Yitso Nyɔŋmai Enyɔ Kɛ Ejwɛ
Yelikɛbuamɔ ko Jɛŋ Je Nɛɛ Ŋɔɔ
1, 2. (a) Mɛni hewɔ Yerusalem maŋ lɛ mli bii atsui efã lɛ? (b) Mɛɛ sanebimɔi sa jogbaŋŋ, yɛ Yerusalem jaramɔ shihilɛ nɛɛ hewɔ?
YERUSALEM maŋ lɛ mli bii lɛ atsui efã—ni esa akɛ amɛtsui afã! Ashur, ni ji maŋtsɛyeli ní he wa fe fɛɛ yɛ nakai beaŋ lɛ, ebatutua “Yuda maji ni atswa gbogboi awo he lɛ fɛɛ ni eŋɔ amɛ.” Agbɛnɛ, Ashur asraafoi akuu lɛ miiwo Yuda maŋtiase lɛ he gbeyei. (2 Maŋtsɛmɛi 18:13, 17) Mɛni Maŋtsɛ Hezekia kɛ Yerusalem maŋ lɛ mli bii ní eshwɛ lɛ baafee?
2 Akɛni eshikpɔŋ lɛ nɔ maŋtiasei krokomɛi lɛ egbee shi momo hewɔ lɛ, Hezekia le akɛ Yerusalem nyɛŋ adamɔ Ashur asraafoi ní he wa waa lɛ ahiɛ kwraa. Kɛfata he lɛ, ale Ashurbii lɛ waa ákɛ yiwalɔi kɛ nɔ fɔŋ feelɔi ní mɔ ko kɛ amɛ yeee egbɔ. Nakai maŋ lɛ asraafoi lɛ ahe yɛ gbeyei aahu akɛ bei komɛi lɛ, mɛi ní amɛwuɔ amɛshiɔ lɛ joɔ foi ni amɛkɛ amɛ wuuu kwraa! Yerusalem shihilɛ ní yɔɔ gbeyei waa nɛɛ hewɔ lɛ, nɛgbɛ emaŋbii lɛ baatsɔ amɛhe kɛya kɛha yelikɛbuamɔ? Ani gbɛ ko yɛ ní amɛbaatsɔ nɔ amɛje Ashur asraafoi lɛ adɛŋ? Ni te fee tɛŋŋ ni Nyɔŋmɔ webii yaje shihilɛ nɛɛ mli? Kɛ́ wɔɔha sanebimɔi nɛɛ ahetoo lɛ, no lɛ esa akɛ wɔku wɔsɛɛ ní wɔyakwɛ bɔ ni Yehowa kɛ maŋ ní ekɛ amɛ efee kpaŋmɔ lɛ ye ha yɛ bei ní eho lɛ amli.
Hemɔkɛyeli Kwamɔ yɛ Israel
3, 4. (a) Mɛɛ be aja Israel maŋ lɛ mli afee lɛ maŋtsɛyelii enyɔ, ni yɛ mɛɛ gbɛ nɔ? (b) Mɛɛ shishijee gbonyo Yerobeam kɛha akutsei nyɔŋma kooyigbɛ maŋtsɛyeli lɛ?
3 Kɛjɛ be mli ní Israel shi Mizraim aahu kɛbashi David binuu Salomo gbele beaŋ—ni ji be sɛɛkɛlɛ ni fa fioo fe afii 500 lɛ—no mli lɛ Israel akutsei 12 lɛ efee ekome ákɛ maŋ kome. Yɛ Salomo gbele sɛɛ lɛ, Yerobeam nyiɛ akutsei nyɔŋma ní yɔɔ kooyigbɛ lɛ ahiɛ ni amɛtse atua amɛshi David we lɛ, ni maŋ lɛ mli ja enyɔ ni ebatsɔ maŋtsɛyelii enyɔ kɛjɛ nakai beaŋ kɛyaa. Enɛ ba yɛ afi 997 D.Ŋ.B.
4 Yerobeam ji Israel maŋtsɛyeli ni yɔɔ kooyigbɛ lɛ klɛŋklɛŋ maŋtsɛ, ni enyiɛ eshishibii lɛ ahiɛ kɛtee hemɔkɛyeli kwamɔ mli kɛtsɔ osɔfoyeli ní mla eŋmɛɛɛ gbɛ kɛ tsinabi jamɔ gbɛjianɔtoo ní ekɛye Aaron osɔfoyeli gbɛjianɔtoo lɛ kɛ Yehowa jamɔ ní mla ŋmɛɔ gbɛ lɛ najiaŋ lɛ nɔ. (1 Maŋtsɛmɛi 12:25-33) Enɛ ji nihii nii yɛ Yehowa hiɛ. (Yeremia 32:30, 35) Yɛ enɛ kɛ yiŋtoi krokomɛi ahewɔ lɛ, eŋmɛ gbɛ ni Ashur baye Israel nɔ kunim. (2 Maŋtsɛmɛi 15:29) Maŋtsɛ Hoshea ka akɛ ebaakumɔ Ashur apã lɛ kɛtsɔ kpaŋmɔ ní ekɛ Mizraim yafee lɛ nɔ, shi kpaŋmɔ lɛ yeee omanye.—2 Maŋtsɛmɛi 17:4.
