Saji ni jɛ Shiwoo Shikpɔŋ lɛ Nɔ

Samaria​—Maŋtiase Yɛ Kooyigbɛ Maŋtiasei lɛ Ateŋ

BABILON, Ninive, kɛ Roma. Amɛji maŋtiasei ni hi shi yɛ Biblia bei amli. Shi kɛlɛ, kɛ wɔɔwie yɛ Biblia shishinumɔ naa lɛ, yɛ Yerusalem diɛŋtsɛ sɛɛ lɛ, eeenyɛ efee akɛ maŋtiase ni ale jogbaŋŋ lɛ jeee enɛɛmɛi ateŋ eko, shi moŋ Samaria. Ehi shi aaafee afii 200 sɔŋŋ akɛ Israel akutsei nyɔŋma lɛ amaŋtsɛyeli lɛ maŋtiase, ni gbalɛ mli shɛɛ saji pii kɔɔ Samaria he. Shi mɛni ji nɔ ni ole yɛ Samaria he? Ni mɛni hewɔ ni eji maŋtiase yɛ kooyigbɛ maŋtiasei ateŋ lɛ?

Kɛ okwɛ shikpɔŋ he mfoniri lɛ, obaakai yinɔsane ko ni ba yɛ be mli ni lsrael akutsei nyɔŋma lɛ tse amɛhe kɛjɛ Yehowa maŋtsɛ lɛ kɛ sɔlemɔ tsu ni yɔɔ Yerusalem lɛ he lɛ. Yerobeam, mɔ ni nyiɛ hiɛ ni ato kooyigbɛ maŋtsɛyeli lɛ shishi lɛ ye nɔ be fioo ko yɛ Shekem, yɛ gbɛ ni ka shi kɛjɛ kooyigbɛ kɛbaa wuoyigbɛ lɛ nɔ. Yɛ sɛɛ mli lɛ, Yerobeam jie emaŋtiase lɛ kɛba Tirzah, ni yɔɔ Wadi Far‘ah ŋwɛigbɛ lɛ. Gbɛ ko ni jɛɔ Yordan Nu Jɔɔ lɛ mli lɛ tsɔɔ Tirzah ni eyatsaa gbɛ ni ka gɔji lɛ anɔ lɛ. Ani ole akɛ Tirzah ji akutsei nyɔŋma maŋtsɛyeli lɛ maŋtiase yɛ Nadab, Baasha, Elah, Zimri kɛ Omri po nɔyeli bei amli?​—1 Mose 12:​5-9; 33:​17, 18; 1 Maŋtsɛmɛi 12:​20, 25, 27; 14:​17; 16:​6, 15, 22.

Shi, afii ekpaa sɛɛ lɛ, Omri to maŋtiase hee ko shishi. Yɛ nɛgbɛ? Ekɛ shika he gɔŋ ni onaa ni ka shi yɛ abɛku gbɛ lɛ fɛɛ, Samaria. (1 Maŋtsɛmɛi 16:​23-28) Eyɛ mli akɛ amrɔ nɛɛ eyɛ shikpɔŋ ni afolɔ tamɔ atrakpoi lɛ pii ni akɛduɔ nii moŋ, shi ekolɛ Omri hala jɛmɛ ejaakɛ gɔŋkpɔ kɛ eyiteŋ tɛtrɛɛ ni ewo ehe nɔ yɛ shikpɔŋ kplanaa lɛ mli lɛ hebuu waaa. Ebinuu Ahab tee nɔ etswa Samaria ema shi, ni eka shi faŋŋ akɛ elɛɛ hei ni ehewalɛ yashɛɔ lɛ mli kɛ gbogboi ni ti. Ema sɔlemɔ tsu hu eha Baal kɛ maŋtsɛ shia kɛha lɛ diɛŋtsɛ ehe kɛ eŋa Jezebel, ni ji Foenika yoo lɛ. Shitsaa eha ale Ahab maŋtsɛ shia lɛ tsu koi lɛ, taakɛ atsɔɔ yɛ baafa ni tsa nɔ lɛ. Ale nakai maŋtsɛ shia lɛ waa yɛ akɔnɔ nii ni fa fe nine kɛ yiwaa ni fa babaoo yɛ mli lɛ hewɔ. (1 Maŋtsɛmɛi 16:​29-33) Feemɔ gbalɔ Elia ni miikwɔ gɔŋ lɛ kɛmiiya maŋ nɛɛ mli, kɛ agbɛnɛ ni enyiɛ gbɛjegbɛ tɛtrɛɛ ni yaa maŋtsɛ shia lɛ nɔ, koni eyawie eshi efɔŋ ni Ahab fee yɛ Baal jamɔ mli lɛ he mfoniri okwɛ.​—1 Maŋtsɛmɛi 17:⁠1.

