1 Maŋtsɛmɛi

19 Kɛkɛ ni Ahab+ yakɛɛ Yezebel+ nibii fɛɛ ni Elia efee lɛ kɛ bɔ ni ekɛ klante egbe gbalɔi lɛ fɛɛ lɛ.+ 2 Kɛkɛ ni Yezebel tsu mɔ ko ni eyakɛɛ Elia akɛ: “Nyɔŋmɔi lɛ kɛ mi aye ni amɛkɛ mi aye ekoŋŋ kɛ́ wɔ nɛkɛ be mli lɛ, mihãko otsɔ tamɔ mɛi ni ogbe lɛ ateŋ mɔ ko!”* 3 Kɛkɛ ni gbeyei mɔ lɛ, no hewɔ lɛ, ete shi ni ejo foi koni ebaa ewala* yi.+ Etee Beer-sheba,+ ni ji Yuda nɔ lɛ,+ ni eshi esɔɔlɔ lɛ yɛ jɛmɛ. 4 Ni etee ŋa lɛ nɔ ni enyiɛ gbi kome gbɛ jekɛmɔ ni eyata rotem tso* ko shishi, ni ebi ni ahã egbo.* Ekɛɛ akɛ: “Efa! Agbɛnɛ, Yehowa, ŋɔɔ miwala* kɛya,+ ejaakɛ mihiii fe mitsɛmɛi lɛ.”

5 Kɛkɛ ni eho ekã shi yɛ rotem tso lɛ shishi ni ewɔ. Shi trukaa lɛ, ŋwɛibɔfo ko bata Elia he+ ni ekɛɛ lɛ akɛ: “Tee shi ni oye nii.”+ 6 Be ni eyaakwɛ lɛ, naa blodo kokloo ko ni kã tɛi ni edɔ klakla nɔ, kɛ nu kɛ kɔɔpoo yɛ eyitsogbɛ. Eye ni enu nu lɛ ni eho ekã shi ekoŋŋ. 7 Sɛɛ mli lɛ, Yehowa bɔfo lɛ ba Elia ŋɔɔ nɔ ni ji shii enyɔ nɔ ni ebakɛɛ lɛ akɛ: “Tee shi ni oye nii, ejaakɛ gbɛ ni obaafã lɛ baawa tsɔ kɛhã bo.” 8 No hewɔ lɛ, ete shi ni eye nii ni enu nu, ni hewalɛ ni ená kɛjɛ nakai niyenii lɛ mli lɛ hã enyɛ enyiɛ jetsɛremɔ kɛ jenamɔ gbii 40 kɛyashi eyashɛ Horeb, ni ji anɔkwa Nyɔŋmɔ lɛ gɔŋ lɛ he tɔ̃ɔ.+

