Yitso 64

Eshaifaa He Nikasemɔ

ETAMƆ nɔ ni Yesu kɛ ekaselɔi lɛ kã he amɛyɛ shia lɛ mli lolo yɛ Kapernaum. Ekɛ amɛ miiwie bɔ ni sa akɛ amɛtsu naagbai ni baa nyɛmimɛi ateŋ lɛ he nii amɛha, no hewɔ lɛ Petro bi lɛ akɛ: “Nuŋtsɔ, shii enyiɛ minyɛmi atɔ̃ minɔ ni miŋɔfa lɛ?” Akɛni Yudafoi ajamɔ mli tsɔɔlɔi lɛ tsɔɔ akɛ akɛ eshai ake kɛyashi shii etɛ hewɔ lɛ, Petro susu akɛ bi ni eeebi akɛ “kɛyashi shii kpawo lo?” lɛ tsɔɔ mlihilɛ babaoo.

Shi jwɛŋmɔ ni tamɔ nɛkɛ akɛ aaaŋmala ashwie shi ni akɛbu naa lɛ ejaaa. Yesu jaje Petro akɛ: “Miikɛɛo akɛ jeee kɛyashi shii kpawo, shi moŋ shii nyɔŋmai kpawo kɛ kpawo.” Eetsɔɔ akɛ esaaa akɛ afoɔ husu ko awoɔ shii abɔ ni esa akɛ Petro kɛ sane ake enyɛmi lɛ he.

Yesu gba ekaselɔi lɛ abɛbua ko koni ekɛma sɔ ni ka amɛnɔ akɛ amɛkɛ sane ake lɛ nɔ mi. Ekɔɔ maŋtsɛ ko ni miitao ekɛ etsuji abu akɔntaa lɛ he. Akɛ etsuji lɛ ateŋ mɔ kome ni hiɛ lɛ nyɔmɔ babaoo ni naa shɛɔ denarioi 60,000,000 ba ehiɛ. Gbɛ ko bɛ ni eeenyɛ etsɔ nɔ ewo nyɔmɔ lɛ. No hewɔ lɛ, taakɛ Yesu tsɔɔ mli lɛ, maŋtsɛ lɛ fa ni ahɔɔ lɛ kɛ eŋa kɛ ebii fɛɛ koni akɛwo nyɔmɔ lɛ.

Enɛ hewɔ lɛ tsulɔ lɛ ho egbee enuŋtsɔ lɛ naji anaa ni ekpa lɛ fai akɛ: “Too otsui shi oha mi ni mawoo nyɔmɔ lɛ fɛɛ!”

Akɛni ena lɛ mɔbɔ hewɔ lɛ, nuŋtsɔ lɛ kɛ mlihilɛ fo tsulɔ lɛ nyɔmɔ babaoo ni ehiɛ lɛ lɛ mli. Shi Yesu tee nɔ akɛ, efee enɛ etsɛɛɛ kɛkɛ ni tsulɔ lɛ je kpo ni eyana enaanyo tsulɔ kroko ni hiɛ lɛ nyɔmɔ denarioi 100 pɛ. Nuu lɛ mɔ enaanyo tsulɔ lɛ sɛ̃ ni ebɔi esɛ̃ miamɔ akɛ: “Wo mi nyɔmɔ ni ohiɛ mi lɛ.”

Shi enaanyo tsulɔ lɛ ehiɛɛɛ shika lɛ eko. No hewɔ lɛ eho egbee tsulɔ ni ehiɛ lɛ nyɔmɔ lɛ naji anaa, ni ekpa lɛ fai akɛ: “Too otsui shi oha mi, ni mawoo nyɔmɔ lɛ fɛɛ.” Shi etamɔɔɔ enuŋtsɔ lɛ, ejaakɛ tsulɔ lɛ musuŋ etsɔɔɔ lɛ, ni eha ayawo enaanyo tsulɔ lɛ tsuŋ.

Yesu tee nɔ akɛ, enɛ hewɔ lɛ tsuji krokomɛi ni na nɔ ni tee nɔ lɛ tee amɛyakɛɛ amɛnuŋtsɔ lɛ. Kɛkɛ ni ekɛ mlifu tsu ni ayatsɛ tsulɔ lɛ kɛba. Ekɛɛ lɛ akɛ: “Tsulɔ fɔŋ, akɛni okpa mi fai hewɔ lɛ, miŋɔ nɛkɛ nyɔmɔ nɛɛ fɛɛ mikeo; ani kulɛ bo hu jeee ogbɛnaa ji akɛ ona onaanyo tsulɔ lɛ mɔbɔ, bɔ ni mi hu minao mɔbɔ lɛ?” Ni nuŋtsɔ lɛ mli fu, ni eŋɔ tsulɔ ni bɛ musuŋtsɔlɛ lɛ eha ni ayawo lɛ tsuŋ kɛyashi beyinɔ ni eeewo lɛ nyɔmɔ ni ehiɛ lɛ lɛ fɛɛ.

Kɛkɛ ni Yesu mu sane lɛ naa akɛ: “Nakai nɔŋŋ mi-Tsɛ ni yɔɔ ŋwɛi lɛ hu aaaŋɔ-fee nyɛ, kɛji nyɛteŋ mɔ fɛɛ mɔ eŋɔɔɔ enyɛmi nɔtɔmɔ ekeee lɛ kɛjɛɛɛ etsuiŋ lɛ.”

Mɛɛ eshaifaa he nikasemɔ fɛfɛo nɛ! Kɛ akɛto eshai ahe nyɔmɔ babaoo ni Nyɔŋmɔ kɛke wɔ lɛ he lɛ, tɔmɔ fɛɛ tɔmɔ ni wɔ Kristofonyo nyɛmi ko aaatɔ wɔnɔ lɛ ji nɔ ko bibioo kwraa. Kɛfata he hu lɛ, Yehowa kɛke wɔ shii akpei abɔ. Yɛ bei babaoo mli lɛ, wɔleee po akɛ wɔfee eshai wɔshi lɛ. No hewɔ lɛ, ani wɔnyɛɛɛ wɔkɛke wɔnyɛmi lɛ shii fioo ko, kɛji akɛ wɔsane ja po lɛ? Kaimɔ akɛ, taakɛ Yesu tsɔɔ yɛ e-Gɔŋ nɔ Shiɛmɔ lɛ mli lɛ, Nyɔŋmɔ ‘kɛ wɔnyɔji lɛ baake wɔ, tamɔ bɔ ni wɔ hu wɔkɛkeɔ mɛi ni hiɛ wɔ nyɔji lɛ.’ Mateo 18:21-35; 6:12; Kolosebii 3:13.

▪ Mɛni ha Petro bi sane yɛ sane ni ekɛaake enyɛmi lɛ he lɛ, ni mɛni hewɔ eeesusu jwɛŋmɔ ni ehiɛ akɛ ekɛ sane aaake enyɛmi shii kpawo lɛ he akɛ etsɔɔ mlihilɛ lɛ?

▪ Esoro bɔ ni maŋtsɛ lɛ kpɛlɛ etsulɔ lɛ faikpamɔ kɛha mɔbɔnalɛ lɛ nɔ yɛ bɔ ni tsulɔ lɛ fee enii yɛ tsulɔ kroko lɛ faikpamɔ lɛ he lɛ yɛ mɛɛ gbɛ nɔ?

▪ Mɛni wɔkaseɔ kɛjɛɔ Yesu abɛbua lɛ mli?