Yitso 1
Obaanyɛ Oná Wɔsɛɛ Shihilɛ ni Yɔɔ Miishɛɛ!
1, 2. Mɛni o-Bɔlɔ lɛ sumɔɔ ni oná?
MƆ KO ni osumɔɔ lɛ lɛ fua bo kɛ miishɛɛ. Aŋmɔ waa kɛ miishɛɛ beni akɛ nanemɛi ni asumɔɔ amɛ yeɔ niyenii kpakpa ko lɛ. Miishɛɛ ni onaa be mli ni okwɛɔ obii ni shwɛɔ kɛ miishɛɛ lɛ. Bei ni tamɔ nɛkɛ lɛ ji miishɛɛnamɔ bei yɛ shihilɛ mli. Shi kɛlɛ, etamɔ nɔ ni naagbai ni mli wawai ni eko nyiɛɔ eko sɛɛ baa lɛ baa mɛi pii anɔ yɛ shihilɛ mli. Kɛ enɛ ji nɔ ni efee oniiashikpamɔ lɛ, na tsui.
2 Eji Nyɔŋmɔ suɔmɔnaa nii akɛ ona naanɔ miishɛɛ mli ŋɔɔmɔ yɛ shihilɛi ni hi fe fɛɛ mli yɛ shihilɛ hei ni yɔɔ fɛo mli. Enɛ jeee lamɔ ko kɛkɛ, ejaakɛ Nyɔŋmɔ diɛŋtsɛ kɛ gbɛ ni oootsɔ nɔ ona nakai wɔsɛɛ miishɛɛ lɛ haa bo. Nakai gbɛ lɛ ji nilee.
3. Mɛɛ nilee nɔ atsɔɔ akɛnaa miishɛɛ, ni mɛni hewɔ wɔbaanyɛ wɔna nɔmimaa akɛ Nyɔŋmɔ baanyɛ ekɛ nakai nilee lɛ aha?
3 Wɔmiiwie nilee krɛdɛɛ ko ni da kwraa fe adesa nilee he. No ji “Nyɔŋmɔ he nilee.” (Abɛi 2:5) Aaafee afii 2,000 ni eho nɛ lɛ, Biblia ŋmalɔ ko kɛɛ: “Shia fɛɛ shia lɛ, mɔ ko kɛ̃ mã, shi mɔ ni saa nii fiaa to ji Nyɔŋmɔ.” (Hebribii 3:4) Susumɔ nilee ni esa akɛ nibii fɛɛ a-Feelɔ lɛ ana lɛ he okwɛ! Biblia lɛ kɛɔ akɛ Nyɔŋmɔ kaneɔ ni etsɛɔ ŋulamii lɛ fɛɛ kɛ amɛgbɛi. Mɛɛ susumɔ ni haa mɔ didãa nɛ, ejaakɛ ŋulamii akpekpei toi akpekpei ohai abɔ yɔɔ wɔ diɛŋtsɛ wɔ ŋulamii kusha lɛ mli, ni ŋulamii ahe nilelɔi kɛɔ akɛ ŋulamii kushai aaafee akpekpei toi akpekpei ohai abɔ krokomɛi yɛ! (Lala 147:4) Nyɔŋmɔ le wɔhe nɔ fɛɛ nɔ hu, no hewɔ lɛ namɔ hu yɔɔ ni baanyɛ ekɛ hetoo kpakpai aha shihilɛ he saji ni he hiaa lɛ?—Mateo 10:30.
