Wɔná Miishɛɛ yɛ ‘Toobi Lɛ Ni Ekɛye Kunim’ Lɛ Hewɔ
YƐ WOLO ko ni Carey W. Barber ŋma yɛ afi 1971 mli lɛ, etsɔɔ bɔ ni nibii etee nɔ eha lɛ yɛ eklɛŋklɛŋ afii 50 ni ekɛsɔmɔ anɔkwa Nyɔŋmɔ lɛ mli. Ekɛɛ akɛ: “Miná miishɛɛ ni nɔ bɛ yɛ afii abɔ ni mikɛhi Yehowa sɔɔmɔ mli lɛ mli. Ewebii lɛ ni mikɛbɔ; mihe ni abu kɛjɛ efɔŋfeelɔi ni yɔɔ Satan je lɛ mli lɛ ahe; gbɛkpamɔ akɛ mikɛ Toobi ni ji Yesu Kristo aaaye kunim; kɛ odaseyeli ni tsɔɔ akɛ Yehowa sumɔɔ mi lɛ fɛɛ haa mináa toiŋjɔlɛ kɛ tsui ni nyɔɔ mɔ mli diɛŋtsɛ ni buɔ mitsui lɛ he, ni asaŋ ehaa mináa hiɛnɔkamɔ ni mli wa akɛ, yɛ naagbee kwraa lɛ maye kunim.”
Yɛ afii ekpaa sɛɛ lɛ, Nyɛminuu Barber ni ji Kristofonyo ni akɛ mumɔ efɔ lɛ mu lɛ bɔi sɔɔmɔ akɛ Yehowa Odasefoi a-Nɔyeli Kuu lɛ mlinyo. Ákɛ Nɔyeli Kuu lɛ mlinyo lɛ, yɛ afii 30 ni nyiɛ sɛɛ kɛba lɛ mli fɛɛ lɛ, etee nɔ ekpa gbɛ akɛ ekɛ ‘Toobi lɛ aaaye kunim.’ Enine shɛ gbɛkpamɔ nɛɛ nɔ kɛtsɔ anɔkwa ni etee nɔ eye aahu kɛyashi egbo yɛ Hɔgbaa, April 8, afi 2007 beni eye afii 101.—1 Korintobii 15:57.
Afɔ́ Carey Barber yɛ England yɛ afi 1905, ni abaptisi lɛ yɛ Winnipeg, Canada yɛ afi 1921 mli. Afii enyɔ sɛɛ lɛ, ekɛ enyɛmi nuu ní ekɛ lɛ ji haaji ni atsɛɔ lɛ Norman fã kɛyahi Brooklyn yɛ New York koni amɛyaye amɛbua kɛtsu nitsumɔ hee ko. Yɛ nakai beaŋ lɛ, no mli lɛ Yehowa webii lɛ miito gbɛjianɔ koni amɛbɔi amɛ diɛŋtsɛ amɛwoji akalamɔ kɛha sanekpakpa lɛ gbɛɛ-kɛshwãmɔ yɛ “je nɛŋ fɛɛ.” (Mateo 24:14) Nyɛminuu Barber tsu nii yɛ woji akalamɔhe bibioo ko, ni no ji klɛŋklɛŋ nitsumɔi ni etsu lɛ ateŋ ekome. Nibii ni amɛkala yɛ no beaŋ lɛ ekomɛi ji mla he saji ni akɛmiiya akɛyaye sane yɛ United States Kojomɔhe Wulu lɛ. Sɛɛ mli lɛ, Nyɛminuu Barber tsu nii yɛ Nitsumɔhe ni kwɛɔ Sɔɔmɔ Nitsumɔ lɛ nɔ lɛ, ni etsu saji ni yaa nɔ yɛ asafoi lɛ amli kɛ shiɛmɔ nitsumɔ lɛ ni aaatsu yɛ maŋ muu lɛ fɛɛ mli lɛ ahe nii titri.
Yɛ niiashikpamɔ ni Nyɛminuu Barber ná yɛ nitsumɔ nɛɛ mli hewɔ lɛ, ebafee mɔ ni he esa jogbaŋŋ kɛha nitsumɔ ni akɛwo edɛŋ akɛ nɔkwɛlɔ gbɛfalɔ yɛ afi 1948 ákɛ eyakwɛ kpokpaa nɔ kpeei anɔ ni esara asafoi fɛɛ ni yɔɔ United States anaigbɛ lɛ. Ewie akɛ, nɔ̃ titri ni enáa he miishɛɛ waa ji ní eje kpo eyashiɛ yɛ maŋ lɛ mli. Nitsumɔ nɛɛ ha nyɛmimɛi hii kɛ yei babaoo bale Nyɛminuu Barber. Bɔ ni ejwɛŋmɔ mɔɔ nii oya kɛ ekãa ni eyɔɔ yɛ sɔɔmɔ nitsumɔ lɛ mli lɛ he ba sɛɛnamɔ diɛŋtsɛ kɛha lɛ beni etee Buu-Mɔɔ Biblia Gilead Skul klas ni ji 26 lɛ. Beni eyɔɔ skul lɛ, ebale eklasnyo ko ni jɛ Canada ni atsɛɔ lɛ Sydney Lee Brewer lɛ. Beni amɛgbe skul lɛ naa lɛ, amɛbote gbalashihilɛ mli ni amɛyaye amɛyookpeemɔ sɛɛ hejɔɔmɔ lɛ yɛ he ko ni bɛŋkɛ Chicago yɛ Illinois kɛsɔmɔ asafoi ni yɔɔ jɛi niiaŋ lɛ. Nyɛmiyoo Barber batsɔ hefatalɔ kpakpa kɛ hewalɛwoo jɛɛhe diɛŋtsɛ kɛha ewu yɛ afii 20 ni amɛkɛsɔmɔ yɛ gbɛfãa nitsumɔ lɛ mli lɛ mli.
Mɛi ni kɛ Nyɛminuu Barber kpe ni amɛbale lɛ jogbaŋŋ yɛ afii nyɔŋmai abɔ ni ekɛsɔmɔ akɛ kpokpaa wulu loo kpokpaa bibioo nɔkwɛlɔ lɛ, aloo yɛ afii 30 ni ekɛsɔmɔ akɛ Nɔyeli Kuu lɛ mlinyo ní fãa gbɛ hu kɛyasaraa nyɛmimɛi lɛ, ahiɛ kpaŋ ewiemɔi ní eha lɛ kɛ bɔ ni ewieɔ kɛ miishɛɛ lɛ nɔ. Wɔyɛ yiŋtoo kpakpa ni wɔɔdamɔ nɔ wɔná miishɛɛ yɛ ‘Toobi lɛ ni ekɛye kunim’ lɛ hewɔ.