Woo Ni Wɔkɛaaha Wɔ Fɔlɔi Ni Edara

 1. Mɛɛ nyɔmɔ wɔhiɛ wɔfɔlɔi, ni no hewɔ lɛ, te esa akɛ wɔnu he wɔha amɛ ni wɔkɛ amɛ aye aha tɛŋŋ?

“BO OTSƐ ni fɔo lɛ toi, ni kaagbe onyɛ he guɔ, kɛ egbɔ lɛ,” taakɛ nilelɔ ni hi shi blema lɛ wo ŋaa lɛ. (Abɛi 23:22) Ekolɛ obaakɛɛ akɛ: ‘Mifeŋ nakai kɔkɔɔkɔ!’ Yɛ nɔ najiaŋ ni ekolɛ wɔɔgbe wɔ nyɛmɛi—loo wɔ tsɛmɛi—ahe guɔ lɛ, wɔteŋ mɛi pii nuɔ suɔmɔ ni mli kwɔ he wɔhaa amɛ. Wɔyooɔ akɛ wɔhiɛ amɛ nyɔmɔ kpele diɛŋtsɛ. Klɛŋklɛŋ kwraa lɛ, wɔ fɔlɔi ji mɛi ni ha wɔ wala. Eyɛ mli akɛ Yehowa ji wala Jɛɛhe moŋ, shi kɛ jeee wɔ fɔlɔi kulɛ, wɔbaŋ shihilɛ mli kɔkɔɔkɔ. Nɔ ko bɛ ni wɔbaanyɛ wɔha wɔ fɔlɔi ni ejara wa tamɔ wala diɛŋtsɛ. Agbɛnɛ hu, susumɔ he-kɛ-afɔleshaa, kwɛmɔ kɛ tsuiyeli, nyɔmɔbɔɔ, kɛ hesusumɔ ni jɛɔ suɔmɔ mli, ni akɛyeɔ abuaa gbekɛ kɛjɛɔ be mli ni eji abifao, aahu kɛyashiɔ be mli ni edaa lɛ he okwɛ. Belɛ, kwɛ bɔ ni nilee yɔɔ mli akɛ Nyɔŋmɔ Wiemɔ lɛ woɔ ŋaa akɛ: “Wo otsɛ kɛ onyɛ, . . . koni ahi ahao, ni otsɛ yɛ shikpɔŋ lɛ nɔ”!—Efesobii 6:2, 3.

 2. Bii ni edara lɛ baanyɛ ‘ato amɛfɔlɔi anajiaŋ pɛpɛɛpɛ’ yɛ mɛɛ gbɛ nɔ?

² Bɔfo Paulo ŋma wolo eha Kristofoi akɛ: “Bii loo nabii lɛ, amɛkase Nyɔŋmɔ gbeyeishemɔ yɛ amɛ diɛŋtsɛ amɛwe tsutsu, ni amɛto amɛfɔlɔi lɛ anajiaŋ pɛpɛɛpɛ; ejaakɛ enɛ yɛ fɛo ni eŋɔɔ Nyɔŋmɔ naa.” (1 Timoteo 5:4) Bii ni edara lɛ jieɔ hiɛsɔɔ kpo yɛ afii abɔ ni amɛfɔlɔi kɛ amɛnii kɛ amɛnaa kɛjie suɔmɔ kpo, ni amɛkɛtsu nii, ni amɛkɛkwɛ amɛ aahu lɛ he, ni amɛtsɔɔ enɛ nɔ amɛkɛ ‘najiaŋtoo ni sa pɛpɛɛpɛ’ nɛɛ haa amɛ. Gbɛ kome ni gbekɛbii aaatsɔ nɔ amɛfee enɛ ji yɔsemɔ ni amɛaayɔse akɛ taakɛ mɔ fɛɛ mɔ ji lɛ, suɔmɔ kɛ hewalɛwoo he hiaa mɛi ni edara yɛ afii amli lɛ—ni bei pii lɛ, enɛ he hiaa amɛ waa. Taakɛ wɔ fɛɛ wɔji lɛ, esa akɛ amɛnu he akɛ amɛhe hiaa. Esa akɛ aha amɛnu he akɛ sɛɛnamɔ yɛ amɛshihilɛ he.

