“Mi Jara Wa Kɛha Yehowa!”

YEHOWA tsuji anɔkwafoi babaoo ŋmɛɔ amɛtsui shi yɛ henumɔi akɛ sɛɛnamɔ ko bɛ amɛhe lɛ he ta ni amɛwuɔ be fɛɛ be yɛ nɛkɛ “jaramɔ bei” nɛɛ amli lɛ mli. (2 Timoteo 3:1) Enɛ bɛ naakpɛɛ, ejaakɛ Satan “ŋaatsɔ̃ɔi” lɛ ekome ji ni eha wɔnu he akɛ, wɔ Bɔlɔ lɛ po sumɔɔɔ wɔ! (Efesobii 6:11) Esa jogbaŋŋ akɛ April 1, 1995 Buu-Mɔɔ lɛ hiɛ saji enyɔ ni esa akɛ asafo lɛ akase ni eyitso ji “Ojara Wa yɛ Nyɔŋmɔ Hiɛ!” kɛ “Wɔhiɛ Adɔ Suɔmɔ kɛ Nitsumɔi Kpakpai Ahe—Yɛ Mɛɛ Gbɛ Nɔ?” Ato nikasemɔi nɛɛ ahe gbɛjianɔ koni ekai wɔ akɛ Yehowa buɔ wɔ mɔdɛŋbɔɔi lɛ akɛ amɛjara wa. Nɔ ni nyiɛ sɛɛ nɛɛ ji hiɛsɔɔ wiemɔi komɛi ni nine shɛ nɔ:

“Wolo tɛtrɛɛ ko nako minɔ hewalɛ babaoo yɛ afii 27 ni mikɛhi shi akɛ Yehowa Odasefoi lɛ ateŋ mɔ kome lɛ tamɔ enɛ. Minyɛɛɛ nɔ ko mafee akɛ ja yaafo—saji nɛɛ kɛ hejɔlɛ babaoo baha mi. Agbɛnɛ minuɔ he akɛ Yehowa sumɔɔ mi babaoo. Etamɔ nɔ ni awo jatsu agbo ko kɛjɛ mikɔŋ nɔ.”—C. H.

“Mikane wolo tɛtrɛɛ nɛɛ shii ejwɛ yɛ gbi kome mli. Minya bɔ ni sane lɛ kɛɛ akɛ, kɛ oheɔ oyeɔ akɛ sɛɛnamɔ ko bɛ ohe lɛ belɛ atsɔɔ bo amale lɛ he. Mikɛ nikasemɔ nɛɛ baatsu nii yɛ nyɛmimɛi asaramɔ kɛ shia kɛ shia shiɛmɔ mli.”—M. P.

“Satan ebɔ mɔdɛŋ waa yɛ bɔ ni eha mɛi ni sumɔɔ Yehowa lɛ po nuɔ he akɛ sɛɛnamɔ bɛ amɛhe ni asumɔɔɔ amɛ lɛ hewɔ. Ni ‘tsulɔ anɔkwafo’ kuu lɛ aaakai wɔ akɛ Yehowa sumɔɔ wɔ waa, ni akɛ ehiɛ sɔɔ nibii bibiibii ni wɔfeɔ wɔhaa lɛ lɛ fɛɛ ji nibii ni woɔ mɔ hewalɛ waa ni mikane lɛ ateŋ ekome. Mikɛ afii pii ena henumɔi ni nyɛwie he yɛ saji nɛɛ amli lɛ. Minuko he dã akɛ Yehowa suɔmɔ lɛ sa mi, no hewɔ lɛ mibɔ mɔdɛŋ ni mafee babaoo yɛ esɔɔmɔ mli akɛ gbɛ ni matsɔ nɔ mana nakai suɔmɔ lɛ. Shi fɔyeli kɛ hiɛgbele ji nɔ ni kanya mi. No hewɔ lɛ, bɔ fɛɛ bɔ ni ŋmɛlɛtswaa abɔ ni mikɛwoɔ sɔɔmɔ lɛ mli lɛ fa ha, loo gbɔmɛi abɔ ni miyeɔ mibuaa amɛ lɛ ji ha lɛ, minuɔ he akɛ efaaa. Nɔ ni minaa pɛ ji nɔ ni minyɛɛɛ mafee lɛ. Agbɛnɛ, kɛ mijɛ suɔmɔ mli misɔmɔ Yehowa lɛ, minuɔ he akɛ eeŋmɔ ni ehiɛ sɔɔ mi. Enɛ haa suɔmɔ ni miyɔɔ kɛha lɛ lɛ daa agbo be fɛɛ be, ni ehaa misumɔɔ akɛ mafee babaoo. Amrɔ nɛɛ minuɔ miishɛɛ babaoo he kɛjɛɔ sɔɔmɔ ni mikɛhaa Yehowa lɛ mli.”—R. M.

