Ani Wɔmiisara Be Fɛɛ Be—Wɔmiikwa Nibii ni Gbalaa Mɔ Jwɛŋmɔ?

¹ Yesu kɛ kɔkɔbɔɔ ha akɛ: “Nyɛsaraa be fɛɛ be . . . koni nyɛnyɛ” amanehului ni baaba kɛ̃ lɛ “fɛɛ mli nyɛje.” (Luka 21:36) Adesa yinɔsane be ni jaraa waa fe fɛɛ mli wɔyɔɔ lɛ. Amanehulu miimɛ mɛi ni kɛ amɛhe haa mumɔŋ wɔdɔiwɔɔ lɛ. Enɛ kɛ oshara baa wɔteŋ mɔ fɛɛ mɔ nɔ. Yesu tsi niyeli, ninumɔ, kɛ daa gbi shihilɛ mli yeyeeye-feemɔ ta. Mɛni hewɔ? Ejaakɛ nɛkɛ nibii nɛɛ baanyɛ ahe wɔbe fɛɛ, amɛbaafee nibii ni gbalaa mɔ jwɛŋmɔ, ni ekɛ mumɔŋ wɔdɔiwɔɔ ni yɔɔ oshara baaba.

² Nibii ni Fɔɔ Mɔ Jwɛŋmɔ Gbalamɔ: Mɛi komɛi eha hiɛtserɛjiemɔ ni fa tsɔ loo nɔ ni ejaaa ehe amɛbe fɛɛ, ni amɛtsɔmɔ mɛi ni TV kwɛmɔ eka amɛhe. Shi kɛlɛ, Maŋtsɛyeli lɛ taomɔ klɛŋklɛŋ etsɔɔɔ akɛ esa akɛ wɔkwa hiɛtserɛjiemɔi fɛɛ. Kɛ wɔkɛ shishinumɔ kɛ hiɛshikamɔ tsu nii lɛ, hiɛtserɛjiemɔ he baanyɛ aba sɛɛnamɔ. (Okɛto 1 Timoteo 4:8 he.) Shi efeɔ nɔ ni gbalaa mɔ jwɛŋmɔ kɛ ebatsɔ nɔ titri yɛ wɔshihilɛ mli, ni ehe wɔbe, nibii ni wɔyɔɔ, loo ehe be ni wɔkɛnaa Maŋtsɛyeli shiɛmɔ nitsumɔ lɛ mli gbɛfaŋnɔ lɛ.

³ Nɔ kroko ni gbalaa mɔ jwɛŋmɔ waa ni kɛ mumɔŋ wɔdɔiwɔɔ baa ji heloo gbɛfaŋ nibii ni he ehiaaa taomɔ. Enɛ biɔ ni mɔ afite be babaoo yɛ nitsumɔ hé, ni ehaà mumɔŋ nibii asɛɛdii nɔ. Mɛi komɛi elaaje mumɔŋ otii yɛ heloo gbɛfaŋ nibii ataomɔ ni amɛkɛ amɛhe wo mli vii bɔni afee ni amɛna shihilɛ mli miishɛjemɔ nibii babaoo hewɔ. Yɛ be mli ni “ŋmaa kɛ hehaa nii” he hiaa wɔ lɛ, esa akɛ wɔbu wɔhe kɛjɛ shika suɔmɔ ni wɔɔna, ni baanyɛ agbala wɔ kɛjɛ hemɔkɛyeli lɛ he lɛ he. (1 Tim. 6:8-10) Kɛ wɔnyɛɛɛ wɔkɛ wɔhiŋmɛi ama Maŋtsɛyeli lɛ he nibii anɔ lɛ, wɔbaanyɛ wɔgbɔjɔ yɛ wɔ weku lɛ mumɔŋ hiamɔ nii ahe nitsumɔ mli, ni wɔnyɛŋ wɔgbe wɔ sɔɔmɔ lɛ naa.—1 Tim. 5:8; 2 Tim. 4:5.

⁴ Ni mɛi krokomɛi hu haa ‘shihilɛ mli yeyeeye-feemɔ heɔ amɛtsuii’ lolo kɛyashɛɔ he ni amɛwɔɔ yɛ mumɔŋ. (Luka 21:34) Yɛ bei komɛi amli lɛ, yeyeeye-feemɔ baa mɔ nɔ yɛ hewalɛnamɔ mli naagbai loo weku shihilɛ mli haomɔi ahewɔ. Shi esaaa akɛ wɔŋmɛɔ gbɛ koni nibii ni kɔɔ wɔhe nɛɛ ahã wɔhiɛ ni hiɔ wɔhe nɔ yɛ nibii agbɛjianɔtoo nɛɛ naagbee ni baa kɛ foi nɛɛ he lɛ aba shi.—Mar. 13:33.

⁵ Nɔ ko nɔ ko bɛ ni baaŋɔɔ Abonsam naa fe ni eeenyɛ eha wɔtamɔ mɛi ni miila lamɔi, ni wɔmiidi je lɛŋ nibii ni bɛ pɔtɛɛ lɛ asɛɛ. Esa akɛ wɔwuu koni wɔhiɛ akã yɛ mumɔŋ. Wɔle akɛ ‘Yehowa gbi lɛ miiba tamɔ julɔ,’ ni ehe miihia ni ‘wɔshi kpe ni wɔhiɛ aka shi.’ (1 Tes. 5:2, 6) Kɛ wɔyoo wɔdɔiwɔɔ he okadii komɛi yɛ wɔ diɛŋtsɛ wɔmli lɛ, ehe hiaa ni ‘wɔjie duŋ mli nitsumɔi lɛ wɔshwie.’—Rom. 13:11-13.

⁶ Nibii ni Baaye Abua Wɔ ni Wɔsara: Mɛni ji nibii ni yeɔ buaa nɛɛ? Sɔlemɔ he miihia. Esa akɛ wɔsɔle be fɛɛ be ni wɔkafɔ̃ɔ. (1 Tes. 5:17) Wɔhe ni wɔkɛaakpɛtɛ Kristofoi asafo lɛ he lɛ ‘baakanya wɔ kɛya suɔmɔ kɛ nitsumɔi kpakpai amli.’ (Heb. 10:24) Wɔmli ni wɔɔpɛi wɔkwɛ yɛ anɔkwayeli mli be fɛɛ be lɛ baaye abua wɔ ni wɔhiɛ ahi bɔ ni ehe hiaa ni wɔye wɔgbɔjɔmɔi anɔ lɛ nɔ. (2 Kor. 13:5) Teemɔŋ nikasemɔ sui kpakpai baaha wɔkɛ ‘hemɔkɛyeli wiemɔi lɛ alɛ wɔhe.’ (1 Tim. 4:6) Kɛ wɔkɛ ekãa fee lɛ, wɔbaanyɛ wɔna hekɛnɔfɔɔ akɛ wɔbaajo nibii ni gbalaa mɔ jwɛŋmɔ lɛ naa foi, koni ‘wɔhiɛ atsɛ ni wɔdamɔ shi shiŋŋ yɛ hemɔkɛyeli lɛ mli.’—1 Kor. 16:13.