Shika Tsina Bi Lɛ

OO, OO! Mɛni gbɔmɛi lɛ feɔ agbɛnɛ nɛɛ? Amɛmiisɔle amɛmiiha tsina bi! Mɛni hewɔ ni amɛfeɔ enɛ?

Beni Mose tsɛ waa yɛ gɔŋ lɛ nɔ lɛ, gbɔmɛi lɛ kɛɛ akɛ: ‘Wɔleee nɔ ni eba Mose nɔ. No hewɔ lɛ nyɛhaa wɔfea nyɔŋmɔ koni enyiɛ wɔhiɛ kɛjɛ shikpɔŋ nɛɛ nɔ.’

Mose nyɛmi nuu Aaron kɛɛ akɛ: ‘Ehi nakai. Nyɛjiea nyɛ shika toiiaŋnii lɛ fɛɛ ni nyɛkɛbahaa mi.’ Beni gbɔmɛi lɛ fee nakai lɛ, Aaron sere fɛɛ ni ekɛfee shika tsina bi ko. Ni gbɔmɛi lɛ kɛɛ akɛ: ‘Wɔ-Nyɔŋmɔ ni jie wɔ kɛjɛ Mizraim lɛ nɛ!’ Ni Israelbii lɛ ŋmɛ okpɔlɔ wulu ko, ni amɛjá shika tsina bi lɛ.

Beni Yehowa na enɛ lɛ, emli fu waa diɛŋtsɛ. No hewɔ lɛ ekɛɛ Mose akɛ: ‘Kpelekemɔ shi kɛya oya. Gbɔmɛi lɛ miifee nii ni ehiii. Amɛhiɛ ekpa mimlai lɛ anɔ ni amɛmiikoto shi kɛmiiha shika tsina bi.’

Mose he fee oya kɛkpeleke shi kɛjɛ gɔŋ lɛ nɔ. Ni beni etsi ebɛŋkɛ amɛ lɛ, nɔ ni ena nɛ. Gbɔmɛi lɛ miilá ni amɛmiijo kɛmiibɔle shika tsina bi lɛ! Mose mli fu waa ni eŋmɛɛ tɛi tɛtrɛbii enyɔ ni mlai lɛ yɔɔ nɔ lɛ ahe etswia shi, ni amɛmli kumɔ dukuduku. Kɛkɛ ni ewó shika tsina bi lɛ ni esere lɛ kwraa. Kɛkɛ ni egbɛlɛ lɛ ni etsɔ tamɔ mulu.

Gbɔmɛi lɛ efee nɔ ko ni ehiii kwraa. No hewɔ lɛ Mose kɛɛ hii lɛ ekomɛi ni amɛkɔlɔ amɛklantei. Mose kɛɛ akɛ: ‘Esa akɛ gbɔmɛi gbohii ni já shika tsina bi lɛ agboi.’ No hewɔ lɛ hii lɛ gbe gbɔmɛi 3,000! Ani enɛ etsɔɔɔ akɛ esa akɛ wɔhiɛ ahi wɔhe nɔ koni wɔjá Yehowa pɛ, ni wɔkajá amale nyɔŋmɔi lɛ eko kwraa?