Israel kɛ Ehiɛ Yafɔ̃ Amale Abobaahe Nɔ
5. Namɔ Israel kɛ ehiɛ fɔ̃ enɔ kɛha yelikɛbuamɔ?
5 Yehowa miitao ní Israelbii lɛ ahiɛ atserɛ amɛ.a No hewɔ lɛ etsu gbalɔ Yesaia kɛ kɔkɔbɔɔ ní nyiɛ sɛɛ lɛ akɛ: “Kpóo ha mɛi ní yaa Mizraim yataoɔ yelikɛbuamɔ, ní amɛkɛ amɛhe fɔ̃ɔ okpɔŋɔi anɔ, ní amɛŋɔɔ amɛhiɛ amɛfɔ̃ɔ shwiilii anɔ, ejaakɛ amɛyi fá, kɛ okpɔŋɔiatsɛmɛi hu anɔ, ejaakɛ amɛhe wa naakpa, shi amɛkwɛɛɛ Israel Mɔ krɔŋkrɔŋ lɛ, ni amɛtaooo Yehowa sɛɛgbɛ lɛ!” (Yesaia 31:1) Kwɛ bɔ ni eyɔɔ mɔbɔ! Israel kɛ ehiɛ eyafɔ̃ okpɔŋɔi kɛ ta shwiilii anɔ babaoo moŋ fe ní ekɛ ehiɛ aaafɔ̃ Yehowa, Nyɔŋmɔ hiɛkalɔ lɛ nɔ. Yɛ Israel heloonaa susumɔ naa lɛ, Mizraim okpɔŋɔi lɛ fá babaoo ni amɛhe wa hu. Lɛɛlɛŋ, Mizraim baafee hefatalɔ ní he yɔɔ sɛɛnamɔ ní ekɛaate shi ewo Ashur asraafoi lɛ! Shi kɛlɛ, etsɛŋ ni Israelbii lɛ baana akɛ heloonaa kpaŋmɔ ní amɛkɛ Mizraim efee lɛ yeee omanye.
6. Mɛni hewɔ Israel hiɛ ní ekɛfɔ̃ Mizraim nɔ lɛ tsɔɔ akɛ ebɛ Yehowa mli hemɔkɛyeli kwraa lɛ?
6 Israel kɛ Yuda maji enyɔ lɛ fɛɛ amli bii lɛ kɛ Yehowa yɛ henɔjɔɔmɔ wekukpaa mli kɛtsɔ Mla kpaŋmɔ lɛ nɔ. (2 Mose 24:3-8; 1 Kronika 16:15-17) Yɛ ehiɛ ní ekɛyafɔ̃ Mizraim nɔ kɛha yelikɛbuamɔ lɛ hewɔ lɛ, Israel miijie Yehowa mli hemɔkɛyeli ní ebɛ kɛ bulɛ ní ebɛ kɛha mlai ní feɔ nakai kpaŋmɔ krɔŋkrɔŋ lɛ fã lɛ kpo faŋŋ. Mɛni hewɔ? Ejaakɛ shiwoo ní Yehowa kɛha akɛ ebaabu ewebii lɛ ahe kɛji amɛtuu amɛhe kwraa amɛha ekome pɛ lɛ fata nakai kpaŋmɔ lɛ mli wiemɔi lɛ ahe. (3 Mose 26:3-8) Ni lɛɛlɛŋ hu, taakɛ ewo shi lɛ, Yehowa etee nɔ ejie ehe kpo shii abɔ ákɛ “[mɔɔ] yɛ fimɔ be mli.” (Lala 37:39; 2 Kronika 14:2, 9-12; 17:3-5, 10) Kɛfata he lɛ, Yehowa tsɔ Mose, ni ji Mla kpaŋmɔ lɛ teŋdamɔlɔ lɛ nɔ ekɛɛ Israel maŋtsɛmɛi ní baaye nɔ wɔsɛɛ lɛ ní amɛkabua okpɔŋɔi babaoo naa amɛha amɛhe. (5 Mose 17:16) Toiboo ní amɛaafee amɛha mla nɛɛ baatsɔɔ akɛ maŋtsɛmɛi nɛɛ kɛ amɛhiɛ fɔ̃ɔ “Israel Mɔ krɔŋkrɔŋ lɛ” nɔ kɛha hebuu. Dɔlɛ sane ji akɛ, Israel nɔyelɔi lɛ bɛ nakai hemɔkɛyeli lɛ eko.
