Sanebimɔi Ni Jɛ Kanelɔi Adɛŋ

Akɛni agbɛnɛ lɛ, akɛɛ abaanyɛ ajaje fɔmɔ sɛɛfoo nifeemɔi kɛ́ abi ni afee nakai lɛ, ani Kristofonyo baanyɛ abu enɛɛmɛi akɛ fɔmɔ naatsĩi nifeemɔ ni ahalaa?

Fɔmɔ sɛɛfoo ebatsɔ fɔmɔ gbɛjianɔtoo nifeemɔ ni akɛtsuɔ nii waa fe fɛɛ. Yɛ mɛi babaoo agbɛfaŋ lɛ, etamɔ nɔ ni enɛ ni aaakpɛlɛ efeemɔ nɔ lɛ damɔ adesai ashihilɛ kɛ woloŋlee tsɔsemɔ ni mɔ ko ená, kɛ agbɛnɛ jamɔŋ susumɔi anɔ. Nɔ ni kɔɔ jamɔŋ hemɔkɛyeli he lɛ ji nɔ kroko ni Yehowa Odasefoi kɛtsuɔ nii, mɛi ni nuɔ he taakɛ lalatsɛ lɛ nuɔ he lɛ akɛ: “Yehowa, tsɔɔmɔ mi ogbɛ lɛ, ni okpala mi kɛtsɔ tempɔŋ ni kã shi faŋŋ nɔ.” (Lala 27:11) Mɛni yɔɔ ni kɔɔ fɔmɔ sɛɛfoo nifeemɔi ahe?

Atsɛɔ nuu fɔmɔ sɛɛfoo kɛha fɔmɔ naatsĩi lɛ akɛ vasectomy (nuu henu lɛ jɛɛhe lɛ ni afoɔ). Afolɔɔ nuu henu lɛ kpãai bibii enyɔ, loo kpãai kɛ emli fɔlɔ ni yɔɔ drɔ hewolo lɛ mli lɛ, ni atsĩɔ emligbɛ. Abaanyɛ akɛ tsofafeemɔŋ nifeemɔ gbɛ̀i srɔtoi atsu enɛ he nii, shi yiŋtoo ni yɔɔ sɛɛ lɛ ji koni akɛtsĩ nuu henu ni baajɛ drɔ mli wui lɛ amli aba lɛ naa. Atsɛɔ yoo fɔmɔ sɛɛfoo lɛ akɛ tubal ligation (kpãai ni fɔlɔ yɔɔ mli lɛ naafĩi). Bei pii lɛ, afeɔ enɛ kɛtsɔ Fallopian tubes (Wɔlɔ Gbɛ̀i) ní wɔji lɛ tsɔɔ mli kɛjɛɔ wɔjiafeemɔhei lɛ kɛyaa he ni abifao lɛ daa yɛ lɛ ni afoɔ lɛ nɔ, ní afĩɔ (loo, apiŋɔ lɛ) koni akɛtsĩ enaagbɛ.

Kɛjɛ jeeŋmɔ lɛ, asusu akɛ nɛkɛ nifeemɔi nɛɛ hiɔ shi daa​—⁠ákɛ nomɛi ha aná fɔmɔ sɛɛfoo ni anyɛŋ ajaje. Shi yɛ mɛi komɛi agbɛfaŋ lɛ, akɛni amɛshwa amɛhe yɛ amɛnifeemɔ lɛ he hewɔ loo yɛ shihilɛ heei ahe hewɔ lɛ, amɛyatao tsofafeemɔŋ yelikɛbuamɔ koni akɛjaje vasectomy loo tubal ligation ko ni amɛfee lɛ koni amɛnyɛ amɛfɔ ekoŋŋ. Yɛ nitsumɔ dadei krɛdɛɛi komɛi ni afee kɛ nibii bibii ahe opireshɛn feemɔ hewɔ lɛ, bɔ ni akaa koni ajaje enɛ ni anyɛ afɔ ekoŋŋ lɛ eye omanye babaoo. Ejeee nɔ ni efɔɔɔ kaa akɛ aaakane akɛ yɛ mɛi ni ahala kɛha enɛ feemɔ lɛ agbɛfaŋ lɛ, abaanyɛ aná oha mlijaa 50 kɛmiiya 70 mli omanyeyeli yɛ vasectomy lɛ jajemɔ mli kɛtsɔ kpãai bibii kɛ amɛmli fɔji lɛ anaabui anaa lɛ ni akɛtsaraa ekoŋŋ lɛ nɔ. Ajaje akɛ, akɔntaabuu ni ji oha mlijaa 60 kɛmiiya 80 mli omanyeyeli yɔɔ kɛha yoo tubal ligation lɛ jajemɔ. Mɛi komɛi ni ekase enɛ he nii lɛ enu he akɛ ehe ehiaaa ni abuɔ fɔmɔ sɛɛfoo dɔŋŋ akɛ nɔ ni hiɔ shi daa. Ekolɛ amɛbaanyɛ amɛhe amɛye akɛ, abaanyɛ abu vasectomy kɛ tubal ligation akɛ etamɔ fɔmɔ naatsĩi tsofai ni anuɔ, condom (rɔba ni akɛwoɔ nuutso he), kɛ diaphragm (rɔba ni akɛhàa fɔmɔkotoku lɛ shishigbɛ)​—⁠nifeemɔi ni abaanyɛ ajaje kɛ́ aasumɔ ni aŋɔ hɔ. Ni kɛlɛ, esaaa akɛ akuɔ hiɛ ashwieɔ emli fãi komɛi ni esa akɛ asusu he lɛ nɔ.

