Tsɔsemɔ Obi Kɛjɛ Egbekɛbiiashi

 1, 2. Namɔ ŋɔɔ esa akɛ fɔlɔi aya kɛha yelikɛbuamɔ yɛ amɛbii atsɔsemɔ mli?

“YEHOWA gboshinii ni ehaa ji bii,” taakɛ fɔlɔ ko ni yɔɔ hiɛsɔɔ jaje aaafee afii 3,000 ni eho nɛ lɛ. (Lala 127:3) Lɛlɛŋ, miishɛɛ ni anaa akɛ fɔlɔ lɛ, ji nyɔmɔwoo ni jara wa, ni jɛɔ Nyɔŋmɔ ŋɔɔ, ni mɛi ni ebote gbalashihilɛ mli lɛ ateŋ mɛi pii anine shɛɔ nɔ. Shi, etsɛɛɛ ni mɛi ni yɔɔ bii lɛ yooɔ akɛ kɛfata miishɛɛ nɛɛ he lɛ, fɔlɔi ni amɛtsɔmɔ lɛ kɛ gbɛnaa nii hu baa.

² Bii atsɔsemɔ efee nitsumɔ ni wa waa ŋmɛnɛ. Shi kɛlɛ, mɛi pii enyɛ amɛtsu he nii kɛ omanyeyeli, ni lalatsɛ ni akɛ mumɔ tsirɛ lɛ lɛ tsɔɔ gbɛ ni atsɔɔ nɔ afeɔ, ni ekɛɛ: “Kɛ jeee Yehowa maa tsu lɛ, no lɛ yakatswaa mɛi ni maa lɛ gboɔ he deŋme.” (Lala 127:1) Babaoo ni onyiɛɔ Yehowa gbɛtsɔɔmɔi asɛɛ jogbaŋŋ lɛ, babaoo ni eeeha otsɔ fɔlɔ kpakpa diɛŋtsɛ ji no. Biblia lɛ kɛɔ akɛ: “Okɛ ohiɛ afɔ̃ Yehowa nɔ kɛ otsui fɛɛ, ni okɛ ohe akakpasa bo diɛŋtsɛ ojwɛŋmɔ.” (Abɛi 3:5) Ani oosumɔ ni obo Yehowa ŋaawoo toi, beni ojeɔ onitsumɔ ni ji bii atsɔsemɔ ni heɔ afii 20 lɛ shishi lɛ?

 3. Mɛɛ gbɛnaa nii tsɛmɛi yɔɔ yɛ bii atsɔsemɔ mli?

³ Yɛ shiai pii amli yɛ je lɛŋ fɛɛ lɛ, hii buɔ bii atsɔsemɔ akɛ eji yoo nitsumɔ titri. Lɛlɛŋ, Nyɔŋmɔ Wiemɔ lɛ gbalaa jwɛŋmɔ kɛyaa tsɛ lɛ nitsumɔ nɔ akɛ mɔ titri ni taoɔ daaŋ ŋmaa. Shi, ekɛɔ hu akɛ, gbɛnaa nii kã enɔ yɛ shia lɛ mli. Biblia lɛ kɛɔ akɛ: “Saamɔ onitsumɔ yɛ agbó naa, ni ofee lɛ klalo oha ohe yɛ ŋmɔshi; no sɛɛ dani oma otsu.” (Abɛi 24:27) Yɛ Nyɔŋmɔ hiɛ lɛ, tsɛmɛi kɛ nyɛmɛi fɛɛ tsuɔ nii akɛ hefatalɔi yɛ bii atsɔsemɔ mli.—Abɛi 1:8, 9.

 4. Mɛni hewɔ esaaa ni wɔbuɔ bihii akɛ amɛhi fe biyei lɛ?

⁴ Te osusuɔ obii lɛ ahe ohaa tɛŋŋ? Amaniɛbɔi kɛɔ akɛ, yɛ Asia nɛkɛ lɛ, “bei pii lɛ akɛ miishɛɛ nyaaa gbekɛbii yei afɔmɔ he.” Abɔɔ amaniɛ akɛ gbekɛbii yei ahe jwɛŋmɔ fɔŋ ni ayɔɔ nɛɛ kã he eyɛ lolo yɛ Latin Amerika, yɛ “wekui ni hiŋmɛi egbele waa” lɛ ateŋ po. Shi, anɔkwale lɛ ji akɛ, gbekɛbii yei jeee bii ni yeɔ gbɛhe ni ji enyɔ. Yakob, ni ji tsɛ ko ni ale lɛ waa yɛ blema beaŋ lɛ, wie eshwiei fɛɛ, ni ebiyei ni efɔ kɛbashi nakai beaŋ lɛ fata he lɛ ahe akɛ “bii ni Nyɔŋmɔ eduro [mi].” (1 Mose 33:1-5; 37:35) Nakai nɔŋŋ Yesu hu jɔɔ “gbekɛbii bibii” (gbekɛbii hii kɛ gbekɛbii yei) ni akɛ amɛ ba eŋɔɔ lɛ fɛɛ. (Mateo 19:13-15) Wɔbaanyɛ wɔna nɔmimaa akɛ ejie bɔ ni Yehowa naa amɛ ehaa lɛ kpo.—5 Mose 16:14.

