Yitso 49

Gbɛfaa Kroko Kɛha Shiɛmɔ yɛ Galilea

BENI ekɛ aaafee afii enyɔ eshiɛ waa sɛɛ lɛ, ani agbɛnɛ Yesu baaje shishi akɛ eekpa ni ejɔɔ ehe? Nɔ ni tamɔɔɔ nakai lɛ, elɛɛ esɔɔmɔ nitsumɔ lɛ mli kɛtsɔ gbɛfaa kroko nɔ, nɔ ni ji etɛ nɔ kɛtee Galilea. Eyasara maji kɛ akrowai ni yɔɔ jɛi kpokpai anɔ lɛ fɛɛ, ni etsɔɔ nii yɛ kpee hei lɛ ni eshɛi Maŋtsɛyeli lɛ he sanekpakpa lɛ. Nɔ ni ena yɛ egbɛfaa lɛ mli lɛ kɔne eyiŋ fe tsutsu lɛ akɛ ehe miihia ni eha shiɛmɔ nitsumɔ lɛ aya hiɛ.

He fɛɛ he ni Yesu yaa lɛ, enaa akɛ mumɔŋ tsamɔ kɛ miishɛjemɔ he miihia gbɔmɛi lɛ. Amɛtamɔ tooi ni bɛ kwɛlɔ, ni amɛtara loo ni amɛnyiɛ kɛkɛ, ni emusuŋ tsɔɔ lɛ yɛ amɛhewɔ. Ekɛɛ ekaselɔi lɛ akɛ: “Nikpamɔ lɛ fa moŋ, shi nitsulɔi lɛ faaa. No hewɔ lɛ nyɛkpaa nikpamɔ Nuŋtsɔ lɛ fai, koni ewo nitsulɔi agbɛ kɛba enikpamɔ lɛ mli!”

Yesu yɛ gbɛjianɔtoo ni ekɛtsuɔ nii. Etsɛ bɔfoi 12 lɛ, ni etsɔ hiɛ ehala amɛ aaafee afi ni tsɔ hiɛ lɛ kɛba. Kɛkɛ ni eja amɛmli enyɔnyɔ, ni amɛyi fee shiɛlɔi akui ekpaa, ni ekɛ famɔi ha amɛ. Ekɛɛ amɛ akɛ: “Nyɛkagbalea jeŋmajiaŋbii lɛ aŋɔɔ, ni nyɛkabotea Samariabii amaŋ ko mli hu; shi moŋ nyɛyaa Israel we tooi ni elaaje lɛ aŋɔɔ. Shi ni nyɛyaa nɛɛ, nyɛshiɛa nyɛkɛa akɛ: Ŋwɛi maŋtsɛyeli lɛ eshɛ shi eta.”

Maŋtsɛyeli ni amɛbaashiɛ he sane lɛ ji nɔ ni Yesu tsɔɔ amɛ ni amɛsɔle ni eba yɛ esɔlemɔ he nɔkwɛmɔ nɔ lɛ mli lɛ. Maŋtsɛyeli lɛ ebɛŋkɛ kɛ shishinumɔ akɛ Maŋtsɛ ni Nyɔŋmɔ ehala lɛ, Yesu Kristo, yɛ amɛteŋ. Bɔni afee ni ema hewalɛ ni ekaselɔi lɛ yɔɔ akɛ nakai nɔyeli ni nɔ kwɔ fe adesai anɔ lɛ najiaŋdamɔlɔi lɛ nɔ mi lɛ, Yesu ha amɛ hewalɛ ni amɛtsa helatsɛmɛi ni amɛtee gbohii ashi po. Efa amɛ ni amɛfee nɛkɛ nibii nɛɛ yaka ni amɛkahe shika.

No sɛɛ lɛ, ekɛɛ ekaselɔi lɛ ni amɛkɛ heloonaa nibii akasaa amɛhe kɛha shiɛmɔ he gbɛfaa nɛɛ. “Nyɛkataoa shika loo jwiɛtɛi loo akɔɔble nyɛwoa nyɛ hɛfiinii amli; asaŋ nyɛkataoa gbɛfaa kotoku, loo flakai enyɔ, loo tokotai, loo tso tete; shi nitsulɔ lɛ eŋmaa sa lɛ.” Mɛi ni hiɛ sɔɔ shɛɛ sane lɛ baahere nɔ ni amɛbaaha amɛ niyenii kɛ wɔɔhe. Taakɛ Yesu kɛɛ lɛ: “Shi maŋ fɛɛ maŋ loo akrowa fɛɛ akrowa mli ni nyɛaatee lɛ, nyɛbia mɔ ni sa shi yɛ jɛi, ni nyɛyato jɛi kɛyashi beyinɔ ni nyɛaatee.”

Kɛkɛ ni Yesu kɛ famɔi ha yɛ gbɛ ni aaatsɔ nɔ akɛ shiatsɛmɛi lɛ awie Maŋtsɛyeli shɛɛ sanɛ lɛ he lɛ he. Efa amɛ akɛ: “Shi kɛ nyɛmiibote shia lɛ, nyɛŋaa lɛ. Shi kɛji shia lɛ sa lɛ, nyɛhaa nyɛ hejɔlɛ lɛ abaa enɔ; shi kɛji esaaa lɛ, no lɛ nyɛ hejɔlɛ lɛ akpale aba nyɛŋɔɔ ekoŋŋ. Ni kɛji mɔ ko hereee nyɛ ni ebooo nyɛ wiemɔi lɛ atoi lɛ, nyɛjea no shia lɛ aloo no maŋ lɛŋ, ni nyɛkpokpoa nyɛnajiashi mlu lɛ.”

Yɛ maŋ ni kpooɔ wiemɔ lɛ he lɛ, Yesu jie lɛ kpo faŋŋ akɛ kojomɔ ni baaba enɔ lɛ mli baawa. Etsɔɔ mli akɛ: “Lɛlɛŋ, miikɛɛ nyɛ akɛ: Ejaraŋ haŋ Sodoma kɛ Gomora shikpɔŋ lɛ yɛ kojomɔ gbi lɛ nɔ, tamɔ no maŋ lɛ.” Mateo 9:35–10:15; Marko 6:6-12; Luka 9:1-5.

▪ Mɛɛ be Yesu je egbɛfaa ni ji etɛ kɛha shiɛmɔ yɛ Galilea lɛ shishi, ni mɛni enɛ ma nɔ mi kɛha lɛ?

▪ Beni etsuɔ ebɔfoi 12 lɛ kɛyaa ni amɛyashiɛ lɛ, mɛɛ famɔ ekɛha amɛ?

▪ Mɛni hewɔ ni eja gbɛ akɛ kaselɔi lɛ aaashiɛ akɛ Maŋtsɛyeli lɛ eshɛ shi eta lɛ?