Te Ooofee Tɛŋŋ Oyi Aná Wala Kɛfo Je Nɛŋ Naagbee Lɛ?

BIBLIA lɛ wieɔ nibii agbɛjianɔtoo nɛɛ naagbee lɛ he akɛ “mlifu gbi ji nakai gbi lɛ, fĩmɔ kɛ amanehulu gbi ni, amaŋfɔ kɛ amaŋfɔfeemɔ gbi ni, duŋ kɛ jeŋ tuutuufeemɔ gbi ni, atatu kɛ oblɔtu kpii gbi hu ni.” (Zefania 1:15) Eji anɔkwale akɛ bei pii lɛ, enɛ jeee gbi ni obaasumɔ ni okpa lɛ gbɛ! Ni kɛlɛ, bɔfo Petro wo enanemɛi Kristofoi lɛ hewalɛ koni amɛfee “mɛi ni kwɛɔ gbɛ ni amɛshweɔ [Yehowa, NW] gbi lɛ baa lɛ, no mli ni ŋwɛi aaahere kɛ la ni eeeshã, ni jeŋ shishijee nii hu aaasere yɛ la mli. Shi yɛ eshiwoo lɛ naa lɛ wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.”—2 Petro 3:12, 13.

Jeee ŋwɛi kɛ shikpɔŋ diɛŋtsɛ hiɛkpatamɔ he ji nɔ ni Petro wieɔ he yɛ biɛ lɛ. “Ŋwɛi” kɛ “shikpɔŋ” ni Petro tsɛ yisɛɛ lɛ yɛ sane nɛɛ mli lɛ ji mfonirifeemɔŋ ŋmɛnɛŋmɛnɛ beaŋ adesai anɔyelii ni ekpɔtɔ lɛ kɛ adesai ajeŋ ni sheee Nyɔŋmɔ gbeyei lɛ. “[Yehowa, NW] gbi lɛ” fiteŋ shikpɔŋ lɛ diɛŋtsɛ, shi moŋ ‘ebaakpata emli eshafeelɔi lɛ ahiɛ kɛjɛ nɔ.’ (Yesaia 13:9) Kɛha mɛi ni “dɔmɔɔ ŋtsɔi ní amɛyeɔ ŋkɔmɔ yɛ nihiinii fɛɛ” ni afeɔ yɛ ŋmɛnɛ adesai ajeŋ fɔŋ nɛɛ mli lɛ, Yehowa gbi lɛ baafee yiwalaheremɔ gbi.—Ezekiel 9:4.

Belɛ, te aaafee tɛŋŋ ni mɔ ko yi aná wala kɛfo “Yehowa gbi wulu ní he yɔɔ gbeyei lɛ”? “Yehowa wiemɔ” ni ajie lɛ kpo atsɔɔ egbalɔi lɛ ateŋ mɔ kome lɛ haa nakai sanebimɔ lɛ hetoo akɛ: “Aaaba mli akɛ mɔ fɛɛ mɔ ní aaatsɛ́ Yehowa gbɛi anɔ lɛ, aaahere eyiwala.” (Yoel 1:1; 3:4, 5) Yehowa Odasefoi yɛ he miishɛɛ akɛ amɛaaye amɛbua bo koni ole nɔ ni tsɛmɔ ni aaatsɛ Yehowa gbɛi lɛ tsɔɔ.