Ekome ji akɛ, abaanyɛ afite gbɛkpamɔi ni ayɔɔ akɛ aaajaje enɛ lɛ waa diɛŋtsɛ kɛtsɔ nibii tamɔ enɛɛmɛi anɔ, ní ji bɔ ni afite kpãai kɛ emli fɔji lɛ aha yɛ fɔmɔ sɛɛfoo nifeemɔ lɛ mli, bɔ ni ajie kpãa kɛ emli fɔlɔ lɛ babaoo aha loo bɔ ni áha efladoku lɛ éda eha, afii abɔ ni eho kɛjɛ beni afee lɛ, ni yɛ vasectomy gbɛfaŋ lɛ, kɛji aleenɔ nibii ebote mli ni baafite nuu lɛ henu lɛ. Ni nɔ ni esaaa akɛ akuɔ hiɛ ashwieɔ nɔ ji, anɔkwa sane ni eji akɛ, ekolɛ anáŋ nibii ni akɛbaafee nibii bibii ahe opireshɛn lɛ yɛ hei pii, loo ekolɛ ehe shika ni abaafite lɛ fá tsɔ̃. No hewɔ lɛ, gbɔmɛi pii ni ekolɛ amɛbaashwe waa koni amɛha ajaje fɔmɔ sɛɛfoo aha amɛ lɛ nyɛŋ afee nakai. Yɛ amɛgbɛfaŋ lɛ, anyɛŋ he nɔ ko afee.a No hewɔ lɛ, akɔntaabui ni atsɔɔ yɛ yiteŋgbɛ kɛha enɛɛmɛi ajajemɔ lɛ ji yiŋ diɛŋtsɛ ni akaa awieɔ nɔ ko kɛkɛ, shi jeee akɔntaabui ni akɛ he fɔ̃ɔ nɔ.

Anɔkwa saji lɛ ekomɛi kɔɔ saji ni ba mli lɛɛlɛŋ lɛ ahe. Sane ko ni akala yɛ United States ni kɔɔ vasectomy ni aaajaje lɛ he lɛ wie akɛ beni agbe opireshɛn feemɔ ni he dɔlai 12,000 lɛ naa lɛ, “helatsɛmɛi lɛ oha mlijaa 63 pɛ baanyɛ awo amɛhefatalɔi lɛ hɔ́.” Kɛfata he lɛ, “hii ni afeɔ vasectomy ahaa amɛ lɛ oha mlijaa ekpaa” pɛ “taoɔ koni ajaje aha amɛ koni amɛnyɛ amɛfɔ ekoŋŋ yɛ naagbee mli.” Yɛ niiamlipɛimɔ ko ni afee yɛ Germany ni kɔɔ Europa teŋgbɛ lɛ he lɛ, aaafee hii oha mlijaa 3 ni hala akɛ afo fɔmɔ sɛɛ aha amɛ lɛ yatao koni ajaje aha amɛ yɛ sɛɛ mli koni amɛnyɛ amɛfɔ ekoŋŋ. Kɛ nakai nii ni aka efeemɔ nɛɛ mli fã baanyɛ aye omanye po lɛ, no aaatsɔɔ akɛ yɛ emli oha mlijaa 98.5 mli lɛ, vasectomy ni aaafee lɛ feɔ tamɔ fɔmɔ sɛɛfoo ni hiɔ shi daa lɛ pɛpɛɛpɛ. Ni yibɔ lɛ baanyɛ aya hiɛ waa yɛ shikpɔji ni nibii bibii ahe opireshɛn feelɔi fioo pɛ yɔɔ mli loo eko kwraa bɛ lɛ mli.

