Yitso 2
Awo Ehiɛ Nyam Dani Afɔ Lɛ
BENI bɔfo Gabriel kɛɛ obalayoo Maria akɛ ebaafɔ binuu ni ebaatsɔ naanɔ maŋtsɛ lɛ, Maria bi lɛ akɛ: “Te aaafee tɛŋŋ ni enɛ aba mliŋ, akɛni mileee nuu nɛɛ?”
Ni Gabriel tsɔɔ mli akɛ: “Mumɔ krɔŋkrɔŋ aaaba onɔ, ni Ŋwɛinyo lɛ hewalɛ aaabaha onɔ, no hewɔ lɛ nakai bi krɔŋkrɔŋ lɛ hu ni ooofɔ lɛ, aaatsɛ lɛ Nyɔŋmɔ Bi.”
Bɔni afee ni eye ebua Maria ni ehe eshɛɛ sane lɛ eye lɛ, Gabriel tee nɔ akɛ: “Shi naa, owekunyo Elizabet lɛ hu, ena binuu musu yɛ egbɔlɛ mli, ni mɔ ni atsɛɔ lɛ kene lɛ ena nyɔji ekpaa. Ejaakɛ nɔ ko nɔ ko bɛ ni Nyɔŋmɔ nyɛŋ afee.”
Maria kpɛlɛ Gabriel wiemɔ lɛ nɔ. Ni mɛni ekɛɛ? Ejaje akɛ: “Naa, Nuŋtsɔ lɛ [Yehowa] weyoo ji mi; aba mli aha mi yɛ owiemɔ lɛ naa.”
Beni Gabriel shi lɛ sɛɛ etsɛɛɛ lɛ, Maria saa ehe ni eshi shia akɛ eeya eyasara Elizabet ni kɛ ewu Zakaria yɔɔ Yudea gɔji lɛ anɔ lɛ. Kɛjɛ Maria shia ni yɔɔ Nazaret lɛ kɛyaa jɛmɛ lɛ jɛkɛ, ekolɛ eheɔ aaafee gbii etɛ loo ejwɛ gbɛnyiɛmɔ.
Beni Maria yashɛ Zakaria shia lɛ, ebote mli ni eŋa amɛ. Kɛkɛ ni mumɔ krɔŋkrɔŋ yi Elizabet obɔ ni ekɛɛ Maria akɛ: “Ajɔɔo yɛ yei ateŋ, ni ajɔɔ omusuŋ bi lɛ! Ni nɛgbɛ enɛ jɛ baha mi ni mi-Nuŋtsɔ nyɛ baa miŋɔɔ nɛɛ? Shi naa, amrɔ pɛ ni oŋamɔ gbee lɛ gbɛɛ yɛ mitoiŋ lɛ, abifao lɛ kɛ mlifilimɔ tumɔ yɛ mimusuŋ.”
Beni Maria nu enɛ lɛ, ekɛ hiɛsɔɔ ni jɛ etsuiŋ to he akɛ: “Misusuma miikafo Nuŋtsɔ lɛ [Yehowa], ni mimumɔ mli miifili lɛ yɛ Nyɔŋmɔ, miyiwalaherelɔ lɛ hewɔ, akɛ ebakwɛ eweyoo humi ni ji lɛ lɛ. Ejaakɛ naa, kɛjɛ ŋmɛnɛ gbi nɛɛ nɔ lɛ, yinɔi lɛ fɛɛ aaajɔɔ mi; ejaakɛ Ofe lɛ efee nii wuji eha mi.” Ni kɛlɛ, yɛ mɔbɔnalɛ ni ajie kpo aha lɛ lɛ fɛɛ sɛɛ lɛ, Maria kɛ woo lɛ fɛɛ ha Nyɔŋmɔ. Ekɛɛ: “Ni krɔŋkrɔŋ ji egbɛi lɛ, ni emɔbɔnalɛ lɛ yɛ mɛi ni sheɔ lɛ gbeyei lɛ anɔ kɛyashi yinɔi ayinɔi.”
Maria tee nɔ ejie Nyɔŋmɔ yi kɛ mumɔ naa gbalɛ lala ko, ni ejaje akɛ: “Ekɛ enine etsu hewalɛ nitsumɔ; mɛi ni woɔ amɛhe yɛ amɛtsuiŋ jwɛŋmɔ mli lɛ egbɛ amɛ eshwa. Ekpa ojei kɛjɛ amɛsɛii anɔ, ni ewó mɛi ni ji humii lɛ anɔ. Eha hɔmɔwɔlɔi etɔrɔ kɛ nii kpakpai, ni henálɔi lɛ, eshwie amɛ efolo. Eye ebua ewenuu Israel, koni ekai emɔbɔnalɛi lɛ, taakɛ bɔ ni ekɛɛ wɔtsɛmɛi lɛ, eha Abraham kɛ eseshibii lɛ kɛya naanɔ.”
Maria kɛ Elizabet hi shi aaafee nyɔji etɛ, ni ŋwanejee ko bɛ he akɛ ebafee yelikɛbualɔ kpele yɛ naagbee otsii ni Elizabet baafɔ lɛ mli. Eyɛ fɛo diɛŋtsɛ akɛ nɛkɛ yei anɔkwafoi enyɔ nɛɛ ni hiɛ musu yɛ Nyɔŋmɔ yelikɛbuamɔ naa lɛ aaanyɛ ahi shi yɛ he kome yɛ amɛwala be mli jɔɔmɔ be nɛɛ mli!
Ani oyoo bɔ ni awo Yesu hiɛ nyam po dani afɔ lɛ lɛ? Elizabet tsɛ lɛ “mi-Nuŋtsɔ,” ni ebi ni efɔko lɛ lɛ tu kɛ miishɛɛ beni Maria pue yɛ jɛmɛ klɛŋklɛŋ lɛ. Yɛ gbɛ kroko nɔ lɛ, yɛ sɛɛ mli lɛ, mɛi krokomɛi kɛ bulɛ haaa Maria kɛ ebi ni ebaafɔ lɛ lɛ, taakɛ wɔbaana lɛ. Luka 1:26-56.
▪ Mɛni Gabriel kɛɛ ni ye bua Maria koni enu gbɛ ni ebaatsɔ nɔ eŋɔ hɔ lɛ shishi?
▪ Mɛɛ gbɛ nɔ atsɔ awo Yesu hiɛ nyam po dani afɔ lɛ?
▪ Mɛni Maria kɛɛ yɛ gbalɛ lala ko ni ela kɛjie Nyɔŋmɔ yi lɛ mli?
▪ Be enyiɛ Maria kɛhi Elizabet masɛi, ni mɛni hewɔ esa jogbaŋŋ akɛ Maria kɛ Elizabet aaahi shi yɛ nɛkɛ be nɛɛ mli lɛ?