“Dani Gɔji Lɛ Ba”
“BO OHl shi aahu akɛ wɔ shihilɛ he yɛ yinɔi fɛɛ mli. Dani gɔji lɛ ba aloo oha shikpɔŋ lɛ kɛ je lɛ ba shihilɛ mli lɛ, no mli lɛ bo ji Nyɔŋmɔ kɛjɛ naanɔ kɛmiiya naanɔ.” (Lala 90:1, 2, New International Version) Wɔ-Bɔlɔ lɛ akɛ wie nakai wiemɔi lɛ, ni kwɛ bɔ ni amɛhaa mɔ mii shɛɔ ehe haa—titri lɛ ŋmɛnɛ, ni nɔ ko kwraa bɛ shiŋŋ lɛ!
Mɛi fioo pɛ yɔɔ hiɛnɔkamɔ kɛha wɔsɛɛ, yɛ shika helɛtemɔ shihilɛ ni fiteɔ daa nɛɛ mli. Bɔ ni awuiyeli kɛ tsofai fɔji kɛ nitsumɔ efa babaoo lɛ etsake maŋtiasei komɛi efee lɛ tawuu hei. Nakai gbɛjianɔtoo ni etsɛ fe fɛɛ, ni ji weku lɛ po miidĩdaa. Wɔnuɔ saji heei ni wɔnuko eko da, tamɔ nuu kɛ nuu wekui nɛkɛ. Wekui ni yɔɔ fɔlɔi komekomei lɛ ayi miifa daa gbi, ni bei pii lɛ, fɔlɔ kome nɛɛ kpeeɔ nɔnyɛɛ kpele shihilɛ naa. Toiŋjɔlɛ ni yɔɔ wekui pii amli lɛ efite kwraa kɛtsɔ musubɔɔ nifeemɔi, tamɔ hefatalɔ yii kɛ gbekɛbii aniseniianifeemɔ nɛkɛ nɔ.
Namɔ baakudɔ wɔ kɛtsɔ nɛkɛ jaramɔ bei nɛɛ amli? Ojogbaŋŋ, ŋaawoo sɛɛ efoko kɛjɛko jwɛŋmɔ kɛ ŋaa he nilelɔi, tsɔɔlɔi, kɛ mɛi krokomɛi aŋɔɔ, shi pii teɔ shi woɔ amɛhe. Dr. Benjamin Spock ji ŋaawolɔ ni ale lɛ fe fɛɛ yɛ yinɔ muu fɛɛ mli yɛ Anaigbɛ maji amli, yɛ saji ni kɔɔ gbekɛbii atsɔsemɔ he lɛ gbɛfaŋ. Kɛkɛ ni ekpɛlɛ nɔ akɛ tɔmɔ yɛ ŋaawoo ni ekɛha lɛ he!
Kwɛ bɔ ni nilee yɔɔ mli waa akɛ Nyɔŋmɔ aaafee wɔ “shihilɛ he”! Tɛsaa ni yɔɔ shiŋŋ ji lɛ, yɛ nɛkɛ basabasa shihilɛ be nɛɛ mli, ni eyɛ “kɛjɛ naanɔ kɛmiiya naanɔ.” Etsɔ gbalɔ Maleaki nɔ ewie yɛ lɛ diɛŋtsɛ ehe akɛ: “Mi Yehowa lɛ, mitsakeee.” (Maleaki 3:6) Anyɛɔ akɛ he fɔɔ tɛi ni Nyɔŋmɔ efolɔ eshwie shi, taakɛ aŋmala yɛ Biblia lɛ mli lɛ nɔ kwraa kɛmɔɔ shi. Eyɛ “dani gɔji lɛ ba,” ni eŋaawoo, ni nine nyɛɔ shɛɔ nɔ yɛ Ŋmalɛ Krɔŋkrɔŋ lɛ mli lɛ damɔ enaanɔ nilee lɛ nɔ. No ji nɔ tuuŋtu ni he hiaa wɔ kɛha miishɛɛnamɔ kɛ omanyeyeli.
Belɛ, nilee yɛ mli akɛ aaana hekɛnɔfɔɔ yɛ Nyɔŋmɔ Wiemɔ, Biblia lɛ mli. Kasemɔ ni ona Nyɔŋmɔ nilee lɛ he sɛɛ. Okɛ ohe afɔ nɔ ni okaseɔ lɛ nɔ, ni oha efee la ni tsɔɔ bo gbɛ yɛ wala gbɛ lɛ nɔ. (Lala 119:105) Mɛi ni feɔ nakai lɛ pɛ yɔɔ wɔsɛɛ be shihilɛ he hiɛnɔkamɔ kɛ jwɛŋmɔŋ toiŋjɔlɛ kpakpa hu.