Saji ni Jɛ Shiwoo Shikpɔŋ lɛ Nɔ

Gerasa​—He ni Yudanyo kɛ Helanyo Kpe yɛ Lɛ

BƆFO Paulo ŋma akɛ “Yudanyo bɛ lɛ, Helanyo hu bɛ dɔŋŋ,” yɛ Abraham anɔkwa seshi lɛ mli. (Galatabii 3:​26-29) Hɛɛ, maŋ nɔ ni mɔ ko jɛ aloo emaŋ shihilɛ he ehiaaa yɛ sane ni kɔɔ Nyɔŋmɔ nɔkpɛlɛmɔ he lɛ mli.

Ekolɛ nɛkɛ wiemɔi nɛɛ baafee nɔ ni sa jogbaŋŋ kɛha Kristofoi ni egbɛ eshwa Roma kpokpaa ko nɔ, tamɔ Galatia kpokpaa Iɛ nɔ, he ni Yudafoi, Helabii Romabii, kɛ maŋbii lɛ diɛŋtsɛ fɛɛ efutu kɛyɔɔ he kome lɛ. Shi lsrael diɛŋtsɛ hei komɛi, tamɔ Gilead nɛkɛ hu?

Nakai kpokpaa lɛ yɛ Yordan bokagbɛ, yɛ Ŋoo Ŋshɔ (Ni Egbo) lɛ kɛ Galilea Ŋshɔ lɛ teŋ. Aaafee nɛkɛ shikpɔŋ tɛtrɛɛ ni nɔ kwɔ fioo, ni baa nii jogbaŋŋ nɛɛ teŋ gbɛ Yabok Faa lɛ maa enaa shi kɛjɛɔ kɛboteɔ Yordan mli. Mfoniri ni yɔɔ ŋwɛi gbɛ Iɛ miitsɔɔ Gerasa, ni amrɔ nɛɛ atsɛɔ jɛmɛ Jerash, ni bɛŋkɛ Yabok faa lɛ ŋwɛi gbɛ lɛ blema tsũi fɛfɛji ni etsɔmɔ tsũ koi lɛ ekomɛi.

Blema jarayeli gbɛ ko ni jɛɔ kooyigbɛ kɛbaa wuoyigbɛ, ni atsɛɔ lɛ “maŋtsɛ gbɛjegbɛ” lɛ tsɔɔ Gilead. Beni Yakob kɛ eweku lɛ shi Haran lɛ, eka shi faŋŋ akɛ amɛtsɔ nɛkɛ gbɛ nɛɛ nɔ kɛtee Yabok. Ekɛ ŋwɛibɔfo ko nɔ, ni ekɛ Esau hu kpe yɛ he ni abaato Gerasa shishi yɛ Iɛ masɛi. (1 Mose 31:​17-25, 45-47; 32:​22-30; 33:​1-17) Yɛ sɛɛ mli lɛ, lsraelbii lɛ fa kɛjɛ wuoyigbɛ kɛtsɔ maŋtsɛ gbɛjegbɛ lɛ nɔ beni amɛnyiɛɔ kɛyaa Shiwoo Shikpɔŋ lɛ nɔ lɛ. Akutsei enyɔ kɛ fa yahi shi yɛ Yabok kooyigbɛ kɛ wuoyigbɛ, yɛ jarayeli gbɛ lɛ masɛi.​—4 Mose 20:​17; 5 Mose 2:​26, 27.

Ani Helabii bana gbɛfaŋnɔ ko yɛ nɛkɛ shikpɔŋ nɛɛ nɔ, ni kɛ nakai lɛ, yɛ mɛɛ gbɛ nɔ? Hɛɛ, amɛfee nakai beni Alexander Kpeteŋkpele lɛ ye kpokpaa lɛ nɔ kunim lɛ. Taakɛ blema sane tsɔɔ lɛ, eto Gerasa maŋ lɛ eha esraafoi Iɛ ateŋ mɛi ni ekpa nitsumɔ lɛ. Fiofio kɛkɛ ni Helabii ashihilɛ bahe shi jogbaŋŋ yɛ jɛmɛ. Maŋtiasei nyɔŋma ni yɔɔ enɔyeli shishi yɛ Yordan kɛ Galilea Ŋshɔ Iɛ bokagbɛ lɛ bafee ekome kɛtsɔ kpaŋmɔ nɔ, ni abale amɛ akɛ Dekapoli. Ekolɛ ona nakai gbɛi lɛ yɛ Biblia lɛ mli da, he ni bɔɔ amaniɛ akɛ “mɛi pii jɛ Galilea kɛ Dekapoli kɛ Yerusalem kɛ Yudea kɛ Yordan sɛɛ nyiɛ [Yesu] sɛɛ” lɛ. Gerasa ji nakai Dekapoli maŋtiasei lɛ ateŋ ekome.​—Mateo 4:⁠25.

