Yitso 11

Fa 13: Nyɔŋmɔ Afii Akpe Maŋtsɛyeli Lɛ Ebɛŋkɛ

52. Taakɛ Hela Ŋmalɛ ni akɛ niji ŋmala ni etsɛ fe fɛɛ lɛ tsɔɔ lɛ, afii 450 ni yɔɔ Bɔfoi lɛ Asaji 13:20 lɛ baa dani Kojolɔi abe lɛ je shishi aloo yɛ amɛ be mu taakɛ ŋmɛnɛŋmɛnɛ Biblia shishitsɔɔlɔi tsɔɔ lɛ?

⁵² Taakɛ Kristofoi a-Hela Ŋmalɛ ni akɛ nine ŋmala lɛ ateŋ nɔ ni etsɛ fe lɛɛ lɛ tsɔɔ lɛ, bɔ ni Bɔfoi lɛ Asaji 13:20 kaneɔ lɛ yɛ sɔrɔto yɛ nɔ ni akɛha yɛ The Emphatic Diaglott lɛ kɛ King James Authorized Version lɛ he. No hewɔ lɛ taakɛ ŋmalɛi ni akɛ niji ŋmala ni amɛtsɛ fe fɛɛ lɛ tsɔɔ lɛ, afii ohai ejwɛ kɛ nyɔŋmai enumɔ lɛ kɔɔɔ Kojolɔi abe lɛ he. Nɔ ni yeɔ enɛ he odase lɛ, The New English Bible ni afee yɛ (afi 1970) lɛ tsɔɔ Bɔfoi lɛ Asaji 13:20 shishi akɛ: “aaafee afii ohai ejwɛ kɛ nyɔŋmai enumɔ, ni yɛ no sɛɛ lɛ ehala kojolɔi eha amɛ kɛbashi gbalɔ Samuel be lɛ mli.” The Jerusalem Bible (Ŋleshi shishitsɔɔmɔ ni afee yɛ 1966) lɛ kaneɔ akɛ: “kɛha aaafee afii ohai ejwɛ kɛ nyɔŋmai enumɔ. Yɛ enɛ sɛɛ lɛ eha amɛ kojolɔi, kɛbashi gbalɔ Samuel nɔ.” The Revised Standard Version Bible ni afeɔ yɛ 1952 lɛ kaneɔ nakai nɔŋŋ, ni nakai nɔŋŋ hu ji bɔ ni American Standard Version Bible ni afee yɛ afi 1901 Ŋ.B. lɛ kaneɔ.

53. Ani blema Hebri Biblia mli ŋmalɛi ni akɛ niji ŋmala lɛ kɛ alfabɛta lɛ tsu nii amɛkɛŋmala yibɔ okadii lɛ diɛŋtsɛ?

⁵³ Nɔ ni fata he lɛ, blema Hebri ŋmalɛi ni akɛ niji ŋmala ni etsɛ fe fɛɛ tamɔ Dead Sea Scrolls lɛ ŋmalaa Biblia mli yibɔ okadii lɛ yɛ wiemɔ mli, shi ekɛ alfabɛta lɛ ŋmalaaa yibɔ okadii lɛ diɛŋtsɛ, no hewɔ lɛ enɛ haŋ niŋmalɔ lɛ atɔ yɛ 1 Maŋtsɛmɛi 6:1a lɛ mli.

54. (a) Biblia mli be he akɔntaabuu ni aŋma afɔ shi ni aaakpɛlɛ nɔ lɛ baasa mɛɛ be kpalaŋŋ ni asusuɔ he yɛ biɛ lɛ he? (b) Ani jiemɔ ni amɛjie “Ba ni eba” lɛ kɛjɛ Buu-Mɔɔ lɛ hiɛ lɛ tsɔɔ akɛ amɛheee ba ni Kristo eba lɛ amɛyeee dɔŋŋ lo?