 3. Mɛɛ gbɛ nɔ wɔɔtsɔ wɔkɛ woo aha wɔfɔlɔi kɛ wɔniimɛi kɛ naamɛi?

³ No hewɔ lɛ wɔbaanyɛ wɔkɛ woo aha wɔfɔlɔi kɛ wɔ niimɛi kɛ wɔ naamɛi kɛtsɔ le ni wɔɔha amɛle akɛ wɔsumɔɔ amɛ lɛ nɔ. (1 Korintobii 16:14) Kɛ wɔkɛ wɔfɔlɔi bɛ shia lɛ, esa akɛ wɔkai akɛ, kɛ wɔkɛ amɛ naa sharamɔ ni amɛnuɔ wɔhe lɛ, etsɔɔ babaoo diɛŋtsɛ kɛhaa amɛ. Miishɛɛ ni wɔkɛaaŋma amɛ wolo, loo wɔtswa amɛ tɛlifon, loo wɔyasara amɛ lɛ baaha amɛmiishɛɛ afa babaoo. Miyo, ni yɔɔ Japan lɛ, ŋma beni eye afii 82 akɛ: “Mibiyoo [ni ewu ji nɔkwɛlɔ gbɛfalɔ] lɛ kɛɔ mi akɛ: ‘Awo, ofainɛ fatamɔ wɔhe “kɛfa gbɛ.” ’ Ekɛ asafoi ni amɛbaasɔmɔ yɛ otsi fɛɛ otsi mli lɛ agbɛi kɛ tɛlifon nɔmba majeɔ mi. No hewɔ lɛ, minyɛɔ migbeleɔ wolo lɛ mli ni mikɛɔ akɛ: ‘Ah. Amrɔ nɛɛ, amɛyɛ biɛ!’ Midaa Yehowa shi be fɛɛ be, yɛ mibi ni ji jɔɔmɔ nɛɛ he.”

 4. Yudafoi ajamɔ mli blema sane woɔ fɔlɔi ni edara ni akɛ amɛ yeɔ kɛ yitsoŋwalɛ lɛ he hewalɛ yɛ mɛɛ gbɛ nɔ?

⁴ Ani eeenyɛ eba akɛ woo ni mɔ kɛaaha efɔlɔi lɛ kɔɔ amɛ heloonaa hiamɔ nii ni aaaha amɛ lɛ he? Hɛɛ. Bei pii lɛ, ekɔɔ he. Yɛ Yesu beaŋ lɛ, Yudafoi ajamɔ mli hiɛnyiɛlɔi lɛ fi amɛ blema sane nɛɛ sɛɛ akɛ, kɛ mɔ ko jaje akɛ ekɛ eshika loo enɔ ko baha akɛ ‘ekɛke Nyɔŋmɔ lɛ,’ eyeɔ ehe kɛjɛɔ gbɛnaa nii ni kã enɔ akɛ ekɛtsu nii ni ekɛkwɛ efɔlɔi lɛ he. (Mateo 15:3-6) Mɛɛ yitsoŋwalɛ nɛ! Nɔ ni amɛkɛɔ nɛɛ tsɔɔ akɛ, nakai jamɔ mli hiɛnyiɛlɔi lɛ miiwo gbɔmɛi lɛ hewalɛ ni amɛkɛ woo akaha amɛfɔlɔi, shi moŋ amɛkɛ amɛ aye kɛ heguɔgbee kɛtsɔ amɛ hiamɔ nii ni amɛhaaa amɛ, yɛ pɛsɛmkunya hewɔ lɛ nɔ. Wɔsumɔŋ ni wɔfee nakai kɔkɔɔkɔ!—5 Mose 27:16.

 5. Yɛ nibii ni nɔyelii eto he gbɛjianɔ yɛ shikpɔji komɛi anɔ lɛ fɛɛ sɛɛ lɛ, mɛni hewɔ bei komɛi lɛ shika yelikɛbuamɔ fata woo ni mɔ kɛaaha efɔlɔi lɛ he lɛ?

