Sanebimɔi Ni Jɛ Kanelɔi Adɛŋ

◼ Ani eja gbɛ akɛ Kristofonyo ko aaaya gbɔbimɔ aloo looshamɔ?

Yɛ bei pii amli Iɛ henumɔi ni mli kwɔlɔ jeɔ kpo yɛ susumɔi sɔrɔtoi ni ahiɛ yɛ gbɔbimɔ he lɛ amli. No hewɔ Iɛ ehi jogbaŋŋ akɛ Kristofoi aaabɔ mɔdɛŋ ni amɛnu bɔ ni Yehowa Nyɔŋmɔ jwɛŋɔ sane Iɛ he taakɛ anaa yɛ Biblia lɛ mli lɛ shishi ni amɛkɛtsu nii.

Nyɔŋmɔ ha adesai hegbɛ koni amɛye ‘ŋa mli’ kɛ “shia” kooloi fɛɛ nɔ. Kɛjɛ shishijee lɛ, Bɔlɔ Iɛ haaa adesai hegbɛ, ni ekolɛ ehe ehiaaa hu, akɛ amɛgbe kooloi kɛha niyenii. (1 Mose 1:​24, 29, 30) Nu Afua lɛ sɛɛ pɛ kɛkɛ ni Nyɔŋmɔ kɛ hegbɛ ha adesai ni amɛye kooloo ni afɔse “ela​—ni ji esusuma lɛ” ashwie shi jogbaŋŋ lɛ loo. (1 Mose 9:​3, 4) Enɛ baanyɛ afee shia loo ŋa mli kooloi aloo.

Israelbii Iɛ lɛɔ kooloi, tamɔ tooi kɛ tsinai, ni kɛ loo miiba amɛtsine lɛ, amɛbaanyɛ amɛgbe eko kɛha niyenii. Amɛ gbɔbiɔ ni amɛshaa loo hu koni amɛna eko kɛha niyenii. (5 Mose 12:​20-24; 14:​4-20) Enɛ kɛ Nyɔŋmɔ wiemɔ ni ewie yɛ mfonirifeemɔ mli akɛ ‘ebaatsu wolɛi pii ni amɛbahɛ ewebii lɛ kɛ gbɔbilɔi pii ni amɛbagbɔbi amɛ’ lɛ kpaa gbee. (Yeremia 16:16) Yɛ sɛɛ mli lɛ, Yesu kɛ wolɛi fata ebɔfoi Iɛ ahe ni ekɛ gbɛtsɔɔmɔi ha yɛ looshamɔ diɛŋtsɛ he.​—Mateo 4:​18-22; 17:​27; Luka 5:​2-6; Yohane 21:​4-7.

Beni blematsɛ Isak ni egbɔ lɛ bi ni aha lɛ niyenii ni ŋɔɔ ni akɛ kooloo ko loo fee lɛ, ebi Yakob miisumɔ ni egbe toobii enyɔ ni ekɛfee niyenii lɛ eha lɛ. Shi, Esau yagbɔbi ŋa mli kooloo koni ena milɛloo eha etsɛ lɛ. Kadimɔ akɛ eyɛ mli akɛ abaanyɛ ana shia kooloo ko loo moŋ, shi Isak bi ni aha lɛ milɛloo. Kadimɔ hu akɛ, ebihii enyɔ lɛ fɛɛ yagbe kooloi lɛ ni akɛbafee niyenii, jeee kɛha emɛ diɛŋtsɛ amɛhe, shi moŋ kɛha mɔ kroko.​—1 Mose 27:​1-19.

Yɛ amɛloo lɛ sɛɛ lɛ, abaanyɛ agbe kooloi yɛ yiŋtoi krokomɛi ahewɔ. Abaanyɛ akɛ amɛ hewolo lɛ afee atadei. (2 Maŋtsɛmɛi 1:8; Marko 1:6; Hebribii 11:37) Akɛ kooloi ahewolo hu feɔ hehaa nibii ni akɛbuɔ he kɛ nibii ni akɛtsuɔ nii yɛ shia, ni anyɛɔ akɛ kooloi ni amɛniyeli he tseee ni lsraelbii lɛ yeee lɛ po ahewolɔ feɔ.​—2 Mose 39:​33-34; 4 Mose 24:7; Kojolɔi 4:19: Lala 56:⁠8.

