Yoshua
9 Be ni maŋtsɛmɛi fɛɛ ni yɔɔ Yordan lɛ anaigbɛ+ lɛ nu nɔ ni eba lɛ, maŋtsɛmɛi ni yɔɔ gɔji lɛ anɔ, kɛ Shefela lɛ, kɛ Ŋshɔ Wulu* lɛ naa fɛɛ,+ kɛ Lebanon hiɛgbɛ lɛ—ni ji Hitbii lɛ kɛ Amorbii lɛ kɛ Kanaanbii lɛ kɛ Perizbii lɛ kɛ Hivbii lɛ kɛ Yebusbii lɛ+— 2 maŋtsɛmɛi nɛɛ fee ekome koni amɛkɛ Yoshua kɛ Israel abawu.+
3 Gibeonbii+ lɛ hu nu nɔ ni Yoshua efee Yeriko+ kɛ Ai+ lɛ he. 4 No hewɔ lɛ, amɛkɛ hiɛtɛ̃ɛ tsu nii ni amɛkɛ niyenii wo kotokui memeji amli ni amɛkɛshwie amɛtejii anɔ, kɛ wain kotokui* memeji ni egbálagbálai ní ataratarai hu; 5 amɛwo tokotai memeji ni atsaratsarai yɛ amɛnaji, ni amɛwo atadei memeji hu. Blodoi fɛɛ ni fata amɛniyenii lɛ ahe lɛ egbigbii ni amɛfee fulufulu. 6 Kɛkɛ ni amɛtee Yoshua ŋɔɔ yɛ nsara lɛ mli yɛ Gilgal,+ ni amɛyakɛɛ lɛ kɛ Israel hii lɛ akɛ: “Wɔjɛ maŋsɛɛ shɔŋŋ wɔba. No hewɔ lɛ, nyɛfainɛ, nyɛkɛ wɔ afea kpaŋmɔ.” 7 Shi Israel hii lɛ kɛɛ Hivbii+ lɛ akɛ: “Benɛ wɔmasɛi kpaakpa nyɛyɔɔ. No hewɔ lɛ, te aaafee tɛŋŋ ni wɔkɛ nyɛ aaafee kpaŋmɔ lɛ?”+ 8 Amɛhã Yoshua hetoo akɛ: “Otsuji* ji wɔ.”
Ni Yoshua kɛɛ amɛ akɛ: “Namɛi ji nyɛ, ni nɛgbɛ nyɛjɛ?” 9 Ni amɛkɛɛ lɛ akɛ: “Otsuji jɛ maŋsɛɛ shɔŋŋ amɛba+ yɛ bulɛ ni amɛyɔɔ kɛhã Yehowa, o-Nyɔŋmɔ lɛ, gbɛ́i lɛ hewɔ, ejaakɛ wɔnu gbɛ́i ni efee kɛ nibii fɛɛ ni efee yɛ Ejipt lɛ he,+ 10 kɛ nibii fɛɛ ni efee Amorbii lɛ amaŋtsɛmɛi enyɔ lɛ ni hi Yordan lɛ sɛɛ* lɛ, Maŋtsɛ Sihon+ ni hi Heshbon lɛ kɛ Maŋtsɛ Og,+ ni ji Bashan maŋtsɛ ni hi Ashtarot lɛ. 11 No hewɔ lɛ, wɔnukpai lɛ kɛ wɔshikpɔŋ lɛ nɔ bii lɛ fɛɛ kɛɛ wɔ akɛ, ‘Nyɛŋɔa gbɛ nɔ niyenii, ní nyɛyaa nyɛkɛ amɛ ayakpea. Nyɛkɛa amɛ akɛ: “Wɔbaatsɔmɔ nyɛtsuji;+ no hewɔ lɛ, agbɛnɛ nyɛkɛ wɔ afea kpaŋmɔ.”’+ 12 Gbi ni wɔshi wɔshĩai akɛ wɔmiiba nyɛŋɔɔ yɛ biɛ lɛ, no mli lɛ, blodoi nɛɛ ni wɔkɔlɔ akɛ gbɛ nɔ niyenii lɛ yɛ klakla. Shi amrɔ nɛɛ nyɛkwɛa, amɛgbigbii ni amɛfee fulufulu.+ 13 Ni wain kotokui nɛɛ, be ni wɔkɛ wain wo amɛmli lɛ, no mli lɛ ehei ni, shi amrɔ nɛɛ amɛgbálagbálai.+ Ni wɔtadei kɛ wɔtokotai lɛ hu etsɔmɔ ememeji yɛ gbɛ lɛ ni jekɛ waa lɛ hewɔ.”