⁵ Yɛ shikpɔji pii anɔ ŋmɛnɛ lɛ, shihilɛ mli gbɛjianɔtoi komɛi ni nɔyeli lɛ kɛtsuɔ nii lɛ haa mɛi ni edara yɛ afii amli lɛ naa amɛ hiamɔ nibii komɛi, tamɔ niyenii, atadei, kɛ wɔɔhe. Kɛfata no he lɛ, ekolɛ mɛi ni edara yɛ afii amli lɛ diɛŋtsɛ eto nibii komɛi ahe gbɛjianɔ kɛha amɛgbɔlɛ beaŋ. Shi kɛ nɛkɛ nibii ni amɛto he gbɛjianɔ nɛɛ tã loo eshɛɛɛ bɔ ni amɛbaanyɛ amɛkɛkwɛ amɛhe jogbaŋŋ lɛ, bii lɛ feɔ bɔ ni amɛaanyɛ koni amɛha amɛfɔlɔi lɛ ahiamɔ nii, ni amɛkɛ woo haa amɛ kɛtsɔɔ nakai feemɔ nɔ. Yɛ anɔkwale mli lɛ, fɔlɔi ni edara yɛ afii amli lɛ akwɛmɔ ji Nyɔŋmɔ jamɔ hetuu-kɛhamɔ he odaseyeli, ni ji, mɔ lɛ hetuu-kɛhamɔ kɛha Yehowa Nyɔŋmɔ, mɔ ni ji gbalashihilɛ gbɛjianɔtoo lɛ Shishitolɔ lɛ.

 6. Mɛɛ shihilɛ he gbɛjianɔ mɛi komɛi eto bɔni afee ni amɛnyɛ amɛkɛtsu amɛfɔlɔi ahiamɔ nii ahe nii?

⁶ Bii ni edara lɛ ateŋ mɛi babaoo etsu amɛfɔlɔi ni egbɔjɔ yɛ gbɔmɔtsoŋ lɛ ahiamɔ nii ahe nii kɛ suɔmɔ kɛ he-kɛ-afɔleshaa. Mɛi komɛi eha amɛfɔlɔi ebafata amɛhe yɛ amɛ diɛŋtsɛ amɛshiai amli aloo amɛfã kɛyahi hei ni bɛŋkɛ amɛ. Mɛi krokomɛi hu efã kɛyahi amɛfɔlɔi lɛ ashiai amli. Bei pii lɛ, gbɛjianɔtoi nɛɛ bafeɔ jɔɔmɔ kɛhaa fɔlɔi lɛ kɛ amɛbii lɛ fɛɛ.

 7. Mɛni hewɔ ehi akɛ okaye oyai okɛfee yiŋkpɛi ni kɔɔ fɔlɔi ni edara yɛ afii amli lɛ ahe lɛ?

⁷ Shi, bei komɛi hu lɛ, nibii kpakpai jɛɛɛ nɛkɛ fã ni afãa nɛɛ mli kɛbaaa. Mɛni hewɔ? Akɛni ekolɛ akpɛɔ yiŋ nɛɛ kɛ oyaiyeli tsɔ̃, aloo ekolɛ yiŋkpɛi nɛɛ damɔ henumɔi pɛ nɔ lɛ hewɔ. “Hiɛtɛ̃lɔ leɔ enanenaa kwɛmɔ,” taakɛ Biblia lɛ kɛ nilee woɔ ŋaa lɛ. (Abɛi 14:15) Akɛ nɔkwɛmɔ nɔ lɛ, ŋɔɔ lɛ akɛ ewa kɛha onyɛ ni eda yɛ afii amli lɛ akɛ ekome pɛ eeehi shi, ni no hewɔ lɛ osusuɔ akɛ kɛ efã kɛbahi omasɛi lɛ, ekolɛ no baahi kɛha lɛ. Beni okɛ nilee susuɔ osusumɔ nɛɛ he lɛ, obaanyɛ osusu nibii ni nyiɛ sɛɛ nɛɛ hu he okwɛ: Mɛni ji ehiamɔ nii diɛŋtsɛ? Ani yelikɛbuamɔ gbɛjianɔtoi komɛi yɛ ni maŋbii lɛ ekomɛi loo nɔyeli lɛ diɛŋtsɛ efee, ni kɛ tsabaa kroko ni akpɛlɛɔ nɔ haa? Ani eesumɔ ni efã kɛshi he ni eyɔɔ lɛ? Kɛ eesumɔ lɛ, mɛɛ gbɛi anɔ ebaasa eshihilɛ he yɛ? Ani ebaashi enanemɛi komɛi? Te enɛ baasa ehe yɛ henumɔŋ eha tɛŋŋ? Ani okɛ lɛ egba otii nɛɛ ahe sane? Te fã ni efãa nɛɛ baasa bo diɛŋtsɛ, kɛ ohefatalɔ, kɛ obii ahe eha tɛŋŋ? Kɛ kwɛmɔ he miihia onyɛ lɛ, namɔ baatsu he nii? Ani abaanyɛ aja nitsumɔ nɛɛ? Ani okɛ mɛi fɛɛ ni ekɔɔ amɛhe tɛɛ lɛ esusu sane lɛ he?

