Yitso 17

Etsɔɔ Nikodemo Nii

BENI Yesu yeɔ afi 30 Ŋ.B. Hehoo lɛ, efee nibii komɛi ni sa kadimɔ loo naakpɛɛ nii. Nɔ ni jɛ mli ba ji akɛ, mɛi pii na hemɔkɛyeli yɛ emli. Nikodemo, ni ji Sanhedrin aloo Yudafoi akojomɔ he wulu fe fɛɛ lɛ mli nyo ko lɛ, hiɛ sɔ enɛ waa ni etao ni ekase nii babaoo. No hewɔ lɛ etee Yesu ŋɔɔ yɛ gbɛkɛ duŋ be mli, ekolɛ eeshe gbeyei akɛ kɛ ana lɛ lɛ, ehe guɔ baagbo yɛ Yudafoi krokomɛi ni ale ekɛ amɛ lɛ ahiɛ.

Ekɛɛ: “Rabi, wɔle akɛ tsɔɔlɔ ni jɛ Nyɔŋmɔ ŋɔɔ ba jio; ejaakɛ mɔ ko nyɛŋ afee okadii ni ofeɔ nɛɛ, akɛ ja Nyɔŋmɔ kɛ mɔ lɛ yɛ.” Yesu kɛɛ Nikodemo yɛ hetoohamɔ mli akɛ, dani mɔ ko aaabote Nyɔŋmɔ Maŋtsɛyeli lɛ mli lɛ, ja ‘afɔ mɔ lɛ ekoŋŋ’ da.

Ni kɛlɛ, te aaafee tɛŋŋ ni aaanyɛ afɔ mɔ ekoŋŋ hu? Nikodemo bi akɛ: “Te aaafee tɛŋŋ ni beni gbɔmɔ egbɔ lɛ ni afɔ lɛ hu? Ani eeenyɛ ebote enyɛ musu mli ekoŋŋ ni afɔ lɛ?”

Dabi, jeee nakai ji bɔ ni fɔ ni aaafɔ mɔ ekoŋŋ lɛ tsɔɔ. Yesu tsɔɔ mli akɛ: “Kɛji ajɛɛɛ nu kɛ mumɔ mli afɔɔɔ mɔ ko lɛ, enyɛŋ Nyɔŋmɔ maŋtsɛyeli lɛ mli ebote.” Beni abaptisi Yesu ni mumɔ krɔŋkrɔŋ lɛ kpeleke shi kɛba enɔ lɛ, atsɔ no nɔ afɔ lɛ yɛ “nu kɛ mumɔ mli.” Nyɔŋmɔ tsɔ sane jajemɔ ni fata he kɛjɛ ŋwɛi akɛ, ‘Mɔ nɛ ji misuɔmɔ Bi ni minaa ehe tsui lɛ’ nɔ etswa adafi akɛ efɔ mumɔŋ binuu ko ni yɔɔ gbɛkpamɔ akɛ eeebote ŋwɛi Maŋtsɛyeli lɛ mli. Yɛ sɛɛ mli, yɛ Pentekoste yɛ afi 33 Ŋ.B. lɛ, mɛi krokomɛi ni abaptisi amɛ lɛ hu anine baashɛ mumɔ krɔŋkrɔŋ lɛ nɔ ni abaatsɔ no nɔ afɔ amɛ hu ekoŋŋ akɛ Nyɔŋmɔ mumɔŋ bii.