4. Mɛni hewɔ esa akɛ wɔkpa gbɛ akɛ Nyɔŋmɔ baaha wɔ famɔi ni baakudɔ wɔ, ni mɛɛ wolo tsuɔ hiamɔ nɛɛ he nii?
4 Feemɔ hii enyɔ ni bɔɔ mɔdɛŋ ni amɛsaa amɛ tsɔnei ahe mfoniri yɛ ojwɛŋmɔ mli. Akɛni hii lɛ ateŋ mɔ kome nijiaŋ eje wui hewɔ lɛ, eshɛrɛ enitsumɔ dadei lɛ eshwie shi. Mɔ kroko lɛ saa tsɔne lɛ diŋŋ, ni etsɔ samfee ni akɛfaa tsɔne lɛ, ni ebɔi ŋmɔlɔ beni tsɔne lɛ here nɔ ni etsuɔ nii jogbaŋŋ lɛ. Etɔŋ bo kwraa akɛ ooole hii enyɔ lɛ ateŋ mɔ ni yɔɔ ŋaawoo he wolo ni jɛ tsɔne feelɔ lɛ dɛŋ. Ani nilee bɛ mli akɛ Nyɔŋmɔ kɛ gbɛtsɔɔmɔ ni baakudɔ wɔ yɛ shihilɛ mli baaha? Taakɛ ekolɛ ole lɛ, Biblia lɛ kɛɔ akɛ nakai pɛpɛɛpɛ eji—ŋaawoo kɛ gbɛtsɔɔmɔ wolo ni jɛ wɔ Bɔlɔ lɛ ŋɔɔ, ni ato he gbɛjianɔ koni ekɛ Nyɔŋmɔ he nilee aha.—2 Timoteo 3:16.
5. Te nilee ni yɔɔ Biblia lɛ mli lɛ jara wa ha tɛŋŋ?
5 Kɛ nɔ ni Biblia lɛ kɛɔ lɛ ji anɔkwale lɛ, belɛ susumɔ nilee jwetrii ni yɔɔ nakai wolo lɛ mli lɛ he okwɛ! Ewoɔ wɔ hewalɛ ni wɔtsa shi wɔtao nilee, ni wɔtao tamɔ ataoɔ jwetri ni aŋɔtee—jeee yɛ adesa susumɔ ni ji sũ lɛ mli, shi moŋ yɛ Nyɔŋmɔ diɛŋtsɛ Wiemɔ lɛ mli yɛ Abɛi 2:1-5. Kɛ wɔtao yɛ jɛmɛ lɛ, ‘wɔbaana Nyɔŋmɔ he nilee.’ Akɛni Nyɔŋmɔ nuɔ wɔ fatɔɔi kɛ hiamɔ nii ashishi hewɔ lɛ, ekɛ ŋaawoo ni baaye abua wɔ ni wɔhi shi yɛ toiŋjɔlɛ kɛ miishɛɛ mli haa wɔ. (Lala 103:14; Yesaia 48:17) Agbɛnɛ hu, Nyɔŋmɔ he nilee kɛ sanekpakpa ko ni ŋɔɔ waa haa wɔ.
NAANƆ WALA!
6. Mɛɛ nɔmimaa Yesu Kristo kɛha yɛ Nyɔŋmɔ he nilee lɛ he?
6 Yinɔsane mli gbɔmɔ Yesu Kristo ni ale lɛ waa lɛ kɛ wiemɔi ni yɔɔ faŋŋ tsɔɔ Nyɔŋmɔ he nilee nɛɛ mli. Ekɛɛ: “Enɛ ji naanɔ wala lɛ, akɛ amɛaaná bo, anɔkwa Nyɔŋmɔ kome lɛ kɛ Yesu Kristo mɔ ni otsu lɛ lɛ he nilee.” (Yohane 17:3, NW) Susumɔ he okwɛ—nilee ni kɛ mɔ yaa naanɔ wala mli!