7. Mɛni Kristofoi ní yɔɔ ŋmɛnɛ lɛ baanyɛ akase kɛjɛ hemɔkɛyeli ní Israel bɛ lɛ mli?
7 Nikasemɔ yɛ enɛ mli kɛha Kristofoi ŋmɛnɛ. Israel kɛ ehiɛ fɔ̃ Mizraim sɛɛfimɔ ní anaa kɛ hiŋmɛi lɛ nɔ moŋ fe sɛɛfimɔ ní yɔɔ hewalɛ waa ní Yehowa kɛhaa lɛ nɔ. Nakai nɔŋŋ hu ŋmɛnɛ, ekolɛ abaaka Kristofoi ní amɛkɛ amɛhiɛ afɔ̃ heloonaa shweshweeshwe shihilɛ jɛɛhei—shika ní akɛto shikatoohei, shihilɛ mli gbɛhe ní ayɔɔ, kɛ hegbɛi ní ayɔɔ yɛ je lɛŋ—lɛ anɔ moŋ fe Yehowa nɔ. Wɔkpɛlɛɔ nɔ akɛ, Kristofoi aweku yitsei kɛ hiɛdɔɔ susuɔ gbɛnaa nii ní kã amɛnɔ akɛ amɛha amɛwekui lɛ amɛheloonaa hiamɔ nii lɛ he. (1 Timoteo 5:8) Shi amɛkɛ amɛhiɛ efɔ̃ɔɔ heloonaa nii anɔ. Ni amɛkwɛɔ amɛhe nɔ jogbaŋŋ yɛ “hiɛjoomɔ hewɔ.” (Luka 12:13-21) Yehowa Nyɔŋmɔ pɛ ji “abobaahe yɛ fimɔ bei amli.”—Lala 9:10; 54:9.
8, 9. (a) Eyɛ mli akɛ ekolɛ etamɔ nɔ ni nilee yɛ ŋaa ní Israel tsɔ lɛ mli moŋ, shi mɛni baajɛ mli aba, ni mɛni hewɔ? (b) Mɛɛ srɔtofeemɔ yɔɔ adesai ashiwoi kɛ Yehowa shiwoi ateŋ?
8 Yɛ naagbee lɛ, Yesaia ye Israel hiɛnyiɛlɔi ní wo ŋaa akɛ amɛkɛ Mizraim ayafee kpaŋmɔ lɛ ahe fɛo, ni ekɛɛ: “Lɛ hu, nilelɔ ji lɛ, ekɛ efɔŋ aaaba, etsɛ́ŋ ewiemɔi lɛ ayisɛɛ; shi eeete shi ewo efɔŋfeelɔi awe lɛ kɛ mɛi ní tsuɔ nishaianii lɛ ayelikɛbuamɔ lɛ.” (Yesaia 31:2) Ekolɛ Israel hiɛnyiɛlɔi lɛ susuɔ akɛ nilelɔi ji amɛ. Shi ani jeee jeŋ muu fɛɛ Bɔlɔ lɛ ji nilelɔ ní nɔ kwɔ fe fɛɛ? Kɛ́ akwɛ lɛ yɛ hiɛaŋhiɛaŋ lɛ, nilee yɛ ŋaa ní Israel tsɔ akɛ ebaatao yelikɛbuamɔ kɛjɛ Mizraim lɛ mli waa. Shi kɛlɛ, nɛkɛ maŋkwramɔŋ kpaŋmɔ ni eyafee nɛɛ bafeɔ mumɔŋ gbalafitemɔ yɛ Yehowa hiɛ. (Ezekiel 23:1-10) No hewɔ lɛ, Yesaia wie akɛ Yehowa ‘kɛ efɔŋ baaba.’
9 Ale jogbaŋŋ akɛ anyɛɛɛ akɛ hiɛ afɔ̃ adesai ashiwoi anɔ, ni adesai ahebuu hu bɛ shweshweeshwe. Shi yɛ gbɛ kroko nɔ lɛ, ehe ehiaaa ní Yehowa ‘atsɛ́ ewiemɔi ayisɛɛ.’ Ebaafee bɔ ni ewo shi lɛ pɛpɛɛpɛ. Ewiemɔi ekuuu sɛɛ kɛyaaa eŋɔɔ efolo.—Yesaia 55:10, 11; 14:24.
10. Mɛni baaba Mizraim kɛ Israel fɛɛ nɔ?
10 Ani Mizraimbii lɛ baafee hebuu nɔ̃ ní anyɛɔ akɛ he fɔ̃ɔ nɔ kɛha Israel? Dabi. Yesaia kɛɛ Israel akɛ: “Shi Mizraimbii lɛ, gbɔmɛi ni, ni amɛjeee Mawu, ni amɛkpɔŋɔi lɛ hu, loo ni, ni jeee mumɔ ni! ni kɛ́ Yehowa kpã enine mli lɛ, mɔ ni buaa mɔ lɛ aaatɛ́, ni mɔ ni ebuaa lɛ hu aaagbee shi, ni amɛyi enyɔ lɛ fɛɛ amɛhiɛ aaakpata shikome.” (Yesaia 31:3) Yelikɛbualɔ lɛ (Mizraim) kɛ mɔ ní eyeɔ ebuaa lɛ lɛ (Israel) fɛɛ baatɛrɛ, ni amɛbaagbee shi, ni amɛbaaba amɛnaagbee beni Yehowa kpãa enine mli koni etsu ekojomɔ he nii kɛtsɔ Ashur nɔ lɛ.