“Enɛɛmɛi ji saji ni hi fe fɛɛ, ni tswaa mɔ maa shi fe fɛɛ, hɛɛ, saji ni ekaaa ni saa wɔtsuii ahe ni mikane pɛŋ! Mikɛ afii 55 ekane Buu-Mɔɔ lɛ, ni nɔ ni akala lɛ ateŋ babaoo kɛ tsakemɔi eba. Shi nɔ ni akala nɛɛ fe nɔ fɛɛ nɔ ni wɔnine eshɛ nɔ pɛŋ ni baajɔɔ wɔ yiŋkɔshikɔshi feemɔi, nibii ni wɔsumɔɔɔ, kɛ gbeyeishemɔi akɛ ‘wɔsaaa’ ni ‘asumɔɔɔ wɔ’ ni wɔnyɛŋ wɔfee babaoo ni ‘wɔkɛna’ Yehowa suɔmɔ lɛ he. Mumɔŋ yelikɛbuamɔ ni he hiaa wɔ nyɛmimɛi lɛ waa lɛ yɛ nɛkɛ Buu-Mɔɔ nɛɛ mli. Mijwɛŋmɔ ji ni mikɛ saji nɛɛ atsu nii shii abɔ beni misaraa nyɛmimɛi lɛ.”—F. K.

“Kɛha wɔ mɛi ni wɔkɛ bulɛ ni wɔbɛ kɛha wɔhe loo wɔkɛ he-nyaŋemɔ henumɔ po peleɔ lɛ, ákɛ wɔɔbua wɔ hewalɛ naa ni wɔya nɔ yɛ anɔkwale lɛ mli lɛ baawa waa. Nɔ ni aŋma nɛɛ jie mɔbɔnalɛ kɛ shishinumɔ ni mli kwɔ waa kpo, etamɔ nɔ ni akɛ tsofa ni jɔɔ piŋmɔ he, ni tsaa mɔ, ni saa tsui lɛ he miitsu nii. Kwɛ bɔ ni eshɛjeɔ mɔ mii akɛ aaakane wiemɔ ni tamɔ nɛkɛ yɛ Buu-Mɔɔ lɛ mli, ni ale ni ŋwanejee ko bɛ he akɛ, Yehowa nuɔ shishi! Miida nyɛ shi akɛ nyɛkai wɔ akɛ Yehowa ebɔɔɔ mɔdɛŋ akɛ eeetsɔ fɔyeli, hiɛgbele, loo gbeyeishemɔ nɔ ekanya ewebii. Eyɛ mli akɛ nɔ ni mifeɔ yɛ shiɛmɔ nitsumɔ lɛ mli lɛ eba shi waa nyɛsɛɛ nɛɛ yɛ shika he naagbai kɛ gbɔmɔtsoŋ hewalɛnamɔ he naagbai ni yɔɔ wɔ weku lɛ mli hewɔ moŋ, shi mitsui nyɔɔ mimli lolo yɛ nɔ ni minyɛɔ mifeɔ lɛ mli. Minaa akɛ, kɛ mibɔ mɔdɛŋ miha suɔmɔ fee mihewalɛ ni kanyaa mi lɛ, minaa miishɛɛ yɛ sɔɔmɔ lɛ mli.”—D. M.

“Migbe ‘Ojara Wa yɛ Nyɔŋmɔ Hiɛ!’ lɛ kanemɔ naa etsɛko. Kuku fɛɛ kuku ha yaafonui yimɔ mihiŋmɛiiaŋ. Mijɛ weku ni suɔmɔ fioo ko pɛ amɛjie kpo amɛtsɔɔ mli. Agbe mihe guɔ, aye mihe fɛo, ni aŋmɔ mi. No hewɔ lɛ, mishihilɛ shishijee mra mli ni minu he akɛ sɛɛnamɔ bɛ mihe. Tsutsu henumɔi ni nyɛɔ minɔ kɛ mikɛ haomɔ ko kpe lɛ eka mihe lolo. Beni mikpa sɔɔmɔ akɛ asafoŋ onukpa lɛ, minu he akɛ minine enyɛ shi—yɛ Nyɔŋmɔ, miweku lɛ, kɛ minyɛmimɛi ni yɔɔ asafo lɛ mli lɛ ahiɛ, taakɛ efɔɔ kaa lɛ. Nɛkɛ henumɔi nɛɛ eyaaa oya, shi sane ni ba yɛ ebe naa pɛpɛɛpɛ nɛɛ eye ebua mi koni maŋmɛ pɛpɛɛpɛ bɔ ni sa. Eha bɔ ni mikwɛɔ shihilɛ mihaa lɛ mli etse keŋkeŋ.”—D. L.