7. Mɛɛ odaseyeli yɔɔ ni tsɔɔ akɛ Nyɔŋmɔ etoko eyiŋ akɛ wɔgboi?
7 Kaajie naanɔ wala kɛmiijɛ ojwɛŋmɔ mli oya akɛ eji lamɔ ko kɛkɛ. Yɛ no najiaŋ lɛ, kwɛmɔ gbɛ ni atsɔ nɔ afee adesa gbɔmɔtso lɛ. Ato he gbɛjianɔ jogbaŋŋ diɛŋtsɛ koni enyɛ esa nii anaa, enu sane, efu nii, ena nii, ni enu nii ahe. Nibii babaoo yɛ shikpɔŋ nɔ ni ŋɔɔ wɔ henumɔ nii anaa—niyenii ni ŋɔɔ, loofɔlɔ lala ni ŋɔɔ, fɔfɔii ni jeɔ ŋma, shikpɔji anɔ hei ni yɔɔ fɛo, naanyobɔɔ kpakpa! Ni wɔ aŋsɔ ni yɔɔ naakpɛɛ lɛ fe kɔmpiuta ni fe fɛɛ lɛ kwraa, ejaakɛ enyɛɔ ehaa wɔhiɛ sɔɔ nakai nibii lɛ fɛɛ ni wɔnaa mli ŋɔɔmɔ. Ani osusuɔ akɛ wɔ Bɔlɔ lɛ miisumɔ ni wɔgboi ni enɛɛmɛi fɛɛ aje wɔdɛŋ? Ani efeŋ nɔ ni jwɛŋmɔ yɔɔ mli babaoo akɛ wɔɔmu sane naa akɛ eesumɔ ni wɔhi shi yɛ miishɛɛ mli ni wɔna shihilɛ mli ŋɔɔmɔ kɛya naanɔ? Ojogbaŋŋ, nakai ji bɔ ni Nyɔŋmɔ he nilee baanyɛ atsɔɔ aha bo.
SHIHILƐ YƐ PARADEISO
8. Mɛni Biblia lɛ kɛɔ yɛ adesai awɔsɛɛ shihilɛ he?
8 Abaanyɛ amua nɔ ni Biblia lɛ kɛɔ yɛ shikpɔŋ lɛ kɛ adesai awɔsɛɛ shihilɛ he lɛ naa awo wiemɔ kome mli—Paradeiso! Yesu Kristo wie he beni ekɛɛ nuu ko ni gboɔ lɛ akɛ: “Okɛ mi aaahi Paradeiso!” (Luka 23:43) Ŋwanejee ko bɛ he akɛ, Paradeiso ni atsi ta lɛ kɛ miishɛɛ shihilɛ ni wɔ klɛŋklɛŋ fɔlɔi, Adam kɛ Hawa hi mli lɛ baaba nakai nuu lɛ jwɛŋmɔ mli. Beni Nyɔŋmɔ bɔ amɛ lɛ, no mli lɛ amɛyeɔ emuu ni amɛhi shikpɔŋ ko ni tamɔ abɔɔ ni Bɔlɔ lɛ to he gbɛjianɔ ni etɛo eha amɛ lɛ mli. Atsɛ lɛ yɛ gbɛ ni sa nɔ akɛ Eden trom, ni gbɛi lɛ shishi tsɔɔ miishɛɛ.