 8. Namɛi obaanyɛ okɛ amɛ asusu saji ahe kɛji ookpɛ oyiŋ yɛ bɔ ni ooofee oye obua ofɔlɔi ni edara lɛ he?

⁸ Akɛni fɔlɔi akwɛmɔ he gbɛnaa nii lɛ kã bii ni yɔɔ weku lɛ mli lɛ fɛɛ nɔ hewɔ lɛ, ebaafee nilee gbɛ akɛ aaatsɛ weku kpee koni mɛi fɛɛ ana yiŋkpɛi afeemɔ mli gbɛfaŋnɔ. Onukpai ni yɔɔ Kristofoi asafo lɛ mli, loo nanemɛi ni kɛ shihilɛ ni tamɔ nakai ekpe pɛŋ lɛ kɛ sanegbaa hu baanyɛ aye abua. Biblia lɛ bɔɔ kɔkɔ akɛ: “Kɛ ajinatoo bɛ lɛ, yiŋtoi feɔ yaka; shi kɛ ŋaawolɔi pii yɛ lɛ, amɛdamɔɔ shi shiŋŋ.”—Abɛi 15:22.

 9, 10. (a) Yɛ amɛ afii ni etee hiɛ lɛ fɛɛ sɛɛ lɛ, mɛɛ hesusumɔ ko esa akɛ ana aha mɛi ni edara yɛ afii amli lɛ? (b) Yɛ nibii fɛɛ ni bi ni eda lɛ baato he gbɛjianɔ eha efɔlɔi lɛ fɛɛ sɛɛ lɛ, mɛni esa akɛ eha amɛ be fɛɛ be?

⁹ Woo ni wɔkɛaaha wɔ fɔlɔi ni edara lɛ biɔ mlitsɔlɛ kɛ sane shishinumɔ. Beni gbɔlɛ lɛ yaa hiɛ ni ekɛ naagbai ni mli wa baa lɛ, ekolɛ ebaawa saŋŋ kɛha mɛi ni edara nɛɛ akɛ amɛaanyiɛ, amɛye nii, ni amɛkai saji. Ekolɛ yelikɛbuamɔ he baahia amɛ. Bei pii lɛ, bii lɛ haoɔ amɛhe waa yɛ amɛfɔlɔi ni edara lɛ ashweshweeshwe feemɔ he, ni amɛbɔɔ mɔdɛŋ ni amɛkɛ gbɛtsɔɔmɔ aha amɛ. Shi mɛi ni edara yɛ afii amli nɛɛ, onukpai ni kɛ amɛwala be fɛɛ ebua nilee kɛ niiashikpamɔ babaoo naa ji amɛ, ni amɛkɛ amɛshihilɛ be fɛɛ ekwɛ amɛ diɛŋtsɛ amɛhe ni amɛkɛfee amɛ diɛŋtsɛ amɛ yiŋkpɛi. Ekolɛ bɔ ni ale amɛ aha kɛ bulɛ ni amɛyɔɔ kɛha amɛhe lɛ damɔ amɛnitsumɔ akɛ fɔlɔi kɛ onukpai lɛ nɔ. Ekolɛ fɔlɔi ni nuɔ he akɛ amɛmiiŋmɛɛ amɛ diɛŋtsɛ amɛshihilɛ kudɔmɔ he amɛmiiha amɛbii lɛ haoɔ yɛ enɛ he, ni edɔɔ amɛ hu. Amɛteŋ mɛi komɛi amli fuɔ yɛ he, ni amɛteɔ shi amɛwoɔ nɔ ni ekolɛ amɛnaa akɛ eji mɔdɛŋ ni abɔɔ ni ahe amɛheyeli kɛjɛ amɛdɛŋ nɛɛ.

