Nuu ni Yɔɔ Suɔmɔ Kɛha Wala kɛ Gbɔmɛi

DANIEL SYDLIK, ni kɛ afii pii esɔmɔ akɛ Yehowa Odasefoi a-Nɔyeli Kuu lɛ mlinyo lɛ gbe eshikpɔŋ nɛɛ nɔ sɔɔmɔ lɛ naa Jufɔ, April 18, 2006. Eye afii 87, ni ekɛ nɔ ni aaashɛ afii 60 sɔmɔ yɛ Betel ni yɔɔ Brooklyn, yɛ New York lɛ.

Ebɔi nitsumɔ yɛ Betel yɛ afi 1946, ni enanemɛi lɛ fɔɔ lɛ tsɛmɔ akɛ Nyɛminuu Dan. Shi dani ebaaya Betel lɛ, etsu nii akɛ gbɛgbalɔ krɛdɛɛ yɛ California, ni awo lɛ tsuŋ hu yɛ Jeŋ Ta II lɛ mli akɛni ekɛ ehe wooo maŋkwramɔŋ saji amli lɛ hewɔ. Átsɔɔ niiashikpamɔi ni ená yɛ nakai be lɛ mli lɛ mli fitsofitso yɛ ewala shihilɛ he sane ni je kpo yɛ June 1, 1985 blɔfo Buu-Mɔɔ lɛ mli saneyitso ni ji “How Priceless Your Friendship, O God!” (Nyɔŋmɔ, Onaanyobɔɔ lɛ Jara Wa!) lɛ mli.

Ale nyɛminuu Sydlik akɛ mɔ ko ni wooo ehe, ni mɔ fɛɛ mɔ nyɛɔ ebɛŋkɛɔ lɛ. Gbi fɛɛ gbi ni ebaanyiɛ hiɛ yɛ ŋmalɛi lɛ amli ni akwɛɔ daa leebi yɛ Betel lɛ, bei pii lɛ, jwɛŋmɔ kpakpa ni ehiɛ kɛ bɔ ni esumɔɔ wala ehã lɛ jeɔ kpo yɛ hiɛkpamɔ wiemɔi ni ekɛtsuɔ nii lɛ mli akɛ: “Eyɛ miishɛɛ akɛ wɔyɛ wala mli ní wɔmiisɔmɔ anɔkwa Nyɔŋmɔ hiɛkãlɔ lɛ.” Akɛni ehaa wiemɔ yɛ asafoŋ kpeei ashishi hewɔ lɛ, ewo mɛi ahewalɛ koni amɛsusu sane nɛɛ he, ni efee enɛ yɛ wiemɔi tamɔ “Maŋ ni Yehowa ji e-Nyɔŋmɔ Lɛ Yɛ Miishɛɛ,” “Yehowa Miishɛɛ lɛ Kpo ni Wɔɔjie,” “Hã Nyɔŋmɔ Mumɔ lɛ La lɛ Ayanɔ Atso,” kɛ “Shihilɛ ni Hi fe Fɛɛ lɛ Kã Wɔhiɛ” ni eha lɛ mli.

Nyɛminuu Sydlik kɛ Marina Hodson ni jɛ England lɛ bote gbalashihilɛ mli yɛ afi 1970, ni ewie akɛ eŋa lɛ ji “yelikɛbualɔ ni Nyɔŋmɔ diɛŋtsɛ kɛke mi.” Amɛkɛ nɔ ni fá fe afii 35 sɔmɔ Yehowa kutuu akɛ gbalashihilɛ mli hefatalɔi.

Yɛ afii ni Nyɛminuu Sydlik kɛhi Betel lɛ, etsu nii yɛ hei srɔtoi babaoo, tamɔ heni akalaa woji yɛ lɛ, kɛ Writing Department lɛ nɛkɛ. Etsu nii yɛ WBBR redio nitsumɔhe lɛ hu. No sɛɛ lɛ, akɛlɛ fata Nɔyeli Kuu lɛ he yɛ November 1974, ni etsu nii akɛ Personnel Committee lɛ kɛ Writing Committee lɛ mli nyo.

Nɔ ni akadi yɛ Nyɛminuu Sydlik he beni ekɛ nɔ ni fá fe afii 30 tsu nii akɛ Personnel Committee lɛ mli nyo ji akɛ, esumɔɔ gbɔmɔ waa. Ekɛ egbee ni mli kwɔ lɛ woɔ mɛi hewalɛ, ni be fɛɛ be lɛ, egbalaa mɛi ajwɛŋmɔ kɛyaa hegbɛ kpele ni wɔná kɛsɔmɔɔ Yehowa lɛ nɔ. Be fɛɛ be lɛ, emaa nɔ mi akɛ anɔkwa miishɛɛ damɔ wekukpaa ni kãa wɔ kɛ Yehowa teŋ kɛ bɔ ni wɔbuɔ wala wɔhaa lɛ nɔ.

Eyɛ mli akɛ Betel weku lɛ hiɛ baatse Nyɛminuu Sydlik waa moŋ, shi wɔhiɛ kpaŋ nɔkwɛmɔnɔ ni efee akɛ mɔ ni sumɔ wala kɛ gbɔmɔ lɛ nɔ. Wɔyɛ nɔmimaa akɛ efata mɛi ni awie amɛhe yɛ Kpojiemɔ 14:13 lɛ ahe akɛ: “Ajɔɔ gbohii lɛ ni gboiɔ yɛ Nuŋtsɔ lɛ mli lɛ kɛjɛ ŋmɛnɛ nɔ kɛyaa nɛɛ. Hɛɛ, mumɔ lɛ kɛɛ, koni amɛjɔɔ amɛhe kɛjɛ amɛhaomɔi lɛ amli; shi amɛnitsumɔi lɛ nyiɛɔ amɛsɛɛ.”