Yitso 73

Samarianyo Musuŋtsɔlɔ Ko

EKOLƐ Yesu yɛ Betania akrowa ni kɛ Yerusalem jɛkɛmɔ aaafee shitoi enyɔ lɛ masɛi. Nuu ko ni le Mose Mla lɛ jogbaŋŋ ba eŋɔɔ ni ebabi lɛ akɛ: “Tsɔɔlɔ, mɛni mafee ni mana naanɔ wala?”

Yesu yoo amrɔ nɔŋŋ akɛ nuu nɛɛ, ni eji mlalelɔ lɛ miibi lɛ sane nɛɛ, jeee ni eetao ekase nɔ ko, shi moŋ, ni ekɛka lɛ ekwɛ. Ekolɛ mlalelɔ lɛ yiŋtoo ji ni Yesu aha lɛ hetoo yɛ gbɛ ni baate shi awo Yudafoi lɛ aniiashishinumɔ. No hewɔ lɛ Yesu ha mlalelɔ lɛ diɛŋtsɛ fimɔ ehe, ni ebi lɛ akɛ: “Mɛni aŋma yɛ Mla lɛ mli lɛ? Te okaneɔ tɛŋŋ?”

Yɛ hetoohamɔ mli lɛ, mlalelɔ nɛɛ kɛ sanesɛɛkɔmɔ ni ekaaa tsu nii, kɛkɛ ni etsɛ wiemɔi ayisɛɛ kɛjɛ Nyɔŋmɔ mlai ni yɔɔ 5 Mose 6:5 kɛ 3 Mose 19:18 lɛ, ni ekɛɛ: “Suɔmɔ Nuŋtsɔ [Yehowa] o-Nyɔŋmɔ lɛ, kɛjɛ otsui fɛɛ kɛ osusuma fɛɛ kɛ onyɛmɔ fɛɛ kɛ ojwɛŋmɔ fɛɛ mli, kɛ onaanyo hu tamɔ bɔ ni osumɔɔ bo diɛŋtsɛ ohe.”

Ni Yesu here lɛ nɔ akɛ: “Bɔ ni oto he lɛ ja; feemɔ nakai ni oyi aaana wala.”

Shi kɛlɛ, mlalelɔ lɛ tsui enyɔɔɔ emli. Hetoo ni Yesu kɛha lɛ lɛ bɛ pɔtɛɛ kɛha lɛ. Eetao nɔmimaa kɛjɛ Yesu ŋɔɔ akɛ bɔ ni esusuɔ lɛ ja ni no hewɔ lɛ jalɔ ji lɛ yɛ bɔ ni ekɛ mɛi krokomɛi yeɔ haa lɛ mli. No hewɔ lɛ ebi akɛ: “Ni namɔ ji minaanyo?”

Yudafoi lɛ heɔ yeɔ akɛ wiemɔ “naanyo” lɛ kɔɔ nanemɛi Yudafoi pɛ ahe, taakɛ bɔ ni 3 Mose 19:18 mli wiemɔi lɛ taoɔ atsɔɔ lɛ. Yɛ anɔkwale mli lɛ, yɛ sɛɛ mli lɛ bɔfo Petro kɛɛ akɛ: “Nyɛ diɛŋtsɛ nyɛle bɔ ni Yudanyo bɛ hegbɛ akɛ ekɛ mɔ ko ni ji maŋ kroko nɔ nyo bɔɔ aloo ebaa eŋɔɔ.” No hewɔ lɛ mlalelɔ lɛ, kɛ ekolɛ Yesu kaselɔi lɛ hu heɔ yeɔ akɛ jalɔi ji amɛ kɛji amɛkɛ amɛnanemɛi Yudafoi lɛ ye yɛ mlihilɛ mli lɛ, akɛni yɛ amɛsusumɔ naa lɛ, mɛi ni jeee Yudafoi lɛ jeee amɛnanemɛi lɛ hewɔ.

Mɛɛ gbɛ Yesu baatsɔ nɔ ejaje amɛjwɛŋmɔ nɛɛ, ni yɛ nakai beaŋ nɔŋŋ lɛ egbaaa etoibolɔi lɛ anaa? Egba amɛ sane ko, ekolɛ yɛ nɔ ko ni ba mli lɛlɛŋ lɛ he. Yesu tsɔɔ mli akɛ: “[Yudafonyo] ko yiŋ kɛjɛ Yerusalem kɛmiiya Yeriko ni eyagbee ojotswalɔi ateŋ, ni amɛkpɔlɔ ehe atadei ni amɛpila lɛ, ni amɛyiŋ amɛtee, ni amɛshi lɛ ni egbo fa kɛ fa.”