Yɛ enɛ hewɔ lɛ, eji lakamɔ nifeemɔ akɛ aaabu nuu loo yoo fɔmɔ sɛɛfoo lɛ akɛ nɔ ko bibioo, tamɔ nɔ ni eji fɔmɔ naatsĩi nifeemɔ ni jeee nɔ ni hiɔ shi daa. Ni kɛha Kristofonyo anɔkwafo lɛ, nibii krokomɛi yɛ ni esa akɛ asusu he.

Sane oti lɛ diɛŋtsɛ ji akɛ, fɔmɔ hewalɛi ji nikeenii ni jɛ wɔ Bɔlɔ lɛ ŋɔɔ. Nɔ ni fata eklɛŋklɛŋ yiŋtoo lɛ he ji shwiei ni aaaná kɛtsɔ adesai ni yeɔ emuu, ni ‘baayi shikpɔŋ lɛ nɔ obɔ ni amɛnaanaa nɔ’ lɛ nɔ. (1 Mose 1:28) Beni Nu Afua lɛ ha shikpɔŋ nɔ bii ayibɔ nɔ gbɔ kɛbashɛ kpaanyɔ lɛ, Nyɔŋmɔ tĩ nakai shishijee gbɛtsɔɔmɔi lɛ amli. (1 Mose 9:⁠1) Nyɔŋmɔ etĩii nakai famɔ lɛ mli ehaaa Israel maŋ lɛ, shi Israelbii bu bii afɔmɔ akɛ nɔ ko ni kɛ miishɛɛ baa waa.​—⁠1 Samuel 1:​1-​11; Lala 128:⁠3.

Anaa nibii ni tsɔɔ akɛ Nyɔŋmɔ yɛ bulɛ kɛha shwiei ni adesai aaaná lɛ yɛ Mla ni ekɛha Israel lɛ mli. Ákɛ nɔkwɛmɔnɔ lɛ, kɛ́ nuu ko ni ebote gbalashihilɛ mli lɛ fɔɔɔ binuu ni baatsa efɔmɔ wekukpaa lɛ nɔ dani egbo lɛ, no lɛ enyɛminuu lɛ ji mɔ ni esa akɛ ená bi kɛtsɔ wunyɛmi gbalashihilɛ nɔ. (5 Mose 25:⁠5) Nɔ ni maa sane oti nɛɛ nɔ mi babaoo ji mla ni kɔɔ ŋa ko ni bɔɔ mɔdɛŋ koni eye ebua ewu yɛ nɔmɔ mli lɛ. Kɛ yoo lɛ emɔ mɔ ni ewu lɛ kɛnɔɔ lɛ nuuhe lɛ, esa akɛ afo yoo lɛ nine; nɔ ni sa kadimɔ ji, Nyɔŋmɔ biii hiŋmɛi yɛ hiŋmɛi najiaŋ nifeemɔ yɛ yoo lɛ gbɛfaŋ aloo ni afite ewu lɛ fɔmɔ nibii kɛto najiaŋ. (5 Mose 25:​11, 12) Nɛkɛ mla nɛɛ baaha aná bulɛ aha fɔmɔ nibii yɛ faŋŋ mli; esaaa akɛ afiteɔ enɛɛmɛi yakatswaa.b

Wɔle akɛ Kristofoi bɛ Israel Mla lɛ shishi, no hewɔ lɛ mla ni yɔɔ 5 Mose 25:​11, 12 lɛ fimɔɔɔ amɛ. Yesu kɛ famɔ haaa ekaselɔi lɛ akɛ amɛbote gbalashihilɛ mli ni amɛfɔ bii babaoo bɔ ni amɛaanyɛ, ni etsɔɔɔ nakai hu, ni gbalashihilɛ mli bii babaoo esusu he nakai yɛ be mli ni amɛkpɛɔ amɛyiŋ akɛ amɛkɛ fɔmɔ naatsĩi nifeemɔ ko aaatsu nii loo amɛfeŋ nakai lɛ. (Mateo 19:​10-12) Bɔfo Paulo wo “yei okulafoi ni darako” ni náa bɔlɛnamɔ mli akɔnɔ lɛ hewalɛ “ni amɛfɔ bii.” (1 Timoteo 5:​11-14) Etsĩii Kristofoi afɔmɔ sɛɛfoo ni hiɔ shi daa lɛ tã​—⁠ní amɛaajɛ amɛsuɔmɔ mli amɛkɛ amɛfɔmɔ nii ni yɔɔ hewalɛ akɛ eeefɔ bii lɛ ashã afɔle.

