Bɔfoi Lɛ Anitsumɔi
22 “Ataamɛi, nyɛmimɛi kɛ tsɛmɛi, agbɛnɛ nyɛboa nɔ ni mibakɛɛ nyɛ lɛ toi.”+ 2 Anɔkwa, be ni amɛnu akɛ ekɛ amɛ miiwie yɛ Hebri wiemɔ mli lɛ, amɛfee diŋŋ fe tsutsu lɛ, ni ekɛɛ: 3 “Yudanyo ji mi,+ ni afɔ mi yɛ Tarso yɛ Kilikia,+ shi atsɔse mi yɛ maŋ nɛɛ mli yɛ Gamaliel+ naji anaa, ni atsɔɔ mi nii yɛ wɔtsɛmɛi lɛ a-Mla lɛ naa fitsofitso,+ ni mihiɛ dɔɔ Nyɔŋmɔ sɔɔmɔ lɛ he tamɔ bɔ ni nyɛ fɛɛ nyɛfeɔ ŋmɛnɛ nɛɛ.+ 4 No mli lɛ, miwaa Gbɛ nɛɛ yi kɛyashiɔ gbele mli, mifimɔɔ hii kɛ yei fɛɛ ni mikɛ amɛ hãa koni awo amɛ tsuŋ,+ 5 ni osɔfonukpa lɛ kɛ onukpai lɛ akuu lɛ fɛɛ baanyɛ aye mi odase. Mihe woji hu kɛjɛ amɛdɛŋ koni mikɛyahã nyɛmimɛi ni yɔɔ Damasko lɛ, ni no mli lɛ, minyiɛ gbɛ kɛmiiya koni miyafimɔ mɛi ni yɔɔ jɛmɛ lɛ ni mikɛ amɛ aba Yerusalem koni agbala amɛtoi.
6 “Shi be ni minyiɛ gbɛ kɛyaa ni mibɛŋkɛ Damasko lɛ, aaafee shwane fintiŋŋ mli lɛ, trukaa lɛ, la kpele ko kpɛ kɛjɛ ŋwɛi kɛbabɔle mi kɛkpe,+ 7 ni migbee shi, ni minu gbee ko miikɛɛ mi akɛ: ‘Saul, Saul, mɛni hewɔ owaa mi yi lɛ?’ 8 Mihere nɔ akɛ: ‘Bo namɔ, Nuŋtsɔ?’ Ni ekɛɛ mi akɛ: ‘Miji Yesu, Nazaretnyo lɛ, mɔ ni owaa lɛ yi lɛ.’ 9 Agbɛnɛ, hii ni fata mihe lɛ na la lɛ, shi amɛnuuu mɔ ni kɛ mi wieɔ lɛ gbee. 10 Ni mikɛɛ akɛ: ‘Mɛni esa akɛ mafee, Nuŋtsɔ?’ Nuŋtsɔ lɛ kɛɛ mi akɛ: ‘Tee shi ni oya Damasko, ni abaakɛɛ bo nɔ fɛɛ nɔ ni ato akɛ ofee lɛ yɛ jɛmɛ.’+ 11 Shi akɛni minaaa nɔ ko nɔ ko yɛ bɔ ni nakai la lɛ kpɛ waa lɛ hewɔ lɛ, mɛi ni fata mihe lɛ mɔ minine mli kɛyashi miyashɛ Damasko.