Esa akɛ Nyɔŋmɔ mla ni biɔ ni afɔse kooloi ni agbeɔ amɛ lɛ ala ashwie shi lɛ akai gbɔbilɔi lɛ akɛ kooloi lɛ awala jɛ eŋɔɔ ni no hewɔ lɛ esa akɛ ajie bulɛ kpo yɛ he, ni akagbe amɛ kɛkɛ. (3 Mose 17:13) Ŋwanejee ko bɛ he akɛ Nimrod gbe kooloi ni ekolɛ ekɛ bɔ ni ehe esa kɛ gbɔbimɔ, kɛ kooloi ni egbeɔ lɛ adaramɔ loo amɛyifalɛ, aloo jweremɔ nibii ni akɛ amɛ feɔ lɛ po shwaa. Eji “gbɔbilɔ kpanaa ni teɔ shi woɔ Yehowa.”​—1 Mose 10:⁠9. New World Translation.

Miishɛɛ ni tamɔ nɛkɛ ni anaa yɛ gbɔbimɔ loo kooloi agbee, aloo yɛ looshamɔ mli lɛ baanyɛ ete shi yɛ Kristonyo ko mli. Gbɔbilɔi kɛ wolɛi babaoo ni pɛiɔ amɛtsuii amli jogbaŋŋ lɛ naa akɛ ‘nɔ ni agbeɔ lɛ he miishɛɛnamɔ’ lɛ miihe aye amɛnɔ. Nakai miishɛɛnamɔ lɛ kɛ kooloi ni abuuu amɛ wala ni agbeɔ amɛ kɛkɛ lɛ nyiɛɔ pɛpɛɛpɛ. No hewɔ lɛ eyɛ mli akɛ gbɔbimɔ loo looshamɔ jeee nɔ ko ni ehiii, (yɛ be mli ni akɛ kooloo ni agbe loo loo ni asha lɛ baafee niyenii aloo kɛha nɔ kroko ni he hiaa lɛ) moŋ, shi ebaafee nɔ ko ni ejaaa gbɛ kɛji Kristofonyo lɛ na mumɔ ni tamɔ Nimrod nɔ lɛ eko. Shi osharai krokomɛi yɛ yɛ miishɛɛ ni anaa yɛ kooloi nɛɛ asɛɛnyiɛmɔ, aloo amɛgbee mli, loo jweremɔ nɔ ni ahaa lɛ sɛɛ.

Buu-Mɔɔ ni je kpo February 1, 1984 lɛ wieɔ nɔ hewɔ ni anɔkwa Kristofoi ehiɛɛɛ tu loo amɛkɛ eko etooo amɛshia ni amɛkɛtsu nii amɛshi adesai loo ni amɛkɛbu amɛhe yɛ amɛhewɔ lɛ he. (Baafai 19-22) Nakai ŋaawoo lɛ hesusumɔ jogbaŋŋ eye ebua Odasefoi komɛi ni amɛsaa amɛkwɛ kɛji amɛbaahiɛ tui ni akɛgbɔbiɔ po. Mɛi babaoo ji mɛi ni ekpɛ amɛyiŋ akɛ amɛbaajie amɛtui lɛ kwraa aloo amɛkpoo akɛ amɛaahiɛ ni mɛi ana loo amɛha ehi he ko ni amɛnine baanyɛ ashɛ nɔ mra. Yɛ nɛkɛ gbɛ nɔ lɛ Kristofoi nɛɛ haaa mɛi asusu akɛ amɛshwaa amɛfɔɔ tui nɛɛ anɔ loo amɛkɛ amɛhe fɔɔ nomɛi anɔ. Kɛfata he lɛ, ni ahiɛɛɛ gbɔbimɔ tui, loo ni ahaaa ehi he ni nine aaashɛ nɔ amrɔ nɔŋŋ lɛ nyɛɔ etsiɔ oshara naa. Nibii ni nyɛɔ egbeɔ mɔ nɛɛ nyɛɛɛ ayaje gbekɛbii ni baanyɛ amɛkapila mɔ ko loo amɛkɛgbe lɛ lɛ adɛŋ, aloo ni mɔ ko nine ashɛ tu nɔ yɛ be mli ni awo ehe gbeyei waa loo nɔ ko gbaa ejwɛŋmɔ naa waa lɛ.​—Okɛto Abɛi 22:3 he.