9. Te klɛŋklɛŋ Paradeiso lɛ mli shihilɛ yɔɔ ha tɛŋŋ?
9 Kwɛ bɔ ni nakai abɔɔ lɛ mli yɔɔ miishɛɛ ha! Eji paradeiso diɛŋtsɛ. Tsei ni woɔ yibii ni ŋɔɔ lɛ fata emli tsei fɛfɛji lɛ ahe. Be mli ni Adam kɛ Hawa kaseɔ amɛ shikpɔŋ lɛ he nii, amɛnuɔ emli nui ni ŋɔɔ lɛ eko, ni amɛbuaa emli tsei lɛ anɔ yibii lɛ anaa lɛ, nɔ ko bɛ ni baaha amɛfee yeyeeye loo amɛshe gbeyei. Kooloi tete po wooo amɛhe gbeyei, ejaakɛ Nyɔŋmɔ eha nuu lɛ kɛ eŋa lɛ miiye amɛ fɛɛ amɛnɔ yɛ suɔmɔ mli. Kɛfata he lɛ, klɛŋklɛŋ adesai enyɔ lɛ yɛ gbɔmɔtsoŋ hewalɛ waa. Shii abɔ ni amɛyaa nɔ amɛboɔ Nyɔŋmɔ toi lɛ, naanɔ wɔsɛɛ be ni yɔɔ miishɛɛ ka amɛhiɛ. Akɛ amɛ Paradeiso shia ni yɔɔ naakpɛɛ lɛ nɔ kwɛmɔ he nitsumɔ ni haa mɔ tsui nyɔɔ emli ha amɛ. Agbɛnɛ, Nyɔŋmɔ kɛ hegbɛ ha Adam kɛ Hawa ni ‘amɛyi shikpɔŋ lɛ nɔ obɔ, ni amɛnaanaa nɔ.’ Amɛkɛ amɛshwiei baalɛɛ Paradeiso lɛ husui amli kɛyashi be mli ni wɔ shibɔlemɔ ŋulami lɛ fɛɛ aaatsɔ he ko ni yɔɔ fɛo kɛ miishɛɛ.—1 Mose 1:28.
10. Beni Yesu wie Paradeiso he lɛ, no mli lɛ mɛni yɔɔ ejwɛŋmɔ mli?
10 Shi kɛlɛ, beni Yesu tsi Paradeiso tã lɛ, ebiii nuu ko ni gboɔ lɛ akɛ esusu be ni eho jeeŋmɔ lɛ he. Dabi, Yesu miiwie wɔsɛɛ be he! Ele akɛ wɔ shikpɔŋ nɔ shia lɛ fɛɛ nɔ baatsɔ paradeiso. Nyɔŋmɔ baaha eklɛŋklɛŋ yiŋtoo kɛha adesai kɛ wɔ shikpɔŋ lɛ aba mli. (Yesaia 55:10, 11) Hɛɛ, akɛ Paradeiso baaba ekoŋŋ! Ni te ebaatamɔ eha tɛŋŋ? Ha Nyɔŋmɔ Wiemɔ, Biblia Krɔŋkrɔŋ lɛ, aha hetoo.
SHIHILƐ YƐ PARADEISO NI AKƐBA EKOŊŊ MLI
11. Mɛni baaba hela, gbɔlɛ, kɛ gbele nɔ yɛ Paradeiso ni akɛba ekoŋŋ lɛ mli?
11 Hela, gbɔlɛ, kɛ gbele ehiŋ shi dɔŋŋ. “No mli lɛ aaagbele shwilafoi ahiŋmɛii, ni aaagbele toimulɔi atoii. No mli lɛ obubuafoi aaatumɔ akɛ ofrote, ni mumui lilɛi hu aaala kɛ nyamɔ.” (Yesaia 35:5, 6) “Nyɔŋmɔ diɛŋtsɛ kɛ [adesai] aaahi shi, . . . Ni Nyɔŋmɔ aaatsumɔ amɛhiɛaŋ yaafonui fɛɛ, ni gbele bɛ dɔŋŋ, ni ŋkɔmɔyeli ko kɛ bolɔmɔ ko kɛ nɔnaa ko hu bɛ dɔŋŋ; ejaakɛ tsutsu nii lɛ eho etee.”—Kpojiemɔ 21:3, 4.
