2 Mose
3 Mose batsɔ eshaanuu Yetro,+ ni ji Midian osɔfo lɛ toi lɛ akwɛlɔ. Be ni ekpalaa toi lɛ kɛyaa ŋa lɛ anaigbɛ lɛ, eyashɛ Horeb,+ ni ji anɔkwa Nyɔŋmɔ lɛ gɔŋ lɛ he. 2 Kɛkɛ ni Yehowa bɔfo jie ehe kpo etsɔɔ lɛ yɛ lalilɛi mli, yɛ ŋmei tso ko teŋ.+ Be ni ehiɛ kwɛmɔ lɛ, ena akɛ ŋmei tso lɛ miitso, ni kɛ̃lɛ, ŋmei tso lɛ eshãaa. 3 No hewɔ lɛ, Mose kɛɛ: “Maya ní mayakwɛ nii ni yɔɔ naakpɛɛ nɛɛ, ní makwɛ nɔ hewɔ ní ŋmei tso lɛ eshãaa lɛ.” 4 Be ni Yehowa na akɛ eeya ní eyakwɛ lɛ, Nyɔŋmɔ tsɛ lɛ kɛjɛ ŋmei tso lɛ teŋ ni ekɛɛ: “Mose! Mose!” kɛkɛ ni ekɛɛ: “Naa mi.” 5 Ni ekɛɛ: “Kaatsi obɛŋkɛ dɔŋŋ. Jiemɔ otokotai lɛ yɛ onane, ejaakɛ he ní odamɔ lɛ, shikpɔŋ krɔŋkrɔŋ ni.”
6 Etsa nɔ akɛ: “Miji otsɛ Nyɔŋmɔ lɛ, ni ji Abraham Nyɔŋmɔ lɛ+ kɛ Isak Nyɔŋmɔ lɛ+ kɛ Yakob Nyɔŋmɔ lɛ.”+ Kɛkɛ ni Mose kɛ ehiɛ tee, ejaakɛ eeshe gbeyei akɛ ebaakwɛ anɔkwa Nyɔŋmɔ lɛ. 7 Yehowa kɛɛ kɛfata he akɛ: “Mina amanehulu ní mimaŋ ni yɔɔ Ejipt lɛ naa lɛ, ni minu bolɔmɔ ni amɛbolɔɔ yɛ amɛnɔ ní mɛi lɛ nyɛɔ koni amɛtsu nii lɛ hewɔ lɛ; mile piŋmɔ ni amɛpiŋɔ lɛ jogbaŋŋ.+ 8 Makpeleke shi ni mayajie amɛ kɛjɛ Ejiptbii lɛ adɛŋ,+ ni mikɛ amɛ baaje nakai shikpɔŋ lɛ nɔ kɛkwɔ kɛya shikpɔŋ kpakpa ni da nɔ, shikpɔŋ ni mliki kɛ wo hoɔ yɛ nɔ,+ ni ji Kanaanbii kɛ Hitbii kɛ Amorbii kɛ Perizbii kɛ Hivbii kɛ Yebusbii lɛ akpokpaa lɛ.+ 9 Agbɛnɛ, naa! Bolɔmɔ ní Israelbii lɛ bolɔɔ lɛ ebashɛ miŋɔɔ, ni mina bɔ ni Ejiptbii lɛ waa amɛ yi waa lɛ hu.+ 10 Agbɛnɛ ba, matsu bo Farao ŋɔɔ, ni obaayajie mimaŋ, ni ji Israelbii lɛ kɛje Ejipt.”+
11 Shi Mose kɛɛ anɔkwa Nyɔŋmɔ lɛ akɛ: “Namɔ ji mi ní maya Farao ŋɔɔ, ní mayajie Israelbii lɛ kɛje Ejipt?” 12 Kɛkɛ ni ekɛɛ: “Mafata ohe,+ ni okadi ní baatsɔɔ akɛ miji mɔ ni tsu bo lɛ nɛ: Kɛ́ oyajie maŋ lɛ kɛje Ejipt lɛ, nyɛbaabasɔmɔ* anɔkwa Nyɔŋmɔ lɛ yɛ gɔŋ nɛɛ nɔ.”+
