Yitso 127

Afu lɛ Sohaa—Gbonyo Bu Folo Hɔgbaa

AGBƐNƐ eshɛ Sohaa shwane kɛmiiba gbɛkɛnaashi mli, ni Nisan 15 Hejɔɔmɔ Gbi lɛ baaje shishi yɛ hulu shinyɔɔ sɛɛ. Yesu gbonyo lɛ ka he etsotsro tso lɛ nɔ, shi ojotswalɔi enyɔ ni fata ehe lɛ ahiɛ kamɔ lolo. Atsɛɔ Sohaa shwane lɛ akɛ Hesaamɔ-kɛ-too ejaakɛ nɛkɛ be nɛɛ mli ni gbɔmɛi hoɔ niyenii ni amɛgbeɔ nitsumɔi krokomɛi ni he hiaa ni anyɛŋ ashi kɛyashi Hejɔɔmɔ Gbi lɛ sɛɛ lɛ anaa.

Hejɔɔmɔ Gbi ni etsɛŋ ni ebaaje shishi lɛ jeee Hejɔɔmɔ Gbi ni ayeɔ daa (otsi lɛ mli gbi ni ji kpawo) lɛ, shi moŋ nɔ ni bɔ he toi enyɔ, loo Hejɔɔmɔ Gbi “kpele.” Atsɛɔ lɛ nakai ejaakɛ Nisan 15, ni ji Akpiti Gbijurɔ ni heɔ gbii kpawo lɛ klɛŋklɛŋ gbi (ni be fɛɛ be lɛ eji Hejɔɔmɔ Gbi, ni otsi lɛ mli gbi nɔ ni eeegbee lɛ kɔɔɔ he eko) lɛ gbeeɔ nakai gbi lɛ nɔ nɔŋŋ taakɛ Hejɔɔmɔ Gbi ni ayeɔ daa lɛ hu ji lɛ.

Taakɛ Nyɔŋmɔ Mla tsɔɔ lɛ, esaaa ni ashiɔ gbohii yɛ tsei lɛ anɔ ni je tsɛreɔ nɔ. No hewɔ lɛ Yudafoi lɛ bi Pilato ni eha amɛgbe mɛi ni asɛŋ amɛ nɛɛ oya kɛtsɔ amɛnaji ni amɛaakumɔ nɔ. No hewɔ lɛ, asraafoi lɛ kumɔ ojotswalɔi enyɔ lɛ anaji. Shi akɛni etamɔ nɔ ni Yesu egbo hewɔ lɛ, amɛkumɔɔɔ enaji. Enɛ ha ŋmalɛ ni kɛɔ akɛ: “Akuŋ ewu ko” lɛ ba mli.

Shi kɛlɛ, bɔni afee ni yiŋkɔshikɔshifeemɔ ko akaba kɛji Yesu egbo lɛlɛŋ lɛ he lɛ, asraafoi lɛ ateŋ mɔ kome kɛ akpɔlɔ tsu eŋmawu mli. Akpɔlɔ lɛ tsu etsui he gbɛ, ni amrɔ lɛ nɔŋŋ ni la kɛ nu jɛ emli. Bɔfo Yohane, ni na nibii nɛɛ fɛɛ kɛ ehiŋmɛi lɛ bɔ amaniɛ akɛ enɛ ha ŋmalɛ kroko hu ba mli: “Amɛaakwɛ Mɔ ni amɛtsu lɛ nɔ lɛ.”

Mɔ kroko hu ni yɔɔ jɛi beni agbeɔ lɛ lɛ ji Yosef ni jɛ Arimatia, ni eji Sanhedrin lɛ mli nyo ni yɔɔ gbɛi kpakpa lɛ. Ekpoo akɛ efiŋ kojomɔ he wulu lɛ nifeemɔ ni ejaaa ni amɛfee amɛshi Yesu lɛ sɛɛ. Yɛ anɔkwale mli lɛ Yosef ji Yesu kaselɔ, eyɛ mli akɛ eeshe gbeyei akɛ eeeha ale lɛ nakai. Shi, agbɛnɛ, efee ekaa, ni etee Pilato ŋɔɔ ni eyabi lɛ ni eŋɔ Yesu gbonyo lɛ eha lɛ. Kɛkɛ ni Pilato fa asraafonyo nukpa ni kwɛɔ nifeemɔ nɛɛ nɔ lɛ, ni yɛ be mli ni onukpa nɛɛ ema nɔ mi akɛ Yesu egbo sɛɛ lɛ, Pilato kɛ egbonyo lɛ ha lɛ.