12. Mɛni hewɔ wɔbaanyɛ wɔna nɔmimaa akɛ awuiyeli, basabasa-feemɔ, kɛ efɔŋ feemɔ ehiŋ wɔsɛɛ be mli Paradeiso lɛ mli?
12 Awuiyeli, basabasa-feemɔ, kɛ efɔŋ feemɔ eho etee kɛmiiya naanɔ. “Efɔŋ feelɔi lɛ, aaafolɔ amɛ ashwie; . . . Eshwɛ fioo kɛkɛ ni mɔ fɔŋ lɛ bɛ dɔŋŋ, . . . Ebɛ jɛi. Shi mɛi ni he jɔ lɛ, shikpɔŋ lɛ aaatsɔ amɛnɔ.” (Lala 37:9-11) “Shi aaafolɔ mɛi fɔji lɛ kɛaajɛ shikpɔŋ lɛ nɔ, ni aaafamɔ kutumpɔfoi lɛ kɛaajɛ nɔ.”—Abɛi 2:22.
13. Mɛɛ gbɛ nɔ Nyɔŋmɔ aaatsɔ ni ekɛ toiŋjɔlɛ aba?
13 Toiŋjɔlɛ baahi shikpɔŋ lɛ fɛɛ nɔ. “[Nyɔŋmɔ] haa tai asɛɛ foɔ kɛyaa shikpɔŋ lɛ naagbee hei lɛ, ekuɔ gãi mli, ni efoɔ akpɔlɔ mli.” (Lala 46:10) “Jalɔ aaafrɔke . . . , ni hejɔlɛ aaafa kɛyashi beyinɔ ni nyɔŋtsere bɛ dɔŋŋ.”—Lala 72:7.
14, 15. Mɛni Biblia lɛ kɛɔ yɛ wɔɔ he, nitsumɔ, kɛ niyenii he yɛ Paradeiso ni akɛba ekoŋŋ lɛ mli?
14 Wɔɔ he baafee shweshweeshwe ni nitsumɔ baaha mɔ tsui anyɔ emli. “Amɛaamamɔ tsũi, ni amɛaahi mli, . . . Amɛmamɔŋ tsũi, ni mɔ kroko ahi mli, ni amɛhuŋ hu, ni mɔ kroko aye; ejaakɛ mimaŋ lɛ gbii aaatamɔ tsei agbii, ni mɛi ni mihala lɛ aaaye amɛninenaa nitsumɔ lɛ mli nii aahu po. Amɛgboŋ deŋme yakatswaa, ni amɛfɔŋ amɛhaŋ oshara.”—Yesaia 65:21-23.
15 Abaana niyenii babaoo ni haa gbɔmɔtsoŋ hewalɛ. “Shikpɔŋ lɛ nɔ aaaba abele babaoo kɛyashwie gɔji lɛ ayiteaŋ.” (Lala 72:16) “Shikpɔŋ lɛ eba enii; Naa Nyɔŋmɔ ni ji wɔ-Nyɔŋmɔ lɛ aaajɔɔ wɔ.”—Lala 67:7.
16. Mɛni hewɔ shihilɛ yɛ Paradeiso baafee nɔ ni ŋɔɔ lɛ?
16 Naanɔ wala yɛ paradeiso shikpɔŋ nɔ baafee miishɛɛ. “Jalɔi lɛ, shikpɔŋ lɛ aaatsɔ amɛnɔ ni amɛaahi nɔ daa.” (Lala 37:29) “Ŋa kpataa kɛ shikpɔŋ gbiŋ lɛ aaanya, ŋa kplanaa lɛ hu mli aaafili lɛ, ni eeegba afofro tamɔ fɔfɔi!”—Yesaia 35:1.
NILEE Kɛ OWƆSƐƐ SHIHILƐ
17. (a) Mɛni esa akɛ ofee kɛ oyɛ shihilɛ yɛ Paradeiso he miishɛɛ? (b) Te wɔfeɔ tɛŋŋ wɔleɔ akɛ Nyɔŋmɔ kɛ tsakemɔi wuji baaba shikpɔŋ nɔ?
