Haomɔ Ni Naa Wa Ni Oshekuyeli Kɛbaa
Wiemɔ kpakpa baanyɛ atswa mɔ ama shi ní ewolɛ hewalɛ. Abɛbuai ko ni jɛ mumɔ mli lɛ kɛɛ akɛ: “Naajɔlɛ wiemɔi tamɔ wóo agbaku, amɛŋɔɔ susuma naa, ni amɛhaa wui naa hewalɛ.” (Abɛi 16:24) Wòo ŋɔɔ, ni ehaa mɔni hɔmɔ yeɔlɛ lɛ tsui nyɔɔ emli oya. Wiemɔi ni ŋɔɔ lɛ baanyɛ aha gbɔmɔtso lɛ he ajɔlɛ nakai nɔŋŋ, ejaakɛ amɛbaanyɛ amɛha mɔ lɛ jwɛŋmɔ mli afililɛ. Kɛji mɔko mli efililɛ ni eyɛ miishɛɛ lɛ owóɔ ehiɛ nɔ tɛ̃ɛ ni ekɛ hekanyamɔ nyiɛɔ kɛ miishɛɛ.
Shi kɛji aaye mɛi ahe osheku aloo shishiumɔ wiemɔi ebɔle amɛ lɛ, enɛ baanyɛ ekɛ haomɔ ni teremɔ wa abaha amɛ. Niiashikpamɔ nɛɛ ba lalatsɛ lɛ nɔ. Esɔle akɛ ajielɛ kɛjɛ apasa lilɛi ni wuɔ shiɔlɛ lɛ afitemɔ mli. Wɔkaneɔ yɛ Lala 120:1, 2 akɛ: “Mifimɔ lɛ mli lɛ, mibo mitsɛ Yehowa, ni ebomi toi. Yehowa, jiemɔ misusuma kɛjɛ apasa naabu kɛ shishiumɔ lilɛi lɛ mli.”
Oshekuyelɔi apasa wiemɔi lɛ tamɔ tatsɛ gaimlibii ni atsɛ̃ kɛjɛ gai mli. Nɛkɛ apasa wiemɔi nɛɛ eha béi kɛ nɔmɔ la lɛ egiri tamɔ ŋai-kɛ-la. Shi ani nakai wiemɔi ni pilaa mɔ lɛ baaya nɔ daa? Dabi, lalatsɛ lɛ kɛ hekɛnɔfɔɔ kwɛ gbɛ akɛ kojomɔbe ko baaba, ni ekɛɛ: “Mɛni shishiumɔ lilɛi lɛ baahao, ni mɛni ebaafee efata he ehao? Etamɔ ekãalɔ gaimlibii ni naa ba kɛ baisa ŋai-kɛ-la.” (Lala 120:3, 4) Akɛni lalatsɛ lɛ kɛ esane lɛ eyadaŋ Yehowa hewɔ lɛ, Ŋwɛi flooflonyo lɛ ji mɔni baaku mɛifɔji asheku lilɛi lɛ naa. Osheku lilɛi lɛ kɛ oshra baaba lɛ diɛŋtsɛ ehe nɔ. Tatsɛ gaimlibii lɛ kɛ Nyɔŋmɔ mlifu kojomɔ ni tamɔ baisa tsei aŋai-kɛ-la ni tsoɔ waa lɛ baaku enaa.
Shi lalatsɛ lɛ nu ehenyɛlɔi ateŋ ni eyɔɔ lɛ ahaomɔ lɛ he waa, ni ekɛto he akɛ eji gbɔ yɛ Mesekbii kɛ Kedarbii yiwalɔi kɛ shikpalɔi ni hiɔ bui amli lɛ ateŋ. Ekɛɛ akɛ: “Kpoo hami! akɛ mibato gbɔ yɛ Mesek, ni mibahi Kedar bui lɛ amasɛi.”—Lala 120:5.
Akɛni lalatsɛ lɛ etsɛ tsɔ yɛ mɛi ni sumɔɔɔ toiŋjɔlɛ lɛ ateŋ hewɔ lɛ, eshwe ni ená toiŋjɔlɛ. Shi mɛifɔji lɛ eŋmɛɛɛ lɛ gbɛ kwraa. Amɛfee klalo daa akɛ amɛkɛlɛ awo bei. Lalatsɛ lɛ tee nɔ akɛ: “Misusuma, kɛ mɛi ni nyɛɔ hejɔlɛ Iɛ hi shi etsɛ tsɔ. Mi lɛ, hejɔlɛ gbɔmɔ ji mi moŋ; shi kɛ miwie pɛ lɛ, belɛ amɛ lɛ amɛnɔ ji ta.”—Lala 120:6, 7.
Kɛji hejɔlɛ gbɔmɛi ji wɔ tamɔ lalatsɛ lɛ, belɛ, esani wɔwo wɔlilɛi manyoflɛ koni wɔkɛ haomɔ akaba mɔko nɔ kɛtsɔ dɔlɛwiemɔi ni gbeɔ mɔ he guɔ lɛ nɔ. Bibliai lɛ ŋaawoo ji akɛ: “Wiemɔ sha ko wiemɔ sha ko akaje nyɛnaa kwraa; shi moŋ wiemɔ ni hi ni ehia, koni eha mɔ nane amɔ shi, ni akɛduro mɛi ni nuɔ lɛ.” (Ef. 4:29) Beni wɔdamɔɔ mɛikrokomɛi ahorabɔɔ kɛ apasai wiemɔi anaa lɛ, wɔbaanyɛ wɔkɛ anɔkwale ni eji akɛ yɛ be ni sa mli lɛ Yehowa Nyɔŋmɔ baajaje nibii fɛɛ lɛ ashɛje wɔmii.
[Akrabatsa ni yɔɔ baafa 3]
“Nyɛhaa Kristo wiemɔ lɛ ahia nyɛ mli babaoo yɛ nilee fee nilee mli; ni nyɛtsɔɔa nyɛhe nii ni nyɛwiea nyɛtsɔɔa nyɛhe yɛ sankutswaai kɛ yijiemɔlalai kɛ mumɔŋlalai amli, ni nyɛkɛ shidaa alaa yɛ nyɛtsuii amli nyɛhaa Nyɔŋmɔ. Ni nɔ fɛɛ ni nyɛfeɔ yɛ wiemɔ loo nitsumɔ gbɛfaŋ lɛ, nyɛfea fɛɛ yɛ Yesu Kristo gbɛi amli, ni nyɛtsɔa enɔ nyɛdaa Nyɔŋmɔ kɛ Tsɛ lɛ shi. Nyɛhaa nyɛwiemɔ he abaa nyam daa, ni ŋoo ahia mli, ni nyɛle bɔni sa akɛ nyɛhaa mɔ fɛɛ mɔ hetoo.—Kol. 3:16, 17; 4:6.