Ni Yosef wo gbonyo lɛ ni ekɛ klala fɛfɛo ni he tse bala ehe ni esaa lɛ kɛha efuu. Nikodemo, ni lɛ hu eji Sanhedrin lɛ mli nyo lɛ baye ebua lɛ. Nikodemo hu nyɛɛɛ ajaje ehemɔkɛyeli yɛ Yesu mli lɛ yɛ faŋŋ mli ejaakɛ eeshe gbeyei akɛ no baaha egbɛhe aje edɛŋ. Shi agbɛnɛ ekɛ tɔ ni mire kɛ aloe ni jara wa waa ni afutu aaashɛ Roma ŋsɛnii tɛi oha ba. Akɛ klalai ni tsofai nɛɛ yɔɔ mli lɛ fimɔ Yesu gbonyo lɛ, tamɔ bɔ ni eji Yudafoi lɛ akusum ni amɛtsɔɔ nɔ amɛsaa gbohii kɛha fuu lɛ.

Kɛkɛ ni amɛkɛ gbonyo lɛ yafɔ Yosef gbonyo bu hee ni eha akpɛ yɛ tɛsaa ko mli yɛ abɔɔ ko ni bɛŋkɛ jɛmɛ lɛ mli. Yɛ naagbee lɛ, akoklo tɛ agbo ko akɛtsi bu lɛ hiɛ. Bɔni afee ni anyɛ agbe efuu lɛ naa dani Hejɔɔmɔ Gbi lɛ ashɛ hewɔ lɛ, gbonyo lɛ saamɔ baafee kplakpla. No hewɔ lɛ, Maria Magdalena kɛ Maria ni ji Yakobo Fioo lɛ nyɛ, ni ekolɛ amɛwaa kɛ gbonyo lɛ saamɔ lɛ kɛ oyaiyeli tee shia koni amɛyasaa tsofai kɛ mui ni jeɔ ŋma kɛba. Yɛ Hejɔɔmɔ Gbi lɛ sɛɛ lɛ, amɛto amɛyiŋ akɛ amɛkɛ tsofai babaoo baawo Yesu gbonyo lɛ lolo koni amɛkɛbaa yi ni eye be babaoo.

Enɔ jetsɛremɔ, ni ji Hɔɔ (Hejɔɔmɔ Gbi) lɛ, osɔfonukpai lɛ kɛ Farisifoi lɛ tee Pilato ŋɔɔ ni amɛyakɛɛ lɛ akɛ: “Nuŋtsɔ, wɔkai akɛ, beni shishiulɔ nɛɛ hiɛ ka lɛ, ekɛɛ: ‘Gbi ni ji gbi etɛ lɛ, mate shi ekoŋŋ.’ No hewɔ lɛ fa ni ayabu bu lɛ he jogbaŋŋ kɛyashi gbi ni ji gbi etɛ lɛ, koni ekaselɔi lɛ akabaju lɛ kɛmiiya, ni amɛyakɛɛ maŋ lɛ akɛ: ‘Ete shi kɛjɛ gbohii ateŋ,’ ni sɛɛkpee shishiumɔ lɛ bafee efɔŋ fe klɛŋklɛŋ nɔ lɛ.”

Ni Pilato ha amɛ hetoo akɛ: “Naa, asraafoi nɛ, nyɛyaa ni nyɛyabua bɔ ni nyɛaanyɛ.” No hewɔ lɛ amɛtee ni amɛtsimɔ tɛ lɛ he fɛɛ ni amɛha Roma asraafoi damɔ naa akɛ bulɔi koni amɛkɛbu gbonyo bu lɛ naa.

Hɔgbaa leebi mra mli lɛ, Maria Magdalena, Yakobo nyɛ Maria, kɛ Salome, Yohana, kɛ yei krokomɛi lɛ kɛ tsofa-kɛ-ŋma ba gbonyo bu lɛ naa ni amɛkɛbawo Yesu gbonyo lɛ. Beni amɛnyiɛ gbɛ nɔ kɛbaa lɛ, amɛkɛɛkɛɛ amɛhe akɛ: “Namɔ aaakoklo tɛ lɛ yɛ bu lɛ naa aha wɔ?” Shi beni amɛshɛ jɛmɛ lɛ, amɛna akɛ shikpɔŋ ehoso, ni Yehowa bɔfo ekoklo tɛ lɛ kɛjɛ jɛmɛ. Bulɔi lɛ etee, ni gbonyo bu lɛ ka shi efolo! Mateo 27:57–28:2; Marko 15:42–16:4; Luka 23:50–24:3, 10; Yohane 19:14, 31–20:1; 12:42; 3 Mose 23:5-7; 5 Mose 21:22, 23; Lala 34:20; Zakaria 12:10.

▪ Mɛni hewɔ ni atsɛɔ Sohaa akɛ Hesaamɔ-kɛ-too lɛ, ni mɛni ji Hejɔɔmɔ Gbi “kpele” lɛ?

▪ Mɛɛ ŋmalɛi ni kɔɔ Yesu gbɔmɔtso lɛ he ba mli?

▪ Mɛni Yosef kɛ Nikodemo yɔɔ feemɔ yɛ Yesu fuu he, ni mɛɛ wekukpaa yɔɔ amɛkɛ Yesu teŋ?

▪ Mɛni osɔfoi lɛ yabi ni Pilato afee, ni mɛɛ hetoo ekɛha amɛ?

▪ Mɛni ba yɛ Hɔgbaa leebi mra mli?