Eji Alexander yiŋtoo lɛ fa ko akɛ ekɛ Helabii baawo emaŋtsɛyeli hei sɔrɔtoi lɛ fɛɛ mli. Syria shishigbɛ [ni Dekapoli maji lɛ fata he], titri ji he ni Helabii lɛ ateŋ mɛi ni fa babaoo tee, akɛ hei ni hiaa waa lɛ ateŋ ekome. Ni kɛbashi ŋmɛnɛ, bokagbɛ je lɛ he ko kwraa bɛ ni yɔɔ blema Hela tsũi fɛfɛji babaoo ni etsɔmɔ amaŋfɔ tamɔ shikpɔŋ ni ka Yordan bokagbɛ lɛ. Hela maŋtiasei nɛɛ jie bɔ ni ato Helabii anitsumɔi kɛ kusumii ahe gbɛjianɔ jogbaŋŋ lɛ kpo fioo etsɔɔ​—Hela nyɔŋmɔi kɛ nyɔŋmɔ-yei lɛ asɔlemɔtsui kpeteŋkpelei, shwɛmɔ hei, maŋ hejuuhei, daa afi shwɛmɔ gbijuji ni ayeɔ, kɛ agbɛnɛ yɛ shihilɛi babaoo mli lɛ, jeŋ nilee skul sɔrɔtoi kɛ nikasemɔi hei wuji lɛ.’​—Hellenism, ni Norman Bentwich fee lɛ.

Kɛji oyakwɛ Gerasa maŋ ni etsɔ amaŋfɔ lɛ, obaana nibii saŋŋ ni maa enɛ nɔ mi. Maŋ kpee he, loo maŋ jarawoo he kokroo ko bɛŋkɛ ewuoyigbɛ agbo lɛ naa gbɛ, ni anyɛɔ anaa yɛ mfoniri lɛ mli. Ekolɛ hejuu hei, sɔlemɔtsui, shwɛmɔ hei, kɛ maŋ lɛŋ tsũi, ni agbala gbɛjegbɛi kɛ amɛhe nyiɛmɔ hei ni akɛ dadei akulashiŋi emamɔ he akɛtsara nɛkɛ hei nɛɛ ateŋ babaoo lɛ baaha onaa akpɛ ohe. Yɛ maŋtiase lɛ sɛɛ gbɛ lɛ, obaana ni akɛ shitoo tɛi loo okadii emamɔ shi yɛ blema gbɛjegbɛ ni jɛɔ Gerasa kɛyaa Dekapoli maŋtiasei krokomɛi, kɛ Mediteranea maji ni ji lɛji adaamɔ hei lɛ amli lɛ he fɛɛ.

Beni Roma baye Gerasa nɔ yɛ afi 63 D.Ŋ.B. sɛɛ po lɛ, Helabii anifeemɔ ka he ehi shi lolo. Obaanyɛ ofee bɔ ni amɛshihilɛ baanyɛ ana Yudafoi ni hi Gerasa kɛ nakai kpokpaa lɛ nɔ lɛ anɔ hewalɛ eha lɛ he mfoniri okwɛ. Wolo ni atsɛɔ lɛ Hellenism lɛ wie akɛ: “Ebalɛ fiofio moŋ, shi yɛ naagbee lɛ, Yudafoi lɛ bɔi gbɔmɛi ni ebɔle amɛ lɛ ajamɔ mli susumɔi lɛ kɛ nitsumɔ, ni amɛjwɛŋɔ Ŋmalɛi lɛ ahe yɛ hewalɛ ni nakai susumɔi lɛ na yɛ amɛnɔ lɛ naa.”

Eyɛ mli akɛ ekolɛ Yesu eshiɛɛɛ yɛ maŋtiase lɛ mli moŋ, shi etee Gerasa kpokpaa lɛ, ni ekolɛ emli lɛɛɔ kɛyashɛɔ Galilea Ŋshɔ lɛ naa lɛ nɔ. Efamɔ daimonioi kɛjɛ nuu ko mli yɛ nakai kpokpaa lɛ nɔ, ni eha amɛyabote kplotoi akuu ko mli. (Marko 5:​1-17) Eeenyɛ ebalɛ akɛ, emra be mli kaselɔi lɛ shiɛ amɛtsɔɔ Yudafoi ni yɔɔ Dekapoli maŋtiasei Iɛ amli lɛ, ni yɛ afi 36 Ŋ.B. sɛɛ lɛ, anyɛ akɛ sanekpakpa lɛ shɛ Helabii ni yɔɔ Gerasa lɛ aŋɔɔ. Ni kɛji gbɔmɔ ni kpɛlɛɔ Kristojamɔ nɔ lɛ ji mɔ ko ni kɛ ehe ekpɛtɛ Yuda jamɔ he gbagbalii jio, eji Yudanyo ni Hela kusum ena enɔ hewalɛ, aloo Helanyo jio, anɔkwa Nyɔŋmɔ lɛ baanyɛ akpɛlɛ enɔ akɛ Abraham mumɔŋ seshi lɛ fa.

[Shikpɔŋ he mfoniri ni yɔɔ baafa 24]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Dion

Gerasa (Jarash)

Philadelphia (Rabbah)

King’s Road

Salt Sea

Jerusalem

Jordan

Jabbok

Pella

Scythopolis (Beth-shean)

Gadara

Sea of Galilee

[He ni Sane lɛ Jɛ]

Edamɔ shikpɔŋ he mfoniri ni Pictorial Archive (Near Eastern History) Est. kɛ Survey of Israel yɔɔ he hegbɛ lɛ nɔ

[Mfoniri ni yɔɔ baafa 24]

Atɛŋ nɛkɛ mfoniri nɛɛ agbo yɛ 1992 Calendar of Jehovah’s’s Witnesses lɛ nɔ.

[He ni Sane lɛ Jɛ]

Pictorial Archive (Near Eastern History) Est.

[He ni Mfoniri ni yɔɔ baafa 25 lɛ Jɛ]

Pictorial Archive (Near Eastern History) Est.