Rut

2 Naomi wu lɛ yɛ wekunyo ko ni ji niiatsɛ kpanaa; atsɛɔ lɛ Boaz,+ ni ekɛ Elimelek jɛ weku kome mli.

2 Rut, Moab yoo lɛ kɛɛ Naomi akɛ: “Ofainɛ, hã maya ŋmɔji lɛ amli koni mayanyiɛ mɔ ni aaana mi mɔbɔ* lɛ sɛɛ maye barle* kpɛkpɛo.”*+ Kɛkɛ ni Naomi kɛɛ lɛ akɛ: “Yaa, mibiyoo.” 3 Kɛkɛ ni eje kpo ni etee eyabɔi kpɛkpɛoyeli yɛ mɛi ni kpaa nii lɛ asɛɛ. Eba mli akɛ, eyaje Boaz,+ mɔ ni kɛ Elimelek jɛ weku kome mli lɛ ŋmɔ mli.+ 4 Nakai beiaŋ nɔŋŋ ni Boaz jɛ Betlehem eba, ni ekɛɛ nikpalɔi lɛ akɛ: “Yehowa kɛ nyɛ ahi shi.” Ni amɛhere nɔ akɛ: “Yehowa ajɔɔ bo.”

5 Kɛkɛ ni Boaz bi oblanyo ni kwɛɔ nikpalɔi lɛ anɔ lɛ akɛ: “Mɛɛ shĩa oblayoo nɛɛ jɛ?” 6 Oblanyo ni kwɛɔ nikpalɔi lɛ anɔ lɛ kɛɛ akɛ: “Oblayoo nɛɛ ji Moab yoo+ ni kɛ Naomi jɛ Moab kpokpaa+ lɛ nɔ kɛba lɛ. 7 Ebabi akɛ, ‘Ofainɛ, manyɛ manyiɛ barle* ni nikpalɔi lɛ eshi yɛ amɛsɛɛ lɛ ateŋ maye kpɛkpɛo+ ni mabua naa lo?’ Ni kɛjɛ leebi ni eba lɛ, etako shi kwraa kɛbashi bianɛ, be ni etee eyata agba lɛ shishi koni ejɔɔ ehe fioo lɛ.”

8 Kɛkɛ ni Boaz kɛɛ Rut akɛ: “Mibiyoo, bo toi. Kaaya ni oyaye kpɛkpɛo yɛ mɔ kroko ŋmɔshi, ni kaaya he kroko hu; hii yei ni tsuɔ nii amɛhãa mi* lɛ amasɛi kpaakpa.+ 9 Hã ohiɛ ahi ŋmɔ ni amɛkpaa mli nii lɛ nɔ, koni onyiɛ amɛsɛɛ. Mifã hii ni tsuɔ nii amɛhãa mi* lɛ akɛ amɛkata ohe.* Kɛ́ kumai miiye bo lɛ, yaa nugbɛi lɛ ahe oyanu nu ni oblahii lɛ eyayɛ lɛ eko.”

10 Kɛkɛ ni ekula shi, ni ekɛ ehiɛ bu shi ni ekɛɛ lɛ akɛ: “Te tɛŋŋ ni mihiɛ eba nyam yɛ ohiɛ, ni otseɔ ohiɛ ohãa mi, mi ni mijɛ jeŋmaŋ kroko nɔ nɛɛ?”+ 11 Ni Boaz kɛɛ lɛ akɛ: “Nibii fɛɛ ni ofee ohã oshaayoo lɛ yɛ owu lɛ gbele sɛɛ, kɛ bɔ ni oshi otsɛ kɛ onyɛ kɛ owekumɛi ashikpɔŋ lɛ nɔ, ni oba mɛi ni oleee amɛ momo lɛ aŋɔɔ lɛ, abɔ mi fɛɛ.+ 12 Yehowa ajwere bo yɛ nɔ ni ofee lɛ hewɔ,+ ni Yehowa, Israel Nyɔŋmɔ lɛ, mɔ ni obaba abo yɛ efiji ashishi lɛ,+ ato bo najiaŋ pɛpɛɛpɛ.”* 13 Kɛkɛ ni yoo lɛ wie akɛ: “Hã mihiɛ aba nyam yɛ ohiɛ, minuŋtsɔ, ejaakɛ oshɛje mimii ni owiemɔ lɛ ehã otsulɔ tsui enyɔ emli,* eyɛ mli akɛ mijeee otsuji lɛ ateŋ mɔ kome po.”