Samaria Shigbeemɔ
11. Mɛɛ esha he okadi Israel fee efɔ̃ shi, ni mɛni jɛ mli ba yɛ naagbee?
11 Yehowa jɛ emɔbɔnalɛ lɛ mli etsu gbalɔi shii abɔ koni amɛwo Israel hewalɛ koni eshwa ehe ní eku sɛɛ kɛba jamɔ krɔŋŋ mli ekoŋŋ. (2 Maŋtsɛmɛi 17:13) Yɛ enɛ fɛɛ sɛɛ lɛ, Israel kɛ efɔji krokomɛi fata esha ni ji tsinabi jamɔ lɛ he kɛtsɔ klamɔ kɛ Baal jamɔ ni ji efɔŋ ní ekɛ ehe wo mli, kɛ wɔŋ kooi kɛ hei grɔŋŋi ní ekɛtsu nii lɛ nɔ. Israelbii lɛ ha “amɛbihii kɛ amɛbiyei tsɔ̃ la mli” po, ni amɛkɛ yibii ní amɛ diɛŋtsɛ amɛheloo wo lɛ shã afɔle amɛha daimonio nyɔŋmɔi. (2 Maŋtsɛmɛi 17:14-17; Lala 106:36-39; Amos 2:8) Bɔni afee ní ekɛ Israel efɔŋfeemɔ lɛ aba naagbee lɛ, Yehowa wo akpɔ akɛ: “Samaria kɛ emaŋtsɛ lɛ elaaje tamɔ nu hiɛ afũi.” (Hoshea 10:1, 7) Yɛ afi 742 D.Ŋ.B. lɛ, Ashur asraafoi batutua Samaria, ni ji Israel maŋtiase lɛ. Yɛ afii etɛ káwoo sɛɛ lɛ, Samaria gbee shi, ni yɛ afi 740 D.Ŋ.B. lɛ, akpata akutsei nyɔŋma maŋtsɛyeli lɛ hiɛ kwraa.
12. Mɛɛ nitsumɔ ko Yehowa kɛha ní atsu ŋmɛnɛ, ni mɛni baaba mɛi ní booo kɔkɔbɔɔ lɛ toi lɛ anɔ?
12 Yehowa kɛ jeŋ muu fɛɛ shiɛmɔ nitsumɔ ko eha yɛ wɔgbii nɛɛ amli koni akɛbɔ kɔkɔ akɛ “eewo gbɔmɛi fɛɛ ní yɔɔ he fɛɛ he lɛ kita akɛ amɛtsake amɛtsui.” (Bɔfoi lɛ Asaji 17:30; Mateo 24:14) Mɛi ní kpooɔ yiwalaheremɔ gbɛ ní Nyɔŋmɔ kɛha lɛ baatsɔmɔ tamɔ “afũi,” ni abaakpata amɛhiɛ tamɔ bɔ ni afee Israel hemɔkɛyeli kwalɔi amaŋ lɛ. Nɔ ni tamɔɔɔ nakai lɛ, mɛi ní kɛ amɛhiɛ fɔ̃ɔ Yehowa nɔ lɛ, “shikpɔŋ lɛ aaatsɔ amɛnɔ̃ ni amɛaahi nɔ daa.” (Lala 37:29) Belɛ, kwɛ bɔ ni nilee yɔɔ mli akɛ wɔɔkwa tɔmɔi ní blema Israel maŋtsɛyeli lɛ tɔ̃ lɛ! Nyɛhaa wɔkɛ wɔhe afɔ̃a Yehowa nɔ kwraa kɛmɔa shi kɛha yiwalaheremɔ.
Yehowa Hewalɛ ní Ekɛhereɔ Mɔ Yiwala Lɛ
13, 14. Mɛɛ miishɛjemɔ wiemɔi Yehowa yɔɔ kɛha Zion?
13 Maŋ ni yɔɔ Israel wuoyigbɛ husui lɛ asɛɛ aaafee kilomitai fioo ko lɛ ji Yerusalem, Yuda maŋtiase lɛ. Yerusalem maŋ lɛ mli bii le nɔ ni eba Samaria nɔ lɛ jogbaŋŋ diɛŋtsɛ. Amrɔ nɛɛ amɛmiina akɛ nakai henyɛlɔ kome too ní he yɔɔ gbeyei waa, ní kpata amɛnaanyo ní yɔɔ kooyigbɛ lɛ hiɛ lɛ miiwo amɛ hu amɛhe gbeyei. Ani amɛbaakase nii kɛjɛ nɔ ni ba Samaria nɔ lɛ mli?
