Maŋtsɛyeli Jajelɔi Bɔ Amaniɛ
Foijee Kɛmiiba Yehowa Teokrase Gbɛjianɔtoo lɛ Mli
JEEŊMƆ beebe ni akanya gbalɔ Yesaia ni ejaje akɛ: ‘Esa akɛ amɛwo Yehowa hiɛ nyam yɛ ŋshɔkpɔi lɛ anɔ.’ (Yesaia 24:15) Yehowa Odasefoi buɔ ŋshɔkpɔi lɛ akɛ eji “je nɛɛŋ,” he ni Yesu wie akɛ esa akɛ “ashiɛ sanekpakpa lɛ” yɛ lɛ fã.—Mateo 24:14; Marko 13:10.
Marquesas Ŋshɔkpɔi lɛ yɛ aaafee kilomitai 1,400 yɛ Tahiti kooyi-bokagbɛ. Amɛfata ŋshɔkpɔi akuu ni etse amɛhe banee, ni yɔɔ Pasifik Wuoyigbɛ ŋshɔ lɛ mli, ni atsɛɔ amɛ French Polynesia lɛ ahe. Akɛni jɛmɛ shikpɔŋ sũ lɛ jɛ lasu gɔŋ mli, ni ebaa nii jogbaŋŋ, ni kɔɔyɔɔ mli dɔɔ ni nugbɔ nɛɔ babaoo yɛ jɛmɛ hewɔ lɛ, kwɛ̃ɛnii baa jogbaŋŋ yɛ ŋshɔkpɔi nɛɛ anɔ. Shi, Marquesas ŋshɔkpɔi lɛ miiwo yibii kroko hu. Susumɔ weku ko ni bo Maŋtsɛyeli shɛɛ sane lɛ toi yɛ Hiva Oa ŋshɔkpɔ lɛ nɔ lɛ sane lɛ he okwɛ.
Jean kɛ eŋa, Nadine mii shɛɛɛ amɛhe yɛ nɔ ni afɔɔ lɛ tsɛmɔ akɛ hiŋmɛigbelemɔ shihilɛ ni yɔɔ Europa Anaigbɛ, ni amɛyɔɔ mli lɛ he. No hewɔ lɛ amɛkpɛ amɛyiŋ akɛ amɛbaashi shihilɛ ni mli wa nɛɛ mli, ni amɛkɛ amɛbi lɛ afã kɛyahi Marquesas Ŋshɔkpɔi lɛ anɔ. Amɛshia hee, ni akɛ pamplo mã lɛ, yɛ jɔɔ ko mli yɛ he ko banee. Ja amɛnyiɛ aahu ŋmɛlɛtswai enyɔ, kɛtsɔ gɔji anɔ gbɛ ni nɔ yɔɔ dokoidokoi nɔ, dani amɛbashɛɔ amɛ akutsoŋbii ni bɛŋkɛ amɛ fe fɛɛ lɛ aŋɔɔ. Akrowa ni bɛŋkɛ amɛ fe fɛɛ, ni yɔɔ datrɛfonyo, skul, kɛ shwapo ni da saŋŋ ni anyɛɔ ayeɔ jara yɛ mli lɛ, heɔ ŋmɛlɛtswai etɛ kɛ́ akɛ tsɔne miiya jɛmɛ.
Jean kɛ Nadine bɛ Nyɔŋmɔ jamɔ saji ahe miishɛɛ. Shi kɛlɛ, amɛkɛ mɛi gbaa bɔ ni fee ni wala je shishi lɛ he saji. Bei pii lɛ, amɛwieɔ sutsakemɔ tsɔɔmɔ ni yɔɔ haŋtsii, ni akaa hiɛ atsɔɔ lɛ he wiemɔi babaoo. Shi tsɔɔmɔi ni amɛkaa amɛhiɛ amɛtsɔɔ nɛɛ eko kwraa haaa amɛtsui anyɔ amɛmli.
Beni amɛtee nɔ amɛ kome pɛ amɛkɛ afii ekpaa hi shi yɛ he ni etse ehe banee lɛ sɛɛ lɛ, amɛnaa kpɛ amɛhe akɛ gbi ko lɛ Yehowa Odasefoi enyɔ basara amɛ. Odasefoi lɛ ná amɛle he ni Jean kɛ Nadine yɔɔ kɛjɛ akrowa ni bɛŋkɛ jɛmɛ lɛ mli bii lɛ adɛŋ. Taakɛ amɛfɔɔ feemɔ lɛ, sanegbaa lɛ tsa nɔ kɛtee sutsakemɔ tsɔɔmɔ lɛ he wiemɔ mli. Gbalashihilɛ mli hefatalɔi nɛɛ ná he miishɛɛ waa akɛ Odasefoi lɛ hiɛ Life—How Did It Get Here? By Evolution or by Creation? wolo lɛ, ni Yehowa Odasefoi Asafo lɛ fee lɛ eko. Ebaŋɔɔ Jean kɛ Nadine naa waa akɛ amɛná wolo ko ni pɛiɔ bɔ ni fee ni wala je shishi lɛ he saji amli fitsofitso.
Be fioo sɛɛ lɛ, aje Biblia mli nikasemɔ shishi. Aaafee afii etɛ sɛɛ lɛ, Jean kɛ Nadine tee hiɛ waa yɛ nikasemɔ lɛ mli. Amɛbahe amɛye akɛ etsɛŋ kwraa ni abaafee shikpɔŋ muu lɛ fɛɛ paradeiso. Beni amɛweku lɛ da kɛyashɛ bii etɛ lɛ, gbɛfaa kɛha Kristofoi akpeei yaa yɛ Maŋtsɛyeli Asa lɛ nɔ, ni heɔ ŋmɛlɛtswai ejwɛ lɛ, bafee kaa diɛŋtsɛ kɛha amɛ. Shi kɛlɛ, no etsiii amɛnaa ni amɛkaya kpeei. Yɛ naagbee lɛ, Jean kɛ Nadine kɛ nu mli baptisimɔ fee amɛ henɔjɔɔmɔ kɛha Yehowa lɛ he okadi. Amɛfee enɛ yɛ kpee wulu ko ni afee yɛ akrowa wulu lɛ mli, he ni mɛi ni fa fe fɛɛ ni ba lɛ ayifalɛ ji 38 lɛ shishi!
Bɔni afee ni amɛye amɛbua Maŋtsɛyeli shiɛlɔi akuu bibioo lɛ, weku lɛ kpɛ amɛyiŋ akɛ amɛbaashi amɛshia ni etse ehe banee lɛ. Amɛfã kɛyahi akrowa ni mɛi ni aaafee akpe yɔɔ mli, ni amrɔ nɛɛ, Jean miisɔmɔ akɛ asafoŋ sɔɔlɔ yɛ Yehowa Odasefoi asafo ni yɔɔ jɛmɛ lɛ mli. Nɛkɛ weku nɛɛ, ni tsutsu ko lɛ, amɛfã kɛyahi ŋshɔkpɔi anɔ koni amɛkɛjo hiŋmɛigbelemɔ naa foi lɛ, buɔ lɛ akɛ eji hegbɛ kpele kɛha amɛ akɛ amɛbaná anɔkwa abobaahe koome, ni ji Yehowa teokrase gbɛjianɔtoo lɛ.