¹⁰ Abɛ tsabaai ni yɔɔ mlɛo kɛha naagbai nɛɛ, shi eji mlihilɛ akɛ aaaŋmɛ fɔlɔi ni edara lɛ agbɛ ni amɛ diɛŋtsɛ amɛkwɛ amɛhe ni amɛ diɛŋtsɛ amɛfee amɛyiŋkpɛi komɛi hu kɛyashi he ni sa. Nilee yɛ mli akɛ, okafee yiŋkpɛi yɛ nɔ ni hi fe fɛɛ kɛha ofɔlɔi lɛ he, yɛ be mli ni klɛŋklɛŋ lɛ, okɛ amɛ ewieko he. Ekolɛ nibii babaoo eje amɛdɛŋ. Ŋmɛɛ amɛ gbɛ ni amɛna amɛ heyeli fioo ko bɔ ni sa. Ekolɛ obaana akɛ kɛji obɔɔɔ mɔdɛŋ babaoo akɛ oookudɔ ofɔlɔi ashihilɛ lɛ, ebaaha okɛ amɛ teŋ wekukpaa lɛ afee ekpakpa jogbaŋŋ diɛŋtsɛ. Amɛbaana miishɛɛ babaoo, ni nakai nɔŋŋ bo hu obaana miishɛɛ. Kɛ ehe miihia ni ofĩ nibii komɛi afeemɔ nɔ doo yɛ amɛhilɛ hewɔ po lɛ, woo ni okɛaaha ofɔlɔi lɛ biɔ ni okɛ hiɛnyam kɛ bulɛ ni sa amɛ lɛ aha amɛ. Nyɔŋmɔ Wiemɔ lɛ woɔ ŋaa akɛ: “Tee shi yɛ yiteŋwajiatsɛ hiɛ, ni owo nuumo hiɛ nyam.”—3 Mose 19:32.

11-13. Kɛ wekukpaa ni kã bi ni eda kɛ efɔlɔi ateŋ lɛ ehiii tsutsu ko lɛ, mɛɛ gbɛ nɔ eeetsɔ etsu kaa ni ji kwɛmɔ ni eeekwɛ amɛ yɛ amɛ gbɔlɛ afii amli lɛ he nii?

¹¹ Bei komɛi lɛ, naagba ko ni bii ni etsɔmɔ onukpai lɛ kɛkpeɔ yɛ woo ni amɛkɛaaha amɛfɔlɔi ni edara lɛ agbɛfaŋ lɛ kɔɔ wekukpaa ni hi amɛkɛ amɛfɔlɔi nɛɛ ateŋ yɛ amɛ gbekɛbiiashi lɛ he. Ekolɛ otsɛ ejieee henumɔ kɛ suɔmɔ kpo etsɔɔɔ bo, ni onyɛ yɛ shɛii ni eyitsoŋ hu wa. Ekolɛ onuɔ nijiaŋwujee, mlifu, kɛ dɔlɛ babaoo he lolo, ejaakɛ amɛkɛ bo ehiii shi tamɔ fɔlɔi ni osumɔɔ ni kulɛ amɛaaji lɛ. Ani obaanyɛ oye henumɔi ni tamɔ nɛkɛ lɛ anɔ kunim?a

¹² Basse, ni da yɛ Finland lɛ, gba akɛ: “Minyɛ wu tsu nii akɛ SS asraafonyo nukpa yɛ Nazi Germany. Etsɛɛɛ ni emli fuɔ, ni ehe yɛ oshara waa diɛŋtsɛ. Eyi minyɛ shii abɔ yɛ mi diɛŋtsɛ mihiɛ. Be ko ni emli fu mi lɛ, ejie ehɛfii nii lɛ ni ekɛ enaa dade lɛ tswa mihiɛ. Etswa mi waa, aahu akɛ eha miyagbee saatso lɛ nɔ.”