Yesu tee nɔ akɛ: “Shi eba mli akɛ osɔfo ko batsɔ nakai gbɛ lɛ nɔ; ni beni ena lɛ lɛ egba afa kɛho. Ni nakai nɔŋŋ hu Levinyo ko hu, beni eshɛ jɛi ni ena lɛ lɛ, egba afa kɛho. Shi Samarianyo ko ni nyiɛ gbɛ bashɛ he ni eyɔɔ lɛ, ni beni ena lɛ lɛ, emusuŋ tsɔ lɛ yɛ ehewɔ.”

Osɔfoi lɛ kɛ amɛ Levibii sɔlemɔ tsu mli sɔɔlɔi lɛ ateŋ mɛi babaoo yɛ Yeriko, aaafee shitoi 14 yɛ gbɛjegbɛ ni nɔ yɔɔ oshara ni kpelekeɔ shi ninetalɔi 3,000 kɛjɛɔ he ni amɛsɔmɔɔ yɛ yɛ Yerusalem sɔlemɔwe lɛ. Abaakpa gbɛ akɛ osɔfo lɛ kɛ Levinyo lɛ baaye abua amɛnaanyo Yudafonyo ni yɔɔ haomɔ mli nɛɛ. Shi amɛfeee nakai. Yɛ no najiaŋ lɛ, Samarianyo lɛ moŋ fee nakai. Yudafoi lɛ ahe tsɛ̃ɔ Samariabii lɛ aahu akɛ yɛ nyɛsɛɛ be ko ni etsɛko tsɔ mli lɛ amɛtsɛ Yesu “Samarianyo” ni amɛkɛjɛ lɛ waa.

Mɛni Samarianyo lɛ fee ni ekɛye ebua Yudafonyo lɛ? Yesu kɛɛ akɛ: “Ni etee eŋɔɔ eyafimɔ epilamɔi lɛ anɔ, ni efɔse mu kɛ wein eshwie nɔ, ni esaa ewo lɛ eta lɛ diɛŋtsɛ ekooloo lɛ nɔ, ni ekɛlɛ tee gbɔiatoohe ni eyakwɛ lɛ. Ni jetsɛremɔ beni eyaa lɛ, ejie denarioi enyɔ [aaafee gbii enyɔ nyɔmɔwoo] eha gbɔiatoohetsɛ lɛ, ni ekɛɛ lɛ akɛ: Kwɛmɔ lɛ jogbaŋŋ, ni nɔ fɛɛ nɔ ni ooosaa ofite lɛ, kɛ miku misɛɛ miba lɛ, mawoo nyɔmɔ.”

Ni egba sane lɛ egbe naa lɛ, Yesu bi mlalelɔ lɛ akɛ: “Mɛi etɛ nɛɛ ateŋ namɔ osusuɔ akɛ etsɔ mɔ ni gbee ojotswalɔi ateŋ nɛɛ naanyo?”

Akɛni ehe tseee lɛ akɛ ekɛ yijiemɔ ko aaaha Samarianyo hewɔ lɛ, mlalelɔ lɛ ha hetoo kuku kɛkɛ akɛ: “Mɔ ni na lɛ mɔbɔ lɛ.”

Kɛkɛ ni Yesu mu sane lɛ naa akɛ: “Bo hu yaa ni oyafee nakai nɔŋŋ.”

Eji Yesu kɛɛ mlalelɔ lɛ tɛɛ akɛ mɛi ni jeee Yudafoi lɛ hu ji enanemɛi kulɛ, jeee kpɛlɛmɔ kɛkɛ nuu nɛɛ ekpɛlɛŋ enɛ nɔ, shi moŋ mɛi ni boɔ sane lɛ toi lɛ hu ateŋ mɛi pii baafi esɛɛ yɛ sane ni ekɛ Yesu gbaa nɛɛ mli. Shi kɛlɛ, nɛkɛ sane ni ba mli diɛŋtsɛ nɛɛ ha efee faŋŋ yɛ gbɛ ni ŋwanejee ko bɛ mli nɔ akɛ mɛi ni fata wɔnanemɛi lɛ ahe hu ji mɛi ni jeee wɔ hewolonɔ su loo wɔmaŋbii. Mɛɛ naakpɛɛ gbɛ Yesu yɔɔ kɛha nitsɔɔmɔ nɛkɛ! Luka 10:25-37; Bɔfoi lɛ Asaji 10:28; Yohane 4:9; 8:48.

▪ Mɛɛ sane mlalelɔ lɛ bi Yesu, ni eka shi faŋŋ akɛ mɛni ji jwɛŋmɔ ni ekɛbi nakai lɛ?

▪ Namɛi Yudafoi lɛ heɔ yeɔ akɛ amɛ ji amɛnanemɛi, ni mɛɛ yiŋtoo haa wɔheɔ wɔyeɔ akɛ kaselɔi lɛ po hiɛ jwɛŋmɔ ni tamɔ nakai?

▪ Mɛɛ gbɛ nɔ Yesu tsɔ eha amɛna jwɛŋmɔ ni ja ni no haaa mlalelɔ lɛ anyɛ ate shi awo enɛ?