Yitso 108

Amɛnine Shɛɛɛ Yesu Nɔ

AKƐNI Yesu miitsɔɔ nii yɛ sɔlemɔ we lɛ ni etsɛko tsɔ ni egba ejamɔ mli henyɛlɔi lɛ abɛbuai etɛ ni kpa amɛyiwalɛ lɛ he mama hewɔ lɛ, Farisifoi lɛ amli efu waa ni amɛtee eyinɔ apãm koni amɛmɔ enaa ni amɛha ewie nɔ ko ni amɛbaanyɛ amɛdamɔ nɔ ni amɛha amɔ lɛ. Ni amɛtee ajina ni amɛtsu amɛkaselɔi lɛ, kɛ Herode kuu lɛ mlibii lɛ ekomɛi, koni amɛbɔ mɔdɛŋ ni amɛnine ashɛ enɔ.

Nɛkɛ hii nɛɛ bakɛɛ: “Tsɔɔlɔ, wɔle akɛ anɔkwafo jio, ni otsɔɔ Nyɔŋmɔ gbɛ lɛ yɛ anɔkwale mli, ni okpaaa gbɔmɛi amli; ni okwɛɛɛ gbɔmɛi ahiɛaŋ; no hewɔ lɛ kɛɛmɔ wɔ bɔ ni osusuɔ, ani eja akɛ atsuɔ onia ahaa Kaisare, aloo ejaaa?”

Yesu yiteŋ mulu ni amɛwo nɛɛ lakaaa lɛ. Eyoo akɛ, kɛji ekɛɛ, ‘Dabi, mla eŋmɛɛɛ gbɛ aloo ejaaa gbɛ akɛ awoɔ too’ lɛ, no lɛ ebaaye maŋjwaa he fɔ eshi Roma. Ni kɛlɛ, kɛji ekɛɛ, ‘Hɛɛ, esa akɛ nyɛwo too nɛɛ’ hu lɛ, Yudafoi lɛ, ni sumɔɔɔ Romabii lɛ ashishi ni amɛyɔɔ lɛ, baanyɛ lɛ. No hewɔ lɛ eha hetoo akɛ: “Osatofoi, mɛɛba nyɛtsɔɔ mi? Nyɛkɛ oniatsumɔ shika lɛ atsɔa mi.”

Beni amɛkɛ ekome baha lɛ lɛ, ebi amɛ akɛ: “Namɔ mfoniri kɛ nɔ ni aŋma yɔɔ nɔ nɛɛ?”

Amɛha hetoo akɛ: “Kaisare nɔŋ.”

“Belɛ nyɛŋɔa Kaisare nii nyɛhaa Kaisare, ni Nyɔŋmɔ nii lɛ nyɛŋɔhaa Nyɔŋmɔ.” Ojogbaŋŋ, beni hii nɛɛ nu Yesu hetoo ni nilee yɔɔ mli lɛ, amɛnaa kpɛ amɛhe. Ni amɛshi lɛ amɛtee.

Akɛni amɛna akɛ Farisifoi lɛ anine enyɛ shi ni amɛnaaa nɔ ko amɛkɛshi Yesu hewɔ lɛ, Sadukifoi lɛ ni kɛɔ akɛ gbohiiashitee ko bɛ lɛ banina lɛ ni amɛbi lɛ akɛ: “Tsɔɔlɔ, Mose kɛɛ akɛ: ‘Kɛji mɔ ko gbo ni eshiii bii yɛ esɛɛ lɛ, enyɛmi aŋɔ eŋa lɛ, koni ewo shwiei eha enyɛmi lɛ.’ Agbɛnɛ nyɛmimɛi kpawo hi wɔteŋ, ni kromɔ bi lɛ wɛ yoo, ni egbo, ni akɛni eshiii bii yɛ esɛɛ lɛ, eshi eŋa lɛ eha enyɛmi lɛ. Nakai nɔŋŋ kã nɔ kɛtsɔ mɔ ni ji enyɔ lɛ kɛ mɔ ni ji etɛ lɛ nɔ kɛyashi mɔ ni ji kpawo lɛ nɔ. Shi amɛ fɛɛ amɛsɛɛ lɛ yoo lɛ hu gbo. Belɛ gbohiiashitee lɛ mli lɛ, mɛi kpawo lɛ ateŋ namɔ ŋa eeetsɔ, ejaakɛ amɛ fɛɛ amɛkɛ lɛ hi shi?”

Ni Yesu ha amɛ hetoo ni ekɛɛ: “Ani jeee Ŋmalɛi lɛ kɛ Nyɔŋmɔ hewalɛ lɛ ni nyɛleee lɛ hewɔ nyɛtɔɔ nɛɛ? Ejaakɛ beni amɛaate shi kɛaajɛ gbohii ateŋ lɛ, amɛwɛŋ yei, ni asaŋ, amɛgbãŋ; shi moŋ amɛaatamɔ ŋwɛibɔfoi. Shi gbohii lɛ, akɛni amɛteɔ shi ekoŋŋ lɛ, ani nyɛkaneko yɛ Mose wolo lɛ mli, yɛ ŋmeitso lɛ he, bɔ ni Nyɔŋmɔ kɛɛ lɛ akɛ: ‘Mi lɛ, Abraham Nyɔŋmɔ kɛ Isak Nyɔŋmɔ kɛ Yakob Nyɔŋmɔ ji mi’ lɛ? Nyɔŋmɔ jeee gbohii a-Nyɔŋmɔ, shi hiɛkalɔi moŋ a-Nyɔŋmɔ ji lɛ. No hewɔ lɛ nyɛmiitɔ̃ babaoo.”