Ekolɛ Kristofoi komɛi yɛ ni sumɔɔ milɛloo aloo nu mli loo ko ŋɔɔmɔ, ni gbɛ pɛ ni aaanyɛ atsɔ nɔ ni nine ashɛ nɔ ji kɛtsɔ gbɔbimɔ loo looshamɔ nɔ. Mɛi komɛi hu yɛ ni naa kɔɔyɔɔ ni tswaa kɛ kpɔiaŋgbɔlemɔ ni amɛnaa yɛ koo mli gbɔbimɔ mli lɛ he miishɛɛ, aloo amɛnaa akɛ jeŋ jɔlɛ be ni amɛkɛyashaa loo lɛ hu haa amɛhe jɔɔ amɛ. Biblia lɛ ewieee eshiii enɛ, no hewɔ lɛ ehe ehiaaa ni wɔkojo mɔ ko yɛ enɛ mli kɛji amɛnyaa enɛɛmɛi ahe loo amɛnyaaa he. Ni Isak kɛ ebihii lɛ anɔkwɛmɔ nɔ lɛ hu tsɔɔ akɛ ehe ehiaaa ni mɔ ni baaye milɛloo loo nu mli loo lɛ afee sane ko ni abaawie he.​—Mateo 7:​1-5; Romabii 14:⁠4.

Ŋwanejee ko bɛ he akɛ bɔfo Petro sumɔɔ wuoyaa waa. Yesu ni atee lɛ shi lɛ kɛ looi komɛi ni jwere emasɛi lɛ tsu nii ni ekɛye ebua lɛ ni esusu bɔ ni enuɔ looi loo wuoyaa he lɛ he. Yesu bi lɛ akɛ: “Simon, Yona bi, osumɔɔ mi fe mɛnɛɛmɛi [enɛɛmɛi] lo?”​—Yohane 21:​1-3, 9-15; kwɛmɔ Buu-Mɔɔ June 1, 1989, baafa 31.

Yɛ nakai gbɛ nɔ nɔŋŋ lɛ, esa akɛ Kristofonyo ni kɛ henilee kpakpa halaa akɛ eeeya gbɔbimɔ loo looshamɔ lɛ asusu nibii ni he hiaa lɛ lɛ ahe jogbaŋŋ. Akɛ nɔkwɛmɔ nɔ lɛ, kɛji gbɔbimɔ loo looshamɔ be lɛ baaje shishi yɛ be mli ni ato asafoŋ kpeei ehe gbɛjianɔ lɛ, mɛni ebaafee? Aloo ani esanegbaa tsɔɔ akɛ ekɛ bɔ ni ehe esa kɛ gbɔbimɔ loo looshamɔ lɛ shwaa? Kwɛ bɔ ni ehi jogbaŋŋ akɛ Kristofonyo ni eda yɛ mumɔŋ, ni bei komɛi lɛ esumɔɔ ni eya gbɔbimɔ loo looshamɔ lɛ aaanyɛ akɛɛ kɛ nɔmimaa akɛ: “Hɛɛ, Nuŋtsɔ, ole akɛ midɔɔ ohe [fe nibii ni midiɔ sɛɛ nɛɛ]”​—Yohane 21:⁠16.