14 Kɛkɛ ni hii lɛ he amɛniyenii lɛ eko,* shi amɛbiii Yehowa.+ 15 No hewɔ lɛ, Yoshua kɛ amɛ kpaŋ toiŋjɔlɛ kpaŋmɔ,+ ni ekɛ amɛ kpaŋ akɛ egbeŋ amɛ, ni nakai ji bɔ ni maŋ lɛ mli onukpai lɛ hu kã amɛ kitã.+
16 Be ni amɛkɛ amɛ ekpaŋ lɛ sɛɛ gbii etɛ lɛ, amɛnu akɛ amɛyɛ amɛmasɛi nɔŋŋ, yɛ amɛkpokpaa lɛ nɔ. 17 Kɛkɛ ni Israelbii lɛ yi mli ni amɛyanina amɛmaji lɛ yɛ gbi ni ji etɛ lɛ nɔ; amɛmaji lɛ ji Gibeon+ kɛ Kefira kɛ Beerot kɛ Kiriat-yearim.+ 18 Shi Israelbii lɛ tutuaaa amɛ, ejaakɛ maŋ lɛ mli onukpai lɛ etsɛ Yehowa, Israel Nyɔŋmɔ lɛ, kɛkã amɛ kitã.+ No hewɔ lɛ, maŋ muu lɛ fɛɛ bɔi huhuuhu wiemɔ kɛ onukpai lɛ shimɔ. 19 Kɛkɛ ni onukpai lɛ fɛɛ kɛɛ maŋ muu lɛ fɛɛ akɛ: “Akɛni wɔkɛ Yehowa, Israel Nyɔŋmɔ lɛ, ekã amɛ kitã hewɔ lɛ, wɔbɛ hegbɛ akɛ wɔyeɔ amɛ awui ko. 20 Nɔ ni wɔbaafee nɛ: Wɔbaahã amɛhi wala mli, bɔ ni afee ni mlifu ko akaba wɔnɔ yɛ kitã ni wɔkã amɛ lɛ hewɔ.”+ 21 Ni onukpai lɛ wie kɛfata he akɛ: “Akagbe amɛ, shi ahã amɛtsɔmɔ laiyalɔi kɛ faaŋyalɔi amɛhã maŋ muu lɛ fɛɛ.” Shi ni onukpai lɛ wo amɛ nɛ.
22 Ni Yoshua tsɛ amɛ ni ekɛɛ amɛ akɛ: “Mɛni hewɔ nyɛlaka wɔ nyɛkɛɛ akɛ, ‘He ni wɔjɛ lɛ kɛ nyɛ teŋ jekɛ waa,’ be mli ni wɔteŋ nɔŋŋ nyɛyɔɔ lɛ?+ 23 Kɛjɛ be nɛɛ nɔ kɛyaa lɛ, alomɔ nyɛ,+ ni nyɛbaatsɔmɔ nyɔji ni baaya lai kɛ faaŋ kɛba mi-Nyɔŋmɔ lɛ shĩa lɛ daa.” 24 Amɛhã Yoshua hetoo akɛ: “Ejaakɛ akɛɛ otsuji faŋŋ akɛ, Yehowa, o-Nyɔŋmɔ lɛ, fã etsulɔ Mose ni ekɛ shikpɔŋ lɛ fɛɛ ahã nyɛ, ní ekpãtã enɔ bii lɛ fɛɛ ahiɛ yɛ nyɛhiɛ.+ Ni nyɛhewɔ lɛ, wɔyashe gbeyei yɛ wɔwala hewɔ,*+ ni no hewɔ ni wɔfee enɛ lɛ.+ 25 Amrɔ nɛɛ wɔyɛ odɛŋ. Nɔ fɛɛ nɔ ni osusuɔ akɛ ehi ni eja lɛ, feemɔ wɔ.” 26 Ni nakai ji nɔ ni efee amɛ; ehere amɛ kɛje Israelbii lɛ adɛŋ, ni amɛgbeee amɛ. 27 Shi nakai gbi lɛ, Yoshua hã amɛtsɔmɔ laiyalɔi kɛ faaŋyalɔi amɛhã maŋ+ lɛ kɛ Yehowa afɔleshaa latɛ lɛ yɛ he ni ebaahala* lɛ,+ ni amɛtee nɔ amɛhi shi nakai kɛbashi ŋmɛnɛ.+