 5. Mɛɛ nii ahesusumɔ esa akɛ ekudɔ gbalashihilɛ mli hefatalɔi ayiŋkpɛɛ yɛ bɔ ni amɛweku dalɛ baafee he?

⁵ Ani akpaa gbɛ yɛ akutsoŋ he ni nyɛyɔɔ lɛ akɛ yoo afɔ bii babaoo bɔ ni eeenyɛ? Eja gbɛ jogbaŋŋ akɛ, gbalashihilɛ mli hefatalɔi lɛ ji mɛi ni baakpɛ amɛyiŋ yɛ bii abɔ ni amɛbaasumɔ ni amɛfɔ lɛ he. Shi kɛ fɔlɔi lɛ bɛ nɔ ko ni amɛkɛbaalɛ bii pii, ni amɛhe atadei amɛha amɛ, ni amɛwo amɛ skul hu? Eka shi faŋŋ akɛ, esa akɛ hefatalɔi lɛ asusu enɛ he kɛ amɛmiikpɛ amɛyiŋ yɛ amɛweku lɛ dalɛ he. Gbalashihilɛ mli hefatalɔi komɛi ni nyɛɛɛ akwɛ amɛbii fɛɛ lɛ kɛ amɛteŋ mɛi komɛi haa amɛwekumɛi koni amɛkwɛ amɛ amɛha amɛ. Ani nifeemɔ ni tamɔ nɛkɛ sa? Ehiii jogbaŋŋ. Ni ejieee gbɛnaa nii ni kã fɔlɔi anɔ yɛ amɛbii ahe lɛ kɛjɛɛɛ amɛnɔ. Biblia lɛ kɛɔ akɛ: “Kɛ mɔ ko kwɛɛɛ lɛ diɛŋtsɛ emɛi, titri lɛ lɛ diɛŋtsɛ eshiabii lɛ, ekpa yɛ hemɔkɛyeli lɛ sɛɛ.” (1 Timoteo 5:8) Gbalashihilɛ mli hefatalɔi ni susuɔ amɛgbɛnaa nii ahe jogbaŋŋ lɛ toɔ amɛ “weku” lɛ dalɛ he gbɛjianɔ, bɔni afee ni amɛnyɛ ‘amɛkwɛ amɛ diɛŋtsɛ amɛmɛi.’ Ani amɛbaanyɛ amɛkɛ nibii ni akɛtsiɔ fɔmɔ naa atsu nii koni amɛnyɛ amɛfee enɛ? No hu amɛ diɛŋtsɛ amɛyiŋkpɛɛ ni, ni kɛ gbalashihilɛ mli hefatalɔi kpɛ amɛyiŋ akɛ amɛaakɔ gbɛ ni tamɔ nɛkɛ lɛ, amɛ nɔŋŋ amɛaakpɛ amɛyiŋ yɛ nibii ni akɛtsiɔ fɔmɔ naa nɛɛ mli nɔ ni amɛaahala lɛ he. “Mɔ fɛɛ mɔ aaatere lɛ diɛŋtsɛ ejatsu.” (Galatabii 6:5) Shi kɛlɛ, gbɛi ni atsɔɔ nɔ atsiɔ fɔmɔ naa, ni musufitemɔ yɔɔ mli lɛ kɛ Biblia shishitoo mlai kpaaa gbee. Yehowa Nyɔŋmɔ ji mɔ ni “wala nu bu” jɛɔ eŋɔɔ kɛbaa. (Lala 36:10) No hewɔ lɛ, ni aaakpata wala hiɛ yɛ be mli ni aŋɔ lɛ hɔ sɛɛ lɛ baatsɔ bulɛ ni abɛ kwraa kɛha Yehowa, ni etamɔ gbɔmɔgbee diɛŋtsɛ.—2 Mose 21:22, 23; Lala 139:16; Yeremia 1:5.

 6. Mɛɛ be esa akɛ aje bi tsɔsemɔ shishi?

⁶ Abɛi 22:6 kɛɔ akɛ: “Tsɔɔmɔ gbekɛ gbɛ ni sa akɛ etsɔ nɔ.” Gbekɛbii atsɔsemɔ ji fɔlɔi anitsumɔ titri kroko. Shi, mɛɛ be esa akɛ nakai tsɔsemɔ lɛ aje shishi? Esa akɛ eje shishi mra. Bɔfo Paulo tsɔɔ mli akɛ atsɔse Timoteo ‘kɛjɛ egbekɛbiiashi.’ (2 Timoteo 3:15) Hela wiemɔ ni akɛtsu nii yɛ biɛ lɛ baanyɛ akɔ abifao bibioo aloo gbekɛ ni afɔko lɛ po he. (Luka 1:41, 44; Bɔfoi lɛ Asaji 7:18-20) No hewɔ lɛ, Timoteo ná tsɔsemɔ kɛjɛ be mli ni eji gbekɛ bibioo mli tɔ̃ɔ—ni eja gbɛ nakai hu. Gbekɛbiiashi ji be ni hi fe fɛɛ ni sa akɛ akɛje gbekɛ tsɔsemɔ shishi. Abifao bibioo po sumɔɔ waa ni ena nilee.