14 Yesaia wiemɔi ní nyiɛ sɛɛ lɛ shɛje Yerusalem maŋ lɛ mli bii amii. Ema nɔ mi eha amɛ akɛ Yehowa miisumɔ ewebii ní ekɛfee kpaŋmɔ lɛ lolo, ni ekɛɛ: “Bɔ ni Yehowa kɛɛ mi nɛ: Bɔ ni jata hũuɔ, loo jata bi hũuɔ yɛ emilɛ̃loo he, ni kɛ́ atsɛ́ kooloi kwɛlɔi asafoi awo ehe, ní esheee amɛgbee gbeyei ni ebuuu amɛbolɔmɔ lɛ: nakai Yehowa Zebaot aaakpeleke shi abawu yɛ Zion gɔŋ lɛ kɛ egɔŋkpɔ lɛ nɔ.” (Yesaia 31:4) Yehowa kɛ awuŋayeli baabu emaŋ krɔŋkrɔŋ lɛ, ni ji Zion he, tamɔ jata bi ní damɔ emilɛ̃loo he eebu he. Ashur asraafoi lɛ ashwãa, loo amɛ hegbeyeiwoo wiemɔi, loo basabasafeemɔ ko bɛ ní baaha Yehowa aŋmɛɛ eyiŋtoo lɛ he.
15. Yehowa kɛ Yerusalem maŋ lɛ mli bii ye yɛ mɔbɔnalɛ kɛ musuŋtsɔlɛ mli yɛ mɛɛ gbɛ nɔ?
15 Agbɛnɛ kadimɔ bɔ ni Yehowa kɛ Yerusalem maŋ lɛ mli bii baaye yɛ mɔbɔnalɛ kɛ musuŋtsɔlɛ mli lɛ: “Bɔ ni loofɔji kɛ amɛfiji feɔ lɛ, nakai Yehowa Zebaot aaabu Yerusalem he: eeebu amɛhe, eeejie amɛ, eeebaa amɛyi, ni eeeha amɛje mli.” (Yesaia 31:5) Loofɔlɔ nyɛ kwɛɔ jogbaŋŋ ni ebuɔ ebii ahe be fɛɛ be. Egbɛɔ efiji amli ni efilikiɔ kɛnyiɛɔ ebii lɛ ayiteŋ yɛ amɛtsũ lɛ mli, ni ekɛ hiŋmɛii ní miikwɛ nii jogbaŋŋ kwɛɔ akɛ eeena oshara ko he okadi ko lo. Kɛ́ kooloo ní mɔmɔɔ ebii lɛ eko miiba ebii lɛ ahe lɛ, efilikiɔ kɛbaa shi oya ni ebafãa ebii lɛ ahe. Nakai pɛpɛɛpɛ Yehowa hu kɛ suɔmɔ baakwɛ Yerusalem maŋ lɛ mli bii lɛ yɛ Ashurbii ní tutuaa amɛ lɛ hewɔ lɛ anɔ jogbaŋŋ.
“Nyɛkua Nyɛsɛɛ Nyɛbaa”
16. (a) Mɛɛ faikpamɔ ní jɛ suɔmɔ mli Yehowa kɛha ewebii lɛ? (b) Mɛɛ be Yuda maŋ lɛ mli bii lɛ atuatsemɔ lɛ je kpo faŋŋ titri? Tsɔɔmɔ mli.
16 Agbɛnɛ Yehowa kai ewebii lɛ akɛ amɛfee esha, ni ewo amɛ hewalɛ ní amɛtsake amɛgbɛ̀i fɔji ní amɛkɔ lɛ, akɛ: “Nyɛkua nyɛsɛɛ nyɛbaa mɔ ni nyɛje ehe kɛtee sɛɛ kwraa lɛ ŋɔɔ, nyɛ Israelbii!” (Yesaia 31:6) Jeee Israel akutsei nyɔŋma maŋtsɛyeli lɛ pɛ efee ehe atuatselɔ. Yuda bii, ní amɛ hu “Israelbii” ji amɛ lɛ, ‘kɛ amɛhe ewo atuatsemɔ mli vii.’ Enɛ he odaseyeli je kpo faŋŋ, titri lɛ beni Yesaia gbe egbalɛ shɛɛ sane lɛ naa lɛ sɛɛ nɔŋŋ, ní Hezekia binuu Manase batsɔ maŋtsɛ lɛ. Taakɛ Biblia lɛ mli sane ní aŋma afɔ̃ shi lɛ tsɔɔ lɛ, “Manase laka Yuda kɛ Yerusalembii lɛ, ni amɛfee efɔŋ fe jeŋmaji ni Yehowa kpata amɛhiɛ yɛ Israelbii lɛ ahiɛ lɛ tete.” (2 Kronika 33:9) Susumɔ he okwɛ! Yehowa kpata wɔŋjalɔi amaji lɛ ahiɛ ejaakɛ amɛhe yɛ nyaŋemɔ yɛ amɛ muji nifeemɔi lɛ amli, ni kɛlɛ Yuda maŋ lɛ mli bii, ní kɛ Yehowa yɔɔ kpaŋmɔ wekukpaa mli lɛ, miifee nibii fɔji fe nakai jeŋmaji lɛ amli bii lɛ tete.