Ni gbɔmɛi asafoi babaoo lɛ naa kpɛ amɛhe ekoŋŋ yɛ hetoo ni Yesu ha lɛ hewɔ. Woloŋmalɔi lɛ ateŋ mɛi komɛi po kpɛlɛ nɔ akɛ: “Tsɔɔlɔ, owie jogbaŋŋ.”

Beni Farisifoi lɛ na akɛ Yesu eku Sadukifoi lɛ anaa ni amɛfee dioo lɛ, kɛkɛ ni amɛfee ekome kɛba eŋɔɔ kutuu. Ni akɛni amɛmiitao ni amɛka lɛ lolo hewɔ lɛ, amɛteŋ woloŋmalɔ ko bi lɛ akɛ: “Tsɔɔlɔ, te nɔ ni ji Mla lɛ mli kita wuluŋ?”

Ni Yesu ha hetoo akɛ: “Kitai lɛ fɛɛ ateŋ klɛŋklɛŋ nɔ ji enɛ: ‘Bo toi, Israel! Nuŋtsɔ [Yehowa] wɔ-Nyɔŋmɔ lɛ, Nuŋtsɔ [Yehowa] kome ni; ni suɔmɔ Nuŋtsɔ [Yehowa] o-Nyɔŋmɔ lɛ kɛ otsui fɛɛ kɛ osusuma fɛɛ kɛ ojwɛŋmɔ fɛɛ kɛ onyɛmɔ fɛɛ!’ Enɛ ji klɛŋklɛŋ kita. Ni nɔ ni ji enyɔ lɛ tamɔ no: ‘Suɔmɔ onaanyo tamɔ bɔ ni osumɔɔ bo diɛŋtsɛ ohe.’ Kita ko bɛ ni fe enɛɛmɛi.” Yɛ anɔkwale mli lɛ, Yesu kɛfata he akɛ: “Kitai enyɔ nɛɛ Mla lɛ kɛ Gbalɔi lɛ fɛɛ tsotsoro.”

Woloŋmalɔ lɛ kɛ lɛ kpa gbee ni ekɛɛ: “Ojogbaŋŋ, tsɔɔlɔ! Anɔkwale okɛɛ akɛ Nyɔŋmɔ kome pɛ yɔɔ, ni Nyɔŋmɔ ko bɛ, akɛ ja lɛ kɛkɛ lɛ; ni lɛ suɔmɔ kɛjɛ tsui fɛɛ kɛ nilee fɛɛ kɛ susuma fɛɛ kɛ nyɛmɔ fɛɛ mli, kɛ naanyo suɔmɔ tamɔ bɔ ni mɔ sumɔɔ lɛ diɛŋtsɛ ehe lɛ, efe shaa afɔlei kɛ afɔlei fɛɛ.”

Ni Yesu na akɛ woloŋmalɔ nɛɛ ha sane lɛ hetoo yɛ nilee mli lɛ, ekɛɛ lɛ akɛ: “Okɛ Nyɔŋmɔ maŋtsɛyeli lɛ teŋ jɛkɛɛɛ.”

Gbii etɛ sɔŋŋ nɛ—Hɔgbaa, Ju, kɛ Jufɔ—ni Yesu bɔi nitsɔɔmɔ yɛ sɔlemɔ we lɛ. Gbɔmɛi lɛ kɛ miishɛɛ bɔo lɛ toi, shi kɛlɛ jamɔ mli hiɛnyiɛlɔi lɛ miitao amɛgbe lɛ, shi kɛbashi amrɔ nɛɛ, amɛmɔdɛŋbɔi lɛ eko yeee omanye. Mateo 22:15-40; Marko 12:13-34; Luka 20:20-40.

▪ Mɛɛ tsɔne Farisifoi lɛ tsɔ koni amɛkɛdu Yesu, ni eji eha hetoo hɛɛ loo dabi kulɛ, mɛni baajɛ mli aba?

▪ Mɛɛ gbɛ nɔ Yesu tsɔ efite tsɔne ni Sadukifoi lɛ tsɔ lɛ koni amɛkɛmɔ lɛ lɛ yɛ?

▪ Mɛɛ mɔdɛŋ Farisifoi lɛ bɔ lolo koni amɛkɛka Yesu, ni mɛni jɛ mli ba?

▪ Gbii enyiɛ Yesu kɛtsɔɔ nii yɛ sɔlemɔ we lɛ, yɛ enaagbee sɔɔmɔ nitsumɔ lɛ mli yɛ Yerusalem, ni mɛni jɛ mli ba?