⁵⁴ No hewɔ lɛ ana akɛ afii 100 ni akɛwo Biblia be he akɔntaabuu lɛ mli yɛ Kojolɔi abe lɛ mli lɛ damɔɔɔ Ŋmalɛ lɛ nɔ. No hewɔ esa akɛ ajie nɔ ni akɛwo mli nɛɛ ni akpɛlɛ Biblia lɛ nɔ taakɛ eji kɛ bɔ ni ekaneɔ yɛ be he akɔntaabuu mli lɛ. Ŋwanejee ko kwraa bɛ he akɛ enɛ baasa be ni Ayemforowu Yesu Kristo parousia lɛ baaje shishi lɛ he. Atsake Buu-Mɔɔ wolo tɛtrɛɛ ni afee yɛ January 1, 1939 lɛ yitso sane lɛ afee lɛ The Watchtower and Herald of Christ’s Kingdom (Buu-Mɔɔ lɛ kɛ Kristo Maŋtsɛyeli lɛ he Adafitswaa) , ni agbɛnɛ March 1, 1939 nɔ̃ lɛ hu bafee The Watchtower Announcing Jehovah’s Kingdom (Buu-Mɔɔ Eetswa Yehowa Maŋtsɛyeli lɛ he Adafi) . Enɛ etsɔɔɔ akɛ mɛi ni ŋmaa wolo tɛtrɛɛ nɛɛ heee ba ni Kristo eba loo parousia lɛ amɛyeee dɔŋŋ akɛ eeya nɔ. Etsɔɔ moŋ akɛ agbala jwɛŋmɔ kɛtee Maŋtsɛyeli lɛ nɔ akɛ ehe miihia waa, Yehowa, maŋtsɛyeli kɛtsɔ Yesu Kristo nɔ lɛ, ejaakɛ Yehowa maŋtsɛyeli kɛtsɔ Kristo nɔ lɛ ji nɔ ni baabu jeŋ muu fɛɛ maŋtsɛ ni Yehowa ji lɛ bem.

55. (a) Mɛɛ be mli ni yɛ mɛɛ gbɛ nɔ ajie afii 100 ni akɛfata Kojolɔi abe lɛ he lɛ kɛtee, bɔni afee ni gbɔmɔ shihilɛ afii 6,000 aba naagbee yɛ mɛɛ be? (b) Yɛ mɛɛ gbɛ nɔ enɛ sa be ni ji 1874 Ŋ.B. lɛ he, ni mɛɛ sanebimɔ te shi?

⁵⁵ Yɛ afi 1943 mli lɛ, Watch Tower Bible and Tract Asafo lɛ fee wolo ko ni ji “The Truth Shall Make You Free” (Anɔkwale lɛ Aaaha Nyɛye Nyɛhe) . Eyitso 11 lɛ ni ji “The Count of time” (Be lɛ Kanemɔ) lɛ mli ejie afii 100 ni akɛwo Kojolɔi ahe lɛ mli lɛ, ni ekɛ bɔ ni Bɔfoi lɛ Asaji 13:20 kaneɔ kɛjɛ blema ni ji anɔkwale lɛ nyiɛ, ni ekpɛlɛ Hebri Ŋmalɛ lɛ mli niŋmaa okadii ni eŋmala kɛ alfabɛta lɛ anɔ. Enɛ kɛ adesa shihilɛ yɛ shikpɔŋ nɔ afii akpei ekpaa lɛ naagbee ba hiɛ kɛbabote afi 1970 afii lɛ amli. Taakɛ eji lɛ enɛ jie afi 1874 Ŋ.B. akɛ be ni Nuŋtsɔ Yesu Kristo kɛaaka esɛɛ kɛ beni eba loo parousia ni anaaa lɛ lɛ shishijee lɛ kɛtee. No hewɔ lɛ afii akpe lɛ ni nɔ ni baakadi no ji Satan Abonsam ni akɛ kɔsɔŋkɔsɔ aaafi lɛ ni atsi enaa kɛ agbɛnɛ 144,000 niyelɔi lɛ kɛ Kristo maŋtsɛyeli yɛ ŋwɛi anunyam mli Iɛ ji nii ni baaba yɛ wɔsɛɛ be mli. Shi Kristo parousia (ba ni eba) lɛ hu? Wolo ni atsi ta yɛ yiteŋgbɛ lɛ baafa 324 wie kɛ nɔmimaa akɛ: “Maŋtsɛ lɛ ba ni eba loo parousia lɛ je shishi yɛ 1914.” Agbɛnɛ hu awie wiemɔ ko yɛ blɔfo Buu-Mɔɔ ni ji July 15, 1949 nɔ lɛ mli (baafa 215 kuku 22) akɛ: “. . . Mesia, Nyɔŋmɔ Bi lɛ ba Maŋtsɛyeli hewalɛ mli yɛ A.D. 1974, ni enɛ ji ebaa ni ji enyɔ lɛ kɛ e-parousia loo ba ni eba ni ji enyɔ lɛ shishijee.”

