Israel Klɛŋklɛŋ Maŋtsɛ lɛ Nɔ Kɛbashi Nomŋɔɔ Mli yɛ Babilon

Saul bafee Israel klɛŋklɛŋ maŋtsɛ. Shi Yehowa kpoo lɛ, ni ahala David akɛ eye maŋtsɛ yɛ enajiaŋ. Wɔbaakase nibii babaoo ni kɔɔ David he. Ákɛ obalanyo lɛ, ekɛ obalaŋ Goliat wu yɛ ta mli. Yɛ sɛɛ mli lɛ, ejo foi kɛjɛ Maŋtsɛ Saul ni yeɔ awuŋa lɛ hiɛ. Ni yɛ no sɛɛ lɛ Abigail ni he yɔɔ fɛo lɛ tsĩ enaa koni ekafee nɔ ko ni jwɛŋmɔ bɛ mli.

Yɛ no sɛɛ lɛ, wɔbaakase nibii babaoo ni kɔɔ David binuu Salomo he, mɔ ni baye David sɛɛ akɛ Israel maŋtsɛ lɛ. Klɛŋklɛŋ maŋtsɛmɛi etɛ ni ye nɔ yɛ Israel lɛ ateŋ mɔ fɛɛ mɔ ye nɔ afii 40. Yɛ Salomo gbele sɛɛ lɛ, aja Israel mli enyɔ, afee lɛ kooyigbɛ maŋtsɛyeli kɛ wuoyigbɛ maŋtsɛyeli.

Akutsei 10 maŋtsɛyeli ni yɔɔ kooyigbɛ lɛ hi shi afii 257 dani Asiriabii lɛ bakpata hiɛ. Yɛ no sɛɛ afii 133 lɛ, akpata wuoyigbɛ akutsei enyɔ maŋtsɛyeli lɛ hu hiɛ. Yɛ nɛkɛ be nɛɛ mli lɛ, akɛ Israelbii lɛ tee nomŋɔɔ mli yɛ Babilon. No hewɔ lɛ Fã EJWƐ lɛ wieɔ yinɔsane be afii 510 he sane, be mli ni nibii ni yɔɔ naakpɛɛ babaoo hoɔ yɛ wɔhiɛ lɛ.