Sanebimɔi ni Jɛ Kanelɔi Adɛŋ

“Buu-Mɔɔ” ni je kpo yɛ November 1, 1995 lɛ gbala jwɛŋmɔ kɛtee nɔ ni Yesu wie yɛ “nɛkɛ yinɔ nɛɛ” he, taakɛ wɔkaneɔ yɛ Mateo 24:34 lɛ nɔ. Ani enɛ tsɔɔ akɛ yiŋkɔshikɔshi-feemɔ ko yɛ Nyɔŋmɔ Maŋtsɛyeli lɛ ni ato ama shi yɛ ŋwɛi yɛ 1914 lɛ he?

Nakai nikasemɔ ni yɔɔ Buu-Mɔɔ lɛ mli lɛ kɛ tsakemɔ ko kwraa haaa yɛ wɔ shishijee tsɔɔmɔ ni kɔɔ 1914 he lɛ mli. Yesu kɛ okadi ni baakadi ba ni eba yɛ Maŋtsɛyeli hewalɛ mli lɛ mamɔ shi. Wɔyɛ odaseyelii babaoo ni tsɔɔ akɛ okadi nɛɛ mlibaa etee nɔ kɛjɛ 1914. Anɔkwa saji ni kɔɔ tai, hɔmɔ, tsɛŋemɔ helai, shikpɔŋ hosomɔi, kɛ odaseyelii krokomɛi ahe lɛ mãa nɔ mi akɛ, Yesu etee nɔ etsu nii akɛ Nyɔŋmɔ Maŋtsɛyeli lɛ nɔ Maŋtsɛ, kɛjɛ 1914. Enɛ tsɔɔ akɛ kɛjɛ nakai beaŋ kɛbaa nɛɛ, wɔhi nibii agbɛjianɔtoo lɛ naagbee lɛ mli.

Belɛ, mɛni Buu-Mɔɔ lɛ tsɔɔ mli lɛ? Ojogbaŋŋ, nɔ titri ni tsɔɔ sane lɛ mli ji shishinumɔ mli ni Yesu kɛ wiemɔ “yinɔ” tsu nii yɛ, yɛ Mateo 24:34 lɛ. Nakai kuku lɛ kaneɔ akɛ: “Lɛlɛŋ, miikɛɛ nyɛ akɛ: Nɛkɛ yinɔ nɛɛ hoŋ, ja nii nɛɛ fɛɛ eba mli dã.” Mɛni Yesu kɛ wiemɔ “yinɔ” lɛ tsɔɔ yɛ egbii lɛ amli kɛ wɔgbii nɛɛ amli fɛɛ?

Ŋmalɛi pii mãa nɔ mi akɛ, Yesu kɛ “yinɔ” lɛ tsuuu nii yɛ kuu bibioo ko ni esoro amɛ lɛ ahe, tamɔ Yudafoi ahiɛnyiɛlɔi lɛ loo ekaselɔi anɔkwafoi lɛ. Shi moŋ ekɛ “yinɔ” tsu nii ni ekɛbu Yudafoi asafoi ni kpoo lɛ lɛ fɔ. Shi, nɔ ni yɔɔ miishɛɛ ji akɛ, aŋkroaŋkroi baanyɛ afee nɔ ni bɔfo Petro wo hewalɛ yɛ he, yɛ Pentekoste gbi lɛ nɔ lɛ, akɛ nyɛtsakea nyɛtsuii, koni “aherea nyɛyiwala kɛjɛa yinɔ kɔ̃ɔdɔŋ nɛɛ mli.”—Bɔfoi lɛ Asaji 2:40.

Eyɛ faŋŋ yɛ nakai wiemɔ lɛ mli akɛ, jeee gbɔmɛi ni amɛye afii pɔtɛɛ, loo be sɛɛkɛlɛ pɔtɛɛ ko Petro wieɔ he lɛ, ni asaŋ ekɛ “yinɔ” lɛ etooo be ko ni ale jogbaŋŋ he. Ekɛɛɛ akɛ, esa akɛ ahere gbɔmɛi ayiwala kɛjɛ yinɔ ni afɔ amɛ yɛ afi nɔ ni afɔ Yesu yɛ mli, aloo yinɔ ni afɔ amɛ yɛ 29 Ŋ.B. lɛ nɔŋŋ mli. No mli lɛ Petro miiwie Yudafoi ni heee yeee ni hi shi yɛ nakai be lɛ mli—ní ekolɛ amɛteŋ mɛi komɛi ji gbekɛbii, ni mɛi krokomɛi hu edara—ni amɛnu Yesu tsɔɔmɔi lɛ, ni amɛna enaakpɛɛ nibii ni efee lɛ loo amɛnu he, ni amɛkpɛlɛɛɛ enɔ akɛ Mesia lɛ ahe.