56. (a) Mɛɛ Biblia shishitsɔɔmɔ hee afee yɛ 1950 mli, ni te etsɔɔ Bɔfoi lɛ Asaji 13:20 shishi eha tɛŋŋ? (b) Agbɛnɛ hu mɛɛ wiemɔ akɛha ni kɔɔ ba ni Kristo ba taakɛ Biblia be he akɔntaabuu tsɔɔ diɛŋtsɛ lɛ he?

⁵⁶ Afi 1950 mli afee New World Translation of the Christian Greek Scriptures Biblia lɛ, ni etsɔɔ Bɔfoi lɛ Asaji 13:20 shishi yɛ gbɛ ni ja nɔ, ni etsɔɔ parousia shishi yɛ be fɛɛ mli akɛ “ba ni eba.” Yɛ enɛ sɛɛ nɔŋŋ ni wolo “This Means Everlasting Life” (Enɛ Ji Naanɔ Wala) lɛ pue. Eyitso 21 lɛ saneyitso ji “Second Presence of Life’s Chief Agent” (Wala Najiaŋdamɔlɔ Nukpa lɛ Ba ni Eba Nɔ Ni Ji Shii Enyɔ) . Naa yitso muu ni wieɔ nɛkɛ sane nɛɛ fɛɛ he taakɛ Biblia be he akɔntaabuu tsɔɔ lɛ. Wɔkaneɔ yɛ ebaafai 220-222 akɛ:

Odaseyeli ni atsɔ hiɛ asusu he lɛ tsɔɔ akɛ afɔ Nyɔŋmɔ maŋtsɛyeli lɛ yɛ A.D. 1914 ni akɛ e-Bi lɛ ta maŋtsɛsɛi nɔ kɛ hewalɛ koni ekɛ dadetso aya nɔ yɛ ehenyɛlɔi ateŋ. Yɛ naagbee lɛ ebaakumɔ amɛ dukuduku ni ejie mɛi ni wuɔ shiɔ Nyɔŋmɔ jeŋ muu fɛɛ maŋtsɛyeli ni ja lɛ kɛya.​—Lala 2:​8, 9.

No hewɔ lɛ A.D. 1914 kadi be mli ni Kristo ku esɛɛ eba yɛ mumɔŋ ni anaaa lɛ. . . . Maŋtsɛyeli lɛ mli ni eba yɛ 1914 lɛ kadiɔ eba ni eba loo parousia ni ji shii enyɔ lɛ shishijee. Nɛkɛ Hela wiemɔ nɛɛ shishi ji ba ni eba aloo eyɛ.

. . . Eyɛ mli akɛ anaaa lɛ yɛ mumɔŋ moŋ, shi ba ni eba nɔ ni ji shii enyɔ lɛ he hiaa gbɔmɛi ni yɔɔ shikpɔŋ muu lɛ fɛɛ nɔ lɛ waa akɛ esaaa akɛ ahaa ehiɔ teemɔŋ, ni ebaŋ lɛ nakai hu. . . . ”Ejaakɛ bɔ ni sarawa jɛɔ boka gbalaa kɛyaa anai lɛ, nakai nɔŋŋ gbɔmɔ bi lɛ ba ni eba [parousia] lɛ aaatamɔ.”​—Mat. 24:​26, 27, NW.