 7. (a) Mɛni hewɔ ehe hiaa ni fɔlɔi enyɔ lɛ fɛɛ kɛ abifao lɛ aná wekukpaa ni bɛŋkɛ kpaakpa lɛ? (b) Mɛɛ wekukpaa hi Yehowa kɛ e-Bi koome lɛ teŋ?

⁷ “Beni mina mibi lɛ klɛŋklɛŋ,” taakɛ yoofɔyoo ko kɛɛ lɛ, “mibasumɔ esane waa.” Nakai nyɛmɛi babaoo feɔ. Nakai tsakpaa fɛfɛo ni yɔɔ nyɛ kɛ abifao teŋ lɛ daa kɛyaa hiɛ beni amɛkpɛtɛɔ amɛhe be fɛɛ be yɛ fɔmɔ lɛ sɛɛ lɛ. Fufɔhamɔ haa nakai tsakpaa lɛ mli waa. (Okɛto 1 Tesalonikabii 2:7 he.) Bɔ ni nyɛ kɛ ebi shwɛɔ ni ekɛ lɛ gbaa sane lɛ he miihia waa yɛ abifao lɛ henumɔŋ hiamɔ nii ahe nitsumɔ mli. (Okɛto Yesaia 66:12 he.) Shi tsɛ lɛ hu? Lɛ hu esa akɛ ekɛ eshwie hee nɛɛ ana tsakpaa ni bɛŋkɛ kpaakpa. Yehowa diɛŋtsɛ feɔ enɛ he nɔkwɛmɔ nɔ. Wɔkaseɔ wekukpaa ni kã Yehowa kɛ e-Bi koome lɛ teŋ lɛ he nii yɛ Abɛi awolo lɛ mli, mɔ ni afeɔ ehe mfoniri akɛ ekɛɔ akɛ: “Yehowa kɛ mi fee egbɛ lɛ shishijelɔ . . . ni mimii shɛɔ mihe daa.” (Abɛi 8:22, 30; Yohane 1:14) Nakai nɔŋŋ tsɛ kpakpa hu haa miishɛɛ kɛ suɔmɔ wekukpaa bakãa ekɛ ebi lɛ teŋ kɛjɛɔ abifao lɛ wala shishijee mli tɔ̃ɔ. Fɔlɔ ko wie akɛ: “Jiemɔ suɔmɔ babaoo kpo otsɔɔ lɛ. Fuamɔ kɛ naa-shɔmɔ egbeko gbekɛ ko dã.”

 8. Mɛɛ jwɛŋmɔŋ kanyamɔ esa akɛ fɔlɔi kɛha abifabii oya nɔŋŋ bɔ ni amɛaanyɛ?

⁸ Shi babaoo he hiaa abifabii. Yɛ amɛfɔmɔ mli nɔŋŋ lɛ, amɛ aŋsɔ efee klalo akɛ ebaahe saji ni ekɛto mli, ni fɔlɔi lɛ aŋɔɔ amɛnaa enɛ kɛjɛɔ klɛŋklɛŋ. Ŋɔɔ maŋ nɔ wiemɔ akɛ nɔkwɛmɔ nɔ. Nii amlipɛilɔi kɛɔ akɛ “asusuɔ akɛ,” bɔ ni gbekɛ nyɛɔ ewieɔ ni ekaneɔ nii jogbaŋŋ hu lɛ “kɛ bɔ ni gbekɛ lɛ kɛ efɔlɔi na sharamɔ eha kɛjɛ egbekɛbiiashi lɛ yɛ tsakpaa ni mli wa waa.” Okɛ obi lɛ agba sane ni okane nii hu oha lɛ kɛjɛ ebifao beaŋ tɔ̃ɔ. Etsɛŋ ni ebaabɔi bo kasemɔ, ni be fioo sɛɛ lɛ, obaabɔi lɛ nikanemɔ hu tsɔɔmɔ. Ekolɛ, ebaanyɛ ekane nii dani ebɔi skul yaa. Ni enɛ baaye abua waa, titri lɛ kɛji tsɔɔlɔi faaa, ni gbekɛbii lɛ ayi fa fe nine yɛ klas ni amɛkaseɔ nii yɛ mli, yɛ maŋ nɔ he ni nyɛyɔɔ lɛ.

 9. Mɛni ji oti ni he hiaa fe fɛɛ ni esa akɛ fɔlɔi akai?

⁹ Nɔ ni he hiaa fɔlɔi Kristofoi fe fɛɛ ji amɛbi lɛ mumɔŋ hiamɔ nii ahe nitsumɔ. (Kwɛmɔ 5 Mose 8:3.) Kɛ mɛɛ oti ni mã amɛhiɛ? No ji, ní amɛye amɛbua amɛbi lɛ ni ena su ni tamɔ Kristo nɔ lɛ, ni tsɔɔ akɛ, ni ewo “gbɔmɔ hee” lɛ. (Efesobii 4:24) Enɛ hewɔ lɛ ehe miihia ni amɛsusu nibii kpakpai, kɛ gbɛi kpakpai ni amɛaatsɔ nɔ amɛtswa amɛ amɛma shi lɛ ahe.

