Bei Etsake
KWƐ miishɛɛ ni eeeji akɛ aaahi shi yɛ blema Israel, yɛ Maŋtsɛ Salomo anɔkwafo lɛ nɔyeli ni yɔɔ nyam lɛ shishi! Eji toiŋjɔlɛ, shweremɔ, kɛ miishɛɛ yinɔ. Be mli beni Salomo kɛ anɔkwayeli damɔ shi shiŋŋ kɛfi anɔkwa jamɔ sɛɛ lɛ, Yehowa jɔɔ maŋ lɛ ni eshwere babaoo. Jeee ninamɔ kpele pɛ Nyɔŋmɔ ha Maŋtsɛ Salomo, shi moŋ “tsui ni le nii ni yooɔ sane sɛɛ hu,” bɔni afee ni Salomo aye nɔ yɛ jalɛ kɛ suɔmɔ mli. (1 Maŋtsɛmɛi 3:12) Biblia lɛ kɛɔ akɛ: “Shikpɔŋ lɛ nɔ maŋtsɛmɛi fɛɛ tao Salomo hiɛ akwɛ, ní amɛbo enilee ni Nyɔŋmɔ kɛwo etsuiŋ lɛ toi.”—2 Kronika 9:23.
Yehowa ha gbɔmɛi lɛ shweshweeshwe shihilɛ, toiŋjɔlɛ, kɛ nibii kpakpai babaoo. Nyɔŋmɔ Wiemɔ lɛ kɛɔ akɛ: “Yuda kɛ Israel yi fa babaoo, tamɔ ŋshɔ naa shia kɛ falɛ, amɛyeyeɔ nii, amɛnunuɔ dãa, ni amɛmli filiɔ amɛ.” “Ni Salomo yinɔ fɛɛ lɛ, [gbɔmɛi lɛ] hi shi shweshweeshwe, mɔ fɛɛ mɔ yɛ eweintso shishi kɛ egbamitso shishi,” yɛ shihilɛ diɛŋtsɛ mli kɛ mfoniri-feemɔŋ hu.—1 Maŋtsɛmɛi 4:20; 5:5.
Bei etsake. Esoro shihilɛ ni yɔɔ ŋmɛnɛ lɛ kwraa yɛ nakai miishɛɛ bei ni eho etsɛ lɛ ahe. Akɛ nɔ ni tamɔɔɔ Salomo be lɛ, naagba titri ko ni yɔɔ ŋmɛnɛ ji ohia. Ohia yɛ maji ni yɔɔ nii waa lɛ po amli. Akɛ nɔkwɛmɔ nɔ lɛ, yɛ United States kɛ Europa Ekomefeemɔ lɛ fɛɛ mli lɛ, gbɔmɛi aaashɛ oha mlijaa 15 yɛ ohia shihilɛ mli, taakɛ Jeŋmaji Ekomefeemɔ lɛ Hiɛyaa he Gbɛjianɔtoo lɛ tsɔɔ lɛ.
Yɛ bɔ ni shihilɛ lɛ ji yɛ je lɛŋ fɛɛ lɛ he lɛ, The State of the World’s Children 1994, ni ji UNICEF (United Nations Children’s Fund) amaniɛbɔɔ lɛ, tsɔɔ mli akɛ je lɛŋ bii fɛɛ ayifalɛ mlijaa enumɔ mli ekome yɛ ohia futaa shihilɛ mli, ni ekɛfata he akɛ shihilɛ lɛ “miiya nɔ emli miiwa ni eefee jaramɔ sane” kɛmiiha ohiafoi ni yɔɔ je lɛŋ lɛ ateŋ mɛi babaoo.
Yɛ maji komɛi anɔ lɛ, nibii ajara ni yaa ŋwɛi waa lɛ miiha ohiafoi lɛ ahaomɔi lɛ miiwo wu. Yoo ko ni jɛ Afrika maŋ ko nɔ lɛ wie akɛ: “Oyaa jara nɔ ni onaa nɔ ko, ni okɛɔ akɛ, ‘EHI, miiya shia ni miyakɔ shika maba ni mibahe.’ Ŋmɛlɛtswaa kome sɛɛ kɛ oku osɛɛ oba ekoŋŋ lɛ, abaakɛɛ bo akɛ shika ni ohiɛ lɛ shɛɛɛ ejaakɛ aŋmɛ nɔ. Te gbɔmɔ baafee tɛŋŋ? Eyɛ nijiaŋwujee waa.”
Yoo kroko hu ni jɛ jɛmɛ wie akɛ: ‘Wɔjieɔ wɔjwɛŋmɔ kɛjɛɔ wɔ hiamɔ nii krokomɛi anɔ koni wɔnyɛ wɔhi shi. Amrɔ nɛɛ, bɔ ni wɔɔfee wɔna niyenii pɛ he wɔsusuɔ daa gbi.’
Taakɛ Jeŋmaji Ekomefeemɔ lɛ tsɔɔ lɛ, hiɛnɔkamɔ kpakpa ko bɛ kɛha wɔsɛɛ. Akɛ nɔkwɛmɔ nɔ lɛ, UNICEF buɔ akɔntaa akɛ, kɛji bɔ ni gbɔmɛi ayifalɛ yaa hiɛ lɛ baatsa nɔ nakai lɛ, no lɛ ohiafoi ni yɔɔ jeŋ fɛɛ lɛ ayifalɛ baaku abɔ he toi ejwɛ “yɛ yinɔ koome pɛ mli.”
Ni kɛlɛ, yɛ shika helɛtemɔ kɛ adesai ashihilɛ diɛŋtsɛ ni yaa nɔ efiteɔ lɛ fɛɛ sɛɛ lɛ, Nyɔŋmɔ tsuji yɛ yiŋtoo ni baaha amɛkpa wɔsɛɛ be kpakpa gbɛ. Eyɛ mli akɛ amɛyɛ mɛi ni kwɛɔ wɔsɛɛ be gbɛ kɛ gbɛkpamɔ ni ehiii lɛ ateŋ moŋ, shi Nyɔŋmɔ tsuji kwɛɔ wɔsɛɛ be gbɛ kɛ miishɛɛ kɛ hekɛnɔfɔɔ. Sane ni nyiɛ sɛɛ lɛ baatsɔɔ yiŋtoi ahewɔ ni amɛfeɔ nakai lɛ amli.
[He ni Mfoniri ni yɔɔ baafa 3 lɛ Jɛ]
De Grunne/Sipa Press