Kɛjɛ 1914 kɛbaa nɛɛ ba ni Kristo eba lɛ miiha odaseyelii ni kɔɔ ba ni eba loo parousia ni ji shii enyɔ lɛ he lɛ miije kpo koni mɛi fɛɛ ni yɔɔ he fɛɛ he anu shishi.

57. (a) Ani Kristo je shishi eye nɔ yɛ ehenyɛlɔi ateŋ dani Jeŋmaji Abe lɛ ba naagbee yɛ 1914? (b) Mɛɛ be mli Ayemforowu lɛ ha anu nyɔɔŋ teŋ bolɔmɔ lɛ he, ni nɔ ni eba kɛjɛ nakai be lɛ mli lɛ ji odaseyeli kɛha mɛɛ anɔkwasaji ni he hiaa?

⁵⁷ Kwɛ bɔ ni ekɛ Ŋmalɛi ni jɛ mumɔŋ lɛ kpaa akɛ Kristo ejeee enɔyeli lɛ shishi afii nyɔŋmai ejwɛ dani Jeŋmaji Abei lɛ ba naagbee yɛ 1914! Shi moŋ, emɛ yɛ nakai be lɛ mli aahu yɛ eŋwɛi Tsɛ lɛ ninejurɔ nɔ koni eje nɔyeli shishi yɛ eshikpɔŋ nɔ henyɛlɔi ni Yehowa kɛ amɛ baafee enaneshi maaŋoo lɛ ateŋ! (Lala 110:​1, 2; Heb. 10:​12, 13) No hewɔ lɛ ba ni eba loo parousia akɛ odehe lɛ je shishi yɛ gbɛ ni ja nɔ yɛ nakai afi lɛ mli. Afi 1919, taakɛ yinɔsane yeɔ he odase lɛ mli oha nyɔɔŋ teŋ bolɔmɔ lɛ jije yɛ shikpɔŋ nɔ koni ekɛtsiɛ “obalayei” ni wɔɔ lɛ kɛha bɔ ni shishilɛ lɛ he hiaa ha lɛ. “Naa, ayemforowu lɛ miiba eei! Nyɛjea kpo, nyɛyakpeea lɛ.” Nakai bolɔmɔ lɛ ha amɛna nɔmimaa akɛ ŋwɛi Ayemforowu lɛ eba. Kɛjɛ nakai be lɛ mli kɛbaa nɛɛ obalayei “nilelɔi” akuu lɛ etsɔ gbɛ ni amɛkɛ lɛ baakpe lɛ nɔ. Ana ni amɛmiikpɛ tamɔ kanei yɛ jeŋ ni mli ewo duŋ nɛɛ mli. Enɛ diɛŋtsɛ ji odaseyeli ni tsɔɔ akɛ shiwoo ni kɔɔ ba ni Kristo eha lɛ he lɛ eba wɔ nɔ. Eji odaseyeli hu ni tsɔɔ akɛ Nyɔŋmɔ afii akpe maŋtsɛyeli kɛtsɔ Kristo nɔ Iɛ ebɛŋkɛ!

58. Mɛni hewɔ wɔkɛ “obalayei nyɔŋma” lɛ he abɛbua lɛ baŋ naagbee yɛ biɛ pɛ yɛ be mli ni wɔsusuɔ bɛŋkɛmɔ ni Maŋtsɛyeli lɛ ebɛŋkɛ lɛ he “okadi” lɛ he lɛ?

⁵⁸ Obalayei nyɔŋma lɛ he abɛbua lɛ mlibaa lɛ jeee nɔ fɛɛ nɔ ni kɔɔ nakai afii akpe maŋtsɛyeli ni jɔɔmɔ yɔɔ mli lɛ he “okadi” ni ebɛŋkɛ lɛ he. Wɔnyɛŋ wɔwa yɛ abɛbua nɛɛ sɛɛ pɛ, shi moŋ esa akɛ wɔya nɔ ni wɔsusu nakai “okadi” ni yɔɔ naakpɛɛ nɛɛ he nibii krokomɛi lɛ ahe.

[Shishigbɛ niŋmai]