9 Be ni eshɛ jɛmɛ lɛ, ebote tɛkplo+ ko mli koni ewɔ jɛmɛ nakai gbɛkɛ lɛ; ni naa! Yehowa kɛ Elia wie* ni ebi lɛ akɛ: “Elia, mɛni ofeɔ yɛ biɛ?” 10 Kɛkɛ ni Elia kɛɛ akɛ: “Miisɔmɔ Yehowa, ni ji Nyɔŋmɔ taiatsɛ+ lɛ kɛ hiɛdɔɔ kpele; ejaakɛ Israelbii lɛ eku okpaŋmɔ+ lɛ mli, ni amɛkumɔ ofɔleshaa latɛi lɛ, ni amɛkɛ klante egbe ogbalɔi lɛ,+ ni mi pɛ ji mɔ ni eshwɛ. Amrɔ nɛɛ, amɛmiitao amɛgbe mi hu.”*+ 11 Shi ekɛɛ Elia akɛ: “Jee kpo ni oyadamɔ gɔŋ lɛ nɔ yɛ Yehowa hiɛ.” Ni naa! be ni Yehowa hoɔ lɛ,+ kɔɔyɔɔ ni naa wa ko tswa waa ni egbala gɔji lɛ ni ejwara tɛsai lɛ kɛnyiɛ Yehowa hiɛ,+ shi Yehowa bɛ kɔɔyɔɔ lɛ mli. Kɔɔyɔɔ lɛ sɛɛ lɛ, shikpɔŋ hoso,+ shi Yehowa bɛ shikpɔŋhosomɔ lɛ mli. 12 Shikpɔŋhosomɔ lɛ sɛɛ lɛ, la ba,+ shi Yehowa bɛ la lɛ hu mli. La lɛ sɛɛ lɛ, enu gbee blɛoo ko ni naa waaa.+ 13 Be ni Elia nu gbee lɛ nɔŋŋ lɛ, ekɛ ehiɛ hɔ egbalɔ atade lɛ mli+ ni eje kpo eyadamɔ tɛkplo lɛ naa. Kɛkɛ ni gbee ko bi lɛ akɛ: “Elia, mɛni ofeɔ yɛ biɛ?” 14 Kɛkɛ ni Elia kɛɛ akɛ: “Miisɔmɔ Yehowa, ni ji Nyɔŋmɔ taiatsɛ lɛ kɛ hiɛdɔɔ kpele; ejaakɛ Israelbii lɛ eku okpaŋmɔ+ lɛ mli, ni amɛkumɔ ofɔleshaa latɛi lɛ, ni amɛkɛ klante egbe ogbalɔi lɛ, ni mi pɛ ji mɔ ni eshwɛ. Amrɔ nɛɛ, amɛmiitao amɛgbe mi hu.”*+

15 Yehowa kɛɛ lɛ akɛ: “Kuu osɛɛ ni oya Damasko ŋa lɛ nɔ. Kɛ́ oshɛ jɛmɛ lɛ, fɔɔ Hazael+ mu akɛ Siria maŋtsɛ. 16 Ni ofɔ Yehu,+ Nimshi nabi lɛ mu akɛ Israel maŋtsɛ, ni ofɔ Elisha,* Shafat ni jɛ Abel-mehola lɛ binuu lɛ mu koni eye osɛɛ akɛ gbalɔ.+ 17 Mɔ fɛɛ mɔ ni baaje Hazael klante lɛ naa lɛ,+ Yehu baagbe lɛ;+ ni mɔ fɛɛ mɔ ni baaje Yehu klante lɛ naa lɛ, Elisha baagbe lɛ.+ 18 Ni miyɛ mɛi 7,000 lolo yɛ Israel;+ mɛi ni kɛ amɛnakutsei kulako shi amɛhãko Baal,+ ni amɛkɛ amɛnaabu hu shɔko enaa.”+

19 No hewɔ lɛ, eshi jɛmɛ etee ni eyana Elisha, Shafat binuu lɛ ni tsinahii 24 ni atsara amɛ ntatai 12 miihu kɛmiinyiɛ ehiɛ, ni lɛ ji mɔ ni kɛ nɔ ni ji 12 nɔ lɛ huɔ. No hewɔ lɛ, Elia tee eŋɔɔ ni eshɛ egbalɔ atade+ lɛ efɔ̃ enɔ. 20 Kɛkɛ ni eshi tsinai lɛ ni ewo foi kɛnyiɛ Elia sɛɛ ni ekɛɛ: “Ofainɛ, ŋmɛɛ mi gbɛ ni miyashɔ mitsɛ kɛ minyɛ naa ni mikɛ amɛ aye shɛɛ. Kɛkɛ lɛ no sɛɛ lɛ, mibanyiɛ osɛɛ.” Elia kɛɛ lɛ akɛ: “Obaanyɛ oya, bɛ mitsiko onaa?” 21 No hewɔ lɛ, eku esɛɛ etee ni eyamɔmɔ tsinahii enyɔ ni ekɛshã afɔle, ni ekɛ tsina kɔi lɛ he tsei lɛ fee lai kɛhoo tsina loo lɛ ni ekɛhã mɛi lɛ, ni amɛye. No sɛɛ lɛ, ete shi ni eyi Elia sɛɛ ni ebɔi lɛ sɔɔmɔ.+