¹³ Shi kɛlɛ, nibii krokomɛi yɛ ni kɔɔ esubaŋ he. Basse kɛfata he akɛ: “Yɛ gbɛ kroko nɔ lɛ, etsuɔ nii waa ni etsĩii heloonaa nii ni sa akɛ eha weku lɛ naa. Ejieee tsɛ suɔmɔ kɛ hedɔɔ kpo etsɔɔɔ mi shikome po, shi mile akɛ eji mɔ ko ni aye lɛ awui waa yɛ henumɔŋ. Enyɛ shwie lɛ kɛjɛ shia beni eji gbekɛ nuu bibioo. Eda akɛ mɔ ko ni sumɔɔ nɔmɔ, ni ebote asraafoi anitsumɔ kɛ tawuu mli beni eji obalanyo. Minuɔ lɛ shishi fioo bɔ ni sa, ni mishwaaa lɛ hu. Beni mida saŋŋ lɛ, mibasumɔ akɛ maye mabua lɛ bɔ ni manyɛ, aahu kɛyashi beni eeegbo. Efeemɔ bɛ mlɛo, shi mifee bɔ ni manyɛ. Mibɔ mɔdɛŋ akɛ mafee binuu kpakpa maha lɛ aahu kɛyashi egbele be mli tɔ̃ɔ, ni misusuɔ akɛ ekpɛlɛ minɔ nakai.”

14. Mɛɛ ŋmalɛ tsuɔ nii yɛ shihilɛi fɛɛ mli, ní nɔ ni teɔ shi yɛ fɔlɔi ni edara yɛ afii amli lɛ akwɛmɔ mli lɛ fata he?

¹⁴ Taakɛ eji yɛ saji krokomɛi amli lɛ, Biblia ŋaawoo nɛɛ tsuɔ nii yɛ weku shihilɛi amli hu, akɛ: “Nyɛwoa musuŋtsɔlɛ, mlihilɛ, heshibaa jwɛŋmɔ, mlijɔlɛ, tsuishitoo, ni kɛji mɔ ko kɛ mɔ ko na sane ko lɛ, nyɛnanaa nyɛhaa nyɛhe ni nyɛkɛfafaa nyɛhe, taakɛ bɔ ni [Yehowa, NW] hu ŋɔfa nyɛ lɛ, nakai nyɛ hu nyɛfea.”—Kolosebii 3:12, 13.

15. Mɛni hewɔ bei komɛi lɛ fɔlɔi akwɛmɔ feɔ haomɔ lɛ?

¹⁵ Fɔlɔ ni eda ni egbɔjɔ kwɛmɔ wa waa diɛŋtsɛ, ni ebiɔ nitsumɔi pii, gbɛnaa nii babaoo, kɛ ŋmɛlɛtswai abɔ. Shi bei pii lɛ, henumɔŋ nɔ lɛ ji nɔ ni wa fe fɛɛ. Eji haomɔ waa akɛ ookwɛ nɔŋŋ ni ofɔlɔ gbɔmɔtsoŋ hewalɛ, ejwɛŋmɔ, kɛ eheyeli fɛɛ miitã kwraa. Sandy, ni jɛ Puerto Rico lɛ, wie akɛ: “Minyɛ ji mɔ titri fe fɛɛ yɛ wɔ weku lɛ mli. Bɔ ni wɔnaa ni enaa amanehulu beni wɔkwɛɔ lɛ lɛ yɛ dɔlɛ waa. Klɛŋklɛŋ lɛ, ebɔi tsutsɔmɔ; no sɛɛ lɛ ekɛ dɛhiɛmɔ tso bɔi nyiɛmɔ, no sɛɛ lɛ emɔ nɔ ko tamɔ shwiili mli kɛnyiɛ, ni naagbee lɛ eta shwiili sɛ̃i mli. No sɛɛ lɛ, ehewalɛ bɔi shibaa oyayaayai, kɛyashi beni egbo. Ená wui amli kansa, ni ehe bahia ni wɔkwɛ lɛ be fɛɛ be—shwane kɛ nyɔɔŋ fɛɛ. Wɔjuɔ ehe ni wɔhaa lɛ niyenii ni wɔkaneɔ nii wɔhaa lɛ. Ewa waa diɛŋtsɛ—titri lɛ yɛ henumɔŋ. Beni miyoo akɛ minyɛ miigbo lɛ, mifo ejaakɛ misumɔɔ esane waa.”

