‘Nyɛkagbalaa Kɔŋtso Kome ni Yeee Egbɔ’

TAAKƐ onaa yɛ mfoniri nɛɛ mli lɛ, etamɔ nɔ ni yoma kɛ tsina ni efee ekome kɛmiihu lɛ ahe ejɔɔɔ amɛ. Kɔŋtso ni feɔ amɛ ekome—ni afee kɛha kooloi enyɔ ni hiɛ dalɛ kɛ hewalɛ kome lɛ—eha kooloi enyɔ lɛ fɛɛ miipiŋ. Akɛni Nyɔŋmɔ susuɔ kooloi ni afeɔ amɛ ekome tamɔ nɛkɛ kɛtsuɔ nii lɛ ahilɛ-kɛhamɔ he hewɔ lɛ, ekɛɛ Israelbii lɛ akɛ: “Okɛ tsina kɛ teji akahu shikome.” (5 Mose 22:10) Nakai shishitoo mla lɛ nɔŋŋ kɔɔ tsina kɛ yoma he.

Bei babaoo lɛ, okwaafonyo kɛ shihilɛ ni mli wa tamɔ nɛkɛ baŋ ekooloi anɔ. Shi kɛji akɛ ebɛ tsinai enyɔ lɛ, ekolɛ ebaaha kooloi enyɔ ni eyɔɔ lɛ agbala kɔŋtso kome. Eka shi faŋŋ akɛ, enɛ ji nɔ ni afii ohai 19 lɛ mli okwaafonyo ni yɔɔ mfoniri lɛ mli lɛ kpɛ eyiŋ akɛ ebaafee. Akɛni srɔtofeemɔ yɛ amɛdaramɔ kɛ amɛtsiimɔ mli hewɔ lɛ, esa akɛ kooloo ni he waaa lɛ amia ehiɛ waa bɔni afee ni enyɛ ekɛ nɔ ni he wa lɛ anyiɛ pɛpɛɛpɛ, ni kooloo ni he wa lɛ baatsu nitsumɔ kpele.

Bɔfo Paulo kɛ nɔkwɛmɔnɔ ni kɔɔ kɔŋtso ni yeee egbɔ he tsu nii koni ekɛtsɔɔ wɔ nikasemɔ ko ni he yɔɔ sɛɛnamɔ. Eŋma akɛ: “Nyɛkɛ mɛi ni heee yeee lɛ akagbalaa kɔŋtso kome ni yeee egbɔ! Ejaakɛ mɛɛ bɔɔ jalɛ kɛ mlatɔmɔ yɔɔ? aloo mɛɛ yeli la kɛ duŋ yɔɔ?” (2 Korintobii 6:14) Te Kristofonyo aaafee tɛŋŋ etsɔ mɔ ni kɛ mɔ ko gbalaa kɔŋtso kome ni yeee egbɔ?

Gbɛ kome baafee kɛji Kristofonyo ko hala gbalashihilɛ mli hefatalɔ ni kɛ lɛ ehiɛɛɛ hemɔkɛyeli kome too lɛ nɔŋŋ. Ekomefeemɔ ni tamɔ nɛkɛ lɛ haŋ mɛi enyɔ lɛ fɛɛ ahe ajɔ amɛ, ni gbalashihilɛ mli hefatalɔi lɛ kɛ amɛhe kpaŋ gbee yɛ saji ni he hiaa titri lɛ ahe.

Beni Yehowa to gbalashihilɛ shishi lɛ, ekɛ nitsumɔ akɛ “hefatalɔ ko” loo “mɔ ko ni tamɔ nuu lɛ” ha ŋa lɛ. (1 Mose 2:18; NW shishigbɛ niŋmaa) Nakai nɔŋŋ, Nyɔŋmɔ tsɔ gbalɔ Maleaki nɔ ewie ŋa lɛ he akɛ ‘hefatalɔ.’ (Maleaki 2:14) Wɔ-Bɔlɔ lɛ miisumɔ ni gbalashihilɛ mli hefatalɔi lɛ afee ekome kɛtsu nii yɛ mumɔŋ gbɛtsɔɔmɔ kome too lɛ nɔŋŋ naa, ni amɛfee ekome kɛtsu naagbai ahe nii ní amɛná he sɛɛ pɛpɛɛpɛ.

Kristofonyo jieɔ bulɛ kpo etsɔɔ wɔŋwɛi Tsɛ lɛ ŋaawoo lɛ kɛji ebote gbalashihilɛ mli “yɛ Nuŋtsɔ lɛ mli.” (1 Korintobii 7:39) Enɛ feɔ shishitoo nɔ̃ kɛha gbalashihilɛ ni efee ekome, ni baanyɛ ekɛ yijiemɔ kɛ woo abaha Nyɔŋmɔ yɛ be mli ni mɛi enyɔ lɛ fɛɛ sɔmɔɔ lɛ akɛ ‘nanemɛi nitsulɔi kpakpai’ yɛ shishinumɔ krɛdɛɛ naa lɛ.—Filipibii 4:3.

[He ni Mfoniri ni yɔɔ baafa 32 lɛ Jɛ]

Yoma kɛ tsina: From the book La Tierra Santa, Volume 1, 1830