Teokrase Yinɔsane Hee Yɛ Korea

MAŊTSƐYELI shiɛmɔ nitsumɔ lɛ miiya hiɛ waa yɛ Korea taakɛ eji yɛ jeŋ fɛɛ Iɛ. Beni ama nitsumɔ he nine tsu hee lɛ yɛ Kongdo, Korea, lɛ sɛɛ afii etɛ pɛpɛɛpɛ kɛkɛ ni ajɔɔ ehee ni ama afata he lɛ nɔ yɛ May 11, 1985. Eji Yehowa Odasefoi ni yɔɔ Korea lɛ teokrase yinɔsane hee.

Taakɛ anaa yɛ mfoniri lɛ mli lɛ, nɔ ni ama afata he lɛ ji nsɔɔdoi ni gbeɔ yi feɔ etɛ ni ama yɛ ɔfis lɛ yiteŋ (mfoniri ni yɔɔ ninejurɔgbɛ lɛ), ni ama nsɔɔdoi enyɔ hu yɛ woji akalamɔ tsu lɛ yiteŋ (teŋgbɛ nɔ̃ lɛ yiteŋ), kɛ nsɔɔdoi etɛ kɛha Betel shia lɛ (nɔ ni yɔɔ abɛkugbɛ lɛ fɛɛ). Tsu ni yɔɔ sɛɛgbɛ kwraa lɛ ji Betel shia momo lɛ.

Shi mɛni hewɔ akɛ ehee nɛɛ fata he yɛ be kukuoo kɛkɛ mli lɛ? Beni abɔi woji—akalamɔ yɛ 1982 yɛ woji akalamɔ tsu hee lɛ mli lɛ, no mli lɛ akalaa Buu-Mɔɔ kɛ Awake! woji tɛtrɛbii lɛ 380,000 daa nyɔŋ nɔ. Enɛ eku ebɔ he kɛyashɛ 760,000 daa nyɔŋ nɔ. Eka shi faŋŋ akɛ tsu hee lɛ baaha ana gbɛ babaoo kɛha woji akalamɔ. Bɔni fee ni atsu woji akalamɔ babaoo he nii lɛ, nyɛmimɛi ni tsuɔ nii yɛ nitsumɔ he nine lɛ ayifalɛ eyashɛ 86. No hewɔ lɛ shia hee lɛ baaha ana wɔɔhe aha amɛ fɛɛ; ayɛ tsũi kɛha nitsulɔi 120 bianɛ.

A. D. Schroeder, ni eji Yehowa Odasefoi a-Nɔyeli Kuu ni yɔɔ Brooklyn, New York lɛ mlinyo lɛ yɛ jɛmɛ kɛha tsũ nɛɛ nɔjɔɔmɔ he gbɛjianɔtoo lɛ. Korea Nitsumɔ He Nine Ajinafoi lɛ bɔ sɔɔmɔ nitsumɔ lɛ he amaniɛ ni amɛtsɔɔ tsũ lɛ maa lɛ hu mli. Mɛi 2,199 ni ba nifeemɔ nɛɛ shishi lɛ fɛɛ jɛ amɛtsuiŋ tɔŋŋ amɛkɛ shidaa ha Yehowa yɛ ejɔɔmɔi babaoo lɛ hewɔ.

March Daa Gbi Ŋmalɛ

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)