10. Mɛɛ sui ehe hiaa ni gbekɛbii lɛ aná?

¹⁰ Bɔ ni tsũ hewalɛ ji lɛ damɔ bɔ ni nibii ni akɛtsu nii yɛ tsũ lɛ maa mli lɛ ji lɛ nɔ titri. Bɔfo Paulo wie akɛ nibii ni hi fe fɛɛ ni abaanyɛ akɛtswa Kristofoi asui ama shi ji “shika, jwiɛtɛi, tɛi ni jara wa.” (1 Korintobii 3:10-12) Enɛɛmɛi feɔ sui tamɔ hemɔkɛyeli, nilee, sane sɛɛkɔmɔ, anɔkwayeli, bulɛ, kɛ hiɛsɔɔ ni jɛɔ suɔmɔ mli, ni aaana aha Yehowa kɛ emlai lɛ ahe mfoniri. (Lala 19:8-12; Abɛi 2:1-6; 3:13, 14) Te fɔlɔi aaafee tɛŋŋ amɛye amɛbua amɛbii kɛjɛ amɛgbekɛbiiashi tɔ̃ɔ ni amɛna nɛkɛ sui nɛɛ? Kɛtsɔ gbɛ ko ni atsɔɔ kɛjɛ jeeŋmɔ beebe lɛ sɛɛnyiɛmɔ nɔ.

11. Israelbii ni ji fɔlɔi ye amɛbua amɛbii ni amɛná Nyɔŋmɔ gbeyeishemɔ sui kpakpai yɛ mɛɛ gbɛ nɔ?

¹¹ Beni eshwɛ fioo ni Israel maŋ lɛ baabote Shiwoo Shikpɔŋ lɛ nɔ lɛ, Yehowa kɛɛ Israelbii ni ji fɔlɔi lɛ akɛ: “Nɛkɛ wiemɔi nɛɛ ni miwoɔo he kita ŋmɛnɛ gbi nɛɛ akã otsui nɔ, ni ojwɛŋ nɔ otsɔɔ obii, ni owie he, beni ota shi yɛ oshia lɛ kɛ beni onyiɛ gbɛ teŋ kɛ beni okã shi kɛ beni ote shi.” (5 Mose 6:6, 7) Hɛɛ, esa akɛ fɔlɔi afee nɔkwɛmɔ nii, nanemɛi, sanegbalɔi, kɛ tsɔɔlɔi.

12. Mɛni hewɔ ehe hiaa ni fɔlɔi afee nɔkwɛmɔ nɔ kpakpa lɛ?

¹² Feemɔ nɔkwɛmɔ nɔ. Klɛŋklɛŋ lɛ, Yehowa wie akɛ: “Nɛkɛ wiemɔi nɛɛ . . . akã otsui nɔ.” Kɛkɛ ni ekɛfata he akɛ: “Ni ojwɛŋ nɔ otsɔɔ obii.” No hewɔ lɛ esa akɛ Nyɔŋmɔ gbeyeishemɔ sui ahi fɔlɔ lɛ tsui mli klɛŋklɛŋ. Esa akɛ fɔlɔ lɛ asumɔ anɔkwale lɛ ni ehi shi yɛ naa. No dani ebaanyɛ eshɛ gbekɛ lɛ tsui he. (Abɛi 20:7) Mɛni hewɔ? Ejaakɛ nɔ ni gbekɛbii naa lɛ náa amɛnɔ hewalɛ waa fe nɔ ni amɛnuɔ ni awieɔ.—Luka 6:40; 1 Korintobii 11:1.

13. Fɔlɔi ni ji Kristofoi baanyɛ anyiɛ Yesu nɔkwɛmɔ nɔ lɛ sɛɛ, yɛ deka ni amɛaaná amɛha amɛbii lɛ gbɛfaŋ yɛ mɛɛ gbɛ nɔ?

¹³ Feemɔ naanyo. Yehowa kɛɛ fɔlɔi ni hi Israel lɛ akɛ: ‘Okɛ obii lɛ awie beni nyɛtara shi yɛ shia, kɛ beni nyɛnyiɛ gbɛ teŋ.’ Enɛ biɔ ni ana be aha gbekɛbii lɛ, ní bɔ ni fɔlɔi lɛ naaa deka lɛ kɔɔɔ he eko. Eyɛ faŋŋ akɛ Yesu nu he akɛ esa akɛ ena be eha gbekɛbii. Yɛ esɔɔmɔ nitsumɔ lɛ naagbee gbii lɛ amli lɛ, ‘gbɔmɛi kɛ amɛbii bibii ba eŋɔɔ, koni etara amɛhe.’ Mɛni Yesu fee yɛ enɛ he? “Eloo amɛ atuu, ni eŋɔ eniji eshwie amɛnɔ, ni ejɔɔ amɛ.” (Marko 10:13, 16) Feemɔ Yesu shihilɛ ni miibɛŋkɛ enaagbee oyayaayai lɛ he mfoniri okwɛ. Shi kɛlɛ, ena be kɛ deka eha gbekɛbii nɛɛ. Mɛɛ nikasemɔ fɛfɛo nɛ!

