SANEBIMƆI NI BIBLIA LƐ EHÃ HETOO
Mɛni hewɔ esa akɛ wɔsɔle?
Yehowa Nyɔŋmɔ miisumɔ ni wɔkɛ lɛ agba wɔnaagbai lɛ ahe sane be fɛɛ be ni wɔsumɔɔ. (Luka 18:1-7) Eboɔ wɔ toi ejaakɛ esusuɔ wɔhe. Akɛni wɔŋwɛi Tsɛ lɛ jɛɔ esuɔmɔ mli efɔ̃ɔ wɔ nine ni wɔsɔle hewɔ lɛ, esa akɛ wɔɔkpɛlɛ nɔ.—Kanemɔ Filipibii 4:6.
Sɔlemɔ jeee nifeemɔ ko kɛkɛ ni atsɔɔ nɔ abiɔ yelikɛbuamɔ. No najiaŋ lɛ, sɔlemɔ yeɔ ebuaa wɔ ni wɔbɛŋkɛɔ Nyɔŋmɔ. (Lala 8:4, 5) Kɛ́ wɔkɛ wɔnaagbai lɛ shwieɔ Nyɔŋmɔ hiɛ be fɛɛ be lɛ, ehãa naanyobɔɔ ni kã wɔ kɛ lɛ teŋ lɛ mli waa.—Kanemɔ Yakobo 4:8.
Te esa akɛ wɔsɔle wɔhã tɛŋŋ?
Kɛ́ wɔmiisɔle lɛ, Nyɔŋmɔ taooo akɛ wɔwo wiemɔi ahe loo ní wɔɔkɛɛ sɔlemɔ pɔtɛ̃ɛ ko ni wɔkase wɔwo wɔyitsoŋ lɛ. Yehowa kpaaa gbɛ akɛ wɔdamɔ shi loo wɔta shi yɛ gbɛ ko nɔ dani ebo wɔsɔlemɔi atoi. Yehowa miisumɔ ni wɔsɔle kɛjɛ wɔtsuiŋ. (Mateo 6:7) Akɛ nɔkwɛmɔnɔ lɛ, Hana ni hi shi yɛ blema Israel lɛ sɔle yɛ eweku shihilɛ ko ni sũ etsui waa lɛ he. Sɛɛ mli be ni ekɔmɔyeli lɛ tsɔ miishɛɛ lɛ, ejɛ etsuiŋ esɔle kɛda Nyɔŋmɔ shi.—Kanemɔ 1 Samuel 1:10, 12, 13, 26, 27; 2:1.
Kwɛ hegbɛ kpele ni wɔyɔɔ! Wɔbaanyɛ wɔkɛ wɔnaagbai lɛ ashwie wɔ-Bɔlɔ lɛ hiɛ. Wɔbaanyɛ wɔjie eyi ni wɔda lɛ shi hu yɛ nibii ni efeɔ lɛ ahe. Ekã shi faŋŋ akɛ, wɔkuŋ wɔhiɛ wɔshwieŋ hegbɛ ni nɔ bɛ nɛɛ nɔ kɔkɔɔkɔ.—Kanemɔ Lala 145:14-16.