Mlihilɛ Gbeɔ Dɔlɛ

BENI George kɛ Manon, ni ji Odasefoi enyɔ komɛi ni yɔɔ Netherlands lɛ tee ní amɛyashiɛ Maŋtsɛyeli sanekpakpa lɛ amɛha yoo onukpa ko lɛ, etseee ehiɛ ehaaa amɛ kwraa. Amɛná amɛle akɛ ewumɛi enyɔ kɛ ebi nuu egboi, ni hela ko ni haa mɔ talɔiaŋ fũɔ lɛ hu eha eepiŋ waa. Eyɛ mli akɛ beni sanegbaa lɛ yaa nɔ lɛ etamɔ nɔ ni etsui eba shi moŋ, shi ejeee gbɛ etseee ehiɛ ehaaa amɛ.

Shi George kɛɛ Manon akɛ ebaasumɔ ni amɛku sɛɛ amɛkɛ fɔfɔii ayaha yoo lɛ, ejaakɛ etamɔ mɔ ko ni he efee shoo ní werɛ eho ehe. Beni amɛkɛ fɔfɔii lɛ tee lɛ, efee Rie, ni ji shĩatsɛ lɛ naakpɛɛ kɛ miishɛɛ fɛɛ. Shi be ní amɛkɛtee jɛmɛ lɛ eyahiii haaa yoo lɛ, no hewɔ lɛ amɛto be kroko. Beni George kɛ Manon ku amɛsɛɛ yɛ be ni amɛto lɛ naa lɛ, mɔ ko mɔ ko bɛ shĩa lɛ. Eyɛ mli akɛ amɛtee jɛmɛ yɛ bei srɔtoi amli moŋ, shi amɛyanaaa yoo lɛ. Amɛbɔi susumɔ po akɛ yoo lɛ sumɔɔɔ ni enaa amɛ dɔŋŋ.

Shi gbi lɛ eko lɛ, George yana Rie yɛ shĩa. Akɛni eyanyɛɛɛ eshiwoo lɛ nɔ eye hewɔ lɛ ekpa fai, ni etsɔɔ mli akɛ no mli lɛ ekã helatsamɔhe. Ewie akɛ: “Shi kɛ́ mikɛɛ bo nɔ ni mifee beni nyɛshi lɛ, oheŋ oyeŋ. Mibɔi Biblia lɛ kanemɔ!” Enɛ gbele gbɛ kɛha sanegbaa ni yɔɔ miishɛɛ, ni amɛje Biblia mli nikasemɔ shishi.

Beni Rie kaseɔ Biblia lɛ, efɔ̃ɔ awerɛho ni eyeɔ lɛ ni ebatsɔ mɔ ko ni yɔɔ miishɛɛ, ní mli hi hu. Eyɛ mli akɛ enyɛɛɛ eje kpo kɛya he ko moŋ, shi etsɛɛɛ ni ekɛ mɔ fɛɛ mɔ ni baa basaraa lɛ lɛ bɔi ehemɔkɛyeli hee lɛ he sane gbaa. Egbɔmɔtsoŋ hewalɛ eŋmɛɛɛ lɛ gbɛ ni eya asafoŋ kpeei daa moŋ, shi kɛlɛ ehiɛ sɔɔ bɔ ni nyɛmimɛi hii kɛ yei lɛ basaraa lɛ lɛ waa. Gbi ni eye afii 82 lɛ, etee kpokpaa nɔ kpee ko, ni abaptisi lɛ kɛfee ehe nɔ ni ejɔɔ eha Nyɔŋmɔ lɛ he okadi.

Beni egbo yɛ nyɔji fioo komɛi asɛɛ lɛ, ayana lalawiemɔ ko ni eŋma. Etsɔɔ bɔ ni shoofeemɔ ni anuɔ he yɛ gbɔlɛ beaŋ lɛ naa wa ha, ni ema bɔ ni ehe hiaa ni ajie mlihilɛ kpo lɛ nɔ mi yɛ nakai wolo lɛ mli. Manon wie akɛ: “Nakai lalawiemɔ lɛ ni mikane lɛ ta mimli waa, ni eŋɔɔ minaa waa akɛ Yehowa ye ebua wɔ ni wɔjie mlihilɛ kpo wɔtsɔɔ lɛ.”

Hɛɛ, Yehowa diɛŋtsɛ nɔkwɛmɔnɔ lɛ tsirɛɔ wɔ ní wɔjie suɔmɔ kɛ mlihilɛ ni tamɔ nakai kpo. (Efe. 5:1, 2) Kɛ́ “wɔkɛ wɔhe tsɔɔ akɛ Nyɔŋmɔ sɔɔlɔi . . . yɛ mlihilɛ mli” lɛ, wɔsɔɔmɔ nitsumɔ lɛ baawo yibii.—2 Kor. 6:4, 6.