14. Mɛni hewɔ sɛɛnamɔ yɔɔ fɔlɔi ni aaana be amɛha amɛbi lɛ he lɛ?

¹⁴ Feemɔ sanegbalɔ. Be ni ooona oha obi lɛ baaye ebua bo ni onyɛ okɛ lɛ agba sane. Babaoo ni okɛ lɛ gbaa sane lɛ, babaoo ni oyooɔ bɔ ni esu yaa nɔ ehaa jogbaŋŋ ji no. Shi, kaimɔ akɛ, sane ni okɛ lɛ aaagba lɛ fe wiemɔ folo kɛkɛ. “Esa akɛ makase sane toiboo he ŋaa,” taakɛ yoo ko ni jɛ Brazil kɛɛ lɛ, “ni mikɛ mitsui abo lɛ toi.” Etsuishitoo lɛ wo yibii beni ebinuu lɛ bɔi ehenumɔi akpojiemɔ kɛ lɛ hamɔ lɛ.

15. Mɛni esa akɛ aha ehi jwɛŋmɔ mli kɛ aasusu hiɛtserɛjiemɔ he?

¹⁵ ‘Ŋmɔlɔ be . . . kɛ joo be,’ ni ji hiɛtserɛjiemɔ be he hiaa gbekɛbii. (Jajelɔ 3:1, 4; Zakaria 8:5) Hiɛtserɛjiemɔ woɔ yibii kpakpai babaoo kɛ fɔlɔi kɛ bii naa mli ŋɔɔmɔ kutuu. Anɔkwa sane ni yɔɔ mɔbɔ yɛ shiai pii amli ji akɛ, hiɛtserɛjiemɔ tsɔɔ tɛlivishin kwɛmɔ. Eyɛ mli akɛ nibii ni ajieɔ yɛ tɛlivishin nɔ lɛ ekomɛi yɛ miishɛɛ moŋ, shi pii fiteɔ sui kpakpai, ni bei pii lɛ, tɛlivishin kwɛmɔ fiteɔ sanegbaa ni aaahi weku lɛ mli. No hewɔ lɛ, mɛni hewɔ okɛ obii lɛ efeee nɔ ko ni biɔ ŋaalee? Nyɛlaa, nyɛshwɛa, nyɛyasaraa nyɛnanemɛi, nyɛyakwɛa hei ni yɔɔ miishɛɛ. Nifeemɔi ni tamɔ nɛkɛ woɔ sanegbaa he hewalɛ.

16. Mɛni esa akɛ fɔlɔi atsɔɔ amɛbii yɛ Yehowa he, ni te esa akɛ amɛfee nakai amɛha tɛŋŋ?

¹⁶ Feemɔ tsɔɔlɔ. “Ojwɛŋ [wiemɔi nɛɛ anɔ] otsɔɔ obii,” Yehowa kɛɛ. Emli sane lɛ kɛɔ bo nɔ ni obaatsɔɔ kɛ bɔ ni obaafee otsɔɔ. Klɛŋklɛŋ lɛ, “suɔmɔ Yehowa, o-Nyɔŋmɔ lɛ, kɛ otsui fɛɛ kɛ osusuma fɛɛ kɛ ohewalɛ fɛɛ!” (5 Mose 6:5) No sɛɛ lɛ, ‘nɛkɛ wiemɔ nɛɛ . . . ojwɛŋ nɔ otsɔɔ.’ Okɛ tsɔsemɔ aha kɛ yiŋtoo akɛ, ebaaha ena suɔmɔ ni jɛ susuma-muu fɛɛ mli kɛha Yehowa kɛ emlai lɛ. (Okɛto Hebribii 8:10 he.) Wiemɔ ni awie akɛ “ojwɛŋ nɔ otsɔɔ” lɛ tsɔɔ nitsɔɔmɔ kɛtsɔ sane mlitĩi nɔ. No hewɔ lɛ, Yehowa miikɛɛ bo akɛ, klɛŋklɛŋ gbɛ ni oootsɔ nɔ oye obua obii lɛ ni amɛna Nyɔŋmɔ gbeyeishemɔ su ji ni owie ehe otsɔɔ amɛ be fɛɛ be kɛtsara nɔ. Nɔ ni fata enɛ he ji Biblia mli nikasemɔ ni okɛ amɛ baafee daa.

17. Mɛni ekolɛ ehe baahia ni fɔlɔi adũ awo amɛbi lɛ mli? Mɛni hewɔ?

¹⁷ Fɔlɔi pii le akɛ ebɛ mlɛo akɛ aaaha sane ayashɛ gbekɛ tsui mli. Bɔfo Petro wo enanemɛi Kristofoi hewalɛ akɛ: “Nyɛshwea wiemɔ lɛ mli fufɔ krɔŋŋ lɛ tamɔ fufɔbii ni afɔ bianɛ.” (1 Petro 2:2) Wiemɔ “nyɛshwea” lɛ tsɔɔ akɛ mɛi pii ji mɛi ni mumɔŋ niyenii he hɔmɔ yeee amɛ yɛ adebɔɔ naa. Ekolɛ ehe baahia ni fɔlɔi atao gbɛi ni amɛaatsɔ nɔ amɛha amɛbi lɛ ashwe enɛ.

