Ye Obua Mɛi Krokomɛi ni “Amɛkɛ Nibii ni Aŋmala lɛ Atsu Nii”
1 Efaaa akɛ ‘aaanu’ gbalɛ wiemɔi ni yɔɔ Kpojiemɔ wolo lɛ mli lɛ kɛkɛ. Kɛ abaana he sɛɛ jogbaŋŋ lɛ, esa akɛ mɔ lɛ kɛ nɔ ni aŋma lɛ ‘atsu nii.’ (Kpoj. 1:3) Woji ni akɛhaa lɛ ji kaselɔi afeemɔ lɛ shishijee kɛkɛ. Kɛ wɔna mɛi ni yɔɔ he miishɛɛ lɛ, ni amɛmiisumɔ akɛ amɛnu lɛ, esa akɛ wɔku wɔ sɛɛ amrɔ nɔŋŋ koni wɔyaye wɔbua amɛ ni amɛkase babaoo. Mɛni wɔbaanyɛ wɔwie he yɛ wɔ klɛŋklɛŋ sɛɛsaramɔ lɛ mli?
2 Kɛ owie okadifeemɔŋ okpɔŋɔ nɔtaralɔi ejwɛ lɛ ahe yɛ oklɛŋklɛŋ saramɔ lɛ mli lɛ, obaanyɛ oje osanegbaa lɛ shishi nɛkɛ:
◼ “Be ko lɛ wɔwie Kpojiemɔ wolo lɛ kɛ bɔ ni emli gbalɛi lɛ baa mli ŋmɛnɛ yɛ je lɛŋ saji amli lɛ he sane. Kpojiemɔ yitso 6 lɛ gba okadifeemɔŋ okpɔŋɔ nɔtaralɔi ejwɛ lɛ akpɔŋɔtamɔ ni kɛ awuiyeli kɛ fimɔ shihilɛ babaoo baaba shikpɔŋ nɔ lɛ he sane efɔ shi. Wɔna enɛ mlibaa kɛ wɔ hiŋmɛii. Mɛi babaoo susuɔ be ni fimɔ shihilɛ nɛɛ baaba naagbee lɛ he koni wɔnyɛ wɔna toiŋjɔlɛ jeŋ shihilɛ mli ŋɔɔmɔ. Te osusuɔ he tɛŋŋ? [Ŋmɛɛ gbɛ ni ewie.] Yesu kaselɔi lɛ yɛ sanebimɔ nɛɛ hetoohamɔ he miishɛɛ.” Kanemɔ he ni atee sanebimɔ lɛ shi yɛ Mateo 24:3 lɛ, kɛ he ni Yesu kɛ hetoohamɔ lɛ ha lɛ hu yɛ kuku 34. Kɛ ahere nɔ jogbaŋŋ lɛ, tsɔɔmɔ naagbee gbii lɛ ahe saji babaoo mli.
3 Kɛ nyɛsusu Nyɔŋmɔ Maŋtsɛyeli lɛ he yɛ klɛŋklɛŋ saramɔ lɛ mli lɛ, obaanyɛ okpɛ oyiŋ ni otsa nɔ kɛ sanebimɔ nɛɛ akɛ:
◼ “Mɛɛ nɔyeli osusuɔ akɛ ehe miihia koni akɛtsu adesai ahiamɔ nii ahe nii? [Ŋmɛɛ gbɛ ni ewie. Kanemɔ Yeremia 10:23.] Taakɛ obaanyɛ ona lɛ, Nyɔŋmɔ etoko eyiŋ pɛŋ akɛ gbɔmɔ akudɔ lɛ diɛŋtsɛ esaji. Mɔdɛŋ sɔrɔtoi ni abɔɔ ni afee nakai ni Nyɔŋmɔ yelikɛbuamɔ bɛ mli lɛ ji nɔ ni kɛ wɔ naagbai babaoo eba lɛ. Nyɔŋmɔ Maŋtsɛyeli lɛ pɛ ji nɔyeli ni baanyɛ ekɛ nɔ ni he hiaa wɔ lɛ aha.” Gbelemɔ Reasoning wolo lɛ baafa 230, ni nyɛsusu ŋmalɛi ni yɔɔ klɛŋklɛŋ saneyitso bibioo lɛ shishi lɛ he. Tsa sanegbaa lɛ nɔ kɛtsɔ nɔ hewɔ ni wɔbaanyɛ wɔkɛ wɔhiɛ afɔ Nyɔŋmɔ nɔ kwraa lɛ he sane mlitsɔɔmɔ nɔ.
4 Ekolɛ obaasumɔ ni oka enɛ okwɛ koni okɛje Ŋmalɛ mli sanegbaa shishi:
◼ Tsɔɔmɔ lɛ mfoniri ni yɔɔ Kpojiemɔ Naagbee wolo lɛ baafa 302, ni otsɔɔ mli akɛ: “Adesai baana shihilɛi nɛɛ amli ŋɔɔmɔ kɛji afeɔ Nyɔŋmɔ suɔmɔnaa nii yɛ shikpɔŋ nɔ taakɛ afeɔ yɛ ŋwɛi lɛ. Shi kɛlɛ, mɛi komɛi sheɔ gbeyei akɛ shihilɛi gbohii baaba ekoŋŋ. Enyɛŋ eba lɛ nakai ejaakɛ mɛi fɔji lɛ fɛɛ baaho aya.” Kanemɔ Lala 37:10, 11. Tsɛ shiatsɛ lɛ koni ena wɔ Biblia mli nikasemɔ he gbɛjianɔtoo lɛ he sɛɛ koni ekase babaoo.
5 Kɛ oshi “Shihilɛ yɛ Toiŋjɔlɛ Jeŋ Hee ko Mli” dɛhiɛmɔ wolo lɛ, tsɔɔmɔ lɛ mfoniri ni yɔɔ hiɛ lɛ koni okane kuku 1 ni yɔɔ saneyitso ni ji “Shihilɛ yɛ Nyɔŋmɔ Jeŋ Hee lɛ Mli” lɛ shishi lɛ. No sɛɛ lɛ kɛɛmɔ akɛ:
◼ “Kɛ wɔmiisumɔ ni wɔhi jeŋ ni tamɔ nakai mli lɛ, nɔ ko yɛ ni ehe miihia ni esa akɛ wɔfee.” Kanemɔ naagbee kuku lɛ, ni okɛ Kpojiemɔ Naagbee wolo lɛ aha.
6 Akɛni wɔyiŋtoo ji ni wɔje Biblia mli nikasemɔi ashishi hewɔ lɛ, ehe miihia ni wɔfee sɛɛsaramɔi ni mɔɔ shi. Too be he gbɛjianɔ oha amɛ, ni osaa ohe jogbaŋŋ. Wɔbaanyɛ wɔtsɔ nɛkɛ gbɛ nɔ wɔye wɔbua mɛi ni yɔɔ tsui kpakpa lɛ yɛ anɔkwale mli.—Kpoj. 22:6, 7.