12 “Kɛkɛ ni nuu ko ni atsɛɔ lɛ Anania ni sheɔ Nyɔŋmɔ gbeyei yɛ Mla lɛ naa, ni Yudafoi ni yɔɔ jɛmɛ lɛ fɛɛ wieɔ ehe ekpakpa lɛ, 13 ba miŋɔɔ. Ebadamɔ mimasɛi ni ekɛɛ mi akɛ: ‘Minyɛmi nuu Saul, naa nii ekoŋŋ!’ Ni nakai ŋmɛlɛtswaa lɛ nɔ nɔŋŋ lɛ, mikwɛ ni mina lɛ.+ 14 Ni ekɛɛ akɛ: ‘Wɔtsɛmɛi lɛ a-Nyɔŋmɔ lɛ ehala bo koni obale esuɔmɔnaa nii ni ona jalɔ lɛ+ ni onu edaaŋ gbee, 15 ejaakɛ obaatsɔ ehe odasefonyo, koni oye nibii fɛɛ ni ona ni onu lɛ ahe odase otsɔɔ gbɔmɛi fɛɛ.+ 16 Ni agbɛnɛ mɛni hewɔ oshashaoɔ shi? Tee shi ni ohã abaptisi bo, ni obo otsɛ egbɛ́i+ lɛ kɛfɔ ohe eshai lɛ oshwie.’+
17 “Shi be ni miku misɛɛ kɛba Yerusalem+ ni misɔleɔ yɛ sɔlemɔ shĩa lɛ, mina ninaa ko, 18 ni mina lɛ ni eekɛɛ mi akɛ: ‘Ohe afee oya ni oje Yerusalem oya, ejaakɛ amɛheŋ mihe odase ni oyeɔ lɛ amɛyeŋ.’+ 19 Ni mikɛɛ: ‘Nuŋtsɔ, amɛ diɛŋtsɛ amɛle jogbaŋŋ akɛ tsutsu ko lɛ, miwoɔ mɛi ni heɔ onɔ amɛyeɔ lɛ tsuŋ ni miyiɔ amɛ yɛ kpeehe fɛɛ kpeehe;+ 20 ni be ni ashwieɔ Stefano, ohe odasefonyo lɛ lá shi lɛ, midamɔ jɛmɛ ni miná he miishɛɛ, ni mibu mɛi ni gbeɔ lɛ lɛ atadei anɔhaanɔi lɛ ahe.’+ 21 Shi ekɛɛ mi akɛ: ‘Yaa, ejaakɛ matsu bo jeŋmaji ni yɔɔ shɔŋŋ lɛ aŋɔɔ.’”+
22 Ni amɛbo lɛ toi aahu kɛbashi nɛkɛ wiemɔ nɛɛ nɔ. Kɛkɛ ni amɛhole amɛgbei anɔ amɛkɛɛ: “Nyɛjiea gbɔmɔ nɛɛ kɛjea shikpɔŋ lɛ nɔ, ejaakɛ esaaa mɔ ni hiɔ wala mli!” 23 Akɛni amɛmiibolɔ ni amɛmiifɔ̃ amɛtadei anɔhaanɔi lɛ, ni amɛmiigbɛ mulu amɛmiishwã kɔɔyɔɔ lɛ mli hewɔ lɛ,+ 24 tatsɛ lɛ fã akɛ akɛ Paulo aba asraafoi ashihilɛhe lɛ, ni ekɛɛ akɛ agwao lɛ kɛtao eyitsoŋ, koni ena nɔ tuuntu hewɔ ni amɛwieɔ gegeege amɛshiɔ Paulo yɛ nɛkɛ gbɛ nɔ lɛ. 25 Shi be ni amɛkpã emli ni amɛbaagwao lɛ lɛ, Paulo bi asraafoiatsɛ ni damɔ jɛmɛ lɛ akɛ: “Ani mla ŋmɛɔ gbɛ akɛ nyɛgwao Romanyo ko* ni abuko lɛ fɔ?”*+ 26 Anɔkwa, be ni asraafoiatsɛ lɛ nu enɛ lɛ, etee tatsɛ lɛ ŋɔɔ ni eyabɔ lɛ enɛ he amaniɛ ekɛɛ: “Mɛni oto oyiŋ akɛ obaafee nɛɛ? Ejaakɛ nuu nɛɛ Romanyo ni.” 27 No hewɔ lɛ, tatsɛ lɛ tsi ebɛŋkɛ ni ebi lɛ akɛ: “Kɛɛmɔ mi, ani Romanyo ji bo?” Ni ekɛɛ: “Hɛɛ.” 28 Tatsɛ lɛ here nɔ akɛ: “Dani matsɔ Romanyo lɛ, mikɛ shika babaoo wo he nyɔmɔ.” Paulo kɛɛ: “Shi mi lɛ, fɔ akɛfɔ mi.”+
29 No hewɔ lɛ, amrɔ lɛ, hii ni miiba amɛbapiŋ lɛ kɛtao eyitsoŋ lɛ gbala amɛhe shi kɛje ehe; ni akɛni tatsɛ lɛ yɔse akɛ Romanyo ji lɛ shi ehã awo lɛ tsein* hewɔ lɛ, eshe gbeyei.+
30 No hewɔ lɛ, enɔ jetsɛremɔ lɛ, akɛni eetao ele nɔ tuuntu hewɔ ni Yudafoi lɛ kɛ sane efɔ̃ enɔ lɛ, eŋmɛɛ ehe ni efã osɔfoi hiɛnaanɔbii lɛ kɛ Sanhedrin* muu lɛ fɛɛ akɛ amɛbakpe. Kɛkɛ ni ekɛ Paulo kpeleke shi kɛba ni ehã ebadamɔ amɛteŋ.+