“Miida nyɛ shi yɛ sane, ‘Ojara Wa yɛ Nyɔŋmɔ Hiɛ!’ lɛ hewɔ. Mitsuɔ hetsɛ̃ ni mli wa waa ni minaa mihaa mihe kɛ henumɔi ni mli wa ni kɔɔ sɛɛnamɔ ni bɛ mihe, ni jɛ niseniianii ni afee mi yɛ migbekɛbiiashi lɛ ahe nii. Esa jogbaŋŋ akɛ aaabu susumɔ ni ejaaa nɛɛ akɛ Satan ŋaatsɔɔ nifeemɔ diɛŋtsɛ. Ebaanyɛ efite suɔmɔ ni mɔ ko yɔɔ akɛ eeehi wala mli lɛ po. Yɛ anɔkwale mli lɛ, esa akɛ matsu nii daa gbi ni mikɛte shi miwo amale akɛ asumɔɔɔ mi lɛ. Sane nɛɛ tsɔɔ babaoo kɛhaa mi fe bɔ ni nyɛaanyɛ nyɛle.”—C. F.

“Ŋmɛnɛ, nyɛmimɛi lɛ kpɛlɛɔ susumɔ akɛ Yehowa hiɛ sɔɔ nifeemɔi ni suɔmɔ kanyaa lɛ fe yisɛɛtsirɛmɔ loo nɔnyɛɛ lɛ nɔ titri. Yehowa su kɛ baŋ ni miishɛɛ kɛ hedɔɔ yɔɔ mli, miishɛɛ ni eyɔɔ yɛ ewebii ahe akɛ aŋkroaŋkroi, kɛ suɔmɔ gbɛ ni etsɔɔ nɔ ekɛ ehe haa lɛ he susumɔ shɛjeɔ mɔ mii ni ekanyaa mɔ. Yɛ enɛ hewɔ lɛ, beni wɔnine shɛ sane ni aŋma, ni ji ‘Ojara Wa yɛ Nyɔŋmɔ Hiɛ!’ lɛ nɔ nɔŋŋ lɛ, mɛi pii jie hiɛsɔɔ ni amɛna lɛ kpo. Etamɔ nɔ ni eegbele gbɛ koni mɛi pii ana amɛkɛ Yehowa teŋ tsakpaa ni bɛŋkɛ babaoo. Mikɛ miŋa miisumɔ ni wɔjie hiɛsɔɔ kpo yɛ bɔ ni aŋma wiemɔi lɛ aha kɛ henumɔ ni ajieɔ lɛ kpo yɛ Buu-Mɔɔ ni baa nyɛsɛɛ nɛɛ amli lɛ he. Wɔmiito gbɛjianɔ koni wɔkɛ otii nɛɛ pii atsu nii yɛ be mli ni wɔsaraa asafoi lɛ.”—Ejɛ nɔkwɛlɔ gbɛfalɔ ŋɔɔ.

“Mifee nikanelɔ anɔkwafo afii 30, shi mikaneko nɔ ko ni kanyaa mɔ, ni woɔ mɔ hewalɛ tamɔ nɛkɛ da. Ŋmalɛi ni akɛtsu nii yɛ hesaa kɛ gbɛ ni mli wa waa nɔ lɛ eye ebua mi koni mafamɔ amalei ni etee ehe yɛ mi diɛŋtsɛ mihenumɔi amli lɛ, ni eha minyɛ mibɛŋkɛ Yehowa he kpaakpa. Mikɛ fɔyeli sɔmɔ Yehowa afii pii. Yitsoŋ nilee ni kɔɔ kpɔmɔ nɔ lɛ kɛ Nyɔŋmɔ suɔmɔ lɛ he pɛ miyɔɔ. Miida nyɛ shi yɛ sɛɛyoomɔ kɛ shishinamɔ he saji ni tamɔ nɛkɛ he. Miikpa gbɛ akɛ makane babaoo ni tamɔ nɛkɛ.”—M. S.

“Yɛ afii 29 ni mikɛhi anɔkwale lɛ mli lɛ fɛɛ mli lɛ, minyɛŋ makai be mli ni nikasemɔ ko etee shidaa kɛ henumɔ ni mli wa waa shi yɛ mimli tamɔ nɛkɛ. Eyɛ mli akɛ, alɛ mi yɛ weku ni susuɔ mɔ he kɛ suɔmɔ babaoo mli moŋ, shi minuko he da akɛ misa wala mli ni miyɔɔ lɛ, aahu ni mafee mɔ ni sa akɛ esɔmɔɔ Yehowa. Nikanemɔ nɛɛ sɛɛ pɛ ni mikula shi yɛ minakutsei anaa, ni mikɛ yaafo babaoo da Yehowa shi. Masumɔ sane ni aŋma nɛɛ kɛya naanɔ. Makwɛ mihe yɛ gbɛ kroko nɔ, ejaakɛ minu shishi bianɛ akɛ mi jara wa kɛha Yehowa.”—D. B.