Yohane Wolo Ni Ji Enyɔ Lɛ
1 Wolo ni onukpa lɛ* kɛmiimaje awula ni ahala lɛ lɛ kɛ ebii lɛ, mɛi ni misumɔɔ yɛ anɔkwale mli lɛ, ni jeee mi pɛ shi mɛi fɛɛ hu ni ebale anɔkwale lɛ, 2 yɛ anɔkwale lɛ ni hiɔ wɔmli ni ekɛ wɔ baahi shi kɛya naanɔ lɛ hewɔ. 3 Dromɔ kɛ mɔbɔnalɛ kɛ toiŋjɔlɛ ni jɛ Nyɔŋmɔ, ni ji Tsɛ lɛ, ni ejɛ Yesu Kristo, ni ji Tsɛ lɛ Bi lɛ hu dɛŋ lɛ kɛ wɔ baahi shi yɛ anɔkwale kɛ suɔmɔ mli.
4 Miná miishɛɛ babaoo akɛ mina obii lɛ ateŋ mɛi komɛi nyiɛ yɛ anɔkwale lɛ mli,+ tamɔ bɔ ni Tsɛ lɛ wo wɔ kitã lɛ pɛpɛɛpɛ. 5 No hewɔ lɛ, agbɛnɛ, awula, jeee kitã hee mikpaa bo fai koni oye nɔ lɛ, shi kitã ni wɔná kɛjɛ shishijee akɛ wɔsumɔsumɔɔ wɔhe lɛ.+ 6 Ni enɛ ji suɔmɔ lɛ, akɛ wɔya nɔ wɔnyiɛ yɛ ekitãi lɛ anaa.+ Enɛ ji kitã lɛ, tamɔ bɔ ni nyɛnu kɛjɛ shishijee lɛ, no ji akɛ nyɛya nɔ nyɛnyiɛ yɛ suɔmɔ mli. 7 Ejaakɛ mɛi babaoo ni lakaa mɛi eba je lɛ mli,+ mɛi ni ejajeee amɛtsɔɔɔ akɛ Yesu Kristo ba yɛ heloo mli lɛ.+ Mɔ nɛ ji mɔ ni lakaa mɔ lɛ kɛ antikristo lɛ.+
8 Nyɛkwɛa nyɛhe nɔ jogbaŋŋ, koni nibii ni wɔtsu nii wɔná lɛ akaŋmɛɛ nyɛ, shi moŋ nyɛná jweremɔnɔ muu lɛ fɛɛ.+ 9 Mɔ fɛɛ mɔ ni tɛkeɔ husu lɛ ni eyaaa nɔ ehiii Kristo lɛ tsɔɔmɔ lɛ mli lɛ, ebɛ Nyɔŋmɔ.+ Mɔ ni yaa nɔ ehiɔ nɛkɛ tsɔɔmɔ nɛɛ mli lɛ ji mɔ ni yɔɔ Tsɛ lɛ kɛ Bi lɛ fɛɛ.+ 10 Kɛ́ mɔ ko ba nyɛŋɔɔ ni ehiɛɛɛ nɛkɛ tsɔɔmɔ nɛɛ lɛ, nyɛkaherea lɛ kɛbaa nyɛshĩai amli,+ ni nyɛkaŋaa lɛ po. 11 Ejaakɛ mɔ ni ŋaa lɛ lɛ, ekɛ lɛ feɔ ekome yɛ enitsumɔi fɔji lɛ amli.
12 Miyɛ nibii pii ni maŋma nyɛ moŋ, shi misumɔɔɔ akɛ mikɛ wolo kɛ iŋki ŋmaa, moŋ lɛ mihiɛ kã nɔ akɛ maba nyɛŋɔɔ ni mikɛ nyɛ abawie hiɛ kɛ hiɛ, koni nyɛmiishɛɛ lɛ ayi obɔ.
13 Onyɛmi yoo ni ahala lɛ lɛ bii lɛ miiŋa bo.