17 Kɛ oyɛ shihilɛ yɛ Paradeiso he miishɛɛ lɛ, kaaha nɔ ko kwraa miitsi onaa kɛmiijɛ Nyɔŋmɔ he nilee namɔ he. Esumɔɔ adesai ni ekɛ tsakemɔi ni he hiaa koni akɛfee wɔ shikpɔŋ lɛ paradeiso lɛ baaba. Yɛ fɛɛ sɛɛ lɛ, kɛ oyɛ hewalɛ ni okɛ nɔnaa kɛ anɔkwayeli ni bɛ ni egbɛ eshwa jeŋ fɛɛ lɛ aaaba naagbee lɛ, ani ofeŋ nakai? Ani wɔɔkpa gbɛ akɛ Nyɔŋmɔ baafee nɔ ni shɛɛɛ nakai? Yɛ anɔkwale mli lɛ, Biblia lɛ wieɔ be mli ni Nyɔŋmɔ baajie je nɛŋ gbɛjianɔtoo ni basabasa-feemɔ eyi mli obɔ nɛɛ kɛaaya ni ekɛ jalɛ nɔyeli ni yeɔ emuu abaye najiaŋ lɛ he yɛ faŋŋ mli. (Daniel 2:44) Shi Biblia lɛ feɔ babaoo fe enɛɛmɛi fɛɛ he nii ni ekɛɔ wɔ lɛ kɛkɛ. Etsɔɔ bɔ ni wɔbaanyɛ wɔje mli shweshweeshwe kɛyabote Nyɔŋmɔ shiwoo jeŋ hee lɛ mli.—2 Petro 3:13; 1 Yohane 2:17.
18. Mɛni Nyɔŋmɔ he nilee lɛ baanyɛ afee aha bo amrɔ nɛɛ?
18 Nyɔŋmɔ he nilee lɛ baanyɛ atsu babaoo hu aha bo amrɔ nɛɛ. Biblia lɛ yɛ shihilɛ mli sanebimɔi ni mli kwɔlɔ waa ni gbaa mɔ naa fe fɛɛ lɛ ahetooi. Egbɛtsɔɔmɔi ni oookpɛlɛ nɔ lɛ baaye abua bo ni ona okɛ Nyɔŋmɔ teŋ naanyobɔɔ. Mɛɛ hegbɛ ni yɔɔ nyam nɛ! Ni enɛ baaha ona toiŋjɔlɛ ni Nyɔŋmɔ pɛ baanyɛ ekɛha lɛ mli ŋɔɔmɔ. (Romabii 15:13, 33) Be mli ni ojeɔ nilee ni he hiaa nɛɛ namɔ shishi lɛ, belɛ ooje oshihilɛ mli nitsumɔ ko ni he hiaa ni nyɔmɔwoo yɔɔ mli fe fɛɛ lɛ shishi. Oshwaŋ ohe yɛ Nyɔŋmɔ nilee ni kɛ mɔ yaa naanɔ wala mli lɛ ni onaa lɛ he kɔkɔɔkɔ.
19. Mɛɛ sanebimɔ wɔbaasusu he yɛ yitso ni nyiɛ sɛɛ lɛ mli?
19 Wɔwie Biblia lɛ he akɛ wolo ni Nyɔŋmɔ he nilee yɔɔ mli. Kɛlɛ, te wɔfeɔ tɛŋŋ wɔleɔ akɛ, ejeee wolo ni adesai anilee yɔɔ mli, shi nɔ ko ni da kwraa fe nakai? Wɔbaasusu sanebimɔ nɛɛ he yɛ yitso ni nyiɛ sɛɛ lɛ mli.
KAA ONILEE OKWƐ
Mɛni hewɔ Nyɔŋmɔ he nilee baanyɛ ekɛ bo aya naanɔ miishɛɛ shihilɛ mli lɛ?
Te wala baatamɔ aha tɛŋŋ yɛ shikpɔŋ nɔ Paradeiso ni baa lɛ mli?
Mɛni hewɔ obaana Nyɔŋmɔ he nilee ni okaseɔ bianɛ lɛ he sɛɛ lɛ?