Awo Ehiɛmiamɔ lɛ He Nyɔmɔ

Aŋkroaŋkroi babaoo ni hiɛ tsui ni ja lɛ miisumɔ ni amɛsuɔlɔi akase Nyɔŋmɔ yiŋtoi ahe nii ni no aha amɛná miishɛɛ yɛ shihilɛ mli. Kɛ́ mɔ ko jɔɔ ehe nɔ eha Nyɔŋmɔ lɛ, ekolɛ mɛi krokomɛi ni ji gbekɛbii kɛ onukpai fɛɛ tsɔ amɛjeŋba kpakpa lɛ nɔ ni amɛye amɛbua lɛ ni efee nakai yiŋkpɛɛ ni nilee yɔɔ mli lɛ. Nakai eba lɛ yɛ Jearim ni ji oblayoo fioo ko ni yɔɔ Mexico ni ŋmala wiemɔi ni nyiɛ sɛɛ nɛɛ eha nyɛmimɛi ni tee Yehowa Odasefoi agbi kome kpee krɛdɛɛ ko shishi lɛ gbɛfaŋ:

“Miisumɔ akɛ magba nyɛ mliflimɔ kɛ miishɛɛ ni miná lɛ. Nyɛhaa magbaa nyɛ nɔ̃ hewɔ. Afii 18 ni eho nɛ, beni afɔko mi lɛ, mifɔlɔi kase anɔkwale lɛ. Minyɛ ná hiɛyaa, ni sɛɛ mli lɛ mi kɛ minyɛminuu lɛ hu fee nakai nɔŋŋ. Wɔfee ekome kɛsɔle wɔha Yehowa koni mitsɛ hu abanyiɛ wala gbɛ lɛ nɔ. Afii 18 eho, ni ŋmɛnɛ ji gbi krɛdɛɛ diɛŋtsɛ kɛha wɔ. Abaabaptisi mitsɛ. Miida Yehowa shi akɛ ekɛ naagbee lɛ baaa dani gbi ni wɔkpa gbɛ aaahu nɛɛ shɛ. Miida bo shi, Yehowa!”

Yɛ afii ni tsɔ̃ hiɛ lɛ amli lɛ, nɛkɛ gbekɛyoo fioo nɛɛ weku lɛ kɛ nɔmimaa ha shishitoo mlai ni yɔɔ ŋaawoo ni ajɛ mumɔŋ aŋma ni yɔɔ 1 Petro 3:1, 2 lɛ hi amɛjwɛŋmɔ mli akɛ: “Nyɛ yeigbayei lɛ hu, nyɛbaa nyɛhe shi nyɛhaa nyɛ diɛŋtsɛ nyɛwumɛi lɛ, koni, kɛ́ mɛi komɛi booo wiemɔ lɛ toi tete lɛ, ashi wiemɔ lɛ sɛɛ ni atsɔ yei lɛ ajeŋba nɔ ni nine ashɛ amɛnɔ, ejaakɛ amɛnaa nyɛjeŋba ni hetsemɔ kɛ gbeyeishemɔ yɔɔ mli lɛ.” Ni eka shi faŋŋ akɛ gbekɛ Jearim kɛ wiemɔi ni yɔɔ 5 Mose 5: 16 lɛ tsu nii akɛ: “Wo otsɛ kɛ onyɛ, taakɛ bɔ ni Yehowa, o-Nyɔŋmɔ lɛ, woo kita lɛ.” Akɛni Jearim kɛ eweku lɛ kɛ shishitoo mlai nɛɛ tsu nii ni amɛkɛ tsuishitoo mɛ Yehowa hewɔ lɛ, eha amɛnine shɛ jɔɔmɔi anɔ.