18. Mɛni ji Yesu nitsɔɔmɔ gbɛi komɛi ni awoɔ fɔlɔi hewalɛ ni amɛkase?

¹⁸ Yesu shɛ tsuii amli kɛtsɔ nɔkwɛmɔ nii ni ekɛtsu nii lɛ nɔ. (Marko 13:34; Luka 10:29-37) Nɛkɛ nitsɔɔmɔ gbɛ nɛɛ mɔɔ shi waa yɛ gbekɛbii agbɛfaŋ titri. Okɛ saji fɛfɛji, ni yɔɔ miishɛɛ, tamɔ ekolɛ nɔ ni yɔɔ My Book of Bible Stories wolo lɛ mli lɛ atsu nii ni okɛtsɔɔ amɛ Biblia mli shishitoo mlai.a Ha gbekɛbii lɛ kɛ amɛhe awo mli. Ha amɛkɛ amɛ ŋaalee atsu nii kɛnu Biblia mli saji ashishi ni amɛfee he nɔkwɛmɔ nii. Yesu kɛ sanebimɔi hu tsu nii. (Mateo 17:24-27) Kasemɔ egbɛ nɛɛ yɛ nyɛ weku nikasemɔ mli. Yɛ nɔ najiaŋ ni ooojaje Nyɔŋmɔ mla ko kɛkɛ lɛ, bi saji tamɔ, Mɛni hewɔ Yehowa ha wɔ mla nɛɛ? Mɛni baaba kɛ wɔye nɔ? Mɛni baaba kɛ wɔyeee nɔ? Sanebimɔi ni tamɔ nɛkɛ baaye abua gbekɛ lɛ ni esusu eyiŋ, ni ena akɛ anyɛɔ ayeɔ Nyɔŋmɔ mlai anɔ, ni amɛhi waa hu.—5 Mose 10:13.

19. Kɛ fɔlɔi nyiɛ Biblia shishitoo mlai asɛɛ yɛ amɛbii ahe nitsumɔ mli lɛ, mɛɛ hegbɛi kpelei komɛi gbekɛbii lɛ baana mli ŋɔɔmɔ?

¹⁹ Kɛji ofee nɔkwɛmɔ nɔ, naanyo, sanegbalɔ, kɛ tsɔɔlɔ lɛ, obaanyɛ oye obua obi lɛ kɛjɛ egbekɛbiiashi afii amli tɔ̃ɔ ni ena lɛ diɛŋtsɛ ekɛ Yehowa Nyɔŋmɔ teŋ wekukpaa ni bɛŋkɛ kpaakpa. Nɛkɛ wekukpaa nɛɛ baawo obi lɛ hewalɛ ni ebaana miishɛɛ akɛ Kristofonyo. Ebaabɔ mɔdɛŋ ni ehi shi yɛ ehemɔkɛyeli lɛ naa, kɛ ekɛ nɔnyɛɛ ni jɛ etipɛŋfoi aŋɔɔ kɛ kaai po miikpe. Ye obua lɛ be fɛɛ be ni ehiɛ asɔ nɛkɛ wekukpaa ni jara wa waa nɛɛ.—Abɛi 27:11.

20. Mɛni ji tsɔsemɔ, ni mɛɛ gbɛ esa akɛ atsɔ nɔ akɛha?

²⁰ Kamɔ ji tsɔsemɔ ni jajeɔ jwɛŋmɔ lɛ kɛ tsui lɛ. Ehe hiaa gbekɛbii be fɛɛ be. Paulo wo tsɛmɛi aŋaa akɛ “nyɛlɛa [nyɛbii lɛ] yɛ Nuntsɔ [Yehowa, NW] tsɔsemɔ kɛ ŋaawoo lɛ mli.” (Efesobii 6:4) Esa akɛ fɔlɔi kɛ tsɔsemɔ aha yɛ suɔmɔ mli, tamɔ bɔ ni Yehowa feɔ lɛ. (Hebribii 12:4-11) Abaanyɛ akɛ tsɔsemɔ ni damɔ suɔmɔ nɔ aha kɛtsɔ saji ahesusumɔ nɔ. No hewɔ lɛ, akɛɔ wɔ akɛ “nyɛboa tsɔsemɔ toi.” (Abɛi 8:33) Mɛɛ gbɛ esa akɛ atsɔ nɔ akɛ tsɔsemɔ aha?

21. Mɛɛ shishitoo mlai esa akɛ fɔlɔi akai kɛji amɛkɛ tsɔsemɔ miiha amɛbii?

²¹ Fɔlɔi komɛi susuɔ akɛ tsɔsemɔ ni amɛkɛaaha amɛbii lɛ tsɔɔ wiemɔ ni amɛkɛ amɛ aaawie kɛ hegbeyeiwoo gbee, ni amɛbolɔ amɛwo amɛ, loo ni amɛjɛ amɛ po. Shi, Paulo woɔ ŋaa yɛ nɛkɛ sane nɛɛ nɔŋŋ he akɛ: “Nyɛ tsɛmɛi lɛ, nyɛkawoa nyɛbii amlifu.” (Efesobii 6:4) Aawo Kristofoi fɛɛ hewalɛ ni ‘amɛmli ajɔ aha mɛi fɛɛ . . . mɛi ni kɛ mlijɔlɛ wieɔ tsɔɔ mɛi ni kuɔ amɛnaa lɛ.’ (2 Timoteo 2:24, 25) Eyɛ mli akɛ fɔlɔi Kristofoi yooɔ akɛ shiŋŋ-feemɔ he miihia moŋ, shi amɛbɔɔ mɔdɛŋ ni amɛha wiemɔi nɛɛ ahi amɛjwɛŋmɔ mli beni amɛtsɔseɔ amɛbii lɛ. Shi, bei komɛi lɛ, saji ahesusumɔ kɛkɛ faaa, ni ekolɛ toigbalamɔ ko he baahia.—Abɛi 22:15.