14 Ni be ni shɛ niyeli be lɛ, Boaz kɛɛ lɛ akɛ: “Tsi kɛba biɛ, baaye blodo lɛ eko, ni okɛ eko atsɔ wain ni joɔ* lɛ mli.” No hewɔ lɛ, yoo lɛ bata nikpalɔi lɛ amasɛi. Kɛkɛ ni Boaz hã lɛ barle* ni ashĩ lɛ eko, ni eye ni etɔ, ni eko shwɛ. 15 Be ni yoo lɛ te shi koni eye kpɛkpɛo lɛ,+ Boaz fã hii ni tsuɔ nii amɛhãa lɛ* lɛ akɛ: “Nyɛhãa enyiɛa barle lɛ po teŋ* ni eye kpɛkpɛo, ni nyɛkanyafĩa lɛ.+ 16 Agbɛnɛ hu, nyɛfamɔa barle lɛ eko yɛ kei lɛ amli nyɛshwiea nyɛsɛɛ koni eye kpɛkpɛo, ni nyɛkawiea ehiɛ.”

17 No hewɔ lɛ, etee nɔ eye kpɛkpɛo yɛ ŋmɔ lɛ mli kɛyashi gbɛkɛnaashi.+ Be ni egbee kpɛkpɛo ni eye lɛ, ená barle* aaafee efa kome.* 18 Kɛkɛ ni ewó, ni etee maŋ lɛ mli, ni eshaayoo lɛ na kpɛkpɛo ni eyaye lɛ. Rut jie nɔ ni shwɛ yɛ niyenii ni eye+ etɔ lɛ sɛɛ lɛ hu ehã eshaayoo lɛ.

19 Kɛkɛ ni eshaayoo lɛ bi lɛ akɛ: “Nɛgbɛ oyaye kpɛkpɛo lɛ yɛ ŋmɛnɛ? Nɛgbɛ oyatsu nii yɛ? Ajɔɔ mɔ ni tse ehiɛ ehã bo lɛ.”+ No hewɔ lɛ, egba eshaayoo lɛ mɔ ni eyatsu nii yɛ eŋɔɔ lɛ he sane, ekɛɛ: “Atsɛɔ nuu ni miyatsu nii yɛ eŋɔɔ ŋmɛnɛ lɛ Boaz.” 20 Ni Naomi kɛɛ eshaayoo lɛ akɛ: “Yehowa, mɔ ni jieɔ suɔmɔ ni tsakeee kpo etsɔɔ hiɛkãalɔi kɛ gbohii lɛ, ajɔɔ lɛ.”+ Naomi tsa nɔ akɛ: “Wɔwekunyo ji nuu lɛ.+ Eji wɔweku lɛ mli mɛi ni baanyɛ akpɔ̃ wɔ lɛ eko.”+ 21 Kɛkɛ ni Rut, Moab yoo lɛ kɛɛ akɛ: “Ekɛɛ mi hu akɛ, ‘Hii minitsulɔi lɛ amasɛi kpaakpa kɛyashi abaagbe nikpamɔ lɛ fɛɛ naa.’”+ 22 Naomi kɛɛ eshaayoo Rut akɛ: “Mibiyoo, ehi akɛ obaanyiɛ yei ni tsuɔ nii amɛhãa lɛ* lɛ asɛɛ moŋ fe nɔ ni aaahao bo yɛ mɔ kroko ŋmɔshi.”

23 No hewɔ lɛ, ehi yei ni tsuɔ nii amɛhãa Boaz* lɛ amasɛi kpaakpa, ni eye kpɛkpɛo kɛyashi agbe barle*+ lɛ kɛ wiiti lɛ fɛɛ kpamɔ naa. Ni etee nɔ ekɛ eshaayoo lɛ hi shi.+