Sanebimɔi Ni Jɛ Kanelɔi Adɛŋ

● Paulo kɛɛ akɛ esa ni asafo nɔkwɛlɔ lɛ afee “mɔ ni yɔɔ ŋa kome.” Mɛni hewɔ esa akɛ ekɛ enɛ afata hesaai kɛha nɔkwɛlɔi lɛ ahe akɛ ni Kristofonyo ko bɛ ni ekɛ ŋamɛi enyɔ baahi shi?

Bɔfo Paulo ŋma yɛ 1 Timoteo 3:2 akɛ: “Shi esa akɛ nɔkwɛlɔ lɛ ahi shi bɔ ni anaŋ ehe sane ko ata, mɔ ni yɔ ŋa kome, hiɛshikalɔ.” Wiemɔ “mɔ ni yɔɔ ŋa kome” lɛ baatsɔɔ akɛ eye ehe kɛjɛ bɔlɛ ni ekɛ mɔ kroko aaana yɛ gbɛ fɔŋ nɔ lɛ he, ni agbɛnɛ efeɔ nɔkwɛmɔ nɔ yɛ Kristofoi ataomɔnii ni kɔɔ gbalashihilɛ he lɛ mli.

Yesu fa akɛ kaselɔi lɛ amɔ Nyɔŋmɔ shishijee taomɔnii ni kɔɔ gbalashihilɛ gbɛjianɔtoo he lɛ mli, nuu kome kɛha yoo kome. (Mat. 19:​5, 6) No hewɔ lɛ anyɛŋ abaptisi mɔ ko akɛ Kristofonyo ja ekɛ yoo kome hi shi. Shi eji nɔ ko ni esa akɛ Paulo ama nɔ mi aha onukpai lɛ, ejaakɛ aŋmɛ yei enyɔ kɛ shihilɛ gbɛ aha Yudafoi lɛ ni ebaanyɛ ehi shi nakai yɛ shikpɔji ni Kristojamɔ baagbɛ ashwa kɛya jɛmɛ lɛ anɔ. Esa ni mɔ hee ni kɛ ehe kpɛtɛɔ asafo lɛ he lɛ anyɛ ana kɛjɛ nɔkwɛmɔ nɔ ni onukpai lɛ feɔ yɛ yoo kome ni amɛkɛhiɔ shi shi moŋ jeee yei enyɔ lɛ mli akɛ eji nɔ ko ni akpɛlɛɔ nɔ aloo gbɛjianɔtoo ni Kristofoi asafo lɛ kpɛlɛɔ nɔ.

Shi wiemɔ “mɔ ni yɔɔ ŋa kome” lɛ baanyɛ atsɔɔ babaoo. Yɛ nakai be lɛ mli lɛ jeŋba he subaŋ ni yɔɔ ‘ni áŋmɛɛ nɔ fɛɛ nɔ he gbɔjɔɔ lɛ jeɔ kpo yɛ ŋashwiemɔ kpitiokpitio kɛ gbalashihilɛ mli botemɔ kpitiokpitio lɛ mli.

Conybeare kɛ Howson wolo ni ji The Life and Epistles of St. Paul) lɛ kɛɛɔ akɛ: “Yɛ gbala-mli-tsemɔ ni efite ni Hela kɛ Roma mla ŋmɛɛɔ gbɛ lɛ mli lɛ, ewaaa kwraa akɛ wu kɛ eŋa aaagbala mli, ni amɛkɛ mɛi krokomɛi ayahi shi yɛ amɛteŋ mɔ kome wala be mli. No hewɔ lɛ nuu baanyɛ ana ŋamɛi etɛ loo ejwɛ ni yɔɔ wala mli; aloo ekolɛ yei ni amɛtsɔmɔ nuu nɛɛ ŋamɛi da.” Esa ni esoro Kristofonyo lɛ yɛ enɛ mli. Ja ehefatalɔ lɛ “ebɔ ajwamaŋ” (jeŋba ni ehiii kwraa) dani ebaanyɛ etse gbala lɛ mli ni ekɛ mɔ kroko ahi shi. (Mat. 5:​32; 19:⁠9) Hesaa ni ji “mɔ ni yɔɔ ŋa kome” lɛ baatsɔɔ akɛ belɛ esa ni onukpa lɛ ato okadi ejeee mɔ ni shwie eŋa ni jeee yɛ Ŋmalɛ lɛ naa tɔmɔ ko hewɔ ni eku sɛɛ ebote gbalashihilɛ mli.

Woloŋlelɔi komɛi enu 1 Timoteo 3:2 shishi akɛ onukpa ko nyɛŋ abote gbalashihilɛ mli nɔ ni ji shii enyɔ kwraa. Shi, nɔni Yesu etsɔ hiɛ ewie kɛ nɔni Paulo ŋma yɛ hekroko lɛ tsɔɔ akɛ, ákɛ aaaku sɛɛ abote gbalashihilɛi mli ekoŋŋ lɛ jeee efɔŋ, no hewɔ lɛ ehaŋ nuu ko afee mɔ ni aaana ehe sane ata, aloo mɔ ni aaana kɛhaŋ sɔɔmɔ akɛ onukpa yɛ asafo lɛ mli. Kaimɔ akɛ Paulo ŋma akɛ ebaahi jogbaŋŋ akɛ okulafoi aaaku sɛɛ abote gbalashihilɛ mli fe nɔni akɔnɔ aaahao amɛ, aloo mɛi ni kɛ amɛhe woɔ mɛi asaji amli.​—1 Kor. 7:​8, 9, 36-39; 1 Tim. 5:​13, 14.

Onukpa ni ji “mɔ ni yɔɔ ŋa kome” lɛ hu kɛ jwɛŋmɔ lɛ baa akɛ eji mɔ ni eye ehe kɛjɛ ŋamɛi enyɔ ni ekɛ mɛi enyɔ lɛ fɛɛ ewo mla shishi aloo gbalafitemɔ he. Esaaa akɛ anaa ehe sane ataa yɛ ogbalashihilɛ gbɛfaŋ esa ni eye eŋa lɛ anɔkwale. No hewɔ lɛ The New English Bible lɛ tsɔɔ kuku nɛɛ shishi yɛ nɛkɛ gbɛ nɔ, esa ni nɔkwɛlɔ lɛ “afee mɔ ni ahorabɔɔ ko ebɛ ehe, mɔ ni yeɔ eŋa kome lɛ anɔkwale.”

No hewɔ lɛ nɔni Paulo kɛɛ akɛ esa ni nɔkwɛlɔ lɛ afee “mɔ ni yɔɔ ŋa kome” lɛ ekɛmiina jeŋba he taomɔnii ni nɔ kwɔlɔ lɛ nɔ mi kɛmiijɛ gbɛi sɔrɔtoi anɔ kɛmiiha onukpa ni ebote gbalashihilɛ mli lɛ. Esa akɛ mɔ fɛɛ mɔ anyɛ ekɛ ehiɛ afɔ enɔ ni enu he akɛ eji mɔ ko ni toɔ gbalashihilɛ ni anaa yɛ anɔkwa Kristofoi ateŋ lɛ he nɔkwɛmɔ nɔ kpakpa.