17. Shihilɛ ní yɔɔ ŋmɛnɛ lɛ tamɔ shihilɛ ní hi shi yɛ Yuda yɛ Manase nɔyeli shishi lɛ yɛ mɛɛ gbɛ nɔ?
17 Afii ohai 21 lɛ shishijee mli nɛɛ, je lɛŋ shihilɛi tamɔ shihilɛi ní hi shi yɛ Yuda yɛ Manase gbii lɛ amli lɛ pɛpɛɛpɛ yɛ gbɛ̀i babaoo nɔ. Jamɔ, hewolonɔ su, kɛ wekui amli nyɛ̃ɛ egbála je lɛŋ bii ateŋ ni amɛtsɔmɔ kui ní teɔ shi woɔ amɛhe. Gbɔmɔgbee nifeemɔi ní yɔɔ gbeyei diɛŋtsɛ, niseniianiifeemɔ, kabonaatoo, kɛ nɔ ni atsɛɔ lɛ wekui ashishibulemɔ lɛ ekpata gbɔmɛi akpekpei abɔ hiɛ. Ŋwanejee ko bɛ he akɛ, gbɔmɛi kɛ jeŋmaji—titri lɛ Kristendom maji lɛ—‘etee shɔŋŋ kwraa’ yɛ amɛ atuatsemɔ lɛ mli. Shi kɛlɛ, wɔbaanyɛ wɔná nɔmimaa akɛ Yehowa eŋmɛŋ gbɛ ní efɔŋfeemɔ aya nɔ daa ní efeee he nɔ ko. Mɛni hewɔ? Yɛ nɔ ni ba yɛ Yesaia gbii lɛ amli lɛ hewɔ.
Aha Yerusalem Ye Ehe
18. Mɛɛ kɔkɔbɔɔ Rabshake kɛha Hezekia?
18 Ashur maŋtsɛmɛi kɛ kunim ní amɛyeɔ yɛ ta mli lɛ he yijiemɔ haa amɛnyɔŋmɔi lɛ. Ancient Near Eastern Texts wolo lɛ eŋmala Ashurbanipal, ni ji Ashur maŋtsɛmɛi lɛ ekome niŋmaai komɛi, ni ewie yɛ mli akɛ mɛi ní kudɔ lɛ ji “Ashur, Bel, Nebo, nyɔŋmɔi kpeteŋkpelei lɛ, [e]nuntsɔmɛi lɛ, ní nyiɛɔ [e]masɛi (be fɛɛ be), [beni lɛ] eye tawuu asraafoi (ní yɔɔ niiashikpamɔ) lɛ anɔ kunim . . . yɛ ta wulu ko ní awu kpetekplee lɛ mli lɛ.” Yɛ Yesaia gbii lɛ amli lɛ, Rabshake, ni ji Ashur Maŋtsɛ Sanherib najiaŋdamɔlɔ lɛ, jie hemɔkɛyeli ní tamɔ nɛkɛ ní eyɔɔ akɛ nyɔŋmɔi lɛ kɛ amɛhe woɔ adesai atai amli lɛ kpo beni ekɛ Maŋtsɛ Hezekia wieɔ lɛ. Ebɔ Yudafoi amaŋtsɛ lɛ kɔkɔ akɛ ekɛ ehe akafɔ̃ Yehowa nɔ kɛha yiwalaheremɔ, ni etsɔɔ mli faŋŋ akɛ jeŋmaji krokomɛi lɛ anyɔŋmɔi lɛ nyɛɛɛ nɔ ko amɛfee ní amɛkɛbu amɛmaŋbii lɛ ahe yɛ Ashur asraafoi ata ní he wa waa lɛ hiɛ.—2 Maŋtsɛmɛi 18:33-35.
19. Te Hezekia fee enii yɛ Rabshake ahorabɔɔ lɛ he eha tɛŋŋ?
19 Te Maŋtsɛ Hezekia fee enii eha tɛŋŋ? Biblia lɛ mli sane lɛ kɛɔ akɛ: “Beni maŋtsɛ Hezekia nu lɛ, egbála etadei ni ekɔ́ kpekpe ebu, ni eyiŋ kɛtee Yehowa we lɛ.” (2 Maŋtsɛmɛi 19:1) Hezekia yɔse akɛ Mɔ kome pɛ yɔɔ ní baanyɛ aye abua lɛ yɛ shihilɛ ní yɔɔ gbeyei waa nɛɛ mli. Eba ehe shi ni ekɛ ehiɛ fɔ̃ Yehowa nɔ kɛha gbɛtsɔɔmɔ.