Eyɛ faŋŋ akɛ, nakai ji bɔ ni Petro nu bɔ ni Yesu kɛ wiemɔ “yinɔ” tsu nii eha, beni ekɛ bɔfoi krokomɛi etɛ lɛ kɛ lɛ yɔɔ Mu Gɔŋ lɛ nɔ lɛ shishi. Taakɛ Yesu gbalɛ wiemɔ lɛ tsɔɔ lɛ, nakai be lɛ mli Yudafoi lɛ—titri lɛ, mɛi ni hi shi yɛ Yesu beaŋ lɛ—baana loo amɛbaanu tai, shikpɔŋhosomɔi, hɔmɔ, kɛ odaseyelii krokomɛi ahe, ní tsɔɔ akɛ Yudafoi anibii agbɛjianɔtoo lɛ naagbee ebɛŋkɛ. Yɛ anɔkwale mli lɛ, nakai yinɔ lɛ hooo eyaaa dani naagbee lɛ ba yɛ afi 70 Ŋ.B.—Mateo 24:3-14, 34.

Esa akɛ wɔkpɛlɛ nɔ akɛ wɔsusuko Yesu wiemɔi lɛ ahe be fɛɛ be, yɛ nakai shishinumɔ naa. Adesai ni yeee emuu lɛ asubaŋ ji ni amɛsumɔ ni amɛle be pɔtɛɛ ni naagbee lɛ baaba. Kaimɔ akɛ bɔfoi lɛ po tao ni amɛle be pɔtɛɛ, amɛbi akɛ: “Nuntsɔ, ani nɛkɛ be nɛɛ mli obaatee Maŋtsɛyeli lɛ shi oma shi oha Israel lɛ?” (Wɔma efã ko nɔ mi.)—Bɔfoi lɛ Asaji 1:6.

Nyɔŋmɔ tsuji ni yɔɔ ŋmɛnɛŋmɛnɛ beaŋ lɛ hu kɛ yiŋtoi ni tamɔ nakai nɔŋŋ, ni anɔkwayeli yɔɔ mli ebɔ mɔdɛŋ akɛ amɛaajɛ nɔ ni Yesu wie yɛ “yinɔ” he lɛ mli amɛna be pɔtɛɛ ko ni abuɔ he akɔntaa kɛjɛɔ 1914. Akɛ nɔkwɛmɔ nɔ lɛ, susumɔi lɛ ekome ji akɛ, yinɔ kome baanyɛ afee afii 70 loo 80 sɛɛkɛlɛ, ni ji mɛi ni edara bɔ ni sa ni amɛaanu nɔ ni klɛŋklɛŋ jeŋ ta lɛ kɛ nibii krokomɛi ni ba lɛ tsɔɔ lɛ shishi; no hewɔ lɛ wɔbaanyɛ wɔbu bɔ ni naagbee lɛ ebɛŋkɛ eha lɛ he akɔntaa.

Bɔ fɛɛ bɔ ni jwɛŋmɔ yɔɔ nɛkɛ susumɔ nɛɛ mli ha lɛ, ani ekɛ ŋaawoo ni Yesu tee nɔ ekɛha lɛ kpãa gbee? Yesu kɛɛ: “Shi no gbi lɛ kɛ no ŋmɛlɛtswaa lɛ, mɔ ko mɔ ko leee he eko, bɔfoi ni yɔɔ ŋwɛi lɛ tete leee, ni Bi lɛ tete leee, ja mi-Tsɛ kome kɛkɛ. . . . No hewɔ lɛ, nyɛsaraa, ejaakɛ nyɛleee nɔ ŋmɛlɛtswaa nɔ ni nyɛ-Nuntsɔ lɛ baa.”—Mateo 24:36-42, NW.

No hewɔ lɛ, sane hee ni yɔɔ Buu-Mɔɔ lɛ mli, ni kɔɔ “yinɔ nɛɛ” he lɛ tsakeee shishinumɔ ni wɔyɔɔ yɛ nɔ ni ba yɛ 1914 he lɛ. Shi eha bɔ ni wɔnuɔ wiemɔ ni ji “yinɔ” ni Yesu kɛtsu nii lɛ shishi wɔhaa lɛ mli fee faŋŋ, ni eye ebua wɔ ni wɔna akɛ, anyɛŋ adamɔ bɔ ni ekɛtsu nii eha nɛɛ nɔ abu akɔntaa ko—ni aakane kɛmiijɛ 1914—ni ale bɔ ni wɔbɛŋkɛ naagbee lɛ he wɔha.