Tsi Obɛŋkɛ Nyɔŋmɔ
Ani Nɔ ko Baanyɛ ‘Agbala Wɔkɛ Nyɔŋmɔ Suɔmɔ lɛ Mli’?
WƆTEŊ namɔ sumɔɔɔ ni ajie suɔmɔ kpo atsɔɔ lɛ? Yɛ anɔkwale mli lɛ, wɔyeɔ omanye kɛ́ wɔwekumɛi kɛ wɔnanemɛi jie suɔmɔ kpo amɛtsɔɔ wɔ lɛ. Shi dɔlɛ sane ji akɛ, wekukpãi ni yɔɔ adesai ateŋ lɛ baanyɛ afite loo etsake yɛ be kukuoo mli. Wɔsuɔlɔi baanyɛ afee wɔ dɔlɛ nii, amɛkpoo wɔ, loo amɛte shi amɛwo wɔ po. Kɛlɛ, mɔ ko yɛ ni suɔmɔ ni eyɔɔ lɛ sɛɛ efooo ni etsakeee hu. Atsɔɔ suɔmɔ ni Yehowa Nyɔŋmɔ yɔɔ kɛha ejálɔi lɛ mli jogbaŋŋ yɛ Romabii 8:38, 39.
Bɔfo Paulo kɛɛ akɛ “miyɛ hewalɛ yɛ nɔ.” Eyɛ hewalɛ yɛ mɛni nɔ? Ákɛ nɔ ko nɔ ko ‘nyɛŋ agbala wɔkɛ Nyɔŋmɔ suɔmɔ lɛ mli.’ Paulo ewieee ehaaa lɛ pɛ ehe, shi moŋ ekɛ wiemɔ ni ji ‘wɔ’ tsu nii—ni tsɔɔ akɛ, eewie mɛi fɛɛ ni sɔmɔɔ Nyɔŋmɔ yɛ anɔkwale mli lɛ ahe. Paulo tsitsii nibii komɛi ni nyɛŋ atsĩ Yehowa naa koni ekajie suɔmɔ kpo etsɔɔ enɔkwa tsuji lɛ atã, ni ekɛma esane lɛ nɔ mi.
“Gbele jio wala jio.” Suɔmɔ ni Yehowa yɔɔ kɛha ewebii lɛ sɛɛ efooo yɛ amɛgbele sɛɛ. Nyɔŋmɔ kɛ amɛ toɔ ejwɛŋmɔŋ, ni ekɛ amɛ baaba wala mli ekoŋŋ yɛ ejalɛ jeŋ hee ni baaba lɛ mli, ni efeɔ enɛ kɛtsɔɔ akɛ eyɛ suɔmɔ kɛha amɛ. (Yohane 5:28, 29; Kpojiemɔ 21:3, 4) Shi dani jeŋ hee lɛ aaaba lɛ, Nyɔŋmɔ yaa nɔ ejieɔ suɔmɔ kpo etsɔɔ enɔkwa tsuji lɛ ekɔɔɔ he eko nɔ ni ekolɛ ebaaba amɛnɔ yɛ je nɛɛ mli.
“Ŋwɛibɔfoi jio nɔyelɔi jio.” Mɛi ni yɔɔ hewalɛ waa loo mɛi ni yɔɔ hegbɛi baanyɛ aná gbɔmɛi anɔ hewalɛ yɛ gbɛ ni waaa nɔ, shi mɔ ko mɔ ko nyɛŋ aná Yehowa nɔ hewalɛ yɛ gbɛ ko kwraa nɔ. Mumɔŋ bɔɔ nii ni yɔɔ hewalɛ, tamɔ ŋwɛibɔfo ni batsɔ Satan lɛ nɛkɛ lɛ nyɛŋ atsɔ Nyɔŋmɔ yiŋ koni ekajie suɔmɔ kpo etsɔɔ ejálɔi. (Kpojiemɔ 12:10) Asaŋ nɔyelii hu ni ekolɛ amɛbaate shi amɛwo anɔkwa Kristofoi lɛ nyɛŋ amɛha Nyɔŋmɔ atsake bɔ ni ebuɔ etsuji lɛ ehaa lɛ.—1 Korintobii 4:13.
“Nii ni yɔɔ nɛɛ jio, nii ni baaba lɛ jio.” Nyɔŋmɔ suɔmɔ lɛ he ejɔɔɔ. Nɔ ko nɔ ko bɛ ni baaba etsuji lɛ anɔ bianɛ loo wɔsɛɛ ni baaha Nyɔŋmɔ akpa suɔmɔ kpo ni ejieɔ etsɔɔ amɛ lɛ.
“Hewalɛi jio.” Paulo ewie mɛi ni yɔɔ hegbɛi yɛ ŋwɛi kɛ shikpɔŋ lɛ nɔ—“ŋwɛibɔfoi” kɛ “nɔyelɔi”—lɛ ahe kɛtsɔ hiɛ, shi agbɛnɛ etsĩ “hewalɛi” atã. Hela wiemɔ ni atsɔɔ shishi akɛ “hewalɛi” lɛ hiɛ shishinumɔi srɔtoi. Ekɔɔɔ he eko shishinumɔ ni ja ni yɔɔ wiemɔ nɛɛ sɛɛ lɛ, anɔkwa sane ko yɛ ni anyɛŋ aje he ŋwane: Hewalɛ ko hewalɛ ko bɛ ŋwɛi loo shikpɔŋ lɛ nɔ ni baanyɛ atsĩ Yehowa naa koni ekajie suɔmɔ kpo etsɔɔ ewebii lɛ.
“Ŋwɛi jio shishi jio.” Yehowa sumɔɔ ewebii lɛ, ekɔɔɔ he eko shihilɛ mli ni amɛyɔɔ, kɛ́ emli wa jio emli waaa jio.
“Aloo nii ní abɔ lɛ amli nɔ kroko jio.” Paulo kɛ wiemɔ ni kɔɔ adebɔɔ nibii fɛɛ ahe nɛɛ tsu nii ni ekɛtsɔɔ akɛ nɔ ko nɔ ko kwraa bɛ ni baanyɛ agbala anɔkwa jálɔi kɛ Yehowa suɔmɔ lɛ mli.
Suɔmɔ ni adesai yɔɔ lɛ baanyɛ atsake loo ehe baanyɛ ajɔ, shi suɔmɔ ni Nyɔŋmɔ yɔɔ kɛha mɛi ni yaa nɔ amɛnáa emli hemɔkɛyeli lɛ he ejɔɔɔ; esɛɛ efooo. Ŋwanejee ko bɛ he akɛ kɛ́ wɔná wɔle enɛ lɛ, ebaatsirɛ wɔ ni wɔtsi wɔbɛŋkɛ Yehowa ni wɔfee bɔ fɛɛ bɔ ni wɔɔnyɛ kɛtsɔɔ akɛ wɔsumɔɔ lɛ.