Yɛ 1910 mli lɛ, blema nibii ahe shitsalɔi yana blema nibii ni akɛ su shɔ lɛ kuku ko ni aŋmala nii yɛ nɔ, ni aŋmala wein kɛ mu ni akɛwo lɛlɛ mli akɛmaje kɛ too ni awo lɛ he saji yɛ nɔ. Shi gbɛi, diɛŋtsɛ ni aŋmala yɛ nɔ lɛ eko fɛɛ eko fa ji wiemɔ ba’al. Ekolɛ ooona he miishɛɛ hu akɛ ooole akɛ shitsalɔi lɛ hu na shwuɔ-wu ni akɛha tsui lɛ amli, taakɛ atsɔɔ yɛ biɛ lɛ. Kaimɔ akɛ 1 Maŋtsɛmɛi 22:39 tsɔ hiɛ mra mli tɔɔ ni etsi “shwuɔ-wu tsu” ko ni Ahab ma lɛ ta. Ekolɛ nɔ ni fata enɛ he hu ji tsu mli saamɔ nibii ni akɛ shwuɔ-wu eha he fɛɛ, tamɔ “shwuɔ-wu saatsei” fɛfɛji ni gbalɔ Amos wie he afii oha sɛɛ lɛ. (Amos 3:​12, 15; 6:​1, 4) Mfonirii titrii ni atɛŋ yɛ amɛnɔ lɛ ateŋ ekomɛi ji amagai ni ashɔɔ amɛ gbɔmɔ fa kɛ jata fa ni yɔɔ fiji lɛ ahe mfonirii kɛ okadii krokomɛi ni jɛ Mizraim blema adesai amli saji amli lɛ hu.

Kɛ atsi Ahab kɛ Jezebel ta lɛ, ekolɛ ebaaha okai gbɛ ni amɛtsɔ nɔ amɛgboi lɛ. Ahab laaje ewala yɛ ta ko ni ekɛ Siria yawuu ni nilee bɛ mli lɛ mli. Beni ayafɔ eshwilii lɛ he yɛ “Samaria kpaakpo lɛ” masɛi lɛ, “gbeei balɛmɔ ela lɛ,” ni eha Elia wiemɔ lɛ ba mli anɔkwale. (1 Maŋtsɛmɛi 21:​19; 22:​34-38) Afɔ̃ maŋnyɛ Jezebel kɛjɛ maŋtsɛ shia lɛ mli samfɛlɛ ko mli ni ebagbee shi ni egbo. Ani kɛjɛ nɛkɛ maŋtsɛ shia ni yɔɔ Samaria nɛɛ mli? Dabi. Ahab yɛ maŋtsɛ shia kroko yɛ kooyigbɛ yɛ Yezreel jɔɔ lɛ mli. Ekɛ hiɛkɔɔ shɔ̃ Nabot wein trom ni bɛŋkɛ jɛmɛ lɛ. Bulɔi ni damɔ nakai maŋtsɛ shia lɛ yiteŋ ni amɛmiikwɛ bokagbɛ kɛjɛ jɛmɛ lɛ na Yehu ni ekɛ mlifu ta okpɔŋɔ nɔ kɛmiikwɔ kɛmiijɛ jɔɔ mli kɛmiiba gɔŋ nɔ gbɛ. Ni jɛmɛ ji he ni tsutsu be ko Samaria maŋnyɛ lɛ jɛ ni ebagbee shi ni enaagbee ni yɔɔ gbeyei ni sa lɛ lɛ ba yɛ.​—1 Maŋtsɛmɛi 21:​1-16; 2 Maŋtsɛmɛi 9:​14-37.

Eyɛ mli akɛ Samaria tee nɔ ehi shi akɛ maŋtiase moŋ, shi Nyɔŋmɔ nɔkpɛlɛmɔ loo jɔɔmɔ ehii maŋ lɛ nɔ. Shi moŋ, ejie hetsɛ̃ kɛ nyɛɛ kpo yɛ emaŋtiase ni yɔɔ wuoyigbɛ ni ji Yerusalem lɛ he. Yehowa tsu gbalɔi babaoo koni amɛyabɔ Samaria nɔyelɔi kɛ maŋ lɛŋ bii lɛ kɔkɔ yɛ amɛ wɔŋjamɔ, jeŋba shara, kɛ emlai anɔ toigbele lɛ hewɔ, shi amɛbooo toi. (Yesaia 9:9; 10:​11; Ezekiel 23:​4-10; Hoshea 7:1; 10:5; Amos 3:9; 8:​14; Mika 1:​1, 6) No hewɔ lɛ, aha Samaria bu ehe akɔntaa yɛ afi 740 D.Ŋ.B., ni Ashurbii lɛ kpata ehiɛ kwraa. Aloo emlibii lɛ ateŋ mɛi pii kɛtee akɛ nomii, ni akɛ gbɔi baye amɛnajiaŋ.​—2 Maŋtsɛmɛi 17:​1-6, 22-24.

Yɛ sɛɛ mli lɛ, Helabii lɛ kɛ Romabii lɛ saa amɛha Samaria bahe gbɛi ekoŋŋ, titri lɛ yɛ Herode Kpeteŋkpele lɛ bei amli. No hewɔ lɛ Yesu kɛ bɔfoi lɛ po le nɛkɛ maŋtiase ni yɔɔ kooyigbɛ maŋtiasei ateŋ nɛɛ jogbaŋŋ.​—Luka 17:​11; Yohane 4:⁠4.

[Shikpɔŋ he mfoniri ni yɔɔ baafa 16]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Yezreel

Tirzah

Samaria

Shekem

Yerusalem

Yordan Faa

[He ni Sane lɛ Jɛ]

Based on a map copyrighted by Pictorial Archive (Near Eastern History) Est. and Survey of Israel.

[He ni Mfoniri ni yɔɔ baafa 16 lɛ Jɛ]

Pictorial Archive (Near Eastern History) Est.

[Hei ni Mfonirii ni yɔɔ baafa 17 lɛ Jɛ]

Pictorial Archive (Near Eastern History) Est.

Garo Nalbandian

Inset: Israel Department of Antiquities and Museums; photograph from Israel Museum, Jerusalem