Maŋtsɛyeli Jajelɔi Bɔ Amaniɛ

Mumɔŋ Heyeli yɛ Colombia

KƐJƐ Spain kunimyelɔi lɛ abeaŋ tɔŋŋ po lɛ, Katolek jamɔ ena hewalɛ kpele yɛ Amerika Wuoyigbɛ Maji anɔ yɛ jamɔ gbɛfaŋ. Etee nɔ ehi shi yɛ be babaoo mli akɛ Maŋ jamɔ yɛ Colombia. Afii 105 ni eho lɛ mli fɛɛ lɛ, Vatikan kɛ Colombia nɔyeli lɛ ehi kpaŋmɔ ko mli ni ebu sɔlemɔ lɛ he ni eha lɛ hegbɛi krɛdɛɛi komɛi yɛ woloŋlee mli tsɔsemɔ kɛ gbalashihilɛ he gbɛjianɔtoi amli.

Yɛ December 1990 mli lɛ, Colombiabii lɛ hala ajinafoi akuu ko koni amɛkwɛ ni amɛfee mlawoo he gbɛjianɔtoo hee, ni amɛtsu enɛ amɛgbe naa yɛ 1991 teŋ gbɛ. Mla gbɛjianɔtoo hee lɛ tsakeɔ jamɔŋ shihilɛ ni yɔɔ Colombia lɛ. Amrɔ nɛɛ mla lɛ buɔ jamɔi fɛɛ akɛ amɛŋmɛɔ pɛpɛɛpɛ, ni anyɛŋ anyɛ gbekɛbii anɔ awo jamɔ mli tsɔɔmɔ ko mli dɔŋŋ yɛ maŋ skul sɔrɔtoi lɛ amli. Aasaa aakwɛ kpaŋmɔ ni akɛ Vatikan efee lɛ mli ekoŋŋ, yɛ be mli ni nɛkɛ mla gbɛjianɔtoo hee nɛɛ mli tsakemɔi yɔɔ jwɛŋmɔ mli lɛ.

Nɛkɛ jamɔ mli heyeli kpele nɛɛ baaba hewalɛ ni Katolek Sɔlemɔ lɛ naa yɛ mɛi anɔ lɛ shi, ni eeeha efee mlɛo eha mɛi ni yɔɔ jalɛ tsui lɛ ni amɛna Biblia mli nilee, ni amɛnine ashɛ mumɔŋ heyeli nɔ.

Yɛ mumɔŋ heyeli ni amɛkpaa gbɛ nɛɛ hewɔ lɛ, Yehowa Odasefoi 51,000 ni yɔɔ nakai maŋ lɛ mli lɛ miisaa amɛhe amɛmiito koni amɛkɛtsu mumɔŋ abobalɔi nɛɛ ahe nii. Eshwɛ fioo ni abaagbe amɛ nitsumɔ he nine tsũi heei ni akɛbaalɛɛ nitsumɔ lɛ mli, kɛ wolo kalamɔ tsɔne ni kalaa nii yɛ sui sɔrɔtoi fɛɛ mli lɛ he nitsumɔ naa. Akɛ be kukuoo mli gbɛgbalɔi krɛdɛɛi etee maji bibii amli koni amɛyatao Yehowa tooi ni elaaje lɛ, ni amɛtsu Biblia mli tsɔsemɔ nitsumɔ ko ni yɔɔ naakpɛɛ. Ato asafoi heei kɛ kui 47 shishi yɛ maji 63 mli, ni maji nɛɛ eko fɛɛ eko mli bii ayifalɛ shɛɔ 10,000.

Yɛ be mli ni Yehowa mumɔ lɛ yaa nɔ etsirɛɔ gbɔmɛi ni yɔɔ jalɛ tsuii lɛ, belɛ obalaŋtai babaoo hu miihere nɔ. Questions Young People Ask​—Answers That Work wolo lɛ efee yelikɛbuamɔ nɔ ni he yɔɔ sɛɛnamɔ waa kɛha obalaŋtai kɛ amɛfɔlɔi fɛɛ. Odasefonyo ko ni miiya shia kɛ shia lɛ kɛ nuu ko ni ekane wolo nɛɛ fai komɛi, beni enaanyo ko kɛma lɛ lɛ kpe. Ena nilee diɛŋtsɛ ni ejieɔ lɛ kpo yɛ weku mli naagbai ahe nitsumɔ mli lɛ he miishɛɛ waa. Yitso 4, ‘Mɛni Hewɔ Ataa kɛ Awo Mli Gbala Lɛ?” titri ha ena miishɛɛ waa, ejaakɛ ekɛ eŋa teŋ miihe agbala. Ekɛɛ wolo nɛɛ jie lɛ kɛjɛ amanehulu kpele ni kulɛ eyaabote mli lɛ mli. Amrɔ nɛɛ ekɛ eweku lɛ fɛɛ kɛ Yehowa Odasefoi miikase Biblia lɛ, ni amɛyaa asafoŋ kpeei hu fɛɛ. Amɛdaa shi waa yɛ nilee ni anyɛɔ atsuɔ he nii, ni Yehowa kɛhaa kɛtsɔɔ Biblia lɛ kɛ egbɛjianɔtoo lɛ nɔ lɛ he.

Nɛkɛ niiashikpamɔ nɛɛ feɔ mumɔŋ heyeli ni anaa bianɛ yɛ Colombia, yɛ be mli ni Yehowa Odasefoi yeɔ buaa gbɔmɛi ni mumɔŋ hɔmɔ yeɔ amɛ lɛ koni amɛkase Yehowa naakpɛɛ yiŋtoi kɛ ejeŋ hee ni ebɛŋkɛ kpaakpa lɛ he nii lɛ he mfoniri.​—2 Petro 3:⁠13.