Kojolɔi
8 Kɛkɛ ni Efraim hii lɛ kɛɛ lɛ akɛ: “Mɛni hewɔ oye wɔ nɛkɛ sane? Mɛni hewɔ otsɛɛɛ wɔ be ni oyaa okɛ Midian ayawu lɛ?”+ Ni amɛwie ehiɛ nyanyaanya.+ 2 Shi ekɛɛ amɛ akɛ: “Mɛni mitsu ni fe nyɛnɔ lɛ? Ani wain yibii kpɛkpɛo ni Efraim+ ye lɛ ehiii kwraa fe wain yibii ni Abiezer kpa lɛ?+ 3 Ani jeee nyɛ nyɛdɛŋ Nyɔŋmɔ ŋɔ Midian lumɛi, Oreb kɛ Zeeb ewo,+ no hewɔ lɛ, mɛni mitsu ni fe nyɛnɔ lɛ?” Be ni ewie yɛ nɛkɛ gbɛ nɔ lɛ,* amɛhe jɔ.*
4 Kɛkɛ ni Gideon bashɛ Yordan naa ni efo faa lɛ. No mli lɛ, etɔ lɛ kɛ hii 300 ni fata ehe lɛ moŋ, shi amɛtee nɔ amɛtiu amɛhenyɛlɔi lɛ. 5 No hewɔ lɛ, ekɛɛ Sukot hii lɛ akɛ: “Nyɛfainɛ, nyɛhãa hii ni nyiɛ misɛɛ lɛ niyenii, ejaakɛ etɔ amɛ, ni miitiu Midian maŋtsɛmɛi, Zeba kɛ Zalmuna.” 6 Shi Sukot lumɛi lɛ kɛɛ akɛ: “Ani onine eshɛ Zeba kɛ Zalmuna nɔ momo hewɔ ni obiɔ ni wɔhã osraafoi lɛ niyenii lɛ?” 7 Kɛkɛ ni Gideon kɛɛ akɛ: “Nɔ ni nyɛwie nɛɛ hewɔ lɛ, kɛ́ Yehowa kɛ Zeba kɛ Zalmuna wo midɛŋ lɛ, no lɛ, mikɛ ŋa nɔ ŋmei kɛ aklatei baagwao nyɛ.”+ 8 Kɛkɛ ni ekwɔ kɛjɛ jɛmɛ kɛtee Penuel ni eyabi amɛ nɔ kome too lɛ nɔŋŋ, shi Penuel hii lɛ hã lɛ hetoo tamɔ bɔ ni Sukot hii lɛ hã lɛ lɛ nɔŋŋ. 9 No hewɔ lɛ, ekɛɛ Penuel hii lɛ akɛ: “Kɛ́ miku misɛɛ miba yɛ toiŋjɔlɛ mli lɛ, makumɔ mɔɔ nɛɛ mashwie shi.”+
10 No mli lɛ, Zeba kɛ Zalmuna kɛ amɛsraafoi lɛ yɛ Karkor, asraafoi aaafee 15,000. Mɛnɛɛmɛi ji mɛi pɛ ni eshwɛ yɛ Bokãgbɛbii lɛ asraafoi lɛ fɛɛ ateŋ,+ ejaakɛ amɛteŋ hii 120,000 ni hiɛɔ klantei egboi momo. 11 Gideon tee nɔ ekwɔ kɛtsɔ mɛi ni hiɔ mama tsũi amli lɛ agbɛ lɛ nɔ, yɛ Noba kɛ Yogbeha+ bokãgbɛ, ni eyatutua mɛi ni yɔɔ nsara lɛ mli lɛ be ni amɛhiɛ bɛ amɛhe nɔ. 12 Be ni Zeba kɛ Zalmuna wo foi lɛ, etiu amɛ, ni eyamɔmɔ Zeba kɛ Zalmuna, Midian maŋtsɛmɛi enyɔ lɛ, ni no hã mɛi fɛɛ ni yɔɔ nsara lɛ mli lɛ jijaa.
13 Ni Gideon, Yoash binuu lɛ ku esɛɛ kɛjɛ ta lɛ mli, ni etsɔ gbɛ ni kwɔɔ kɛyaa Heres lɛ nɔ. 14 Be ni ebaa lɛ, emɔ oblanyo ko ni jɛ Sukot, ni eta edaaŋ. No hewɔ lɛ, oblanyo lɛ ŋmala Sukot lumɛi lɛ kɛ onukpai lɛ agbɛ́ii ehã lɛ, hii 77. 15 Ni etee Sukot hii lɛ aŋɔɔ ni eyakɛɛ akɛ: “Naa Zeba kɛ Zalmuna, mɛi ni nyɛwie nyɛshi mi yɛ amɛhewɔ akɛ, ‘Ani onine eshɛ Zeba kɛ Zalmuna nɔ momo hewɔ ni obiɔ ni wɔhã ohii ni etɔ amɛ lɛ niyenii lɛ?’”+ 16 Kɛkɛ ni emɔmɔ maŋ lɛ mli onukpai lɛ, ni ekɛ ŋa nɔ ŋmei kɛ aklatei gwao Sukot hii lɛ.*+ 17 Ni ekumɔ Penuel mɔɔ lɛ eshwie shi+ ni egbe maŋ lɛ mli hii lɛ.