16, 17. Mɛɛ ŋaawoo baanyɛ aye abua mɔ ni kwɛɔ mɔ kroko lɛ, ni ehiɛ nibii ahesusumɔ ni ŋmɛɔ pɛpɛɛpɛ mli?

¹⁶ Kɛ oyaje shihilɛ ni tamɔ nɛkɛ mli lɛ, mɛni obaanyɛ ofee ni okɛkpee naa? Yehowa toiboo kɛtsɔ Biblia kanemɔ nɔ, kɛ wiemɔ ni okɛ lɛ aaawie kɛtsɔ sɔlemɔ nɔ lɛ baaye abua bo waa. (Filipibii 4:6, 7) Kɛji ebaahi kɛ nitsumɔ lɛ, kwɛmɔ ni oye niyenii ni hewalɛ yɔɔ mli, ni obɔ mɔdɛŋ ona wɔɔ kpakpa hu. Kɛ ofee enɛ lɛ, ebaaha ohi shihilɛ kpakpa mli, yɛ henumɔŋ kɛ gbɔmɔtsoŋ fɛɛ, koni onyɛ okwɛ osuɔlɔ lɛ jogbaŋŋ. Ekolɛ obaanyɛ oto gbɛjianɔ ni ona hejɔɔmɔ fioo kɛjɛ daa gbi nitsumɔ ni otsuɔ lɛ amli. Kɛ hejɔɔmɔ ni oooná yɛ daa gbi nitsumɔ mli nɛɛ ehiŋ po lɛ, kɛlɛ, nilee yɛ mli akɛ oooto be ko ohã ohe ni okɛwo otsui fioo. Obaanyɛ oto gbɛjianɔ ni mɔ kroko hu kɛ ofɔlɔ ni he yeɔ lɛ abahi shi ni ekwɛ lɛ, koni onyɛ oshi lɛ ni ona be fioo ni okɛjɔɔ ohe.

¹⁷ Efɔɔ kaa akɛ mɛi ni edara ni amɛkwɛɔ mɛi krokomɛi ni bɛ hewalɛ lɛ, kpaa babaoo gbɛ kɛjɛɔ amɛ diɛŋtsɛ amɛdɛŋ fe bɔ ni sa. Shi kaanu he akɛ oyeɔ fɔ yɛ nɔ ni onyɛɛɛ ofee lɛ hewɔ. Yɛ shihilɛi komɛi amli lɛ, ekolɛ ehe baahia ni okɛ osuɔlɔ ni he yeɔ nɛɛ aya he ni akwɛɔ mɛi ni egbɔlɔ lɛ yɛ lɛ, ni akwɛ lɛ yɛ jɛmɛ. Kɛ oji mɔ ko ni kwɛɔ mɛi ni tamɔ nakai lɛ, ha nɔ ni okpaa gbɛ yɛ bo diɛŋtsɛ ogbɛfaŋ lɛ afee nɔ ni nilee yɔɔ mli. Jeee ofɔlɔi ahiamɔ nii pɛ esa akɛ oha eŋmɛ pɛpɛɛpɛ, shi moŋ esa akɛ ohã obii lɛ, kɛ ohefatalɔ, kɛ bo diɛŋtsɛ onɔ hu aŋmɛ pɛpɛɛpɛ.

18, 19. Mɛɛ sɛɛfimɔ he shiwoo Yehowa kɛha, ni mɛɛ niiashikpamɔ tsɔɔ akɛ eyeɔ shiwoo nɛɛ mli anɔkwale?

¹⁸ Yehowa jɛɔ suɔmɔ mli etsɔɔ e-Wiemɔ, ni ji Biblia lɛ nɔ ekɛ gbɛtsɔɔmɔ ni baanyɛ aye abua mɔ ko ni miikwɛ efɔlɔi ni egbɔlɔ lɛ haa, shi jeee no pɛ ji yelikɛbuamɔ ni ekɛhaa. “Yehowa bɛŋkɛɔ mɛi fɛɛ ni tsɛɔ lɛ lɛ,” taakɛ lalatsɛ lɛ ŋma yɛ mumɔ naa lɛ. “Eboɔ amɛ bolɔmɔ toi, ni ehereɔ amɛyiwala.” Yehowa baahere emɛi anɔkwafoi lɛ ayiwala, loo ebaabaa amɛyi kɛtsɔ shihilɛi ni mli wa fe fɛɛ lɛ po mli.—Lala 145:18, 19.

