Yitso 46

Yoo ko Ta Etade lɛ He

YESU sɛɛkuu kɛmiijɛ Dekapolis lɛ he amaniɛbɔɔ bashɛ Kapernaum, ni asafo babaoo ko babua amɛhe naa yɛ ŋshɔ lɛ naa koni amɛkɛ lɛ akpe. Ŋwanejee ko bɛ he akɛ amɛnu akɛ eha ahum lɛ kpa tswaa ni etsa nuu ni daimonioi yɔɔ emli lɛ. Agbɛnɛ, beni enyiɛ ŋshɔ lɛ naa lɛ, amɛbabua amɛhe naa yɛ emasɛi, ni amɛfee klalo kɛmiikpa lɛ gbɛ.

Mɛi ni taoɔ ni amɛna Yesu lɛ ateŋ mɔ kome ji Yairo, ni eji kpee he lɛ onukpai lɛ ateŋ mɔ kome lɛ. Kɛkɛ ni eho egbee Yesu naji anaa ni ekpa lɛ fai aahu akɛ: “Gbo mibiyoo fioo heɔ agbo nɛɛ; hewɔ lɛ ba ni okɛ oniji abashwie enɔ, ni ena hewalɛ, ni eyi ana wala.” Akɛni gbekɛyoo lɛ ji ebi koome pɛ, ni eye afii 12 hu hewɔ lɛ, Yairo sumɔɔ esane waa.

Yesu kpɛlɛ nɔ, ni mɛi babaoo ni yɔɔ jɛmɛ lɛ fata ehe ni amɛyiŋ kɛmiiya Yairo shia lɛ. Wɔbaanyɛ wɔna bɔ ni mɛi lɛ baana miishɛɛ amɛha yɛ be mli ni amɛkpaa naakpɛɛ nii kroko gbɛ lɛ. Shi yoo kome ko yɛ mɛi lɛ ateŋ ni ejwɛŋmɔ ka naagba wulu ko ni ka enɔ lɛ pɛ nɔ.

Afii 12 sɔŋŋ nɛ, ni yoo nɛɛ ena amanehulu yɛ la ni hoɔ lɛ lɛ hewɔ. Etee datrɛfoi sɔrɔtoi aŋɔɔ, ni efite eshika fɛɛ bɔni afee ni ekɛtsa ehe. Shi anyɛko aye abua lɛ; shi moŋ enaagba lɛ mli ewo wu.

Taakɛ bɔ ni ekolɛ obaana lɛ, kɛfata gbɔjɔmɔ ni egbɔjɔɔ lɛ lɛ he lɛ, yoo nɛɛ hela lɛ yɛ hiɛgbele ni eshwieɔ ehiɛ shi hu. Mɛi efɔɔɔ hela ni tamɔ nɛkɛ he wiemɔ yɛ mɛi ateŋ. Kɛfata he lɛ, yɛ Mose Mla lɛ shishi lɛ kɛ yoo ko yɛ ni la hoɔ lɛ lɛ, ehe tseee, ni esa akɛ mɔ fɛɛ mɔ ni taa ehe loo emama ni la ekpa mli lɛ he lɛ aju ehe, ni lɛ hu ehe tseee kɛyashi gbɛkɛ.

Yoo lɛ enu naakpɛɛ nii ni Yesu feɔ lɛ he sane ni amrɔ nɛɛ eetao lɛ. Shi akɛni ehe tseee hewɔ lɛ, enyiɛ mɛi lɛ ateŋ blɛoo koni akayoo lɛ, ni ekɛɛ lɛ diɛŋtsɛ ehe akɛ: “Kɛji mina etade lɛ he mita kɛkɛ lɛ mihe aaawa mi.” Beni efee nakai lɛ, amrɔ nɔŋŋ ni enu he akɛ la ni hoɔ lɛ lɛ ekpa!

“Namɔ ta mitade lɛ he lɛ?” Kwɛ bɔ ni Yesu wiemɔi nɛɛ baaha enaa akpɛ ehe! Te eeefee tɛŋŋ ele hu? Shi Petro kɛɛ: ‘Tsɔɔlɔ, onaa akɛ asafo lɛ miitsi miibɛŋkɛ bo ni amɛmiimia bo, ni obiɔ akɛ “Namɔ ta mihe lɛ?” ’

Beni Yesu taoɔ yoo lɛ yɛ mɛi lɛ ateŋ lɛ, etsɔɔ mli akɛ: “Mɔ ko eta mihe, ejaakɛ minu he akɛ hewalɛ ko eje mimli.” Lɛlɛŋ, jeee hetaa folo ko kɛkɛ ni, ejaakɛ tsamɔ ni jɛ mli ba lɛ gbala hewalɛ yɛ Yesu mli.

No hewɔ lɛ ni yoo lɛ na akɛ ayoo lɛ lɛ, eba ni ebagbee Yesu naji anaa, kɛ gbeyeishemɔ kɛ hekpokpomɔ. Kɛkɛ ni egba anɔkwale ni kɔɔ ehela lɛ he kɛ bɔ ni agbɛnɛ atsa lɛ lɛ fɛɛ, yɛ asafo muu lɛ fɛɛ hiɛ.

Akɛni anɔkwale ni ewie nɛɛ tsirɛ Yesu hewɔ lɛ, ekɛ mɔbɔnalɛ shɛje emii ni ekɛɛ: “Biyoo, ohemɔkɛyeli eha ohe ewao; yaa yɛ hejɔlɛ mli, ni ohela lɛ aaajɔo.” Kwɛ bɔ ni ehi jogbaŋŋ akɛ wɔɔle akɛ Mɔ ni Nyɔŋmɔ ehala lɛ koni eye shikpɔŋ nɛɛ nɔ lɛ ji mɔ ko ni naa mɔbɔ, ni esumɔɔ mɛi asane ni eyɛ hewalɛ ni ekɛaaye ebua amɛ hu! Mateo 9:18-22; Marko 5:21-34; Luka 8:40-48; 3 Mose 15:25-27.

▪ Namɔ ji Yairo, ni mɛni hewɔ ni eba Yesu ŋɔɔ lɛ?

▪ Mɛɛ naagba yoo ko yɔɔ, ni mɛni hewɔ Yesu ŋɔɔ ni eeeba kɛha yelikɛbuamɔ lɛ wa waa kɛha lɛ lɛ?

▪ Mɛɛ gbɛ nɔ atsɔ atsa yoo lɛ, ni mɛɛ gbɛ nɔ Yesu shɛje emii yɛ?