Yitso 15

Yesu Klɛŋklɛŋ Naakpɛɛ Nii

GBI kome loo gbii enyɔ pɛ eho kɛjɛ be mli ni Andrea, Petro, Yohane, Filipo, Natanael, kɛ ekolɛ Yakobo batsɔmɔ Yesu klɛŋklɛŋ kaselɔi lɛ. Amrɔ nɛɛ amɛnyiɛ gbɛ nɔ kɛmiiya amɛmaŋ yɛ Galilea kpokpaa lɛ nɔ, he ni amɛ fɛɛ amɛjɛ lɛ. He ni amɛyaa ji Kana, ni ji Natanael maŋ, ni yɔɔ gɔji lɛ anɔ yɛ Nazaret masɛi gbɛ kpaakpa, yɛ he ni Yesu diɛŋtsɛ da yɛ lɛ. Afɔ̃ amɛ nine kɛha yookpeemɔ okpɔlɔŋmɛɛ ko yɛ Kana.

Yesu nyɛ hu eba yookpeemɔ lɛ shishi. Akɛni Maria ji mɛi ni boteɔ gbalashihilɛ mli lɛ awekui lɛ anaanyo hewɔ lɛ, etamɔ nɔ ni efata he ni asɔmɔɔ gbɔi babaoo ni afɔ̃ amɛ nine kɛba lɛ. No hewɔ lɛ ehe fee oya ni ena akɛ nɔ ko miita, ni eyabɔ Yesu amaniɛ yɛ enɛ he: “Amɛbɛ wein.”

Enɛ hewɔ lɛ, beni Maria kɛɛ Yesu akɛ efee wein ni taa lɛ he nɔ ko lɛ, kɛjɛ shishijee lɛ, Yesu shashao shi fioo. Ebi lɛ akɛ: “Mɛɛ sane mikɛo yɔɔ awo?” Akɛ mɔ ni Nyɔŋmɔ ewo lɛ Maŋtsɛ lɛ, esaaa akɛ ewekumɛi kɛ enanemɛi tsɔɔ lɛ nɔ ni esa akɛ efee. No hewɔ lɛ Maria kɛ nilee tsu nii ni eshi sane lɛ eha ebinuu lɛ, ni ekɛɛ mɛi ni sɔmɔɔ lɛ kɛkɛ akɛ: “Nɔ fɛɛ nɔ ni eeekɛɛ nyɛ lɛ, nyɛfea.”

Ojogbaŋŋ, tɔ botokui ekpaa mamɔ shi, ni eko fɛɛ eko yeɔ nɔ ni fe galɔŋ nyɔŋma. Ni Yesu fa mɛi ni sɔmɔɔ lɛ akɛ: “Nyɛwoa botokui lɛ amli nu obɔbɔ.” Kɛkɛ ni sɔɔlɔi lɛ wo amɛmli nu ni fɛɛ yimɔ obɔbɔ. Kɛkɛ ni Yesu kɛɛ: “Nyɛyɛa eko nyɛyahaa piafonyo lɛ.”

Piafonyo lɛ hiɛ sɔ bɔ ni wein lɛ ŋɔɔ ha lɛ waa diɛŋtsɛ, ni eleee akɛ atsɔ naakpɛɛ gbɛ nɔ afee enɛ. Kɛkɛ ni etsɛ ayemforowu lɛ, ni ekɛɛ lɛ akɛ: “Mɔ fɛɛ mɔ lɛ, wein kpakpa ekɛbamaa shi klɛŋklɛŋ, ni beni mɛi lɛ etɔrɔ lɛ, no dani amɛkɛ nɔ ni eŋɔɔɔ lɛ baa; shi bo lɛ oŋɔ wein kpakpa lɛ moŋ oto kɛbashi be nɛ.”

Yesu klɛŋklɛŋ naakpɛɛ nii ji enɛ, ni beni amɛna enɛ lɛ, ewo ekaselɔi heei lɛ ahemɔkɛyeli hewalɛ waa. Yɛ no sɛɛ lɛ, amɛfa gbɛ kɛtee Kapernaum maŋtiase lɛ mli yɛ Galilea Ŋshɔ lɛ masɛi, ni enyɛ kɛ enyɛ bii lɛ fata amɛhe. Yohane 2:1-12.

▪ Mɛɛ be mli yɛ Yesu sɔɔmɔ nitsumɔ lɛ mli ni akpee yoo yɛ Kana lɛ?

▪ Mɛni hewɔ ni Yesu kpoo ŋaa ni enyɛ wo lɛ lɛ?

▪ Mɛɛ naakpɛɛ nii Yesu fee, ni mɛɛ hewalɛ ena yɛ mɛi krokomɛi anɔ?