Sanebimɔi ni Jɛ Kanelɔi Adɛŋ

Ani Yehowa kɛ Abraham fee ekpaŋmɔ lɛ yɛ Ur loo Haran?

Anaa tsutsu amaniɛbɔɔ ni kɔɔ kpaŋmɔ ni Yehowa kɛ Abraham fee lɛ yɛ 1 Mose 12:1-3, he ni kɛɔ akɛ: “Ni Yehowa kɛɛ Abram akɛ: Jee oshikpɔŋ lɛ nɔ kɛ ojaku lɛ kɛ otsɛ we lɛ kɛya shikpɔŋ ni matsɔɔo lɛ nɔ. Ni maha otsɔ jeŋmaŋ kpeteŋkpele . . . Ni omli aaajɛ ajɔɔ shikpɔŋ lɛ nɔ wekui fɛɛ.”a Ekolɛ Yehowa kɛ Abraham fee kpaŋmɔ nɛɛ sɛɛ mli beni eyɔɔ Ur lɛ, ni esaa ema nɔ mi beni Abraham yɔɔ Haran lɛ.

Yɛ klɛŋklɛŋ afii oha lɛ mli lɛ, Stefano tsɛ Yehowa famɔ akɛ Abraham afã kɛya Kanaan lɛ yisɛɛ. Beni ekɛ Akuashɔŋ lɛ wieɔ lɛ, ekɛɛ akɛ: “Anunyam Nyɔŋmɔ lɛ jie ehe kpo etsɔɔ wɔtsɛ Abraham, beni eyɔɔ Mesopotamia, ni enáko ebahi Haran lɛ, ni ekɛɛ lɛ akɛ: Jee oshikpɔŋ lɛ nɔ kɛ oweku lɛŋ kɛya shikpɔŋ ni matsɔɔo lɛ nɔ.” (Bɔfoi lɛ Asaji 7:2, 3, wɔma efã ko nɔ mi.) Shishijee lɛ Abraham jɛ Ur, ni taakɛ Stefano tsɔɔ lɛ, jɛmɛ ji he ni enu famɔ lɛ yɛ klɛŋklɛŋ kwraa akɛ eya Kanaan. (1 Mose 15:7; Nehemia 9:7) Stefano etsĩii kpaŋmɔ ni Nyɔŋmɔ kɛ Abraham fee lɛ tã, shi yɛ 1 Mose 12:1-3 lɛ, akɛ nakai kpaŋmɔ lɛ tsa famɔ akɛ eya Kanaan lɛ. No hewɔ lɛ, nilee yɛ mli akɛ abaahe aye akɛ Yehowa kɛ Abraham fee kpaŋmɔ lɛ yɛ Ur.

Shi kɛlɛ, amaniɛbɔɔ ni yɔɔ Mose Klɛŋklɛŋ Wolo lɛ mli lɛ tsɔɔ akɛ Yehowa saa eti ekpaŋmɔ lɛ mli eha Abraham yɛ Haran, tamɔ bɔ pɛ ni esaa ewie emli fai komɛi ahe fitsofitso yɛ bei babaoo mli yɛ Kanaan lɛ. (1 Mose 15:5; 17:1-5; 18:18; 22:16-18) Taakɛ 1 Mose 11:31, 32 lɛ tsɔɔ lɛ, Abraham tsɛ, Tera shi Ur kɛtee Kanaan, ni Abraham, Sara, kɛ Lot fata ehe. Amɛba Haran ni amɛbahi jɛmɛ kɛyashi Tera gbo. Abraham kɛ be saŋŋ hi Haran ní baanyɛ aha ená nii bɔ ni sa. (1 Mose 12:5) Ni beni shɛ he ko lɛ, Nahor ni ji Abraham nyɛmi nuu lɛ hu fã kɛtee jɛmɛ.

Beni Biblia lɛ ŋmala Tera gbele he sane sɛɛ lɛ, ebɔ amaniɛ yɛ wiemɔ ni Yehowa kɛha Abraham lɛ he ni etsa nɔ akɛ: “Kɛkɛ ni Abram yiŋ, taakɛ bɔ ni Yehowa ekɛɛ lɛ lɛ.” (1 Mose 12:4) No hewɔ lɛ, 1 Mose 11:31-12:4 lɛ kɛ hewalɛwoo babaoo haa akɛ Yehowa wie wiemɔi ni aŋmala yɛ 1 Mose 12:1-3 lɛ yɛ Tera gbele sɛɛ. Kɛji nakai ji sane lɛ, belɛ Abraham shi Haran kɛtee shikpɔŋ ni Yehowa etsɔɔ lɛ lɛ nɔ yɛ toiboo kɛha famɔ ni enu he amrɔ lɛ hewɔ, kɛ agbɛnɛ nɔ ni enu he afii babaoo ni etsɔ hiɛ yɛ Ur lɛ.

Taakɛ 1 Mose 12:1 lɛ tsɔɔ lɛ, Yehowa fã Abraham akɛ: “Jee oshikpɔŋ lɛ nɔ kɛ ojaku lɛ kɛ otsɛ we lɛ.” Yɛ be ko mli lɛ Abraham “maŋ” ji Ur, ni jɛmɛ ji etsɛ “shia.” Shi kɛlɛ, Abraham tsɛ kɛ eshiabii lɛ fã kɛtee Haran, ni Abraham tsɛ jɛmɛ akɛ eshikpɔŋ. Beni ekɛ afii babaoo ehi Kanaan sɛɛ lɛ, etsu etsulɔ kɛtee ‘emaŋ kɛ ewekumɛi lɛ aŋɔɔ’ koni ayatao ŋa aha Isak, ni tsulɔ lɛ tee “Nahor maŋ lɛ mli” (ekolɛ Haran loo he ko ni bɛŋkɛ jɛmɛ lɛ mli). (1 Mose 24:4, 10) Jɛmɛ tsulɔ lɛ yana Rebeka yɛ, yɛ Abraham wekumɛi ni ji Nahor weku ni da lɛ ateŋ.—1 Mose 22:20-24; 24:15, 24, 29; 27:42, 43.

Yɛ Stefano wiemɔ ni ekɛha Akuashɔŋ lɛ mli lɛ, ekɛɛ akɛ: “Ni beni etsɛ gbo sɛɛ lɛ, efã lɛ kɛje jɛi kɛba nɛkɛ shikpɔŋ ni nyɛyɔɔ nɔ ŋmɛnɛŋmɛnɛ nɛɛ nɔ.” (Bɔfoi lɛ Asaji 7:4) Enɛ tsɔɔ akɛ Yehowa kɛ Abraham wie yɛ Haran. Nilee yɛ mli akɛ abaahe aye akɛ yɛ nakai be lɛ mli lɛ Yehowa ti kpaŋmɔ ni ekɛ Abraham fee lɛ mli shii abɔ taakɛ abɔ he amaniɛ yɛ 1 Mose 12:1-3 lɛ, akɛni kpaŋmɔ lɛ bɔi nitsumɔ beni Abraham eshi kɛtee Kanaan lɛ hewɔ. No hewɔ lɛ, anɔkwalei lɛ fɛɛ ahe susumɔ haa amuɔ sane naa akɛ ekolɛ Yehowa kɛ Abraham fee ekpaŋmɔ lɛ yɛ Ur ni esaa ema nɔ mi yɛ Haran.

[Shishigbɛ niŋmaa]