Yiwalɛ Nifeemɔ—Etsɛŋ ni Ebaaba Naagbee Kwraa!
“Yiwalɛ Nifeemɔ Miiwo Maŋ He Gbeyei”—The New York Times, United States.[1]
“Yiwalɛ Nifeemɔ yɛ Shia”—O Globo, Brazil.[2]
“Yiwalɛ Nifeemɔ Ebote Je Lɛŋ Yei Ateŋ”—The Globe and Mail, Canada.[3]
SANEYITSEI ni jɛ adafitswaa woji amli yɛ Amerika Kooyigbɛ kɛ Wouyigbɛ nɛɛ feɔ nifeemɔ ni gbaa jeŋ fɛɛ naa lɛ he mfoniri. Taakɛ nɔ ni World Health Organization lɛ wie he nyɛsɛɛ nɛɛ lɛ tsɔɔ lɛ, “yiwalɛ nifeemɔi fɛɛ etee hiɛ diɛŋtsɛ yɛ nyɛsɛɛ afii nyɔŋma nɛɛ mli.”[4]
Susumɔ akuntaabui ni teeɔ sane hesusumɔ shi lɛ ekomɛi ahe okwɛ:[5]
Gbɔmɔgbeei. Yɛ Latin America kɛ Caribbean lɛ, gbɔmɛi aaafee 1,250 kɛ yiwalɛ gbele kpeɔ daa gbi. Nɔ ni ejɛ mli kɛba ji akɛ, “yɛ maji lɛ akpokpaa fã nɔ lɛ, gbɔmɔgbee ji nɔ titri ni baa gbɛhe ni ji enyɔ yɛ oblahii kɛ oblayei ni eye kɛjɛ afii 15 kɛyashi afii 24 lɛ ateŋ.”[6]
Yiwalɛ nii ni afeɔ ashiɔ gbekɛbii. Gbɔmɔtsoŋ, bɔlɛnamɔ kɛ henumɔŋ niseniianii ni afeɔ gbekɛbii lɛ ji jeŋ fɛɛ naagba. Ákɛ nɔkwɛmɔnɔ lɛ, “niiamlipɛimɔi ni afee yɛ onukpai ni yɔɔ jarayeli maji amli lɛ tsɔɔ akɛ, gbekɛbii oha mlijaa 10 kɛyashi oha mlijaa 15 bajeɔ bɔlɛnamɔ mli niseniianifeemɔi ashishi—amɛteŋ mɛi babaoo ji gbekɛbii yei.”[7]
Yiwalɛ nii ni afeɔ ashiɔ yei. Beni amɛpɛi adesai ahegbɛi ni atsi naa yɛ jeŋ fɛɛ yɛ afi 1997 lɛ mli sɛɛ lɛ, niiamlipɛilɔi mu sane naa akɛ: “Yiwalɛ nifeemɔ ni yaa nɔ yɛ shia lɛ ebafee nibii titri ni kɛ yei awuiyeli baa yɛ maji ni yɔɔ jeŋ fɛɛ mli lɛ ateŋ ekome.” (Human Rights Watch World Report 1998)[8] Amrɔ nɛɛ, atsɛɔ yiwalɛ nifeemɔ ni yaa nɔ yɛ shia ni ji nɔ ni egbɛ eshwã jeŋ fɛɛ ni kɛlɛ afɔɔɔ he amaniɛbɔɔ lɛ akɛ, “afii ohai 20 lɛ mli naagba ni afɔɔɔ he wiemɔ.”—The Globe and Mail, Canada.[9]
Nakai nɔŋŋ “awo shikpɔŋ lɛ nɔ obɔ kɛ yiwalɛ” yɛ Noa gbii lɛ amli. (1 Mose 6:9-12) Shi Yehowa Nyɔŋmɔ baa nakai “jalɔ shiɛlɔ lɛ” kɛ eweku lɛ yi ‘beni ekɛ nu afua lɛ ba mɛi ni kwa Nyɔŋmɔ lɛ aje lɛ nɔ lɛ.’ Nyɔŋmɔ baafee nii ni tamɔ nakai nɔŋŋ yɛ wɔ gbii nɛɛ amli. Ebaabaa “jalɔi” ayi beni ejieɔ yiwalɛ nifeemɔ kɛ efɔŋfeemɔ kɛyaa ni efeɔ shikpɔŋ nɛɛ paradeiso yɛ ejeŋ hee ni ewo he shi lɛ mli lɛ. (2 Petro 2:4-9; 3:11-13) Ani onáaa miishɛɛ akɛ ooole akɛ etsɛŋ ni yiwalɛ nifeemɔ baaba naagbee kwraa?