20. Te Yehowa baafee enii yɛ Yuda maŋ lɛ mli bii lɛ ahe eha tɛŋŋ, ni mɛni esa akɛ amɛkase kɛjɛ enɛ mli?
20 Yehowa kɛ gbɛtsɔɔmɔ ní etaoɔ lɛ ha lɛ. Etsɔ gbalɔ Yesaia nɔ ewie akɛ: “Nakai gbi lɛ nɔ lɛ nyɛteŋ mɔ fɛɛ mɔ aaashɛrɛ ejwiɛtɛi wɔji kɛ eshika wɔji, ní nyɛkɛ nyɛ diɛŋtsɛ nyɛniji fee nyɛkɛfee esha lɛ, eshwie.” (Yesaia 31:7) Kɛ́ Yehowa miiwu kɛmiiha ewebii lɛ, abaakpá bɔ ni Sanherib nyɔŋmɔi lɛ ji diɛŋtsɛ lɛ ahe mama—amɛhe bɛ sɛɛnamɔ ko kwraa. Enɛ ji nikasemɔ ko ní esa akɛ Yuda maŋ lɛ mli bii lɛ kɛto amɛtsui mli diɛŋtsɛ. Yɛ Maŋtsɛ Hezekia anɔkwayeli lɛ fɛɛ sɛɛ lɛ, Yuda shikpɔŋ lɛ nɔ eyi obɔ̃ kɛ amagai, taakɛ Israel hu ji lɛ. (Yesaia 2:5-8) Yɛ Yuda maŋ lɛ mli bii lɛ agbɛfaŋ lɛ, amɛkɛ Yehowa teŋ wekukpaa lɛ saamɔ baabi ní amɛshwa amɛhe kɛjɛ amɛhe eshai lɛ amli ní amɛshɛrɛ ‘amɛwɔji’ ní he bɛ sɛɛnamɔ lɛ fɛɛ amɛshwie.—Kwɛmɔ 2 Mose 34:14.
21. Te Yesaia tsɔɔ Yehowa nifeemɔi ní ekɛbaakpata Ashur hiɛ lɛ mli yɛ gbalɛ wiemɔ mli eha tɛŋŋ?
21 Agbɛnɛ, Yesaia kɛ gbalɛ wiemɔ tsɔɔ bɔ ni Yehowa nifeemɔi ní ekɛbaakpata Yuda henyɛlɔ ní he yɔɔ gbeyei lɛ hiɛ lɛ baaji aha lɛ mli akɛ: “Ashur aaanyɔ yɛ klante ní jeee gbɔmɔ nɔ̃ naa, ni klante ní jeee gbɔmɔ nɔ̃ aaakpata ehiɛ; ni eeejo klante naa foi, ni eblahii lɛ hu, aaatsũ amɛ onia.” (Yesaia 31:8) Kɛ́ tawuu gbi lɛ shɛ lɛ, ehe ehiaŋ ní Yerusalem maŋ lɛ mli bii agbala amɛklantei kɛjɛ amɛheboi lɛ amli. Abaakpata Ashur asraafoi lɛ ateŋ mɛi ní he wa fe fɛɛ lɛ ahiɛ, jeee kɛtsɔ gbɔmɛi aklantei anɔ, shi moŋ kɛtsɔ Yehowa klante nɔ. Ni Ashur Maŋtsɛ Sanherib lɛ, “eeejo klante naa foi.” Beni Yehowa bɔfo kpata etabilɔi lɛ ateŋ mɛi 185,000 hiɛ sɛɛ lɛ, eku esɛɛ kɛtee emaŋ. Sɛɛ mli lɛ, lɛ diɛŋtsɛ ebihii yagbe lɛ beni ekula enyɔŋmɔ Nisrok hiɛ ní ejáa lɛ lɛ.—2 Maŋtsɛmɛi 19:35-37.