22. Kɛ ehe miihia ni agbala gbekɛ toi lɛ, mɛni esa akɛ aye abua lɛ ni enu shishi?

²² Gbekɛbii sɔrɔtoi biɔ tsɔsemɔ yɛ gbɛi sɔrɔtoi anɔ. Mɛi komɛi yɛ ni ‘wiemɔi kɛkɛ tsɔseee’ amɛ. Yɛ amɛ gbɛfaŋ lɛ, toigbalamɔ ni akɛaaha yɛ bei komɛi amli yɛ toigbele hewɔ lɛ baanyɛ afee amɛ yiwalaheremɔ. (Abɛi 17:10; 23:13, 14; 29:19) Shi, esa akɛ gbekɛ lɛ anu nɔ hewɔ ni agbalaa etoi lɛ shishi. ‘Tso kɛ kamɔ haa mɔ leɔ nii.’ (Abɛi 29:15; Hiob 6:24) Kɛfata he lɛ, husui yɛ toigbalamɔ he. Yehowa kɛɛ emaŋ lɛ akɛ: ‘Magbala otoi bɔ ni sa kɛkɛ.’ (Yeremia 46:28b) Biblia lɛ wooo mlifu ni akɛaayi mɔ, loo yii ni naa wa waa fe nine, ni yeɔ gbekɛ lɛ awui ni epilaa lɛ po lɛ he hewalɛ yɛ gbɛ ko kwraa nɔ.—Abɛi 16:32.

23. Mɛni esa akɛ gbekɛ anyɛ anu shishi kɛ efɔlɔi miigbala etoi?

²³ Beni Yehowa bɔ ewebii lɛ kɔkɔ akɛ ekɛ tsɔsemɔ baaha amɛ lɛ, klɛŋklɛŋ lɛ ewie akɛ: “Kaashe gbeyei, . . . ejaakɛ mikɛo yɛ.” (Yeremia 46:28a) Nakai nɔŋŋ esaaa ni tsɔsemɔ ni fɔlɔi kɛhaa, yɛ gbɛ fɛɛ gbɛ ni sa nɔ lɛ, haa gbekɛ lɛ nuɔ he akɛ akpoo lɛ. (Kolosebii 3:21) Shi moŋ, esa akɛ gbekɛ lɛ anu he akɛ, akɛ tsɔsemɔ miiha lɛ, ejaakɛ fɔlɔ lɛ ‘kɛ lɛ yɛ,’ ni eshiko lɛ.

24, 25. Mɛni ji hegbeyeiwoo nɔ ko ni anyaŋeɔ ni ehe hiaa ni abu gbekɛbii ahe kɛjɛ he yɛ bei nɛɛ amli?

²⁴ Onukpai pii susuɔ amɛ gbekɛbiiashi he akɛ eji miishɛɛ be. Amɛkaiɔ miishɛɛ henumɔ ni ji shweshweeshwe feemɔ ni amɛnaa, kɛ nɔmimaa hu ni amɛnaa akɛ amɛfɔlɔi baakwɛ amɛ, yɛ shihilɛ fɛɛ shihilɛ ni amɛyɔɔ mli lɛ mli. Fɔlɔi sumɔɔ ni amɛbii anu he nakai, shi ewa waa akɛ aaaha gbekɛbii ahi shi shweshweeshwe fe bɔ ni eyɔɔ tsutsu ko, yɛ ŋmɛnɛ jeŋ ni ekpɔtɔ nɛɛ mli.

²⁵ Hegbeyeiwoo nɔ ko ni anyaŋeɔ waa ni etee nɔ waa yɛ nyɛsɛɛ afii nɛɛ amli ji bɔlɛnamɔ mli niseniianii ni afeɔ gbekɛbii. Yɛ Malaysia nɛkɛ lɛ, gbekɛbii aniseniianiifeemɔ he amaniɛbɔɔ ku ebɔ he toi ejwɛ yɛ afii nyɔŋma ni ho lɛ mli. Yɛ Germany lɛ, afeɔ gbekɛbii aaashɛ 300,000 bɔlɛnamɔ mli niseniianii daa afi, yɛ be mli ni Amerika Wuoyigbɛ maŋ ko mli lɛ, yɛ nii amlipɛimɔ ni afee lɛ naa lɛ, mɛi ayifalɛ ni afeɔ amɛ nakai daa afi, ni abu he akɔntaa ji mɛi 9,000,000 sɔŋŋ! Dɔlɛ sane ji akɛ, afeɔ nɛkɛ gbekɛbii nɛɛ ateŋ mɛi babaoo niseniianii yɛ amɛ diɛŋtsɛ amɛshia mli, ni gbɔmɛi ni amɛle amɛ ni amɛkɛ amɛhe fɔ̃ɔ amɛnɔ ji mɛi ni feɔ amɛ enɛ. Shi esa akɛ fɔlɔi afee hefamɔ nɔ̃ ni mli wa waa kɛha amɛbii lɛ. Te fɔlɔi aaafee tɛŋŋ amɛfee hebulɔi?