13 Shi Mose kɛɛ anɔkwa Nyɔŋmɔ lɛ akɛ: “Kɛ́ mitee Israelbii lɛ aŋɔɔ ni miyakɛɛ amɛ akɛ, ‘Nyɛtsɛmɛi a-Nyɔŋmɔ lɛ tsu mi nyɛŋɔɔ,’ ni amɛkɛɛ mi akɛ, ‘Mɛni ji egbɛ́i lɛ?’+ Mɛni mikɛɛ amɛ?” 14 No hewɔ lɛ, Nyɔŋmɔ kɛɛ Mose akɛ: “Matsɔ Nɔ Ni Misumɔɔ Ni Matsɔ.”*+ Ni ekɛɛ kɛfata he akɛ: “Enɛ ji nɔ ni okɛɛ Israelbii lɛ, ‘Matsɔ tsu mi nyɛŋɔɔ.’”+ 15 Kɛkɛ ni Nyɔŋmɔ saa ekɛɛ Mose akɛ:
“Nɔ ni okɛɛ Israelbii lɛ nɛ, ‘Yehowa, nyɛtsɛmɛi a-Nyɔŋmɔ lɛ, ni ji Abraham Nyɔŋmɔ lɛ+ kɛ Isak Nyɔŋmɔ lɛ+ kɛ Yakob Nyɔŋmɔ lɛ,+ tsu mi nyɛŋɔɔ.’ Enɛ ji migbɛ́i kɛmiiya naanɔ,+ ni nɛkɛ ji bɔ ni akai mi kɛjɛ yinɔ kome nɔ kɛya yinɔ kroko nɔ. 16 Agbɛnɛ, yaa ní oyabua Israel onukpai lɛ anaa, ní okɛɛ amɛ akɛ, ‘Yehowa, nyɛtsɛmɛi a-Nyɔŋmɔ lɛ, ni ji Abraham kɛ Isak kɛ Yakob Nyɔŋmɔ lɛ, ejie ehe kpo etsɔɔ mi, ni ekɛɛ: “Migbala mijwɛŋmɔ kɛba nyɛnɔ,+ ni mina nɔ ni afeɔ nyɛ yɛ Ejipt lɛ. 17 No hewɔ lɛ, mikɛɛ, majie nyɛ kɛjɛ amanehulu+ ní nyɛnaa yɛ Ejiptbii lɛ adɛŋ lɛ mli kɛya Kanaanbii kɛ Hitbii kɛ Amorbii+ kɛ Perizbii kɛ Hivbii kɛ Yebusbii+ lɛ ashikpɔŋ lɛ nɔ, shikpɔŋ ni mliki kɛ wo hoɔ yɛ nɔ lɛ.”’+
18 “Bɔ fɛɛ bɔ ni fee lɛ, amɛbaabo ogbee toi,+ ni obaaya, bo kɛ Israel onukpai lɛ, nyɛbaaya Ejipt maŋtsɛ lɛ ŋɔɔ. Ni nyɛkɛa lɛ akɛ: ‘Yehowa, Hebribii+ lɛ a-Nyɔŋmɔ lɛ kɛ wɔ ewie. No hewɔ lɛ, ofainɛ, hã wɔfã gbɛ gbii etɛ gbɛnyiɛmɔ kɛya ŋa lɛ nɔ koni wɔyashã afɔle wɔhã Yehowa, wɔ-Nyɔŋmɔ lɛ.’+ 19 Shi mi diɛŋtsɛ mile jogbaŋŋ akɛ, Ejipt maŋtsɛ lɛ eŋmɛŋ nyɛ gbɛ ní nyɛya, ja akɛ nineshiwalɛ enyɛ enɔ dã.+ 20 No hewɔ lɛ, makpã minine mli, ni matsɔ minaakpɛɛ nibii fɛɛ ní mafee yɛ Ejipt lɛ nɔ matswa Ejipt nɔ, ni no sɛɛ lɛ, ebaahã nyɛya.+ 21 Ni mahã maŋ nɛɛ hiɛ aba nyam yɛ Ejiptbii lɛ ahiɛ, ni kɛ́ nyɛmiiya lɛ, nyɛkɛ nyɛdɛ̃ folo eyaŋ kɔkɔɔkɔ.+ 22 Yoo fɛɛ yoo abi ekutsoŋnyo kɛ yoo ní ebato gbɔ yɛ eshĩa lɛ jwiɛtɛi kɛ shika tsuru nibii kɛ mamai* hu, ni nyɛkɛbaawowoo nyɛbihii kɛ nyɛbiyei lɛ; ni nyɛbaakpakpaa Ejiptbii lɛ ahe nii.”+