22. Mɛni Kristofoi ní yɔɔ ŋmɛnɛ lɛ baanyɛ akase kɛjɛ nibii ní ba ní kɔɔ Hezekia kɛ Ashur asraafoi lɛ ahe lɛ mli?
22 Mɔ ko mɔ ko, ní Hezekia hu fata he lɛ, nyɛɛɛ atsɔ hiɛ ale bɔ ni Yehowa baafee ejie Yerusalem kɛjɛ Ashur asraafoi lɛ adɛŋ. Shi kɛlɛ, bɔ ni Hezekia tsu haomɔ lɛ he nii eha lɛ feɔ nɔkwɛmɔnɔ ní nɔ bɛ kɛha mɛi ní kɛ kaai kpeɔ ŋmɛnɛ lɛ. (2 Korintobii 4:16-18) Bɔ ni ale Ashurbii ní woɔ Yerusalem he gbeyei lɛ waa akɛ mɛi ní he yɔɔ gbeyei lɛ hewɔ lɛ, shishinumɔ yɛ he akɛ Hezekia she gbeyei. (2 Maŋtsɛmɛi 19:3) Shi kɛlɛ, ená Yehowa mli hemɔkɛyeli, ni etao E-gbɛtsɔɔmɔ, jeee gbɔmɔ nɔ̃. Kwɛ jɔɔmɔ ní eji kɛha Yerusalem akɛ efee nakai! Kristofoi ní sheɔ Nyɔŋmɔ gbeyei ŋmɛnɛ lɛ hu baanyɛ aná henumɔi ní mli wa waa kɛji amɛyaje nɔnyɛɛ shishi. Yɛ shihilɛi pii amli lɛ, shishinumɔ yɛ he akɛ amɛsheɔ gbeyei. Ni kɛlɛ, kɛ́ ‘wɔŋɔ wɔhaomɔi fɛɛ wɔfɔ̃ Yehowa nɔ’ lɛ, ebaakwɛ wɔnɔ. (1 Petro 5:7) Ebaaye ebua wɔ ní wɔye wɔgbeyeishemɔ lɛ nɔ, ni ebaawo wɔ hewalɛ ní wɔnyɛ wɔdamɔ shihilɛ ní haoɔ wɔ lɛ naa.
23. Mɛɛ gbɛ nɔ ashi Sanherib kɛ gbeyeishemɔ henumɔ, shi jeee Hezekia?
23 Yɛ naagbee lɛ, Sanherib ji mɔ ni ná gbeyeishemɔ henumɔi, shi jeee Hezekia. Namɔ ŋɔɔ ebaanyɛ eya? Yesaia gba efɔ̃ shi akɛ: “Etɛsaa lɛ aaaho aya yɛ gbeyei naa, ni elumɛi lɛ ahe aaakpokpo yɛ aflaŋaa lɛ hewɔ. Nakai Yehowa, mɔ ni ela yɔɔ Zion ní eflɔnɔɔ yɔɔ Yerusalem lɛ, kɛɛ.” (Yesaia 31:9) Sanherib nyɔŋmɔi lɛ—“etɛsaa,” ni ji abobaahe ní ehiɛ kã nɔ lɛ—ha enine nyɛ shi. Kɛ́ wɔɔkɛɛ lɛ, ‘amɛho amɛtee yɛ gbeyei naa.’ Kɛfata he lɛ, Sanherib lumɛi lɛ po nyɛɛɛ aye abua lɛ. Amɛ hu gbeyei mɔmɔ amɛ waa.
24. Mɛɛ shɛɛ sane ní mli kã shi faŋŋ abaanyɛ akase kɛjɛ nɔ ni ba Ashur nɔ lɛ mli?
24 Yesaia gbalɛ lɛ fã nɛɛ kɛ shɛɛ sane ní mli kã shi faŋŋ haa mɔ fɛɛ mɔ ní baafee ehe Nyɔŋmɔ shitee-kɛ-wolɔ lɛ. Tawuu nii, loo hewalɛ, loo ŋaa ko bɛ ní baanyɛ afite Yehowa yiŋtoi. (Yesaia 41:11, 12) Yɛ nakai beaŋ nɔŋŋ lɛ, mɛi ní kɛɔ akɛ amɛsɔmɔɔ Nyɔŋmɔ, shi kɛlɛ amɛshĩɔ lɛ ní amɛyataoɔ shweshweeshwefeemɔ yɛ heloonaa nibii amli lɛ, kɛ nijiaŋwujee diɛŋtsɛ baakpe. Mɔ fɛɛ mɔ ní “[kwɛɛɛ] Israel Mɔ krɔŋkrɔŋ lɛ” baana akɛ Yehowa kɛ “efɔŋ aaaba.” (Yesaia 31:1, 2) Lɛɛlɛŋ, abobaahe diɛŋtsɛ ní hiɔ shi kɛyaa naanɔ ji Yehowa Nyɔŋmɔ.—Lala 37:5.
[Shishigbɛ niŋmaa]
a Eeenyɛ efee akɛ, Israel ji mɔ ni akɛ Yesaia yitso 31 lɛ klɛŋklɛŋ kukuji etɛ lɛ wie. Etamɔ nɔ ni naagbee kukuji ekpaa lɛ kɔɔ Yuda he.
[Mfoniri ni yɔɔ baafa 319]
Mɛi ní kɛ amɛhiɛ fɔ̃ɔ heloonaa nibii anɔ lɛ anine baanyɛ shi
[Mfoniri ni yɔɔ baafa 322]
Yehowa baabu emaŋ krɔŋkrɔŋ lɛ he, tamɔ bɔ ni jata buɔ emilɛ̃loo he lɛ
[Mfonirii ni yɔɔ baafa 324]
Jamɔ, hewolonɔ su, kɛ wekui amli nyɛ̃ɛ egbála je lɛŋ bii ateŋ ni amɛtsɔmɔ kui ní teɔ shi woɔ amɛhe
[Mfoniri ni yɔɔ baafa 326]
Hezekia tee Yehowa we lɛ kɛha yelikɛbuamɔ