26. Mɛɛ gbɛi komɛi anɔ abaanyɛ atsɔ aha gbekɛbii afee shweshweeshwe, ni nilee baanyɛ abu gbekɛ lɛ he yɛ mɛɛ gbɛ nɔ?

²⁶ Akɛni niiashikpamɔ tsɔɔ akɛ mɛi ni feɔ gbekɛbii niseniianii lɛ anine shɛɔ gbekɛbii ni bɔlɛnamɔ he sane bibioo ko pɛ amɛle lɛ anɔ yɛ gbɛ ni waaa kwraa nɔ hewɔ lɛ, gbɛ titri ni aaatsɔ nɔ atsĩ enɛ naa ji ni atsɔse gbekɛ lɛ, beni eji gbekɛ kwraa po. Nilee baanyɛ eha mɔ hebuu “kɛjɛ gbɛ fɔŋ nɔ, kɛjɛ mɛi ni wieɔ nibii kɔ̃ɔdɔji lɛ adɛŋ.” (Abɛi 2:10-12) Mɛɛ nilee? Biblia shishitoo mlai, ni tsɔɔ nɔ ni ja kɛ nɔ ni ejaaa yɛ jeŋba gbɛfaŋ lɛ ahe nilee. Nilee hu yɛ mli akɛ mɛi ni edara lɛ ekomɛi feɔ nibii fɔji, ni no hewɔ lɛ esaaa ni gbekɛ boɔ amɛ toi kɛji gbɔmɛi wo lɛ ŋaa ni eyafee nibii ni esaaa. (Okɛto Daniel 1:4, 8; 3:16-18 he.) Kaaha nakai tsɔsemɔ lɛ fee shikome sanegbaa kɛkɛ. Gbekɛbii pii yɛ ni ehe hiaa ni atĩ nikasemɔ mli aha amɛ aahu dani amɛnyɛ amɛkai jogbaŋŋ. Beni gbekɛbii daraa saŋŋ lɛ, tsɛ lɛ baajɛ suɔmɔ mli ena bulɛ kɛha hegbɛ ni ebiyoo yɔɔ akɛ mɔ ni eda ni le hiɛgbele, kɛ nyɛ lɛ hu nakai nɔŋŋ kɛha ebinuu—ni amɛkɛ nakai feemɔ awo henumɔ ni gbekɛ lɛ yɔɔ yɛ nɔ ni ja he lɛ mli hewalɛ. Ni, yɛ anɔkwale mli lɛ, hebuu nii ni fe fɛɛ ni akɛteɔ shi awoɔ niseniianiifeemɔ ji kwɛmɔ ni nyɛ diɛŋtsɛ nyɛbaakwɛ amɛnɔ jogbaŋŋ akɛ fɔlɔi.

27, 28. Namɔ ji fɔlɔi ayelikɛbuamɔ Jɛɛhe kpele fe fɛɛ kɛji amɛkɛ gbekɛ tsɔsemɔ he kaa miikpe?

²⁷ Lɛlɛŋ, bi tsɔsemɔ kɛmiijɛ egbekɛbiiashi ji kaa diɛŋtsɛ, shi ehe ehiaaa ni fɔlɔi ni heɔ yeɔ lɛ akpee kaa lɛ naa amɛkome too. Mra mli yɛ Kojolɔi lɛ agbii lɛ amli lɛ, beni nuu ko ni atsɛɔ lɛ Manoa lɛ baná ele akɛ ebaatsɔ tsɛ lɛ, ebi Yehowa gbɛtsɔɔmɔ kɛha ebi lɛ tsɔsemɔ. Yehowa ha esɔlemɔi lɛ ahetoo.—Kojolɔi 13:8, 12, 24.

²⁸ Yɛ nakai gbɛ nɔŋŋ nɔ ŋmɛnɛ lɛ, kɛ fɔlɔi ni heɔ yeɔ lɛ miitsɔse amɛbii lɛ, amɛ hu amɛbaanyɛ amɛkɛ Yehowa awie yɛ sɔlemɔ mli. Fɔlɔ ni mɔ ko ji lɛ ji nitsumɔ ni wa, shi nyɔmɔwoi kpelei yɛ mli. Gbalashihilɛ mli hefatalɔi Kristofoi komɛi ni yɔɔ Hawaii wie akɛ: “Oyɛ afii 12 ni okɛbaatsu nitsumɔ ni oyɔɔ, ni ji obi lɛ tsɔsemɔ he nii, dani nakai jaramɔ afii, ni ji afii nyɔŋma-kɛ-etɛ kɛyaa lɛ aje shishi. Shi kɛji óbɔ mɔdɛŋ waa okɛ Biblia shishitoo mlai etsu nii lɛ, no lɛ agbɛnɛ be eshɛ ní okɛaakpá miishɛɛ kɛ toiŋjɔlɛ, beni amɛkpɛɔ amɛyiŋ akɛ amɛmiisumɔ ni amɛsɔmɔ Yehowa kɛjɛ amɛtsui mli lɛ.” (Abɛi 23:15, 16) Kɛ obi lɛ kpɛ eyiŋ nakai lɛ, bo hu ebaatsirɛ bo, ni okɛ miishɛɛ baawie akɛ: “Yehowa gboshinii ni ehaa ji [bihii kɛ biyei].”