Ŋmɛnɛŋmɛnɛ Beaŋ “Ojotswalɔi Abuu”

GBƆMƆ bɔɔ su he nilelɔ, Colin Turnbull gba eniiashikpamɔi yɛ wolo tɛtrɛɛ Natural History lɛ mli akɛ gbɛfalɔ ni miikpa shi yɛ Yerusalem. Ekɛɛ akɛ “Blonya mumɔ” ni eje shishi ena lɛ “ba shi oya” beni ena akɛ maŋ lɛ shwapoi lɛ “amli oyimɔ obɔbɔ kɛ nibii ni sɛɛnamɔ bɛ he kwraa ni jara wawai tsɔ ni aahɔɔ aaha (gbɛfalɔi) ni heɔ Blonya nibii tamɔ nɔ ni nɔ ko miinyɛ amɛnɔ ni amɛhe nii lɛ.”

Turnbull wie “Blonya mumɔ” ni ena lɛ he akɛ: “Elaaje ekoŋŋ yɛ he ni misusu akɛ jɛmɛ moŋ baakanya enɛ lɛ​—Yesu Gbonyo Bu Krɔŋkrɔŋ lɛ.” (Emligbɛ anaa yɛ ŋwɛigbɛ lɛ.) Jɛmɛ ji he ni nanemɛi gbɛfalɔi “ni amɛnifeemɔ tsɔɔ akɛ amɛbɛ bulɛ ko kɛha krɔŋkrɔŋ nii” lɛ ha enijiaŋ je wui yɛ be mli ni “amɛtsirɛɔ amɛhe ni amɛhɛleɔ amɛhe yɛ gbɛ ni jeee Kristofoi agbɛ nɔ, ni amɛkɛ amɛkɔji kɛ nikutsei tsiɔ amɛhe kɛtsɔɔ gbɛ bibioo ni kɛ mɔ yaa gbonyo bu lɛ diɛŋtsɛ naa lɛ. Nɔmɔi bibii jeɔ shishi yɛ be kɛ bei amli, kɛ jɛmɔi kɛ niji ni afɔɔ ni etsɔɔɔ nɔ krɔŋkrɔŋ kwraa.”

Turnbull kɛɛ, “ni ekɛ hetsemɔ kɔɔyɔɔ ko aaaba ekoŋŋ lɛ,” osɔfoi ni kwɛɔ nɛkɛ he nɛɛ nɔ lɛ “shwieɔ krɔŋkrɔŋ-feemɔ henumɔ ko ni aaana lɛ kɛtsɔɔ nɔkwɛmɔ nɔ ni amɛ diɛŋtsɛ lɛ amɛfeɔ yɛ hiɛdɔɔ kɛ basabasa-feemɔ su mli lɛ nɔ.” Ewie amɛteŋ mɔ kome he akɛ “ewo atade yuu ko ni tamɔ asra-su ni tsii, ni eha eyitsei ahe fɛɛ kɛbashi enaji anaa ja ehiɛ pɛ, tamɔ Rasputin” ni “ekɛ gidigidi-feemɔ tsirɛɔ gbɛfalɔi lɛ kɛjɛɔ gbonyo bu lɛ naa kɛyaa sɛɛ, be fɛɛ be ni kuu ko ni baawo nyɔmɔ babaoo, ni ji gbɛfalɔi ni hiɛ kɛnɛrɛ (ni atsɛɔ amɛ jamɔ he gbɛfalɔi) aaapue, ni Rasputin kroko nyiɛ amɛhiɛ lɛ.” Tsɔɔlɔ nɛɛ kɛɛ akɛ, nɔ ni jɛɔ mli baa ji “bei loo basabasa-feemɔ ni baa mɛi ni ehiɛɛɛ kɛnɛrɛ lɛ kɛ mɛi ni hiɛ kɛnɛrɛ lɛ ateŋ, kɛ agbɛnɛ yɛ osɔfoi sɔrɔtoi lɛ ateŋ, ejaakɛ etamɔ nɔ ni jamɔ kui sɔrɔtoi ni kɛ amɛhe shiɔ akaŋ ni miitao be kɛ gbɛhe lɛ bɛ naagbee.”

Nilelɔ Turnbull hefatalɔ lɛ yɛ “he krɔŋkrɔŋ lɛ sɛɛ aaafee abasaŋ fioo ko jɛkɛmɔ, ni ekula shi, ni egbɔmɔtso lɛ fa etee ehe yɛ gbogbo lɛ mli fɔlɔ ko mli.” Turnbull gba akɛ: “Beni mikwɛɔ lɛ, eninejurɔ je kpo ni eetao shika ko waa yɛ ekotoku lɛ mli ni enaaa, shi enine kome hɔ fɔlɔ lɛ mli, ekpa mli tamɔ nɔ ni mɔ ko hiɛ mli yɛ jɛmɛ. Beni enyɛ ejie shika lɛ kɛtee fɔlɔ lɛ mli pɛ kɛkɛ ni aŋmɛɛ enine abɛku lɛ he, ni minaanyo lɛ te shi edamɔ shi . . . Nɔ ni ehiɛ yɛ ebɛku dɛ ji krɔs bibioo ko ni akɛ tso efee ni efa efɔ, ni osɔfo mɔ kome shihilɛ ni kwɛɔ no nɔ lɛ ni kula shi ni etee ehe yɛ nakai tɛkplo bibioo lɛ mli kɛmiimɛ mɔ kroko ni eeena etswa lɛ ojo lɛ, kɛ nu ni akɛɛ eji nu krɔŋkrɔŋ eshwa nɔ.”

Yesu Kristo na su ko ni tamɔ nakai yɛ mɛi ni ehe gbɛi lɛ ahe yɛ sɔlemɔ we lɛ, ni ekɛɛ amɛ akɛ amɛkɛ miifee “ojotswalɔi abuu.” (Luka 19:​45, 46) Lɛlɛŋ, jeee Yerusalem pɛ ‘ojotswalɔi abuu’ nɛɛ yɔɔ yɛ wɔgbii nɛɛ amli.

[He ni Mfoniri ni yɔɔ baafa 25 lɛ Jɛ]

Pictorial Archive (Near Eastern History) Est.