¹⁹ Myrna, ni yɔɔ Philippines lɛ bale enɛ beni ekwɛɔ enyɛ, ni hela ni gbeɔ mɔ afã lɛ eko eha etsɔ mɔ ni nyɛɛɛ ehe nɔ ko efee lɛ. “Nɔ ko bɛ ni haoɔ mɔ waa fe ni oona ni osuɔlɔ ko miina amanehulu, ni enyɛɛɛ ekɛɛ bo ehé pɔtɛɛ ni waa ehe,” taakɛ Myrna ŋma lɛ. “Etamɔ nɔ ni miikwɛ lɛ ni eemii nu fiofio, ni minyɛɛɛ he nɔ ko kwraa mafee. Mikotoɔ shi shii abɔ ni mikɛɛɔ Yehowa bɔ ni etɔ mi eha. Mifoɔ tamɔ bɔ ni David, mɔ ni kpa Yehowa fai akɛ ekɛ ehiɛ yaafonui lɛ awo tɔ mli koni ekai lɛ lɛ fo lɛ. [Lala 56:9] Ni taakɛ Yehowa wo shi lɛ, eha mi hewalɛ ni he hiaa mi. ‘Yehowa batsɔ̃ tamɔ sɛɛfimɔ nɔ kɛha mi.’ ”—Lala 18:19.

20. Mɛɛ Biblia shiwoi yeɔ buaa mɛi ni kwɛɔ mɛi krokomɛi lɛ ni amɛkpa shihilɛ kpakpa gbɛ, kɛji mɔ ni amɛkwɛɔ lɛ lɛ po gbo?

²⁰ Afɔɔ wiemɔ akɛ fɔlɔi ni edara yɛ afii amli lɛ akwɛmɔ tamɔ “sane ko ni enaagbee bɛ miishɛɛ.” Mɔdɛŋbɔɔ ni fe fɛɛ ni akɛaakwɛ amɛ lɛ fɛɛ sɛɛ lɛ, ekolɛ mɛi ni edara yɛ afii amli nɛɛ baagboi, taakɛ Myrna nyɛ gbo lɛ. Shi mɛi ni hiɛ kã Yehowa nɔ lɛ le akɛ gbele jeee sane lɛ naagbee kwraa. Bɔfo Paulo wie akɛ: “Miyɛ Nyɔŋmɔ nɔ hiɛnɔkamɔ, akɛ gbohiiashitee baaba, ni jalɔi kɛ mɛi ni ejaaa fɛɛ baate shi.” (Bɔfoi lɛ Asaji 24:15) Mɛi ni elaaje amɛfɔlɔi ni edara yɛ afii amli yɛ gbele mli lɛ naa miishɛjemɔ kɛjɛɔ gbohiiashitee he hiɛnɔkamɔ kɛ jeŋ hee ni miishɛɛ yɔɔ mli ni Nyɔŋmɔ kɛbaaba, ni “gbele bɛ dɔŋŋ” lɛ he shiwoo lɛ mli.—Kpojiemɔ 21:4.

21. Mɛɛ nɔ kpakpa jɛɔ woo ni akɛhaa fɔlɔi ni edara lɛ mli kɛbaa?

²¹ Nyɔŋmɔ tsuji yɛ bulɛ ni mli kwɔ kɛha amɛfɔlɔi, eyɛ mli akɛ ekolɛ amɛfɔlɔi nɛɛ egbɔlɔ. (Abɛi 23:22-24) Amɛkɛ woo haa amɛ. Beni amɛfeɔ nakai lɛ, amɛnaa nɔ ni abɛbua ni jɛ mumɔŋ nɛɛ kɛɔ lɛ mli niiashikpamɔ, akɛ: “Hã otsɛ kɛ onyɛ mii ashɛ amɛhe, ni mɔ ni fɔo lɛ hu anya.” (Abɛi 23:25) Ni nɔ ni fe fɛɛ lɛ, mɛi ni kɛ woo haa amɛfɔlɔi ni edara yɛ afii amli lɛ saa Yehowa Nyɔŋmɔ hiɛ, ni amɛkɛ woo haa lɛ hu.