Shi gbɛhe ni Nyɔŋmɔ Bi krɛdɛɛ ni ji adesa nɛɛ hiɛ lɛ he miihia waa. Yesu kɛɛ Nikodemo akɛ: “Ni bɔ ni Mose wo onufu lɛ nɔ yɛ ŋa lɛ nɔ lɛ, nakai nɔŋŋ sa akɛ awo gbɔmɔ Bi lɛ nɔ, koni mɔ fɛɛ mɔ ni heɔ yeɔ lɛ hiɛ akakpata.” Hɛɛ, taakɛ bɔ ni ehe bahia ni nakai Israelbii ni onufui ni ebɔɔ yɔɔ amɛmli lɛ ekɔmɔ amɛ lɛ akwɛ akɔɔble onufu lɛ koni amɛyi ana wala lɛ, nakai nɔŋŋ ehe miihia ni adesai fɛɛ ana hemɔkɛyeli yɛ Nyɔŋmɔ Bi lɛ mli koni ahere amɛyiwala kɛjɛ amɛgbele shihilɛ lɛ mli.

Beni Yesu maa gbɛfaŋnɔ ni suɔmɔ yɔɔ mli ni Yehowa ná yɛ enɛ mli lɛ nɔ mi ehaa Nikodemo lɛ, ekɛɛ lɛ akɛ: “Ejaakɛ nɛkɛ Nyɔŋmɔ sumɔɔ je lɛ, akɛ eŋɔ e-Bi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ena naanɔ wala.” No hewɔ lɛ, beni eyɔɔ biɛ yɛ Yerusalem yɛ be mli ni eje esɔɔmɔ nitsumɔ lɛ shishi nyɔji ekpaa sɛɛ lɛ, Yesu fee lɛ faŋŋ akɛ lɛ ji gbɛ ni Yehowa Nyɔŋmɔ kɛha ni abaatsɔ nɔ ahere adesai ayiwala lɛ.

Yesu tee nɔ etsɔɔ mli lolo eha Nikodemo akɛ: “Ejaakɛ Nyɔŋmɔ tsuuu e-Bi lɛ kɛbaaa je lɛ mli koni ebakojo je lɛ,” ni ji akɛ, koni ebabu amɛ fɔ, aloo ebabu amɛ gbele fɔ, ni ebu adesai aweku lɛ fɔ kɛha hiɛkpatamɔ. Shi moŋ, taakɛ Yesu kɛɛ lɛ, atsu lɛ kɛba “koni atsɔ enɔ ahere je lɛ yiwala.”

Nikodemo kɛ gbeyeishemɔ ba Yesu ŋɔɔ yɛ duŋ lɛ mli koni akana lɛ. No hewɔ lɛ eyɛ miishɛɛ waa akɛ Yesu kɛɛ lɛ nɛkɛ ni ekɛgbe esanegbaa lɛ naa: “Shi kojomɔ lɛ nɛ, akɛ la [ni Yesu fee he mfoniri yɛ eshihilɛ kɛ enitsɔɔmɔ mli] lɛ eba je lɛ mli, shi gbɔmɛi sumɔɔ duŋ lɛ moŋ fe la lɛ, ejaakɛ amɛnitsumɔi lɛ efɔji ni. Ejaakɛ mɔ fɛɛ mɔ ni tsuɔ nifɔjianii lɛ nyɛɔ la lɛ, ni ebaaa la lɛ he, koni akakã enitsumɔi lɛ. Shi mɔ ni feɔ anɔkwale nii lɛ baa la lɛ he koni enitsumɔi lɛ aje kpo, ejaakɛ Nyɔŋmɔ mli atsu amɛ yɛ.” Yohane 2:23–3:21; Mateo 3:16, 17; Bɔfoi lɛ Asaji 2:1-4; 4 Mose 21:9.

▪ Mɛni ha Nikodemo yasara lɛ lɛ, ni mɛni hewɔ eba yɛ gbɛkɛ mli lɛ?

▪ Ni ‘aaafɔ mɔ ko ekoŋŋ’ lɛ tsɔɔ mɛni?

▪ Te Yesu fee gbɛfaŋnɔ ni enaa yɛ wɔyiwalaheremɔ mli lɛ he mfoniri eha tɛŋŋ?

▪ Mɛni ji ba ni Yesu baaa ni ebakojo je lɛ shishi?