Kristofoi bɔɔ mɔdɛŋ koni amɛsusu nibii ni tamɔ nɛkɛ ni tsɔɔ akɛ Nyɔŋmɔ kɛ bulɛ haa nyɛmɔ ni amɛyɔɔ akɛ amɛkɛaafɔ bii lɛ waa. Esa akɛ gbalashihilɛ mli hefatalɔ fɛɛ hefatalɔ akpɛ eyiŋ kɛji amɛkɛ fɔmɔ gbɛjianɔtoo he nifeemɔi ni sa baatsu nii kɛ be ni amɛaafee nakai. Eji nɔ ni akpɛlɛɔ nɔ akɛ amɛyiŋkpɛɛ lɛ bafeɔ nɔ ni tsii kɛ́ tsofafeemɔ nifeemɔi kɛ nɔmimaa ha akɛ nyɛ loo bi kɛ tsofafeemɔ mli osharai ni mli wa kpe, kɛ́ gbele baanyɛ ajɛ mli aba po, yɛ hɔŋɔɔ ni baaba wɔsɛɛ ko lɛ mli lɛ. Mɛi komɛi ni yɔɔ nakai shihilɛ lɛ mli lɛ kɛ shishashaomɔ ekpɛlɛ fɔmɔ sɛɛfoo nifeemɔ nɔ taakɛ atsɔɔ kɛtsɔ hiɛ lɛ koni amɛná nɔmimaa akɛ hɔŋɔɔ ko kwraa woŋ nyɛ (ni ekolɛ eyɔɔ bii krokomɛi momo) lɛ loo gbekɛ ni sɛɛ mli lɛ abaanyɛ akɛ hela ko ni woɔ mɔ wala he gbeyei afɔ lɛ lɛ wala he gbeyei.

Shi Kristofoi ni kɛ oshara ni ekaaa ni esoro no kwraa ni tamɔ nɛkɛ ekpeee lɛ baasumɔ lɛɛlɛŋ ni “amɛjwɛŋmɔ akã shi” koni amɛkɛ bulɛ ni mli kwɔ ni Nyɔŋmɔ yɔɔ kɛha hewalɛ ni fɔmɔ nii yɔɔ lɛ atsu nii koni amɛkɛkudɔ amɛsusumɔ kɛ nifeemɔi. (1 Timoteo 3:2; Tito 1:8; 2:​2, 5-8) Enɛ baatsɔɔ bɔ ni akɛ mumɔŋ dalɛ susuɔ Ŋmalɛ naa gbɛtsɔɔmɔi ahe waa ahaa. Ni kɛlɛ, kɛ́ abaná ale yɛ faŋŋ akɛ Kristofonyo ko kɛ bulɛ haaa Nyɔŋmɔ susumɔi yɛ gbɛ ni ejaaa nɔ lɛ hu? Ani mɛi krokomɛi ayiŋ efeŋ amɛ kɔshikɔshi akɛ eji nɔkwɛmɔnɔ kpakpa loo ejeee nakai, ákɛ ale lɛ akɛ mɔ ni yɔɔ gbɛi kpakpa ni tsɔɔ akɛ ekpɛɔ eyiŋ bɔ ni kɛ Biblia lɛ kpãa gbee lɛ naa? Yɛ anɔkwale mli lɛ, nii ni fiteɔ mɔ jeŋba nɛkɛ ni gbaa mɔ naa yɛ gbɛi kpakpa ni mɔ ko efee lɛ he lɛ, baanyɛ asa sɔɔlɔ ni he aaasa kɛha sɔɔmɔ hegbɛi krɛdɛɛi lɛ ahe, eyɛ mli akɛ ekolɛ kulɛ ebaŋ lɛ nakai kɛ́ mɔ ko eha afee nii nɛɛ aha lɛ yɛ be mli ni eleee.​—⁠1 Timoteo 3:⁠7.

[Shishigbɛ niŋmai]