18 Ebi Zeba kɛ Zalmuna akɛ: “Te hii ni nyɛgbe yɛ Tabor lɛ tamɔ tɛŋŋ?” Ni amɛkɛɛ lɛ akɛ: “Amɛtamɔ bo, amɛteŋ mɔ fɛɛ mɔ tamɔ maŋtsɛ binuu.” 19 Ni ekɛɛ akɛ: “Minyɛmimɛi hii ji amɛ, mimami musuŋbii ji amɛ. Bei abɔ ni Yehowa hiɛ kã nɛɛ, eji nyɛgbeee amɛ kulɛ, migbeŋ nyɛ.” 20 Kɛkɛ ni ekɛɛ Yeter, ekromɔbi lɛ akɛ: “Tee shi ni ogbe amɛ.” Shi oblanyo lɛ gbalaaa eklante lɛ, ejaakɛ eeshe gbeyei, ejaakɛ eji oblanyo lolo. 21 No hewɔ lɛ, Zeba kɛ Zalmuna kɛɛ akɛ: “Bo diɛŋtsɛ tee shi ni ogbe wɔ, ejaakɛ nuu hewalɛ naa akojoɔ lɛ yɛ.”* No hewɔ lɛ, Gideon te shi ni egbe Zeba kɛ Zalmuna+ ni ejie jwinei ni afee lɛ tamɔ nyɔɔŋtsere ni yɔɔ amɛfukpɔŋɔi lɛ akuɛi lɛ.
22 Sɛɛ mli lɛ, Israel hii lɛ kɛɛ Gideon akɛ: “Ye wɔnɔ, bo kɛ obinuu kɛ onabi fɛɛ, ejaakɛ ohere wɔ kɛje Midian dɛŋ.”+ 23 Shi Gideon kɛɛ amɛ akɛ: “Miyeŋ nyɛnɔ, ni mibinuu hu yeŋ nyɛnɔ, Yehowa ji mɔ ni baaye nyɛnɔ.”+ 24 Gideon tsa nɔ akɛ: “Mabi nyɛ nɔ ko moŋ: nyɛteŋ mɔ fɛɛ mɔ ahã mi gugɔŋ ga kɛjɛ ta mli nibii ni eloo lɛ amli.” (Akɛni Ishmaelbii ji mɛi ni aye amɛnɔ kunim lɛ hewɔ lɛ, amɛyɛ shika tsuru gugɔŋ gai.)+ 25 Amɛhã hetoo akɛ: “Wɔbaahã bo aahu.” Kɛkɛ ni amɛkɛ mama lɛɛ shi, ni hii lɛ ateŋ mɔ fɛɛ mɔ jie gugɔŋ ga kɛjɛ ta mli nibii ni eloo lɛ amli ni eshɛ efɔ̃ nɔ. 26 Shika tsuru gugɔŋ gai ni ebi lɛ tsiimɔ fee shika tsuru shekeli* 1,700, soro jwinei ni afee lɛ tamɔ nyɔɔŋtsere, kɛ toiiaŋnii, kɛ atadei ni hiɛ pɛpol kɔla ni Midian maŋtsɛmɛi lɛ wo, kɛ afukpɔŋɔi lɛ akuɛnii lɛ.+
27 Gideon kɛfee efɔd+ ni ekɛtsotsoro shi yɛ emaŋ ni ji Ofra+ lɛ mli; ni Israelbii lɛ fɛɛ yajá efɔd lɛ* yɛ jɛmɛ,+ ni ebatsɔ tsɔne kɛhã Gideon kɛ eshĩabii lɛ.+
28 No hewɔ lɛ, aba Midian+ shi awo Israelbii lɛ ashishi, ni amɛteee shi amɛwooo Israel* dɔŋŋ; ni toiŋjɔlɛ ba shikpɔŋ lɛ nɔ* afii 40 yɛ Gideon gbii lɛ amli.+
29 No hewɔ lɛ, Yerubaal,+ Yoash binuu lɛ ku esɛɛ etee eshĩa lɛ ni eyahi jɛmɛ.
30 Gideon fɔ bihii 70,* ejaakɛ eyɛ ŋamɛi pii. 31 Ehemɔ* ni yɔɔ Shekem lɛ hu fɔ binuu ehã lɛ, ni ewo lɛ gbɛ́i akɛ Abimelek.+ 32 Ni Gideon, Yoash binuu lɛ gbo be ni eye afii pii, ni afu lɛ yɛ etsɛ Yoash fuuhe lɛ, yɛ Abiezerbii lɛ amaŋ ni ji Ofra lɛ mli.+
33 Be ni Gideon gbo nɔŋŋ lɛ, Israelbii lɛ yajá Baal srɔtoi lɛ* ekoŋŋ,+ ni amɛkɛ Baal-berit fee amɛnyɔŋmɔ.+ 34 Israelbii lɛ kaiii Yehowa, amɛ-Nyɔŋmɔ lɛ,+ mɔ ni kpɔ̃ amɛ kɛje amɛhenyɛlɔi fɛɛ ni bɔle amɛ lɛ adɛŋ lɛ;+ 35 ni amɛjieee suɔmɔ ni tsakeee kpo amɛtsɔɔɔ Yerubaal, ni ji Gideon shĩabii lɛ koni amɛkɛto ekpakpa fɛɛ ni efee Israel lɛ najiaŋ.+