Mumɔi Ehiko Shikpɔŋ Nɔ Ni Amɛgboi
Mumɔi yɛ shihilɛ mli! Mumɔi kpakpai kɛ mumɔi fɔji fɛɛ yɛ mumɔi ashihilɛ he ni anaaa jɛmɛ lɛ. Ani amɛji gbɔmɛi ni hi shikpɔŋ nɔ ni amɛgboi?
Dabi, amɛjeee nakai. Kɛji gbɔmɔ gbo lɛ, nakai nuu loo yoo lɛ tsaaa nɔ kɛyaaa mumɔi ajeŋ ko mli, taakɛ mɛi pii susuɔ lɛ. Te wɔfeɔ tɛŋŋ wɔleɔ enɛ hu? Ejaakɛ Biblia lɛ kɛɔ nakai. Biblia lɛ ji wolo ko ni wieɔ anɔkwale ni jɛ anɔkwa Nyɔŋmɔ koome, ni egbɛi ji Yehowa lɛ ŋɔɔ. Yehowa bɔ gbɔmɛi adesai; kɛji amɛgboi lɛ, lɛ ele nɔ ni baa amɛnɔ jogbaŋŋ.—Lala 83:19; 2 Timoteo 3:16.
Adam jɛ sũ mli, etee sũ mli ekoŋŋ
Biblia lɛ kɛɔ akɛ Nyɔŋmɔ “kɛ shikpɔŋ sũ” bɔ Adam, ni ji klɛŋklɛŋ gbɔmɔ lɛ. (1 Mose 2:7) Nyɔŋmɔ kɛ lɛ wo Paradeiso, ni ji Eden trom lɛ mli. Eji Adam bo Yehowa mla lɛ toi kulɛ, egboŋ; kulɛ eyɛ wala mli lolo yɛ shikpɔŋ nɔ ŋmɛnɛ. Shi beni Adam je gbɛ eku Nyɔŋmɔ mla lɛ mli lɛ, Nyɔŋmɔ kɛɛ lɛ akɛ: “Oooku osɛɛ kɛaatee shikpɔŋ sũ mli, ejaakɛ emli ajieo kɛjɛ. Ejaakɛ sũ jio, ni sũ mli oooku osɛɛ kɛaatee!”—1 Mose 3:19.
Mɛni enɛ tsɔɔ? Ojogbaŋŋ, nɛgbɛ Adam yɔɔ dani Yehowa bɔ lɛ kɛjɛ shikpɔŋ su lɛ mli? Ebɛ he ko he ko. Ejeee mumɔ ko ni afɔko lɛ ni yɔɔ ŋwɛi. Ebɛ shihilɛ mli. No hewɔ lɛ beni Yehowa kɛɛ akɛ Adam baaku esɛɛ “kɛaatee shikpɔŋ sũ mli” lɛ, eetsɔɔ akɛ Adam baagbo. Etsaaa nɔ kɛfooo mli kɛyaaa mumɔi ashihilɛ he ko. Beni Adam gbo lɛ, ebatsɔ nɔ ko ni wala bɛ mli ekoŋŋ, nɔ ko ni bɛ shihilɛ mli. Gbele tsɔɔ wala ni abɛ.
Shi mɛi krokomɛi ni egboi lɛ hu? Ani amɛ hu amɛbɛ shihilɛ mli? Biblia lɛ haa hetoo akɛ:
“Amɛ fɛɛ [gbɔmɛi kɛ kooloi fɛɛ] amɛyaa he kome: amɛ fɛɛ amɛjɛ sũ mli, ni amɛ fɛɛ amɛtsɔɔ sũ ekoŋŋ.”—Jajelɔ 3:20.
“Gbohii lɛ, amɛleee nɔ ko nɔ ko.”—Jajelɔ 9:5.
“Amɛsuɔmɔ jio, amɛnyɛɛ jio, amɛwuŋayeli jio, fɛɛ eho etee jeeŋmɔ.”—Jajelɔ 9:6.
“Nitsumɔ loo yiŋshwiemɔ loo nilee loo ŋaa ko bɛ gbohiiajeŋ he ni oyaa lɛ.”—Jajelɔ 9:10.
“[Gbɔmɔ] kuɔ esɛɛ kɛyaa esũ lɛ mli ekoŋŋ; nakai gbi lɛ nɔŋŋ eyiŋtoi lɛ laajeɔ.”—Lala 146:4.
Hiɛkãlɔi pɛ baanyɛ afee enɛɛmɛi
Ani nɛkɛ ŋmalɛi nɛɛ anɔ kpɛlɛmɔ wa kɛba bo? Kɛji nakai lɛ, susumɔ enɛ he okwɛ: Yɛ wekui pii amli lɛ, nuu lɛ tsuɔ nii ni enaa shika ni ekɛkwɛɔ eshiabii lɛ. Kɛji nuu lɛ gbo lɛ, yɛ be babaoo mli lɛ, shihilɛ lɛ jaraa haa eweku lɛ. Bei komɛi po lɛ eŋa kɛ ebii lɛ naaa shika ni fa bɔ ni sa ni amɛkɛaahe niyenii. Ekolɛ nuu lɛ henyɛlɔi po baajɛ amɛ. Agbɛnɛ bi ohe akɛ: ‘Kɛji nuu lɛ hiɛ ka yɛ mumɔi aje lɛ mli lɛ, mɛni hewɔ eyaaa nɔ ni eeeha eweku lɛ amɛhiamɔ nii? Mɛni hewɔ ni ebuuu eweku lɛ he kɛjɛɛɛ mɛi fɔji ahe lɛ?’ Nɔ hewɔ ji akɛ, nɔ ni ŋmalɛi lɛ kɛɔ lɛ ja. Nuu lɛ bɛ wala mli, ni enyɛɛɛ nɔ ko nɔ ko efee dɔŋŋ.—Lala 115:17.
Gbohii lɛ nyɛŋ amɛye amɛbua mɛi ni hɔmɔ yeɔ amɛ lɛ aloo amɛfa mɛi ni afeɔ amɛ efɔŋ lɛ ahe
Ani enɛ tsɔɔ akɛ mɛi ni egboi lɛ baŋ wala mli kwraa dɔŋŋ? Dabi, etsɔɔɔ nakai. Wɔbaawie gbohiiashitee lɛ he yɛ sɛɛ mli. Shi etsɔɔ akɛ gbɔmɛi ni egboi lɛ leee nɔ ni ofeɔ. Amɛnaaa bo, amɛnuuu owiemɔ, ni amɛnyɛɛɛ amɛkɛ bo awie. Ehe ehiaaa ni oshe amɛ gbeyei. Amɛnyɛŋ amɛye amɛbua bo, ni amɛnyɛŋ amɛhao bo hu.—Jajelɔ 9:4; Yesaia 26:14.